Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  June 2014

Thuša ba Bangwe go Fihlelela Bokgoni bja Bona ka Botlalo

Thuša ba Bangwe go Fihlelela Bokgoni bja Bona ka Botlalo

“Ke tla nea keletšo leihlo la ka le le go wena.”—PS. 32:8.

1, 2. Jehofa o lebelela bjang bahlanka ba gagwe ba mo lefaseng?

GE BATSWADI ba bogetše bana ba bona ba bapala, gantši ba makatšwa ke bokgoni bja tlhago bjoo ba nago le bjona. Na le wena o lemogile seo? O ka hwetša gore ngwana yo mongwe o kgona go dira dilo ka lebelo goba o na le bokgoni go tša dipapadi, mola ngwana wa gabo a kgona dipapadi tše di sa nyakego matla. Eupša go sa šetšwe ditalente tša bana ba bona, batswadi ba thabela go ba thuša go di fihlelela ka botlalo.

2 Jehofa le yena o kgahlegela kudu bana ba gagwe ba mo lefaseng. O lebelela bahlanka ba gagwe ba mehleng yeno e le “matsaka a ditšhaba ka moka.” (Hag. 2:7) Ke matsaka go yena kudukudu ka baka la tumelo ya bona le boineelo bja bona. Lega go le bjalo, o ka ba o lemogile gore Dihlatsegotee le wena lehono di na le bokgoni bjo bo sa swanego. Bana babo rena ba bangwe ke diboledi tše matla mola ba bangwe e le dikgwari go rulaganyeng dilo. Dikgaetšedi tše dintši di kgona go ithuta maleme a šele le go a diriša bodireding, mola tše dingwe di bea mohlala o mobotse kudu go kgothatšeng ba bangwe goba go hlokomeleng balwetši. (Baroma 16:1, 12) Na ga re thabele go ba le Bakriste ba bjalo ka moka ka phuthegong?

3. Ke dipotšišo dife tšeo re tlago go di ahlaahla sehlogong se?

3 Lega go le bjalo, badumedigotee le rena ba bangwe, go akaretša bana babo rena ba banyenyane goba bao ba sa tšwago go kolobetšwa, ba ka ba ba ikwa ba se gae ga mahlaku ka phuthegong. Re ka  ba thuša bjang go fihlelela bokgoni bja bona ka botlalo? Ke ka baka la’ng re swanetše go katanela go šetša kudu dika tša bona tše dibotse, ka go re’alo ra ba lebelela ka tsela yeo Jehofa a ba lebelelago ka yona?

JEHOFA O BONA DIKA TŠE DIBOTSE GO BAHLANKA BA GAGWE

4, 5. Pego yeo e lego go Baahlodi 6:11-16 e bontšha bjang gore Jehofa o bona seo bahlanka ba gagwe ba ka kgonago go se dira?

4 Dipego tše mmalwa tša ka Beibeleng di bontšha gabotse gore Jehofa ga a fo bona dika tše dibotse go bahlanka ba gagwe, eupša o bona le dilo tše dingwe tšeo ba ka kgonago go di dira. Ka mohlala, ge Gideone a be a kgethwa gore a hlakodiše batho ba Modimo bao ba bego ba tlaišwa ke Bamidiane, o swanetše go ba a ile a makatšwa ke tumedišo ya morongwa yeo e rego: “Jehofa o na le wena, wena monna yo matla wa mogale.” Go bonagala ka nako yeo Gideone a be a sa ipone e le “monna yo matla.” O ile a bolela mafokodi a gagwe le go ipona a se bohlokwa. Eupša poledišano yeo e ilego ya latela e ile ya bontšha gore ruri Jehofa o be a na le pono e botse kudu ka mohlanka yo wa gagwe go feta kamoo Gideone a bego a itebelela ka gona.—Bala Baahlodi 6:11-16.

5 Jehofa o be a kgodišegile gore Gideone o tla hlakodiša Baisiraele ka gobane O bone bokgoni bja gagwe. Ka mohlala, morongwa wa Jehofa o bone ge Gideone a be a diriša matla a gagwe ka moka go fola korong. Morongwa yoo o be a lemogile selo se sengwe gape ka Gideone. Mehleng ya Beibele, gantši balemi ba be ba folela mabele ka ntle gore moya o kgone go hlokola mooko. Se se makatšago ke gore Gideone o be a folela korong segatelong sa morara ka sephiring gore ge Bamidiane ba ka tšwelela a kgone go e uta. A bohlale bjo bokaakang! Ka gona ga go makatše ge Jehofa a ile a lebelela Gideone e se feela molemi yo bohlale, eupša gape e le monna yo a lego šedi. Ee, Jehofa o ile a bona seo Gideone a bego a ka kgona go se dira gomme a mo diriša.

