Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2014

Ba Ile ba Ikgafa ka go Rata—Kua Micronesia

Ba Ile ba Ikgafa ka go Rata—Kua Micronesia

KATHERINE o goletše United States gomme a kolobetšwa gore e be yo mongwe wa Dihlatse tša Jehofa a na le nywaga e 16. O be a šoma ka thata bodireding eupša batho ba sa arabele gabotse molaetšeng wa Mmušo. O re: “Ke ile ka bala diphihlelo tša batho bao ba ilego ba rapela Modimo gore a ba romele motho yo a tlago go ba thuša go mo tseba. Gantši ke be ke kganyoga go hwetša motho yo bjalo, eupša seo ga se sa direga.”

Ka morago ga go dira boboledi tšhemong yeo ka nywaga e mentši, Katherine o ile a thoma go nagana ka go hudugela lefelong leo batho ba bego ba tlo arabela gabotse molaetšeng wa Mmušo. Lega go le bjalo, o ile a ipotšiša ge e ba a ka kgona go dira seo. E bile gatee feela bophelong bja gagwe moo a ilego a ba kgole le lapa la gabo, e lego dibeke tše pedi feela, le gona o be a hlologela gae letšatši le lengwe le le lengwe. Lega go le bjalo, kganyogo ya gagwe e tšwago pelong ya go nyaka go latswa lethabo leo le tlišwago ke go thuša bao ba tsomago Jehofa e ile ya ba e matla. Ka morago ga go hwetša mafelo a mmalwa ao a ka hudugelago go ona, o ile a ngwalela lekala la Guam gomme a hwetša boitsebišo bjoo a bego a bo nyaka. Ka July 2007, Katherine o ile a hudugela Saipan a na le nywaga e 26, e lego sehlakahlaka seo se lego Lewatleng la Pacific, seo se lego kgole le ga gabo ka dikhilomithara tše e ka bago tše 10 000. Mafelelo a go huduga ga gagwe e bile afe?

GO ARABJA GA DITHAPELO TŠE PEDI

Ka moragonyana ga gore Katherine a fihle phuthegong ya moo e mpsha, o ile a kopana le Doris, e lego mosadi yo a lego nywageng ya magareng ga bo-40, yoo a ilego a amogela thuto ya Beibele. Ka morago ga gore ba ithute dikgaolo tše tharo tša mathomo tša puku ya Seo Beibele e se Rutago, Katherine o ile a thoma go tshwenyega. O re: “Doris e be e le morutwana yo botse, ka gona ke be ke sa nyake go senya thuto yeo. Ke be ke se ka ka ka swara thuto ya Beibele ya ka mehla gomme ke nagana gore Doris o hloka kgaetšedi yo a nago le phihlelo gore a ithute le yena, mohlomongwe yo a lekanago le yena ka nywaga.” Katherine o ile a rapela Jehofa gore a mo thuše go hwetša kgaetšedi yo a swanelegago yoo a ka mo neago morutwana wa gagwe wa Beibele. Ke moka o ile a phetha ka gore a botše Doris gore ga a sa tlo swarelwa thuto ke yena.

Katherine o re: “Pele ga ge nka botša Doris taba yeo, o ile a mpotša gore o nyaka go bolela le nna ka bothata bjo itšego. Ka morago ga go mo theetša, ke ile ka mmotša kamoo Jehofa a ilego a nthuša go lebeletšana le bothata bjo bo swanago. O ile a nteboga.” Ke moka Doris o ile a botša Katherine gore: “Jehofa o diriša wena go nthuša. Letšatšing la pele leo o nketetšego ka lona, ke be ke feditše diiriiri ke bala Beibele. Ke be ke lla, ke  kgopela Modimo gore a nthomele motho yo a itšego gore a tle a nthuše go kwešiša Beibele. Ka yona nako yeo, o ile wa kokota mojako. Jehofa o be a arabile thapelo ya ka!” Katherine o tlala megokgo ka mahlong ge a anega phihlelo ye yeo e kgomago. O re: “Mantšu a Doris e be e le karabo ya thapelo ya ka. Jehofa o ile a mpontšha gore nka kgona go tšwela pele ke swara thuto yeo.”

Doris o kolobeditšwe ka 2010, gomme lehono o swara dithuto tše mmalwa tša Beibele. Katherine o re: “Ke leboga gakaakang gore selo seo e bego e le kgale ke se kganyoga, e lego gore ke thuše motho go ba mohlanka wa Jehofa, se phethagetše!” Lehono Katherine o thabela go hlankela e le mmulamadibogo yo a kgethegilego sehlakahlakeng sa Pacific sa Kosrae.

