Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2014

Batho ba Jehofa ba ‘Tlogela go se Loke’

Batho ba Jehofa ba ‘Tlogela go se Loke’

“Yo mongwe le yo mongwe yo a bitšago leina la Jehofa a tlogele go se loke.” —2 TIM. 2:19.

1. Selo sa bohlokwa kudu borapeding bja rena ke sefe?

NA O kile wa bona leina Jehofa le ngwadilwe moagong o itšego goba musiamong wa dilo tša bokgabo? Ga go pelaelo gore seo se ile sa go kgahla le go go thabiša. Go ba gona, leina la Modimo ke la bohlokwa kudu borapeding bja rena—re Dihlatse tša Jehofa! Lefaseng ka bophara, ga go na batho bao ba tsebjago kudu ka leina la Modimo go swana le rena. Lega go le bjalo, re a tseba gore tokelo ya go bitšwa ka leina la Modimo e tla le boikarabelo bjo itšego.

2. Tokelo ya go bitšwa ka leina la Modimo e tla le boikarabelo bofe?

2 Go diriša leina la Modimo ga go bolele gore o a re amogela. Re swanetše go phela ka go dumelelana le ditekanyetšo tša gagwe tša boitshwaro. Ka baka leo, Beibele e re gopotša gore batho ba Jehofa ba swanetše go “furalela se sebe.” (Ps. 34:14) Moapostola Paulo o boletše molao wo wa motheo ka mo go kwagalago ge a be a ngwala gore: “Yo mongwe le yo mongwe yo a bitšago leina la Jehofa a tlogele go se loke.” (Bala 2 Timotheo 2:19.) Ka ge re le Dihlatse tša Jehofa, ruri re tsebja ka go bitša leina la gagwe. Eupša re swanetše go dira’ng gore re tlogele go se loke?

 “TLOGANG” DITIRONG TŠE MPE

3, 4. Ke lengwalo lefe leo e lego kgale diithuti tša Beibele di nyaka go le kwešiša, gona ka baka la’ng?

3 Ela hloko taba e dikologilego mantšu a Paulo ao a lego go 2 Timotheo 2:19. Temana ye e bolela ka “motheo o tiilego wa Modimo” ke moka ya bolela ka dipolelwana tše pedi tše di ngwadilwego motheong woo. Go bonagala polelwana ya pele yeo e rego, “Jehofa o tseba ba gagwe” e tsopotšwe go Numeri 16:5. (Bona sehlogo se se fetilego.) Go thwe’ng ka polelwana ya bobedi? Ke kgale diithuti tša Beibele di nyaka go kwešiša polelwana ya bobedi yeo e rego, “Yo mongwe le yo mongwe yo a bitšago leina la Jehofa a tlogele go se loke.” Ka baka la’ng?

4 Mantšu a Paulo a kwagala eka o be a tsopola karolo e itšego ka Mangwalong a Seheberu. Lega go le bjalo, ga go bonagale go na le temana ka Mangwalong a Seheberu yeo e swanago le mantšu ao Paulo a a tsopotšego. Ka gona, moapostola yo o be a bolela ka’ng ge a be a re: “Yo mongwe le yo mongwe yo a bitšago leina la Jehofa a tlogele go se loke”? Pele ga ge Paulo a ka bolela mantšu ao, o tsopotše Numeri kgaolo 16, yeo e bolelago ka borabele bja Kora. Na polelwana ya bobedi le yona e ka ba e tswalana le ditiragalo tša borabele bjoo?

5-7. Ke ditiragalo dife tša mehleng ya Moshe tšeo di re thušago go kwešiša mantšu a Paulo ao a begilwego go 2 Timotheo 2:19? (Bona seswantšho seo se lego mathomong a sehlogo.)

