Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2014

Diriša Lentšu la Modimo—Le a Phela!

Diriša Lentšu la Modimo—Le a Phela!

“Lentšu la Modimo le a phela e bile ke le matla.”—BAHEB. 4:12.

1, 2. Jehofa o ile a nea Moshe kabelo efe, gona o ile a mo kgonthišetša go re’ng?

O BE o tla ikwa bjang ge ba be ba ka re o ye o eme pele ga mmuši yo a phagamego kudu lefaseng gomme o emele batho ba Jehofa? Ga go pelaelo gore o be o tla tshwenyega kudu, wa ikwa o sa swanelege e bile o boifa. O be o tla beakanya ditaba tša gago bjang? O be o tla dira’ng gore mantšu a gago a be le matla ka ge o tla be o le moemedi wa Modimo Ramatlaohle?

2 Moshe o ile a ba boemong bjo bjalo. Jehofa o kile a botša monna yo “yo boletaleta go feta batho bohle bao ba bego ba phela lefaseng,” gore o mo roma go Farao gore a yo hlakodiša batho ba gagwe bokgobeng kua Egipita. (Num. 12:3) Go etša ge re tseba, Farao e be e le monna wa senganga le yo a sa hlomphego motho. (Ek. 5:1, 2) Lega go le bjalo, Jehofa o be a nyaka gore Moshe a yo laela Farao gore a lokolle makgoba a gagwe a dimilione tše mmalwa nageng yeo! Ga go makatše ge Moshe a ile a botšiša Jehofa gore: “Ke nna mang nka yago go Farao gomme ka ntšha bana ba Isiraele Egipita?” Moshe o swanetše go ba a ile a ikwa a sa swanelege goba a se na bokgoni. Eupša Modimo o ile a mo kgonthišetša gore o tla ba le yena. Jehofa o ile a re: “Ke tla ba le wena.”—Ek. 3:9-12.

3, 4. (a) Moshe o be a boifa’ng? (b) Ke boemong bofe moo o ka kwešišago tlhohlo yeo Moshe a bego a lebeletšane le yona?

3 Ke’ng seo Moshe a bego a se boifa? Go bonagala a be a boifa gore Farao o be a ka se amogele goba go theetša moemedi wa Jehofa  Modimo. Le gona Moshe o be a boifa gore batho ba gabo ba be ba ka se kgolwe gore Jehofa o mo kgethile gore a ba ntšhe Egipita. Ka go re’alo, Moshe o ile a re go Jehofa: “Eupša bjale a re re ga ba nkgolwe e bile ga ba theetše lentšu la ka, ka baka la gore ba tla re: ‘Jehofa ga se a iponagatša go wena.’”—Ek. 3:15-18; 4:1.

4 Karabo yeo Jehofa a ilego a e nea Moshe le ditiragalo tšeo di ilego tša latela di ka ruta yo mongwe le yo mongwe wa rena thuto ya bohlokwa. Ke therešo gore go ka fo se direge gore o eme pele ga mmuši yo a phagamego. Eupša na o kile wa hwetša o tšhošwa ke go bolela ka Modimo le Mmušo wa gagwe gaešita le go batho feela bao o kopanago le bona letšatši le letšatši? Ge e ba go le bjalo, ela hloko seo o ka ithutago sona phihlelong ya Moshe.

“KE ENG SE O SE SWEREGO KA SEATLENG SA GAGO?”

5. Jehofa o ile a nea Moshe eng, gona seo se ile sa mo thuša bjang gore a se sa boifa? (Bona seswantšho seo se lego mathomong a sehlogo.)