DITLHOHLO TŠE THARO LE KAMOO O KA LEBELETŠANAGO LE TŠONA

Bana babo rena le dikgaetšedi ba ka godimo ga ba lekgolo bao ba tšwago dinageng dišele (ba nywaga ya go tloga ka e 19 go ya go e 79) ba hlanketše moo go nyakegago thušo kua Micronesia. Maikwelo a bašomi ba ba mafolofolo a hlaloswa gabotse ke Erica, yoo a hudugetšego Guam ka 2006 a na le nywaga e 19. O re: “Go bose kudu go bula madibogo tšhemong yeo batho ba gona ba nyoretšwego therešo. Ke leboga kudu gore Jehofa o nthušitše go tsenela mohuta wo wa tirelo. Ke tsela e kaonekaone ya bophelo!” Lehono, Erica o thabela go hlankela e le mmulamadibogo yo a kgethegilego sehlakahlakeng sa Ebeye seo se lego Dihlakahlakeng tša Marshall. Ke therešo gore go hlankela nageng e šele go na le ditlhohlo. Anke re ahlaahleng tše tharo tša tšona gomme re bone kamoo bao ba hudugetšego Micronesia ba lebeletšanago le tšona.

Erica

Tsela ya bophelo. Ka morago ga gore Simon wa nywaga e 22 a goroge sehlakahlakeng sa Palau ka 2007, kapejana o ile a lemoga gore mešomo ya boiphedišo yeo a bego a tla e hwetša e be e tla dira gore a gole tšhelete e nyenyane kudu ge e bapetšwa le yeo a bego a e gola nageng ya gabo kua Engelane. Simon o re: “Ke ile ka swanelwa ke go ithuta go se reke selo le ge e le sefe seo ke se nyakago. Ga bjale ke kgetha gabotse dijo tšeo ke di rekago, le gona ke tsoma tša theko ya tlase. Ge sedirišwa se itšego se senyega, ke nyaka dikarolo tša sona tšeo di kilego tša dirišwa gomme ka leka go hwetša motho yo a ka nthušago go se lokiša.” Go nyakega ga gore a phele bophelo bjo bonolo go mo kgomile bjang? Simon o re: “Go nthušitše go bona seo e tlogago e le sa bohlokwa bophelong le kamoo nka phelago ka dilo tše sego kae. Ke bone tlhokomelo ya Jehofa ka makga a mmalwa. Nywageng e šupago yeo ke hlanketšego mo, ga se ka ka ka hloka dijo le marobalo.” Ruri Jehofa o thekga bao ba phelago bophelo bjo bonolo ka ge ba nyaka go tsoma Mmušo pele.—Mat. 6:32, 33.

Go hlologela gae. Erica o re: “Ke rata ditho tša lapa lešo kudu, ka gona ke be ke tshwenyegile gore go hlologela gae go tlo šitišana le bodiredi bja ka.” O ile a dira’ng go itokišeletša tlhohlo ye? O re: “Pele nka huduga, ke ile ka bala dihlogo tša Morokami tša mabapi le go hlologela gae. Di ile tša ntokišeletša go lebeletšana le tlhohlo ye ka katlego. Go se sengwe sa dihlogo tšeo, mma yo mongwe o ile a kgonthišetša morwedi wa gagwe gore Jehofa o tla mo hlokomela, a re: ‘Jehofa o tla go hlokomela  gakaone go feta nna.’ Ruri kgonthišetšo yeo e ile ya mmatlafatša.” Hannah le monna wa gagwe e lego Patrick, ba hlankela sehlakahlakeng sa Majuro seo se lego Dihlakahlakeng tša Marshall. Hannah o alafa go hlologela gae ka go swarega ka go thuša bana babo rena le dikgaetšedi ba phuthegong yeo ba hlankelago go yona. O re: “Ka mehla ke leboga Jehofa ka bana babo rena le dikgaetšedi ba lefaseng ka bophara ka gobane le bona ke lapa lešo. Ke be nka se tsoge ke hlanketše mo go nyakegago thušo ge e be e se ka thekgo ya bona e lerato.”