5 Beibele e re Dathane le Abirama, e lego barwa ba Eliaba, ba ile ba tlatša Kora gomme ba etelela pele batho bao ba bego ba rabela go Moshe le Arone. (Num. 16:1-5) Ba ile ba bontšha phaa gore ga ba hlomphe Moshe le gore ba gana matla a gagwe a bolaodi ao a a neilwego ke Modimo. Marabele ao a ile a tšwela pele a dula gare ga batho ba Jehofa, ka go re’alo a bea kotsing bomoya bja bao ba botegago. Ge go fihlile letšatši la gore Jehofa a bontšhe phapano magareng ga barapedi ba gagwe ba botegago le marabele, o ile a nea taelo e lebanyago.

6 Beibele e re: “Ke moka Jehofa a botša Moshe a re: ‘Bolela le setšhaba o re: “Tlogang kgauswi le ditente tša Kora, Dathane le Abirama!”’ Ka morago ga moo Moshe a ema a ya go Dathane le Abirama gomme banna ba bagolo ba Isiraele ba sepela le yena. A bolela le setšhaba a re: ‘Hle tlogang ditenteng tša batho ba ba kgopo gomme le se ke la swara selo sa bona, gore le se ke la gogolwa dibeng tša bona ka moka.’ Gateetee setšhaba sa tloga pele ga tente ya Kora, ya Dathane le ya Abirama go tšwa ka mahlakoreng ohle.” (Num. 16:23-27) Ke moka Jehofa a bolaya marabele ao ka moka. Eupša barapedi ba Modimo ba botegago—bao ka go tloga ditenteng tša batho ba kgopo ba ilego ba tlogela go se loke—ba ile ba phološwa.

7 Jehofa o bona seo se lego ka pelong! O bona go botega ga batho ba gagwe. Lega go le bjalo, batho ba gagwe bao ba botegago ba ile ba swanelwa ke go gata mogato o itšego ka gore ba ikaroganye le ba sa lokago. Ka gona, go ka direga gore Paulo o be a bolela ka pego yeo e lego go Numeri 16:5, 23-27 ge a be a ngwala gore: “Yo mongwe le yo mongwe yo a bitšago leina la Jehofa a tlogele go se loke.” Phetho yeo e dumelelana le mantšu a Paulo ao a rego: “Jehofa o tseba ba gagwe.”—2 Tim. 2:19.

“PHEMA DINGANGIŠANO TŠA BOŠILO LE TŠA GO HLOKA TSEBO”

8. Ke ka baka la’ng go fo diriša leina la Jehofa goba go ba setho sa phuthego ya Bokriste go se gwa lekana?

8 Ka go bolela ka ditiragalo tšeo tša mehleng ya Moshe, Paulo o be a gopotša Timotheo bohlokwa bja gore a gate mogato wa go šireletša tswalano ya gagwe ya bohlokwa le Jehofa. Go fo ba ka phuthegong ya Bokriste go be go se gwa lekana, go swana le ge go fo bitša leina la Jehofa go be go se gwa lekana mehleng ya Moshe. Barapedi ba botegago ba swanetše go gata mogato ka go se dikadike gore ba tlogele go se loke. Se se be se e ra go re’ng go Timotheo? Gona batho ba Jehofa  lehono ba ka ithuta’ng keletšong ya Paulo e buduletšwego?

9. “Dingangišano tša bošilo le tša go hloka tsebo” di ile tša kgoma bjang phuthego ya Bokriste ya lekgolong la pele la nywaga?

9 Lentšu la Modimo le re nea keletšo e lebanyago ya mabapi le mehuta ya go se loke yeo Bakriste ba swanetšego go e tlogela goba go e gana. Ka mohlala, ditemaneng tša kgauswi le 2 Timotheo 2:19, Paulo o botša Timotheo gore ‘a se ke a lwa le ba bangwe ka mantšu’ le gore a ‘pheme dipolelo tša lefeela.’ (Bala 2 Timotheo 2:14, 16, 23.) Ditho tše dingwe tša phuthego di be di kgothaletša dithuto tša bohlanogi. Le gona go bonagala ba bangwe ba be ba tšweletša dikgopolo tše di tsošago dingangišano. Gaešita le ge dikgopolo tše bjalo di be di sa nape di ganetšana le Mangwalo, di be di baka dikarogano. Di ile tša dira gore go be le dingangišano le go lwa ka mantšu, tša dira gore phuthego e se phele gabotse moyeng. Ke ka baka leo Paulo a gateletšego bohlokwa bja go “phema dingangišano tša bošilo le tša go hloka tsebo.”