6, 7. (a) Tsela yeo Jehofa a bego a lebelela moporofeta Amose ka yona e be e fapana bjang le yeo Baisiraele ba bangwe ba bego ba mo lebelela ka yona? (b) Ke dilo dife tšeo di bontšhago gore Jehofa o be a se a dira phošo ka go kgetha Amose?

6 Mohlala wa moporofeta Amose le wona o re bontšha gore Jehofa o bona seo bahlanka ba gagwe ba ka kgonago go se dira, gaešita le ge batho ba bantši ba ka ba ba ile ba lebelela Amose e le motho wa maemo a tlasana goba wa go se re selo. Amose o itlhalositše e le modiši wa dinku le mohlabi wa mago a dihlare tša mesikamore—e lego dijo tšeo di bego di lebelelwa e le tša badiitšana. Ge Jehofa a be a kgetha Amose gore a iše molaetša wa kahlolo go mmušo wa meloko e lesome wa Isiraele wa barapedi ba diswantšho, go ka direga gore Baisiraele ba bangwe ba ile ba nagana gore Jehofa ga se a kgetha gabotse.—Bala Amose 7:14, 15.

7 Amose o be a etšwa motseng wo o lego lekatana, eupša o be a na le tsebo ka metlwae le babuši ba mehleng ya gagwe. Ga go pelaelo gore o be a tseba maemo a kua Isiraele go tloga le go dula, e bile a ka ba a ithutile ka ditšhaba tša kgauswi le moo go babapatši ba basepedi bao a bego a gwebišana le bona. (Amose 1:6, 9, 11, 13; 2:8; 6:4-6) Lehono diithuti tše dingwe tša Beibele di reta Amose gore ke mongwadi yo a nago le bokgoni. Ga se feela gore moporofeta yo o dirišitše mantšu a bonolo le a matla eupša gape o bapeditše dilo gabotse le go bapala ka mantšu ka bokgwari. Ruri sebete seo Amose a ilego a se bontšha ge a be a araba moperisita wa moradia e lego Amatsia, e bile bohlatse bja gore Jehofa ga se a dira phošo ka go mo kgetha gomme a diriša bokgoni bja Amose bjoo mathomong bo bego bo sa bonagale.—Amose 7:12, 13, 16, 17.

8. (a) Jehofa o ile a kgonthišetša Dafida eng? (b) Ke ka baka la’ng mantšu ao a lego go Psalme 32:8 a kgothatša bao ba sa ikholofelego goba bao ba sa kgonego go dira dilo tše itšego?

8 Ee, Jehofa o bona dilo tšeo mohlanka yo mongwe le yo mongwe wa gagwe a ka kgonago go di dira. O ile a kgonthišetša Kgoši Dafida gore o tla dula a mo hlahla, ‘leihlo la gagwe  le le go yena.’ (Bala Psalme 32:8.) Na o bona lebaka leo re swanetšego go kgothatšwa ke seo? Gaešita le ge re ka ba re sa ikholofele, Jehofa a ka re thuša go dira dimaka gomme ra fihlelela dipakane tšeo re bego re nagana gore re ka se tsoge re di fihleletše. Go etša ge morutiši yo a nago le bokgoni a ka hlahla morutwana yo a se nago phihlelo gore a dire tšwelopele, Jehofa o ikemišeditše go re hlahla ge re dutše re dira tšwelopele moyeng. Le gona Jehofa a ka diriša badumedigotee le rena go re thuša go dira dilo tšeo re bego re nagana gore re ka se tsoge re kgonne go di dira. Bjang?