5 Ge Moshe a be a botša Modimo gore batho ba ka se mo theetše, o ile a mo hlama gore a tle a kgone go lebeletšana le seo se bego se tlo direga. Pego yeo e lego go Ekisodo e re: “Jehofa a re go [Moshe]: ‘Ke eng se o se swerego ka seatleng sa gago?’ Yena a re: ‘Ke lepara.’ Modimo a re: ‘Le lahlele fase.’ Ka gona a le lahlela fase gomme la fetoga noga; Moshe a e tšhaba. Bjale Jehofa a re go Moshe: ‘Otlolla seatla sa gago o e sware ka mosela.’ Ka gona a otlolla seatla a e swara ka mosela gomme ya fetoga lepara ka seatleng sa gagwe.” Ke moka Modimo a re: ‘O dire se e le gore ba dumele gore Jehofa o iponagaditše go wena.’ (Ek. 4:2-5) Ee, Modimo o ile a nea Moshe selo seo se bego se tla hlatsela gore molaetša wa gagwe o tšwa go Yena. Lepara la Moshe leo batho ba bangwe ba bego ba sa re selo ka lona le ile la fetoga sephedi ka matla a Modimo! Ruri mohlolo woo o be o tla dira gore mantšu a Moshe a be le matla, a kgodiša batho gore Jehofa o a mo thekga! Ka go re’alo, Jehofa o ile a mmotša gore: “O tla swara lepara leo ka seatla sa gago e le gore o dire dipontšho ka lona.” (Ek. 4:17) Ka ge bjale Moshe a be a swere lepara leo le bego le hlatsela gore Modimo o na le yena, o be a loketše go yo emela Modimo wa therešo ka sebete pele ga Farao le batho ba Modimo.—Ek. 4:29-31; 7:8-13.

6. (a) Ke’ng seo re swanetšego go se swara ge re dira boboledi, gona ka baka la’ng? (b) Hlalosa seo se bolelwago ke gore “lentšu la Modimo le a phela” le gore “ke le matla.”

6 Le rena ge re botša ba bangwe molaetša wa Beibele ba ka re botšiša potšišo e swanago le yeo Modimo a ilego a e botšiša Moshe, ya gore: “Ke eng se o se swerego ka seatleng sa gago?” Mabakeng a mantši, re tla ba re swere Beibele gomme re loketše go e diriša. Gaešita le ge batho ba bangwe ba ka lebelela Beibele e le puku e sa rego selo, Jehofa o bolela le rena ka yona. (2 Pet. 1:21) E re botša ka dikholofetšo tša Modimo tša mabapi le dilo tšeo di tlago go direga ge Mmušo wa gagwe o buša. Ke ka baka leo moapostola Paulo a ngwadilego gore: “Lentšu la Modimo le a phela e bile ke le matla.” (Bala Baheberu 4:12.) Dikholofetšo ka moka tše di lego ka Lentšung la Jehofa di a phethagala, ka gobane ka mehla o gata megato ya go di phethagatša. (Jes. 46:10; 55:11) Ge motho a lemogile se, seo a se balago ka Beibeleng se ka ba le tutuetšo e matla bophelong bja gagwe.

7. Re ka ‘swara bjang lentšu la therešo ka tshwanelo’?

7 Ee, Jehofa o re neile Lentšu la gagwe leo le ngwadilwego leo re ka le dirišago go hlatsela gore molaetša wa rena o ka botwa le gore o tšwa go yena. Ke ka baka leo Paulo ka morago ga gore a ngwalele Baheberu lengwalo, a ilego a kgothaletša morwa wa gagwe wa moya yo a bego a mo tlwaetša e lego Timotheo gore a ‘dire sohle se a ka se kgonago go swara lentšu la therešo ka tshwanelo.’ (2 Tim. 2:15) Rena re ka diriša bjang keletšo ye ya Paulo? Ka go balela batho bao ba tlago go re theetša mangwalo ao a opago kgomo lenaka ao a tlago go ba kgoma dipelo. Dipampišana tšeo di lokolotšwego ka 2013 di hlametšwe go re thuša go dira sona seo.

 BALA LENGWALO LEO LE OPAGO KGOMO LENAKA!

8. Molebeledi yo mongwe wa tirelo o itše’ng ka dipampišana tšeo di sa tšwago go lokollwa?

8 Dipampišana tše tšeo di sa tšwago go lokollwa di hlamilwe go swana. Ka gona ge re kgona go diriša e tee ya tšona, re tla kgona go di diriša ka moka. Na go bonolo go di diriša? Molebeledi yo mongwe wa tirelo kua Hawaii, U.S.A., o ngwadile gore: “Re makaditšwe ke kamoo dipampišana tše di atlegago ka gona modirong wa ntlo le ntlo le modirong wa seterateng.” Ngwanabo rena yo o hweditše gore tsela yeo dipampišana tše di ngwadilwego ka yona e nolofaletša motho go araba, gomme gantši se se lebiša dipoledišanong tše di kgahlišago. Ngwanabo rena yo o nagana gore potšišo ya sehlogo le dikarabo tšeo motho a swanetšego go kgetha e tee ya tšona, ke tšona di dirago gore go be le dipoledišano tše di kgahlišago. Ga go hlokagale gore mong wa ntlo a tshwenyege ka gore o tla nea karabo e fošagetšego.