10. Re swanetše go arabela bjang ge re kopana le dithuto tša bohlanogi?

10 Lehono ga se gantši batho ba Jehofa ba hlaselwa ke bohlanogi ka phuthegong. Lega go le bjalo, ge re ka kopana le dithuto tšeo e sego tša Mangwalo, go sa šetšwe gore re kopana le tšona kae, re swanetše go di gana ka ntle le go dikadika. E tla ba gabošilo go ngangišana le bahlanogi, e ka ba ge re kopana le bona goba ka go bolela le bona mekerong ya Inthanete goba ka mohuta le ge e le ofe wa poledišano. Gaešita le ge rena re ka ba re ipotša gore re nyaka go thuša motho yoo, poledišano e bjalo e tla ba e sa dumelelane le keletšo ya Mangwalo yeo re sa tšwago go e ahlaahla. Go e na le moo, ka ge re le batho ba Jehofa, re phema bohlanogi ka mo go feletšego, ee, re a bo gana.

Phema go ngangišana le bahlanogi (Bona serapa 10)

11. Ke’ng seo se ka tsošago “dingangišano tša bošilo,” gona bagolo ba Bakriste ba ka bea mohlala o mobotse bjang tabeng ye?

11 Ka ntle le bohlanogi, go na le dilo tše dingwe tšeo di ka šitišago khutšo ya phuthego. Ka mohlala, dipono tše di fapafapanego ka boithabišo di ka tsoša “dingangišano tša bošilo le tša go hloka tsebo.” Go ba gona, ge motho yo a itšego a kgothaletša boithabišo bjo bo sa dumelelanego le ditekanyetšo tša Jehofa tša boitshwaro, bagolo ba Bakriste ga se ba swanela go fo kgotlelela boitshwaro bjo bo bjalo e le feela go phema dingangišano. (Ps. 11:5; Baef. 5:3-5) Lega go le bjalo, bagolo ba ba šedi gore ba se gapeletše dipono tša bona. Ba kgomarela ka potego keletšo ya Mangwalo yeo e neilwego balebeledi ba Bakriste yeo e rego: “Dišang mohlape wa Modimo woo le o hlokometšego, . . . e se be ka go buša bao e lego bohwa bja Modimo, eupša e be ka go ba mehlala go mohlape.”—1 Pet. 5:2, 3; bala 2 Bakorinthe 1:24.

12, 13. (a) Dihlatse tša Jehofa di lebelela bjang taba ya go kgetha boithabišo, gona di diriša melao efe ya motheo ya Beibele? (b) Melao ya motheo yeo e ahlaahlilwego go serapa 12 e šoma bjang ditabeng tša motho ka noši?

12 Tabeng ya boithabišo, mokgatlo wa rena ga o hlahlobe dimobi tše itšego, dipapadi tša dibidio, dipuku goba dikoša tše itšego e le gore o bee molao wa dilo tšeo re swanetšego go di phema. Ka baka la’ng? Beibele e kgothaletša motho yo mongwe le yo mongwe go tlwaetša ‘matla a gagwe a go hlatha gore a kgethologanye se se nepagetšego le se se fošagetšego.’ (Baheb. 5:14) Beibele e na le melao ya motheo yeo Mokriste a ka naganišišago ka yona ge a kgetha boithabišo. Dikarolong ka moka tša bophelo, pakane ya rena e swanetše go ba go ‘tšwela pele re kgonthišetša se se amogelegago go Morena.’ (Baef. 5:10) Beibele e ruta gore dihlogo tša malapa di na le matla a taolo, ka gona di ka gana boithabišo bjo itšego ka malapeng a tšona. *1 Bakor. 11:3; Baef. 6:1-4.