ŠETŠA KUDU DIKA TŠE DIBOTSE TŠA BA BANGWE

9. Re ka diriša bjang keletšo ya Paulo ya gore re “kgahlegele” ditaba tša ba bangwe?

9 Paulo o kgothaleditše Bakriste ka moka gore ba “kgahlegele” ditaba tša badumedigotee le bona. (Bala Bafilipi 2:3, 4.) Moko wa keletšo ya Paulo ke gore re swanetše go lemoga dika tše dibotse tšeo ba bangwe ba nago le tšona gomme re di tšeele godimo. Re ikwa bjang ge motho yo mongwe a re reta ka tšwelopele yeo re e dirilego? Gantši seo se re tutueletša go dira mo go oketšegilego le go ntšha ka ga tšhwene. Ka mo go swanago, ge re bontšha badumedigotee le rena gore ba bohlokwa, re ba thuša go gola moyeng le gore ba atlege.

10. Ke bomang bao ka mo go kgethegilego re swanetšego go ba kgahlegela?

10 Ke bomang bao ka mo go kgethegilego re swanetšego go ba kgahlegela? Ke therešo gore ka moka ga rena re nyaka gore batho ba bangwe ba re kgahlegele. Lega go le bjalo, bana babo rena ba banyenyane goba bao ba sa tšwago go kolobetšwa ke bona ka mo go kgethegilego ba swanetšego go kwa gore ba a akaretšwa medirong ya phuthego. Se se tla ba thuša go kwešiša gore le bona ke karolo ya phuthego. Ka lehlakoreng le lengwe, ge re ka palelwa ke go bontšha bana babo rena ba gore re a ba kgahlegela, seo se ka dira gore ba dikadike go katanela go fihlelela maikarabelo a itšego ka phuthegong, mola Lentšu la Modimo le ba kgothaletša go dira bjalo.—1 Tim. 3:1.

11. (a) Mogolo yo mongwe o ile a thuša bjang lesogana le itšego gore le se sa ba le dihlong? (b) O ithuta’ng phihlelong ya Julien?

11 Ludovic, e lego mogolo yo a hotšwego ke kgahlego yeo a e bontšhitšwego e sa le yo monyenyane o re: “Ge ke bontšha ngwanabo rena kgahlego e tšwago pelong, o dira tšwelopele ka lebelo.” Ge Ludovic a bolela ka lesogana le lengwe leo le bego le na le dihlong leo le bitšwago Julien, o re: “Ka ge Julien a be a sa ikholofele ge a leka go dira dilo tše itšego ka phuthegong, o be a feleletša a sa tsebe seo a se dirago. Eupša ke ile ka lemoga gore o be a le botho kudu e bile a tloga a nyaka go thuša ba bangwe ka phuthegong. Ka gona, go e na le gore ke mo swaye diphošo, ke ile ka šetša kudu dika tša gagwe tše dibotse gomme ka mo kgothatša.” Ge nako e dutše e eya, Julien o ile a ba mohlanka wa bodiredi, e bile gona bjale ke mmulamadibogo wa ka mehla.

BA THUŠE GO FIHLELELA BOKGONI BJA BONA KA BOTLALO

12. Ke selo sefe sa bohlokwa seo re swanetšego go se dira gore re thuše ba bangwe go fihlelela bokgoni bja bona ka botlalo? Nea mohlala.

12 E le gore re kgone go thuša ba bangwe go fihlelela bokgoni bja bona ka botlalo, re swanetše go ba šedi. Go etša ge phihlelo ya Julien e bontšha, re ka swanelwa ke go hlokomologa mafokodi a ba bangwe gomme ra šetša kudu dika tša bona tše dibotse le bokgoni bjoo ba ka bo hlagolelago. Jesu o ile a dira sona seo go moapostola Petro. Gaešita le ge ka dinako tše dingwe Petro a be a bonagala a sa tsebe taba tša gagwe, Jesu o ile a bolela e sa le pele gore o be a tla tsepama go etša leswika.—Joh. 1:42.

13, 14. (a) Baranaba o ile a bontšha temogo bjang ge a be a dirišana le Mareka? (b) Ngwanabo rena yo mongwe wa mofsa o ile a holwa bjang ke thušo ya go swana le yeo e ilego ya newa Mareka? (Bona seswantšho seo se lego mathomong a sehlogo.)

