Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  July 2014

“Le tla ba Dihlatse tša ka”

“Le tla ba Dihlatse tša ka”

“[Jesu] a re go bona: ‘. . . Le tla ba dihlatse tša ka . . . go fihla karolong ya kgole ya lefase.’”—DIT. 1:7, 8.

1, 2. (a) Hlatse e kgolokgolo ya Jehofa ke mang? (b) Leina Jesu le bolela’ng, gona Morwa yo wa Modimo o ile a phela bjang ka go dumelelana le lona?

“KE TSWALETŠWE sona se gomme ke sona se ke se tletšego lefaseng, gore ke hlatsele therešo.” (Bala Johane 18:33-37.) Jesu Kriste o boditše Mmušiši wa Judea wa Moroma mantšu a ge a be a mo sekiša. Jesu o be a sa tšwa go mmotša gore ke yena kgoši. Nywaga e mentši ka morago, moapostola Paulo o ile a bolela ka mohlala wo wa Jesu wa go ba le sebete, “yoo bjalo ka hlatse a dirilego boipolelo bjo bobotse bja phatlalatša pele ga Pontio Pilato.” (1 Tim. 6:13) Ruri ka dinako tše dingwe go nyakega sebete se segolo gore re be ‘dihlatse tše di botegago le tša therešo’ lefaseng le la Sathane leo le re hloilego!—Kut. 3:14.

2 Jesu o belegwe e le hlatse ya Jehofa ka ge e be e le Mojuda. (Jes. 43:10) Le gona o ile a ba hlatse e kgolokgolo ya Modimo go feta batho ka moka bao Jehofa ilego a ba godiša gore ba tle ba emele leina la Gagwe. Jesu o ile a tšeela godimo kudu seo se bolelwago ke leina leo Modimo a mo reetšego lona. Ge morongwa a be a botša tatago Jesu wa mogodiši e lego Josefa gore seo Maria a se imilego ke ka moya o mokgethwa, o ile a oketša ka gore: “[Maria] o tla belega morwa gomme leina la gagwe o mmitše Jesu, gobane o tla phološa batho ba gabo dibeng tša bona.” (Mat. 1:20, 21) Diithuti tše dingwe tša Beibele di dumela gore leina Jesu le tšwa leineng la Seheberu la Jeshua, gomme le na le sebopego se se khutsofaditšwego  sa leina la Modimo; leina leo le bolela gore “Jehofa ke Phološo.” Ka go dumelelana le seo se bolelwago ke leina la gagwe, Jesu o ile a thuša “dinku tše di timetšego tša ntlo ya Isiraele” go sokologa dibeng tša tšona gore Jehofa a boele a di amogele. (Mat. 10:6; 15:24; Luka 19:10) Ka baka leo, Jesu o ile a nea bohlatse ka Mmušo wa Modimo ka mafolofolo. Mongwadi wa Ebangedi e lego Mareka o begile gore: “Jesu a ya Galilea, a bolela ditaba tše dibotse tša Modimo a re: ‘Nako e beilwego e fihlile gomme Mmušo wa Modimo o batametše. Itsholeng gomme le be le tumelo ditabeng tše dibotse.’” (Mar. 1:14, 15) Le gona Jesu ka sebete o ile a kgalemela o šoro baetapele ba bodumedi ba Bajuda, e lego seo se dirilego gore ba mo gafele gore a bolawe koteng.—Mar. 11:17, 18; 15:1-15.

“MATETE A MODIMO”

3. Go ile gwa direga’ng letšatšing la boraro ka morago ga lehu la Jesu?

3 Mehlolo ya mehlolo! Letšatšing la boraro ka morago ga gore Jesu a bolawe ka sehlogo, Jehofa o ile a mo tsoša, e sego e le motho wa nama, eupša e le sebopiwa sa moya seo se sa hwego. (1 Pet. 3:18) E le go hlatsela seo, Morena Jesu o ile a ikapeša mmele wa nama gomme a bontšha barutiwa ba gagwe gore o tsošitšwe bahung. Lona letšatšing leo a tsošitšwego ka lona, o ile a iponagatša bonyenyane ka makga a mahlano go barutiwa ba gagwe ba fapafapanego.—Mat. 28:8-10; Luka 24:13-16, 30-36; Joh. 20:11-18.

