Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) SEPTEMBER 2014

Batswadi—Dišang Bana ba Lena

Batswadi—Dišang Bana ba Lena

“O tsebe mohlape wa gago.” —DIE. 27:23.

1, 2. (a) Boikarabelo bja modiši wa Isiraeleng ya bogologolo bo be bo akaretša’ng? (b) Batswadi ba swana bjang le badiši?

BADIŠI ba Isiraeleng ya bogologolo ba be ba phela bophelo bjo thata. Ga se feela gore ba be ba swanetše go kgotlelela phišo le go tonya, eupša gape ba be ba swanetše go šireletša mehlape ya bona go dibata le mahodu. Badiši bao ba be ba hlokomela dinku tša bona ka mehla le go alafa tše di babjago goba tše di gobetšego. Ba be ba nea dikwana tlhokomelo e kgethegilego ka gobane di fokola gabonolo e bile ga di na matla a go swana le a dinku tše di godilego.—Gen. 33:13.

2 Batswadi ba Bakriste ba swana le badiši ka ditsela tše itšego, ba bonagatša dika tšeo badiši ba kgonthe ba swanetšego go ba le tšona. Ba na le boikarabelo bja go godiša bana ba bona “ka tayo le temošo ya Jehofa.” (Baef. 6:4) Na mošomo woo o bonolo? Aowa! Bana ba lehono ba lebeletšane le tutuetšo e kgopo ya Sathane gotee le go se phethagale ga bona. (2 Tim. 2:22; 1 Joh. 2:16) Ge e ba o na le bana, o ka ba thuša bjang? Anke re ahlaahleng dilo tše tše tharo tšeo o ka di dirago go diša bana ba gago—ba tsebe, ba fepe gomme o ba hlahle.

 TSEBA BANA BA GAGO

3. Ke’ng seo se bolelwago ke gore batswadi ba “tsebe” bana ba bona?

3 Modiši yo botse o hlahloba nku e nngwe le e nngwe ka kelohloko go kgonthišetša gore e phetše gabotse. O ka dira se se swanago ka bana ba gago. Beibele e re: “[Tseba] mohlape wa gago.” (Die. 27:23) Gore o atlege tabeng ye, o swanetše go hlahloba ditiro tša bana ba gago, seo ba se naganago le maikwelo a bona. O ka dira seo bjang? Tsela e nngwe e kaonekaone ke ka go boledišana le bana ba gago ka mehla.

4, 5. (a) Ke mekgwa efe e mengwe yeo e ka thušago bana go ntšhetša batswadi ba bona sa mafahleng? (Bona seswantšho seo se lego mathomong a sehlogo.) (b) Wena o dirile’ng gore bana ba gago ba boledišane le wena ka bolokologi?

4 Batswadi ba bangwe ba hweditše gore go thata kudu go boledišana le bana ba bona ge ba tsena mahlalagading—ba ka thoma go dikadika le go ikwa ba sa lokologe go botša batswadi seo ba se naganago le kamoo ba ikwago ka gona. Ge e ba go le bjalo ka bana ba gago, o ka dira’ng? Go e na le go gapeletša morwa goba morwedi wa gago gore le boledišane nako e telele le dutše fase, leka go diriša dibaka tša ge le iketlile. (Doit. 6:6, 7) O ka ba wa swanelwa ke go dira dilo tše itšego le yena. Le ka ikotlolla maoto goba la sepela gotee ka koloi, la bapala papadi e itšego goba la dira mešongwana e itšego ya ka gae le le gotee. Maemo a bjalo a ge le iketlile a ka thuša bana ba lena bao ba lego mahlalagading go ikwa ba lokologa go le ntšhetša sa mafahleng.