13 Melao ya motheo ya Beibele yeo e ahlaahlilwego  ka mo godimo ga e šome feela tabeng ya go kgetha boithabišo. Dipono tše di sa swanego mabapi le moaparo le go itokiša, tša maphelo le dijo gotee le ditaba tše dingwe tša motho ka noši le tšona di ka tsoša dingangišano. Ka go re’alo, ge e ba go se na molao wa motheo wa Mangwalo wo o tshelwago, ka bohlale batho ba Jehofa ba phema go ngangišana ka ditaba tše bjalo, “gobane mohlanka wa Morena ga se a swanela go lwa eupša o swanetše go ba bonolo [go ba šedi] go bohle.”—2 Tim. 2:24.

PHEMA BAGWERA BA BABE!

14. Paulo o boletše seswantšho sefe go bontšha bohlokwa bja go phema bagwera ba babe?

14 Ke ka tsela efe e nngwe yeo bao ba ‘bitšago leina la Jehofa ba ka tlogelago go se loke’? Ke ka go phema go gwerana le batho bao ba dirago dilo tše di sa lokago. Hlokomela gore ka morago ga gore Paulo a bolele ka seswantšho sa “motheo o tiilego wa Modimo” o ile a bolela seswantšho se sengwe. O ngwadile mabapi le ‘ntlo e kgolo’ yeo go yona go se nago “dibjana tša gauta le tša silifera feela, eupša go bile [go nago] le tša kota le tša letsopa, gomme tše dingwe ke tša morero o hlomphegago eupša tše dingwe ke tša morero o sa hlomphegego.” (2 Tim. 2:20, 21) Ke moka o ile a kgothaletša Bakriste gore ba ‘katoge,’ goba ba ikaroganye le dibjana tšeo di dirišetšwago “morero o sa hlomphegego.”

15, 16. Re ka ithuta’ng seswantšhong sa ‘ntlo e kgolo’?

15 Seswantšho se se ra go re’ng? Paulo o swantšha phuthego ya Bokriste le ‘ntlo e kgolo,’ gomme ditho tša phuthego o di swantšha le “dibjana,” goba didirišwa tša ka ntlong. Ka ntlong, dibjana tše dingwe di ka ba le ditšhila tše kotsi ka baka la go se hlatswiwe gabotse. Mong wa ntlo o tla beela ka thoko dibjana tšeo gore di se šilafatše dibjana tše dingwe tše di hlwekilego tšeo di dirišetšwago go apea.

16 Ka mo go swanago, batho ba Jehofa lehono bao ba katanelago go phela maphelo a hlwekilego, ba swanetše go phema go gwerana le batho ba itšego ka phuthegong bao ba tlwaetšego go hlokomologa melao ya  motheo ya Jehofa. (Bala 1 Bakorinthe 15:33.) Ge e ba re swanetše go phema batho ba itšego ka gare ga phuthego, gona go bohlokwa kudu gore re ‘furalele’ goba re pheme go gwerana le bao ba lego ka ntle ga phuthego, bao ba bantši ba bona e lego ‘barati ba tšhelete, ba sa kwego batswadi, ba sa botegego, bathomeletši, ba bogale, ba go se rate go loka, baeki, le bao ba ratago maipshino go e na le go rata Modimo’!—2 Tim. 3:1-5.

JEHOFA O ŠEGOFATŠA GO GATA GA RENA MOGATO KA GO SE DIKADIKE

17. Baisiraele ba botegago ba ile ba tlogela go se loke ka tekanyo e kaakaa’ng?

17 Beibele e bolela ka go lebanya kamoo Baisiraele ba ilego ba gata mogato ka go se dikadike ge ba be ba botšwa gore ba “[tloge] kgauswi le ditente tša Kora, Dathane le Abirama.” Pego yeo e re “gateetee setšhaba sa tloga.” (Num. 16:24, 27) Ga se ba ka ba dikadika goba go senya nako. Le gona lengwalo le le bontšha tekanyo yeo ba ilego ba kwa ka yona. Ba ile ba “tloga . . . go tšwa ka mahlakoreng ohle.” Batho ba bao ba botegago ba be ba sa nyake go hlotšetša ka mahlakoreng a mabedi. Ba be ba ekwa ka dipelo ka moka. Ba ile ba thekga Jehofa ka go tia gomme ba tlogela go se loke. Re ka ithuta’ng mohlaleng wo?