4. Jesu o ile a swara seboka sefe ka morago ga tsogo ya gagwe, gona ke boikarabelo bofe bjo a ilego a bo botša barutiwa ba gagwe?

4 Lekga la bohlano leo Jesu a ilego a iponagatša ka lona ke ge a be a tšwelela go baapostola ba gagwe le go ba bangwe bao ba bego ba bokane le bona. Tiragalong yeo e sa lebalegego, o ile a ba swarela seo re ka rego ke thuto ya Lentšu la Modimo. O ile a “bula menagano ya bona ka mo go feletšego gore ba kwešiše seo se bolelwago ke Mangwalo.” Ke moka ba ile ba kwešiša gore go bolawa ga gagwe ke manaba a Modimo le go tsošwa ka mohlolo go boletšwe e sa le pele ka Mangwalong. Mafelelong a seboka seo sa ka morago ga tsogo ya gagwe, Jesu o ile a botša barutiwa bao ba gagwe seo ba bego ba swanetše go se dira. O ile a ba botša gore “motheong wa leina la gagwe boitsholo bakeng sa tebalelo ya dibe bo tla bolelwa ditšhabeng ka moka—go thoma Jerusalema.” A oketša ka gore: “Lena le tla ba dihlatse tša dilo tše.”—Luka 24:44-48.

5, 6. (a) Ke ka baka la’ng Jesu a ile a re: “Le tla ba dihlatse tša ka”? (b) Ke selo sefe se sefsa sa mabapi le morero wa Jehofa seo barutiwa ba Jesu ba bego ba tla swanelwa ke go se botša batho?

5 Ka gona, ka morago ga matšatši a 40 ge Jesu a be a iponagatša la mafelelo go baapostola ba gagwe, ba swanetše go ba ba ile ba kwešiša gabotse seo a bego a se bolela ka mantšu a gagwe a bonolo eupša e le a matla ao a rego: “Le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.” (Dit. 1:8) Ke ka baka la’ng Jesu a ile a re: “Le tla ba dihlatse tša ka,” a se a ka a re tša Jehofa? Jesu nkabe a ile a ba botša gore e be e tla ba dihlatse tša Jehofa, eupša batho bao a bego a bolela le bona e be e le Baisiraele, ka gona e be e šetše e le dihlatse tša Jehofa.

Ka ge re le barutiwa ba Jesu, re tšwela pele re botša batho morero wa Jehofa ka bokamoso (Bona serapa 5 le 6)

6 Ga bjale barutiwa ba Jesu ba be ba tla swanelwa ke go botša batho ka selo se sefsa sa mabapi le morero wa Jehofa—e lego selo se segolo kudu go feta go lokollwa ga Baisiraele bokgobeng kua Egipita gomme ka morago bothopša kua Babilona. Lehu la Jesu Kriste le tsogo ya gagwe di neile batho motheo wa go lokologa bokgobeng bjo bogolo kudu, bokgobeng bja sebe le lehu. Ka Pentekoste ya 33 C.E., barutiwa ba Jesu bao ba bego ba sa tšwa go tlotšwa ka moya o mokgethwa ba ile ba botša batho “matete a Modimo,” gomme bontši bja bao ba ilego ba ba theetša ba ile ba arabela gabotse. Ka go re’alo, a le ka letsogong le letona la Tatagwe legodimong, Jesu o ile a thoma go bona seo se bolelwago ke leina la gagwe se phethagala le go feta ge batho ba diketekete ba sokologa gomme ba  bontšha tumelo go yena ka ge e le tsela ya Jehofa ya go phološa batho.—Dit. 2:5, 11, 37-41.