5 Go thwe’ng ge e ba ka morago ga go leka dilo tše ngwana wa gago a sa dikadika go boledišana le wena? O ka leka mokgwa o mongwe. Ka mohlala, go e na le go botšiša morwedi wa gago gore o hlwele bjang, o ka mmotša kamoo wena o hlwelego ka gona. Go ka direga gore a arabele ka go go botša gore yena o hlwele bjang. Goba ge e ba o nyaka go tseba seo ngwana wa gago a se naganago ka taba e itšego, o se ke wa botšiša gore yena o reng ka yona. O ka mmotšiša gore yo mongwe wa bagwera ba gagwe o ikwa bjang ka taba yeo. Ke moka o ka mmotšiša gore ke keletšo efe yeo a bego a ka e nea mogwera wa gagwe tabeng yeo.

6. Ke’ng seo se bolelwago ke go ba le nako ya bana ba gago le go batamelega?

6 Go ba gona, e le gore bana ba gago ba kgone go boledišana le wena ka bolokologi, ba swanetše go bona gore o na le nako ya bona le gore o a batamelega. Ge batswadi ka mehla ba bonagala ba swaregile, bana bao ba lego mahlalagading ba kgetha go itulela le mathata a bona. Go thwe’ng ka go batamelega? Go fo botša ngwana wa gago gore a ka bolela le wena ka nako e nngwe le e nngwe ge a nyaka ga se gwa lekana. Bana ba lena bao ba lego mahlalagading ba swanetše go bona gore le tla theetša mathata a bona goba la se ba galefele. Batswadi ba bantši ba bea mohlala o mobotse tabeng ye. Kayla wa nywaga e 19 o re: “Ke kgona go bolela le tate ka selo se sengwe le se sengwe. Ga a ntsene ganong, e bile ga a nkahlole; o fo ntheetša ka kelohloko. Ka go re’alo ka mehla o nnea keletšo e botse kudu.”

7. (a) Motswadi a ka ba le tekatekano bjang ge a boledišana le ngwana wa gagwe ka ditaba tša go swana le go beana mabaka? (b) Batswadi ba ka galefiša bana ba bona bjang ba sa lemoge?

7 Gaešita le ge o bolela le bana ba gago ka ditaba tše dikgolo—ka mohlala, go beana mabaka—hlokomela gore o se bolele kudu ka dikotsi tša seo moo o lebalago go ba ruta ka tsela ya maleba ya go beana mabaka. Ka mohlala: Akanya o le lebenkeleng la go jela gomme wa hwetša gore pukwana ya go otara dijo e go botša feela ka dikotsi tša dijo tše di nago le mpholo. Ga go pelaelo gore o tla tloga lebenkeleng leo wa yo nyaka le lengwe. Bana ba gago ba ka dira se se swanago ge e ba ka mehla ge ba nyaka keletšo o ba botša ka dikotsi feela. (Bala Bakolose 3:21.) Go e na le moo, leka go ba le tekatekano. Kgaetšedi yo mongwe wa mofsa yo a bitšwago Emily o re: “Ge batswadi ba ka ba bolela le nna ka go beana mabaka, ga ba bolele tše ekego go dira bjalo  go fošagetše. Ba gatelela kudu lethabo leo le tlišwago ke go tsebana le motho yo mongwe gabotse le go hwetša molekane wa lenyalo. Seo se nthušitše gore ke se tšhabe go boledišana le bona ka taba ye. Ge e le gabotse, ke nyaka gore ba tsebe motho le ge e le ofe yo ke beanago le yena mabaka go e na le go ba fihlela seo.”

8, 9. (a) Mehola ya go theetša bana ba gago ntle le go ba tsena ganong ke efe? (b) O holegile bjang ka go theetša bana ba gago ge ba bolela?