9, 10. (a) Dipampišana tša rena di re kgothaletša bjang go diriša Beibele? (b) Ke dipampišana dife tšeo wena o kgonnego go di diriša, gona ka baka la’ng?

9 Pampišana e nngwe le e nngwe e re kgothaletša go balela motho lengwalo leo le opago kgomo lenaka. Ka mohlala, nagana ka pampišana e rego Na Tlaišego e tla ka ya Fela? Go sa šetšwe gore mong wa ntlo o araba potšišo ye ka “ee,” “aowa,” goba “mohlomongwe,” o se ke wa hlwa o bolela tše dintši. Phetla letlakaleng la ka gare gomme o re go yena: “Ekwa seo Beibele e se bolelago.” Ke moka o mmalele Kutollo 21:3, 4.

10 Ka mo go swanago, ge o diriša pampišana e rego O Lebelela Beibele Bjang? o se ke wa tshwenyega ka gore mong wa ntlo o kgetha karabo efe. Wena e fo phetla letlakaleng la ka gare gomme o re: “Beibele e re ‘Lengwalo ka moka le buduletšwe ke Modimo.’” O ka oketša ka gore: “Ge e le gabotse, lengwalo le le swere dintlha tše dingwe gape.” Ke moka bula Beibele ya gago gomme o bale lengwalo la 2 Timotheo 3:16, 17.

11, 12. (a) Ke’ng seo se go thabišago bodireding? (b) Dipampišana di ka go thuša bjang go itokišeletša go dira maeto a go boela?

11 Tsela yeo mong wa ntlo a arabelago ka yona ke yona e tla go thušago go bona gore o ka mmalela tsebišo e kaakaang pampišaneng yeo le go e ahlaahla. Boemong le ge e le bofe, ka ntle le gore o file batho dipampišana, o tla thabišwa ke gore o kgonne go ba balela Lentšu la Modimo—gaešita le ge o ka ba o badile temana e tee goba tše pedi leetong la mathomo. Leetong le le latelago, o ka tšwetša pele poledišano.

 12 Letlakala la ka morago la pampišana e nngwe le e nngwe le na le sehlogwana se se rego, “Seo o ka Naganišišago ka Sona.” Ka tlase ga sehlogwana seo, go na le mangwalo le potšišo yeo le ka tlago la e ahlaahla leetong la go boela. Ge o sepediša pampišana e rego O Nagana’ng ka Bokamoso? potšišo yeo le ka tlago la e ahlaahla leetong la go boela ke yeo e rego: “Modimo o tla kaonefatša lefase la rena bjang?” Lona letlakaleng leo go na le lengwalo la Mateo 6:9, 10 le la Daniele 2:44. Ge o diriša pampišana e rego Na Ruri Bahu ba ka Phela Gape? potšišo yeo le ka tlago la e ahlaahla ke e rego: “Ke ka baka la’ng re tšofala le go hwa?” Gona moo go na le lengwalo la Genesi 3:17-19 le la Baroma 5:12.

13. Hlalosa kamoo re ka dirišago dipampišana go thoma dithuto tša Beibele.

13 Diriša dipampišana go go thuša go thoma dithuto tša Beibele. Ge motho a ka skena khouto yeo e lego letlakaleng la ka morago la dipampišana tša rena, e tla mo lebiša bidiong e kopana Wepesaeteng ya rena yeo e ka mo kgothaletšago go ithuta Beibele. Le gona dipampišana tše di na le seswantšho sa poroutšha ya Ditaba tše Dibotse tše di Tšwago go Modimo! e bile di lebiša mmadi thutong yeo a swanetšego go e bala ka poroutšheng ye. Ka mohlala, pampišana e rego Ge e le Gabotse ke Mang yo a Laolago Lefase? e lebiša mmadi go thuto 5 ka poroutšheng yeo.Pampišana e rego Ke’ng Seo se Dirago Gore Bophelo bja Lapa bo Thabiše? e mo lebiša go thuto 9. Ge o ka diriša dipampišana tše ka tsela yeo e hlalositšwego mo, o tla ba o latela mokgwa o mobotse wa go diriša Beibele leetong la mathomo le maetong a go boela. Ka go re’alo, o ka kgona go thoma dithuto tše dintši tša Beibele. Ke’ng se sengwe seo o ka se dirago gore o diriše Lentšu la Modimo ka katlego bodireding?