Simon

Go hwetša bagwera. Simon o re: “Ge o fihla nageng e šele, o hwetša selo se sengwe le se sengwe se fapana le sa mo o tšwago. Ka dinako tše dingwe ke hlologela go bolela metlae yeo batho ba moo ba tla e kwešišago.” Erica o re: “Mathomong, ke be ke ikwa ke le noši, eupša seo se ile sa nthuša go naganišiša ka maikemišetšo a ka a go hudugela moo. Ke be ke se ka hudugela moo gore ke tlo ikhola eupša ke hudugetše go tlo hlankela Jehofa ka mo go oketšegilego.” O oketša ka gore: “Ge nako e dutše e eya, ke ile ka ba le bagwera ba babotse bao ke ba ratago kudu.” Simon o ile a šoma ka thata gore a ithute Sepalau, e lego seo se mo thušago go ‘katološa lerato leo le lego ka pelong ya gagwe’ go bana babo le dikgaetšedi ba moo. (2 Bakor. 6:13) Maiteko a gagwe a go ithuta leleme leo a ile a dira gore bana babo rena ba mo rate. Ee, ge bao ba sa tšwago go fihla nageng e itšego ba šoma gotee le bana babo rena ba moo, ka moka ga bona ba thabela bogwera bja kgauswi ka phuthegong. Ke meputso efe e mengwe yeo e hwetšwago ke bao ba ikgafago ka go rata gore ba yo hlankela mo go nyakegago thušo e kgolo?

‘GO BUNA KA BONTŠI’

Moapostola Paulo o itše: “Yo a bjalago ka bontši le go buna o tla buna ka bontši.” (2 Bakor. 9:6) Ruri molao wo wa motheo o šoma go bao ba katološago bodiredi bja bona. Ke dienywa dife tšeo ba di ‘bunago ka bontši’ kua Micronesia?

Patrick le Hannah

Kua Micronesia, go sa dutše go na le dibaka tše dintši tša go thoma dithuto tša Beibele le go bona kamoo batho bao ba ithutago therešo ya Lentšu la Modimo le go e diriša ba tšwelago pele ka gona moyeng. Le gona Patrick le Hannah ba ile ba šoma tšhemo kua Angaur, e lego sehlakahlaka se senyenyane seo se nago le baagi ba 320. Ka morago ga go dira boboledi moo ka dikgwedi tše pedi, ba ile ba kopana le mma yo a se nago molekane. Gateetee o ile a amogela thuto ya Beibele, a amogela therešo ka go fagahla gomme a dira diphetogo tše dikgolo bophelong bja gagwe. Hannah o re: “Ka mehla ge re fetša go ithuta le yena, gomme re tloga legaeng la gagwe ka dipaesekele tša rena, nna le Patrick re be re lebelelana ke moka re re: ‘Re a leboga Jehofa!’” Hannah o oketša ka gore: “Ke a tseba gore Jehofa a ka ba a ile a diriša tsela e nngwe go gogela mosadi yo go yena, eupša ka baka la go hlankela mo go nyakegago thušo e kgolo, re kgonne go hwetša motho yo yoo a swanago le nku le go mo thuša go tseba Jehofa. Ye ke e nngwe ya diphihlelo tše di kgahlišago kudu maphelong a rena!” Go etša ge Erica a bolela, “ge o thuša motho yo a itšego go tseba Jehofa, o hwetša lethabo le le sa hlalosegego!”

NA O KA TSENYA LETSOGO?

Dinageng tše dintši go nyakega bagoeledi ba oketšegilego ba Mmušo. Na o ka ba yo mongwe wa bao ba hudugelago moo go nyakegago thušo? Rapela Jehofa gore a matlafatše kganyogo ya gago ya go katološa bodiredi bja gago. Boledišana le bagolo ba phuthego ya geno ka taba yeo, molebeledi wa tikologo goba bao ba kilego ba ba le tokelo ya go hlankela nageng yeo go nyakegago thušo. Ge o thoma go dira dithulaganyo, ngwalela lekala leo le okamelago tšhemo yeo o nyakago go hlankela go yona gomme o kgopele tsebišo e oketšegilego. * Mohlomongwe le wena o ka tlatša bana babo rena le dikgaetšedi ba dikete—ba banyenyane le ba bagolo, bao ba sego lenyalong goba ba lego lenyalong—bao ba ikgafago ka go rata gomme wa latswa lethabo la ‘go buna ka bontši.’

^ ser. 17 Bona sehlogo se se rego, “Na o ka ‘Tshelela Matsedonia’?” ka go Tirelo ya Rena ya Mmušo ya August 2011.

Ithute ka mo go oketšegilego

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?