“TOPOLLO BAKENG SA BA BANTŠI”

7. Ditiragalo tša letšatšing la Pentekoste ya 33 C.E. di ile tša hlatsela’ng?

7 Ditiragalo tša letšatšing la Pentekoste ya 33 C.E. di ile tša hlatsela gore Jehofa o amogetše ka lethabo mohola wa sehlabelo se se phethagetšego sa Jesu e le poelano, goba go lefelelwa ga dibe. (Baheb. 9:11, 12, 24) Go etša ge Jesu a boletše, o be “a se a tlela go hlankelwa, eupša a tletše go hlankela le go nea moya wa gagwe gore e be topollo bakeng sa ba bantši.” (Mat. 20:28) “Ba bantši” bao ba bego ba tlo holwa ke topollo ya Jesu e be e ka se be feela Bajuda bao ba itshotšego. Go e na le moo, thato ya Modimo ke gore “mehuta yohle ya batho e phološwe,” ka gobane topollo “e [tloša] sebe sa lefase!”1 Tim. 2:4-6; Joh. 1:29.

8. Barutiwa ba Jesu ba ile ba nea bohlatse go fihla kae, gona ba thušitšwe ke’ng?

8 Na barutiwa bao ba Jesu ba lekgolong la pele la nywaga ba ile ba ba le sebete sa go tšwela pele ba nea bohlatse ka yena? Ee, go bile bjalo, eupša ga se ba dira bjalo ka matla a bona. Moya o mokgethwa wa Jehofa o ile wa ba nea matla le phišego ya go tšwela pele ba nea bohlatse. (Bala Ditiro 5:30-32.) Nywaga e ka bago e 27 ka morago ga Pentekoste ya 33 C.E., go be go ka bolelwa gabotse gore “molaetša wa therešo wa ditaba tše dibotse” o fihlile go Bajuda le Bantle “tlholong yohle yeo e lego tlase ga legodimo.”—Bakol. 1:5, 23.

9. Go etša ge go boletšwe e sa le pele, go ile gwa direga’ng ka phuthego ya mathomo ya Bokriste?

9 Ka manyami, ganyenyane-ganyenyane phuthego ya mathomo ya Bokriste e ile ya šilafatšwa. (Dit. 20:29, 30; 2 Pet. 2:2, 3; Juda 3, 4) Go etša ge Jesu a boletše, bohlanogi bjo bjalo, bjoo bo kgothaletšwago ke “yo kgopo” e lego Sathane, bo be bo tla gola gomme bja bipa Bokriste bja therešo go fihlela “bofelong bja tshepedišo ya dilo.” (Mat. 13:37-43) Ke moka Jehofa o be a tla bea Jesu gore e be Kgoši godimo ga batho. Seo se diragetše ka October 1914, gomme sa swaya go thoma ga ‘mehla ya bofelo’ bja tshepedišo e kgopo ya Sathane.—2 Tim. 3:1.

10. (a) Ke ngwaga ofe wa bohlokwa woo Bakriste ba tloditšwego ba mehleng yeno ba ilego ba bolela ka wona e sa le pele? (b) Go ile gwa direga’ng ka October 1914, gona seo se bonwa bjang ke batho ka moka?

10 Bakriste ba tloditšwego ba mehleng yeno ba boletše e sa le pele gore October 1914 e be e tla ba ngwaga wa bohlokwa. Ba be ba theile phetho ya bona boporofeteng bja  Daniele bja mabapi le sehlare se seteleletelele seo se ilego sa rengwa eupša se be se tlo gola gape ka morago ga “mabaka a šupago.” (Dan. 4:16) Jesu o ile a bolela ka nako e swanago e le “dinako tše di beilwego tša ditšhaba” boporofeteng bja gagwe bja mabapi le go ba gona ga gagwe mo go bego go sa tla gotee le bja “bofelo bja tshepedišo ya dilo.” Ga e sa le go tloga ngwageng woo wa bohlokwa wa 1914, “pontšho ya go ba gona [ga Kriste]” e le Kgoši e mpsha ya lefase e bonwa gabotse ke batho ka moka. (Mat. 24:3, 7, 14; Luka 21:24) Ka gona ga e sa le go tloga ka nako yeo, “matete a Modimo” a akareditše go bea ga Jehofa Jesu sedulong sa bogoši e le Kgoši godimo ga batho.