BOLELA KA SEO BATHO BA TSHWENYEGILEGO KA SONA

14, 15. O ka ekiša bjang boemo bja kgopolo bja Paulo ka bodiredi?

14 Paulo o be a katanela go ipea boemong bja “batho ba bantši ka mo go ka kgonegago” ge a be a le bodireding. (Bala 1 Bakorinthe 9:19-23.) Hlokomela gore Paulo o be a holofetše go ‘rua Bajuda, go rua bao ba lego tlase ga molao, go rua bao ba se nago molao le go rua bao ba fokolago.’ Ee, o be a nyaka go fihlelela “batho ba mehuta ka moka, e le gore ka mešegofela [a] phološe ba bangwe.” (Dit. 20:21) Re ka ekiša bjang boemo bja kgopolo bja Paulo ge re itokišeletša go botša “mehuta yohle ya batho” bao ba lego tšhemong ya gabo rena therešo?—1 Tim. 2:3, 4.

15 Tše dingwe tša dithero tšeo re ka di dirišago di tšwelela ka go Tirelo ya Rena ya Mmušo kgwedi le kgwedi. Leka go di diriša. Eupša ge e ba batho ba tšhemong ya gabo lena ba tshwenyegile ka dilo tše itšego, itlhamele matseno ao a tsošago kgahlego ka tšona. Nagana ka maemo a moo o dulago, ka batho ba moo le ka dilo tšeo ba tshwenyegilego kudu ka tšona. Ke moka nagana ka lengwalo leo le kgomago maemo ao ba lego go ona. Molebeledi yo mongwe wa mosepedi o boletše kamoo yena le mosadi wa gagwe ba dirišago Beibele kudu bodireding ka gore: “Beng ba dintlo ba bantši ba re dumelela go bala lengwalo letee ge feela re bolela ka boripana e bile re sa rarele. Re thoma pele ka ditumedišo tša lefelong leo re butše Dibeibele tša rena, ke moka ra balela mong wa ntlo lengwalo.” Anke re ahlaahleng mehlala e sego kae ya ditaba tšeo di atlegago bodireding, dipotšišo le mangwalo ao o ka lekago go a bala tšhemong ya gabo lena.

Na o diriša Beibele le dipampišana ka katlego ge o le bodireding? (Bona dirapa 8-13)

16. Hlalosa kamoo re ka dirišago Jesaya 14:7 bodireding.

16 Ge e ba o dula tikologong yeo gantši go felago go eba le dikgaruru, o ka botšiša motho gore: “Na o nagana gore ka letšatši le lengwe re ka kwa ditabeng go thwe: ‘Lefase ka moka le khuditše, le imologile kgakanegong. Batho ba hlalala ka mekgoši ya lethabo’? Beibele e re’alo go Jesaya 14:7. Ge e le gabotse, Beibele e re botša ka dikholofetšo tše dintši tša Modimo tša gore o tlo tliša khutšo mo lefaseng.” Ke moka kgopela motho yoo gore o mmalele e nngwe ya dikholofetšo tšeo ka Beibeleng.

17. O ka diriša bjang lengwalo la Mateo 5:3 ge o boledišana le motho yo a itšego?

 17 Na banna ba bantši ba tšhemong ya gabo lena ba hwetša go le thata go hlokomela malapa a bona? Ge e ba go le bjalo, o ka thoma poledišano ka go botšiša gore: “O nagana gore monna o swanetše go gola bokae gore lapa la gagwe le thabele bophelo?” Ka morago ga karabo, tšwela pele ka gore: “Banna ba bantši ba gola tšhelete ya go feta yeo, eupša malapa a bona a sa dutše a sa kgotsofale. Ke’ng seo se tlogago se nyakega?” Ke moka bala Mateo 5:3 gomme o kgopele motho yoo go mo swarela thuto ya Beibele.