8 Ka go dumelelana le seo Kayla a se boletšego, le ka bontšha gore le a batamelega ka go theetša bana ba lena ka go se fele pelo. (Bala Jakobo 1:19.) Mma yo mongwe yo a se nago molekane yo a bitšwago Katia o dumela ka gore: “Mathomong, ke be ke felela morwedi wa ka pelo. Ke be ke dula ke mo tsena ganong ge a bolela. Lebaka ke gore ke ba ke lapile kudu go ka mo theetša goba ke sa nyake a ntshwenya. Ka ge ga bjale ke lahlile mokgwa woo, morwedi wa ka o kgona go boledišana le nna. Re bagwera ba bagolo.”

Ba theetšeng gore le kgone go ba tseba (Bona dirapa 3-9)

9 Tate yo a bitšwago Ronald o bile le phihlelo e swanago ka morwedi wa gagwe yo a lego mahlalagading. O re: “Ge a be a mpotša gore o ratana le mošemane yo a itšego sekolong, ke ile ka thoma ka go ferekana. Eupša ka morago ga go naganišiša kamoo Jehofa a sa felelego bahlanka ba gagwe pelo le go dirišana le bona ka tekatekano, ke ile ka nagana gore ke swanetše go nea morwedi wa ka sebaka sa go hlalosa maikwelo a gagwe pele nka leka go mo phošolla. Ke leboga gore ke ile ka dira sona seo! E be e le la mathomo ke kwešiša maikwelo a morwedi wa ka. Ge a feditše go bolela, ke ile ka hwetša go le bonolo go boledišana le yena ka tsela e lerato. Se se kgahlišago ke gore o ile a amogela keletšo ya ka. O ile a mpotša go tšwa pelong gore o tla tlogela seo a bego a se dira.” Go boledišana le bana ba gago ka mehla go dira gore o dule o bulegetšwe ke dikgoro ge o nyaka go bolela le bona ka seo ba se naganago le ka maikwelo a bona. Seo se tla dira gore o kgone go ba thuša go dira diphetho tše dibotse bophelong. *

FEPA BANA BA GAGO

10, 11. O ka thuša bana ba gago bjang gore ba se ke ba aroga?

10 Modiši yo botse o a tseba gore nku le ge e le efe e ka aroga mohlapeng. Mohlomongwe e gogelwa ke bjang bjo botala kua kgojana gomme ya feleletša e arogile mohlapeng. Ka mo go swanago, ngwana a ka  thoma go aroga moyeng, a goketšwa ke bagwera ba babe goba boithabišo bjo bo gobogilego. (Die. 13:20) O ka thibela bjang boemo bjo?

11 Ge o ruta bana ba gago, gata mogato le semeetseng ge o lemoga mafokodi a itšego. Katanela go matlafatša dika tša Bokriste tšeo ba nago le tšona. (2 Pet. 1:5-8) Borapedi bja lapa bja ka mehla ke nako e botse ya gore o dire seo. Ge Tirelo ya Rena ya Mmušo ya October 2008 e be e hlalosa tokišetšo ye e itše: “Dihlogo tša malapa di kgothaletšwa go rwala boikarabelo bjoo Jehofa a di neilego bjona go kgonthišetša gore lenaneo la thuto ya Beibele ya lapa leo le nago le morero le la ka mehla le a latelwa.” Na o diriša ka botlalo tokišetšo ye e lerato go diša bana ba gago? Kgodišega gore bana ba gago ba tšeela godimo kudu maiteko ao o a dirago go etiša pele go ba hlokomela moyeng.—Mat. 5:3; Bafil. 1:10.

Ba fepeng gabotse (Bona dirapa 10-12)

12. (a) Bafsa ba hotšwe bjang ke borapedi bja lapa bja ka mehla? (Akaretša le lepokisi le le rego, “ Ba bo Tšeela Godimo Kudu.”) (b) Wena o hotšwe bjang ke borapedi bja lapa?