11, 12. (a) Ke’ng seo Kgoši e mpsha ya lefase e thomilego go se dira ngwageng wa ka morago ga ntwa wa 1919? (b) Go ile gwa direga’ng gape go thoma magareng ga bo-1930? (Bona seswantšho seo se lego mathomong a sehlogo.)

11 Ka ge e le Kgoši e mpsha ya lefase, go se go ye kae Jesu Kriste o ile a thoma go lokolla balatedi ba gagwe ba tloditšwego bokgobeng bja “Babilona o Mogolo.” (Kut. 18:2, 4) Ka 1919, e lego ngwaga wa ka morago ga Ntwa ya Pele ya Lefase, go ile gwa bulega dibaka tša gore lefaseng ka bophara go newe bohlatse mabapi le tsela ya Modimo ya go phološa batho le go bolela ditaba tše dibotse tša Mmušo wo o bego o sa tšwa go hlongwa. Bakriste ba tloditšwego ba ile ba diriša dibaka tšeo gomme gwa kgoboketšwa batlotšwa ba bangwe ba diketekete gore le bona e tle e be bajabohwa le Kriste.

12 Go thoma magareng ga bo-1930 go ya pele, go ile gwa ba molaleng gore Kriste o thomile go kgoboketša ‘dinku tša gagwe tše dingwe’ tše dimilionemilione, tšeo di bego di tla bopa “lešaba le legolo” go tšwa ditšhabeng ka moka. Ka tlase ga tlhahlo ya Bakriste ba tloditšwego, lešaba le le legolo le lona le latela mohlala wa Jesu wa go ba le sebete gomme le botša batho ka moka gore phološo e tšwa go Modimo le Kriste. Ge lešaba le le ka kgotlelela modirong wo wa go nea bohlatse gomme la tšwela pele le bontšha tumelo sehlabelong sa Kriste sa topollo, le tla phologa ‘masetlapelo a magolo,’ ao a tlago go fediša lefase la Sathane.—Joh. 10:16; Kut. 7:9, 10, 14.

‘RAPA SEBETE SA GO BOLELA DITABA TŠE DIBOTSE’

13. Ka ge re le Dihlatse tša Jehofa, re ikemišeditše go dira’ng, gona re tseba bjang gore re tla atlega?

13 Eka re ka tšwela pele re tšeela godimo tokelo ya go ba Dihlatse tša “matete” ao Jehofa Modimo a a dirilego le tša dikholofetšo tša gagwe tša nakong e tlago. Ke therešo gore ga se ka mehla go dira bjalo go lego bonolo. Bana babo rena ba bantši ba šoma ditšhemong tšeo go tletšego batho bao ba sa thabelego, bakweri goba bao ba re tlaišago. Re ka dira seo moapostola Paulo le badirišani ba gagwe ba ilego ba se dira. Paulo o ile a re: “Re ile ra rapa sebete ka Modimo wa rena gore re le botše ditaba tše dibotse tša Modimo re lebeletšane le kganetšo e šoro.” (1 Bathes. 2:2)  Ka gona anke le ka mohla re se ke ra felelwa ke matla. Go e na le moo, anke re ikemišetšeng go phelela boineelo bja rena ge lefase le la Sathane e eba mašope. (Jes. 6:11) Re ka se kgone go dira seo ka matla a rena, eupša go etša Bakriste ba lekgolong la pele la nywaga, re swanetše go rapela Jehofa gore ka moya wa gagwe o mokgethwa a re nee “matla a fetago a tlwaelegilego.”—Bala 2 Bakorinthe 4:1, 7; Luka 11:13.