18. O ka diriša bjang Jeremia 29:11 go kgothatša ba bangwe?

18 Na batho ba tikologong ya geno ba sa kwešitšwe bohloko ke selo se itšego seo se sa tšwago go direga? O ka thoma thero ya gago ka gore: “Re tlile mo gore re tlo le kgothatša. (Bala Jeremia 29:11.) Na o kwele dilo tše tharo tšeo Modimo a re kganyogelago tšona? O re kganyogela ‘khutšo,’ ‘bokamoso’ le ‘kholofelo.’ Na ga se mo go kgothatšago go tseba gore Modimo o nyaka gore re ipshine ka bophelo? Eupša seo se ka kgonega bjang?” Ke moka bontšha mong wa ntlo thuto yeo e sepedišanago le taba ye ka poroutšheng ya Ditaba tše Dibotse.

19. Hlalosa kamoo re ka dirišago Kutollo 14:6, 7 ge re bolela le badumedi.

19 Na o dula tikologong ya batho ba go rata bodumedi? Ge e ba go le bjalo, o ka thoma poledišano ka go botšiša gore: “Ge morongwa a be a ka bolela le wena, na o be o tla mo theetša? (Bala Kutollo 14:6, 7.) Ka ge morongwa yo a re re ‘boife Modimo,’ na ga o nagane gore re swanetše go tseba gore o bolela ka Modimo ofe? Morongwa yo o re thuša go tseba karabo ge a re ke ‘Yo a dirilego legodimo, lefase, lewatle le didiba tša meetse.’ Ke mang a dirilego dilo tše?” Ke moka bala Psalme 124:8, yeo e rego: “Thušo ya rena e leineng la Jehofa, yena Modiri wa legodimo le lefase.” Botša motho yoo gore o ka rata go tlo mo hlalosetša kutšwanyana ka Jehofa Modimo.

20. (a) Re ka diriša bjang Diema 30:4 go ruta motho leina la Modimo? (b) Ke lengwalo lefe leo wena o kgonago go le diriša ka katlego?

20 O ka thoma poledišano le mofsa ka gore: “Ke rata go go balela lengwalo le lengwe leo le nago le potšišo ya bohlokwa kudu. (Bala Diema 30:4.) Ga go na motho yo a kilego a dira dilo tše, ka gona temana ye e swanetše go ba e bolela ka Mmopi wa rena. * Re ka tseba leina la gagwe bjang? Ke kgopela go go bontšha lona ka Beibeleng.”

ANKE LENTŠU LA MODIMO LE GO THUŠE GO ATLEGA BODIREDING

21, 22. (a) Lengwalo leo le opago kgomo lenaka le ka fetoša motho bjang? (b) O ikemišeditše go dira’ng ge o dutše o phetha bodiredi bja gago?

21 Ga o tsebe kamoo batho ba tla arabelago ka gona ge o ba baletše lengwalo leo le opago kgomo lenaka. Ka mohlala, bana babo rena ba babedi kua Australia ba ile ba kokota mojakong wa mosadi yo mongwe. Yo mongwe wa bona o ile a mmotšiša gore: “Na o tseba leina la Modimo?” ke moka a bala lengwalo letee feela—Psalme 83:18. Mosadi yoo o re: “Ke ile ka šala ke maketše! Ge Dihlatse tšeo di sepetše, ke ile ka otlela dikhilomithara tše 56 go ya lebenkeleng la dipuku gore ke yo bona seo Dibeibele tše dingwe di se bolelago ke moka ka lebelela leina leo ka pukuntšung. Ka morago ga go kgolwa gore leina la Modimo ke Jehofa, ke ile ka ipotšiša gore ke dilo dife tše dingwe tšeo ke bego ke sa di tsebe.” Gateetee ka morago ga moo, mosadi yo le monna yo a bego a tlo nyalana le yena ba ile ba thoma go ithuta Beibele, ke moka mafelelong ba kolobetšwa.

22 Lentšu la Modimo le fetoša maphelo a bao ba le balago le go bontšha tumelo dikholofetšong tša Jehofa tše di kgahlišago. (Bala 1 Bathesalonika 2:13.) Molaetša wa Beibele o na le matla a magolo go feta selo le ge e le sefe seo re ka se bolelago ge re leka go fihlelela dipelo tša batho. Ke ka baka leo re swanetšego go diriša Lentšu la Modimo nako le nako ge sebaka se tšwelela. Le a phela!

^ ser. 20 Bala “Dipotšišo tše Tšwago go Babadi” ka go Morokami wa July 15, 1987, letlakala 31.