12 Ela hloko seo mofsa yo a bitšwago Carissa a se boletšego mabapi le kamoo Borapedi bja Lapa bo hotšego lapa la gabo. O re: “Ke thabela gore ka moka ga rena re dula fase gotee gomme ra boledišana. Ka go dira bjalo, re ba ngatana e tee le go ba le dinako tše dibotse. Tate o swara Borapedi bja rena bja Lapa ka mehla. Go a thabiša go bona a bo tšeela godimo—gomme seo se dira gore le nna ke nyake go bo tšeela godimo. Le gona seo se dira gore ke be le mabaka a oketšegilego a go mo hlompha e le tate le hlogo ya lapa.” Kgaetšedi yo mongwe wa mofsa yo a bitšwago Brittney o itše: “Borapedi bja lapa bo mpatameditše kgauswi le batswadi ba ka. Bo nthuša go bona gore ba tshwenyegile ka mathata a ka le gore ba na le taba le nna. Borapedi bja lapa bo matlafatša lapa la gešo le go dira gore le be le botee.” Go molaleng gore go fepa bana ba gago moyeng—kudukudu ka borapedi bja lapa—ke tsela e kaonekaone ya gore o be modiši yo botse. *

HLAHLA BANA BA GAGO

13. Ngwana a ka thušwa bjang gore a hlankele Jehofa?

13 Modiši yo botse o diriša molamo wa gagwe go hlahla mohlape le go o šireletša. O mongwe wa merero ya gagwe e megolo ke go iša dinku tša gagwe “mafulong a mabotse.” (Hesek. 34:13, 14) Ka ge o le motswadi, na ye ga se pakane ya gago ya moya? O nyaka go hlahla bana ba gago gore ba hlankele Jehofa. O nyaka gore bana ba gago ba ikwe go swana le mopsalme yo a ngwadilego gore: “Wena Modimo wa ka, ke kgahlwa ke go dira thato ya gago, molao wa gago o ka garegare ga ka.” (Ps. 40:8) Bana bao ba bago le moya o bjalo ba tla ineela go Jehofa gomme ba kolobetšwa. Eupša ba swanetše go gata mogato woo ge ba godile ka mo go lekanego tlhaologanyong gore ba ka itirela phetho yeo e bile ba tloga ba nyaka go hlankela Jehofa.

14, 15. (a) Pakane ya batswadi ba Bakriste e swanetše go ba efe? (b) Ke ka baka la’ng mofsa yo a lego mahlalagading a ka belaela ditumelo tša rena?

14 Eupša go thwe’ng ge e ba bana ba gago ba bonagala ba sa gole moyeng—mohlomongwe ba bile ba belaela ditumelo tša bona? Katanela go nweletša ka dipelong tša bona go rata Jehofa Modimo le go tšeela godimo dilo ka moka tšeo a re diretšego tšona. (Kut. 4:11) Ke moka ge ba dirile bjalo, ba tla kgona go itirela phetho ya go hlankela Modimo.

15 Lega go le bjalo, go thwe’ng ge e ba mo nakong ye bana ba gago ba belaela ditumelo tša bona? O ka ba diša bjang gomme wa ba thuša go bona gore go hlankela Jehofa ke tsela e di phalago tšohle ya bophelo le gore go dira bjalo go tla ba tlišetša lethabo la ka mo go sa felego? Leka go hwetša lebaka la dipelaelo tša bona. Ka mohlala, na morwa wa  gago o tloga a sa dumelelane le dithuto tša Beibele, goba na o fo ba a hloka sebete sa go emela therešo go dithaka tša gagwe? Na morwedi wa gago o tloga a sa kwešiše bohlokwa bja go phela ka ditekanyetšo tša Modimo tša boitshwaro, goba na o fo ba a ikwa a lewa ke bodutu goba a sa amogelwe ke ba bangwe?

Ba hlahleng ditseleng tša bona (Bona dirapa 13-18)

16, 17. Batswadi ba ka thuša bana ba bona bjang go dira gore therešo e be ya bona?