14, 15. (a) Bakriste ba be ba swarwa bjang lekgolong la pele la nywaga C.E., gona moapostola Petro o ile a re’ng go bona? (b) Re swanetše go ikwa bjang ge re swarwa gampe feela ka gobane re le Dihlatse tša Jehofa?

14 Lehono, batho ba dimilione ba ipolela gore ke Bakriste, “eupša ba latola [Modimo] ka mediro ya bona, gobane ke ba makgapha le ba go se kwe e bile ga ba amogelege bakeng sa modiro o mobotse wa mohuta le ge e le ofe.” (Tito 1:16) Re swanetše go dula re gopola gore Bakriste ba therešo ba lekgolong la pele la nywaga ba be ba hloilwe ke batho ba bantši mehleng ya bona. Ke ka baka leo moapostola Petro a ilego a ngwala gore: “Ge e ba le gobošwa ka baka la leina la Kriste, le a thaba, gobane . . . moya wa Modimo, o godimo ga lena.”—1 Pet. 4:14.

15 Na mantšu a ao a buduletšwego a ka šoma go Dihlatse tša Jehofa lehono? Ee, ka gobane le rena re nea bohlatse bja gore Jesu ke Kgoši. Ka go re’alo, go hloiwa ka baka la ge re bitšwa ka leina la Jehofa go no swana le ge re “gobošwa ka baka la leina la [Jesu] Kriste,” yoo a ilego a botša baganetši ba gagwe gore: “Ke tlile ka leina la Tate, eupša ga le nkamogele.” (Joh. 5:43) Ka gona nakong e tlago ge o kopana le kganetšo modirong wa boboledi, rapa sebete. Kganetšo e bjalo ke bohlatse bja gore Modimo o a go amogela le gore moya wa gagwe ‘o godimo ga gago.’

16, 17. (a) Batho ba Jehofa ba thabela’ng dinageng tše dingwe tše dintši? (b) O ikemišeditše go dira’ng?

16 Le gona o se ke wa lebala gore dinageng tše dingwe tše dintši re a oketšega. Gaešita le ditšhemong tšeo re di šomago gantši, re sa dutše re hwetša batho bao ba ratago go re theetša bao re ka ba botšago molaetša wa rena o kgahlišago wa phološo. Anke re direng sohle seo re ka se kgonago go boela bathong bao ba thabelago gomme ge go kgonega re ba swarele dithuto tša Beibele, re ba thuše go gatela pele go fihlela ba ineela le go kolobetšwa. Mohlomongwe o ikwa go swana le Sarie wa Afrika Borwa, yoo a bego a dutše a le mafolofolo modirong wa go nea bohlatse ka nywaga e fetago e 60. O re: “Ke leboga kudu gore ka baka la sehlabelo sa Jesu sa topollo, nka ba le tswalano e botse le Jehofa, yena Mmuši wa legohle, e bile ke thabela go botša ba bangwe ka leina la gagwe la letago.” Sarie le monna wa gagwe Martinus, ba thušitše batho ba bantši, go akaretša le bana ba bona ba bararo, go ba barapedi ba Jehofa. Sarie o oketša ka gore: “Ga go na mošomo o mongwe wo o thabišago kudu go feta wo, e bile Jehofa ka moya wa gagwe o mokgethwa, o nea yo mongwe le yo mongwe wa rena matla ao re a hlokago go tšwela pele ka modiro wo o phološago maphelo.”

17 Go sa šetšwe gore re Bakriste bao ba kolobeditšwego goba re sa šomela ntlheng yeo, re na le mabaka a mantši a go leboga tokelo ya go kopanela le phuthego ya lefaseng ka bophara ya Dihlatse tša Jehofa. Ka gona, tšwela pele o nea bohlatse bjo bo tletšego ge o dutše o katanela go dula o hlwekile lefaseng la Sathane leo le šilafetšego. Ka go dira bjalo, o tla godiša Tatago rena yo lerato wa legodimong, yoo re nago le tokelo ya go bitšwa ka leina la gagwe la letago.