18. Paulo o be a naganne ka’ng ge a be a kgothaletša Timotheo gore a “[tšhabe] dikganyogo tša bofsa”?

18 Ge go tliwa tabeng ya go šireletša tswalano ya rena le Jehofa, re swanetše go gata mogato kapejana le ka go se dikadike. Paulo o be a naganne ka seo ge a be a kgothaletša Timotheo gore a “[tšhabe] dikganyogo tša bofsa.” (2 Tim. 2:22) Ka nako yeo, Timotheo o be a šetše a godile, mohlomongwe a le nywageng ya bo-30. Lega go le bjalo, “dikganyogo tša bofsa” tša bošilo ga di ye ka nywaga. Ge Timotheo a be a ka ba le dikganyogo tše bjalo, o be a swanetše go di ‘tšhabela.’ Ka mantšu a mangwe, Timotheo o be a swanetše go ‘tlogela go se loke.’ Jesu o boletše molaetša o swanago ge a be a re: “Ge e ba leihlo la gago le go diriša sebe, le gonye o le lahlele kgole le wena.” (Mat. 18:9) Lehono, Bakriste bao ba tšeelago godimo keletšo ye ba gata mogato kapejana ge go na le seo se beago bomoya bja bona kotsing, ga ba dikadike goba go senya nako.

19. Ba bangwe lehono ba gatile mogato bjang ka go se dikadike gore ba itšhireletše dikotsing tša moya?

19 Batho ba bangwe bao ba bego ba rata bjala pele e ka ba Dihlatse ba dirile phetho ya gore ba se sa kgwatha dino tše di tagago. Ba bangwe ba phema mehuta e itšego ya boithabišo yeo e sa fošagalago eupša e ka gakatšago mafokodi a bona a boitshwaro. (Ps. 101:3) Ka mohlala, ngwanabo rena yo mongwe pele e ka ba Hlatse o be a tlwaetše go ya mafelong a go tantsha moo go dirwago boitshwaro bjo bo gobogilego. Eupša ka morago ga go ithuta therešo, o phema ka mo go feletšego go tantsha gaešita le dipokanong tša Dihlatse ka ge a tšhaba gore o tla tsoša dikganyogo tše di fošagetšego goba go gopola dilo tša nakong e fetilego. Ke therešo gore ga se gwa letelwa gore Bakriste ba pheme bjala ka mo go feletšego, go tantsha goba dilo tše dingwe tšeo e sego phošo go di dira. Lega go le bjalo, go letetšwe gore ka moka ga rena re gate mogato ka go se dikadike le ka mo go feletšego gore re itšhireletše dikotsing tša moya.

20. Gaešita le ge go ka fo se be bonolo go ‘tlogela go se loke,’ ke’ng seo se re kgothatšago?

20 Tokelo ya go bitšwa ka leina la Modimo e sepedišana le boikarabelo. Re swanetše go ‘tlogela go se loke’ gomme re ‘furalele se sebe.’ (Ps. 34:14) Ke therešo gore ga se ka mehla go lego bonolo go dira seo. Eupša ke mo go kgothatšago gakaakang go tseba gore Jehofa o tla dula a rata “ba gagwe” le bao ba kgomarelago ditsela tša gagwe tša go loka.—2 Tim. 2:19; bala 2 Dikoronika 16:9a.

^ ser. 12 Bona sehlogo seo se lego go jw.org/nso seo se rego, “Na le Thibela Dimobi, Dipuku Goba Dikoša tše Itšego?” ka tlase ga MABAPI LE RENA > DIPOTŠIŠO TŠEO DI BOTŠIŠWAGO KUDU.