16 Go sa šetšwe gore lebaka ke lefe, o ka thuša ngwana wa gago go fenya dipelaelo le ge e le dife tšeo a nago le tšona. Bjang? O mongwe wa mekgwa yeo batswadi ba bantši ba hweditšego o šoma ke wa go kgothaletša morwa goba morwedi wa bona go ntšha sa mafahleng ka go mmotšiša gore: “O ikwa bjang ka go ba Mokriste? Wena o nagana gore mehola ya seo ke efe? Go thatafa ge go etla kae? Na o nagana gore mehola ya go ba Mokriste ke e mentši go feta mathata, e lego mehola yeo re e thabelago gona bjale le ya nakong e tlago? Ke ka baka la’ng o re’alo?” Go ba gona, o swanetše go botšiša dipotšišo tšeo ka mantšu a gago ka tsela e botho le ya bogwera, e sego bjalo ka ge eka o lephodisa. Nakong ya poledišano, le ka ahlaahla Mareka 10:29, 30. Bafsa ba bangwe ba ka nyaka go ngwala dikgopolo tša bona ba diriša dikholomo tše pedi—go ya pele ba ka ngwala mathata a go ba Mokriste gomme go ya bobedi ba ngwala mehola ya seo. Ge le bona dilo tšeo ba di ngwadilego, le ka kgona go lemoga mathata ao ba nago le ona gomme la ba thuša go a rarolla. Ge e ba go le bohlokwa gore re ithute le batho bao ba thabelago puku ya Seo Beibele e se Rutago le ya Lerato la Modimo,’ gona go bohlokwa le go feta gore re ithute le bana ba rena! Na o dira bjalo?

17 Ge nako e dutše e eya, bana ba gago ba tlo swanelwa ke go itirela phetho ya yo ba ratago go mo hlankela. Na o nagana gore ba tla amogela ditumelo tša gago ka mohlolo? Ba swanetše go dira gore therešo e be ya bona. (Die. 3:1, 2) Ge e ba ngwana wa gago a bonagala a na le bothata tabeng ye, ke ka baka la’ng o sa boele morago gomme wa mo ruta dithuto tša motheo? Mo thuše go naganišiša ka dipotšišo tša go swana le gore: “Ke tseba bjang gore Modimo o gona? Ke’ng seo se nkgodišago gore Jehofa Modimo o tloga a na le taba le nna? Ke ka baka la’ng ke dumela gore ditekanyetšo tša Jehofa ke tša go nkhola?” Ipontšhe o le modiši yo botse ka go hlahla ngwana wa gago goba bana ba gago ka go se fele pelo gore ba kgone go hlatsela gore tsela ya Jehofa e di phala tšohle. *Baroma 12:2.

18. Batswadi ba ka ekiša bjang Modiši yo Mogolo e lego Jehofa?

18 Bakriste ka moka ba therešo ba nyaka go ekiša Modiši yo Mogolo. (Baef. 5:1; 1 Pet. 2:25) Batswadi ka mo go kgethegilego ba swanetše go tseba mohlape wa bona—e lego bana ba bona ba bohlokwa—le go dira sohle seo ba ka se kgonago go ba hlahla gore ba tle ba hwetše ditšhegofatšo tšeo Jehofa a ba holofeditšego tšona. Ka gona, dirang sohle seo le ka se kgonago go diša bana ba lena ka go tšwela pele le ba godišetša tseleng ya therešo!

^ ser. 9 Ge o nyaka ditšhišinyo tše di oketšegilego, bala Morokami wa August 1, 2008, matlakala 10-12.

^ ser. 12 Ge o nyaka go tseba mo go oketšegilego ka taba ye, bala sehlogo se se rego, “Borapedi bja Lapa—Bo Bohlokwa Bakeng sa go Phologa!” ka go Morokami wa October 15, 2009, matlakala 29-31.

^ ser. 17 Taba ye e ahlaahlilwe ka botlalo ka go Morokami wa February 1, 2012, matlakala 18-21.