13 Baranaba o ile a bontšha temogo e swanago ge a be a dirišana le Johane, yoo a bego a na le sefane sa Seroma sa Mareka. (Dit. 12: 25) Leetong la mathomo la Paulo la boromiwa a na le Baranaba, Mareka e be e le “modiredi” wa bona, mohlomongwe a ba hlokomela ka dilo tša nama. Eupša ge ba fihla Pamfilia, gateetee Mareka o ile a ba tlogela. Ba ile ba swanelwa ke go ya ka leboa ba nnoši go phatša tikologo yeo e tletšego ka bahlakodi. (Dit. 13:5, 13) Lega go le bjalo, go bonagala Baranaba a ile a hlokomologa go se botege ga Mareka gomme ka morago a diriša sebaka seo go mo tlwaetša ka botlalo. (Dit. 15:37-39) Se se ile sa thuša lesogana le go ba mohlanka wa Jehofa yo a godilego tsebong. Se se kgahlišago gape ke gore Mareka o be a le kua Roma le Paulo, yoo ka nako yeo a bego a golegilwe, gomme a romela gotee le yena madume go Bakriste ba phuthegong ya Kolose, e bile moapostola Paulo o ile a mmolela gabotse. (Bakol. 4:10) Akanya kamoo Baranaba a swanetšego go ba a ile a thaba ka gona ge Paulo a be a kgopela Mareka gore a tle a mo thuše.—2 Tim. 4:11.

14 Alexandre, e lego mogolo yo a sa tšwago go kgethwa, o gopola kamoo ngwanabo rena yo mongwe a mo thušitšego ka gona. O re: “Ge ke be ke sa le yo monyenyane, ke be ke tšhoga kudu ge ke rapela pele ga batho. Mogolo yoo o ile a mpontšha kamoo nka beakanyago dikgopolo tša ka le go thekga ditho. Go e na le gore a se sa hlwa a itshwenya ka go nkgopela go rapela, o ile a dula a nkgopela go dira bjalo dibokeng tša tirelo ya tšhemo. Ge nako e dutše e eya, ke ile ka se sa tšhoga kudu.”

15. Paulo o ile a bontšha bjang gore o be a rata bana babo kudu?

15 Ge re bona seka se itšego se sebotse go Mokristegotee, na re a mmotša? Go Baroma kgaolo 16, Paulo o ile a bolela ka badumedigotee le yena ba ka godimo ga 20 bao dika tša bona di bego di dira gore a ba rate kudu. (Baroma 16:3-7, 13) Ka mohlala, Paulo o ile a dumela gore Andronika le Juniase ba hlanketše Kriste ka nywaga e mentši go mo feta, a gatelela kgotlelelo ya bona ya Bokriste. Le gona Paulo o boletše gabotse ka mmago Rufose, mohlomongwe a naganne ka tlhokomelo e lerato yeo a ilego a mmontšha yona pejana.

Frédéric (ka go le letshadi) o ile a kgothatša Rico go dula a ikemišeditše go hlankela Jehofa (Bona serapa 16)

16. Mafelelo e ka ba afe ge re reta bana babo rena ba banyenyane?

16 Go ka ba le mafelelo a mabotse ge re reta ba bangwe ka go tšwa pelong. Nagana ka Rico, e lego lesogana la kua Fora leo le bego le nyamišitšwe kudu ke gore tatago lona yo e bego e se Hlatse o be a le ganetša go kolobetšwa. Rico o ile a nagana gore o be a tla swanelwa ke go leta go fihlela e le yo mogolo pele a ka hlankela Jehofa ka botlalo. Le gona o be a nyamišitšwe ke gore bana ba bangwe sekolong ba a mo kwera. Frédéric, e lego mogolo wa phuthego yo a bego a kgopetšwe go ithuta le mošemane yo, o re: “Ke ile ka reta Rico ka gobane kganetšo yeo a bego a lebeletšane le yona e be e bontšha gore o na le sebete sa go bolela ka tumelo ya gagwe.” Mantšu a a theto a ile a kgothatša Rico moo a ilego a ikemišetša go dula e le mohlala gomme a mo thuša go batamela kgauswi le tatagwe. Rico o ile a kolobetšwa a na le nywaga e 12.

Jérôme (ka go le letona) o thušitše Ryan go swanelegela go ba moromiwa (Bona serapa 17)

17. (a) Re ka thuša bjang bana babo rena go dira tšwelopele? (b) Moromiwa yo mongwe o be a thuša bana babo rena ba bafsa bjang, gona mafelelo e bile afe?

17 Nako le nako ge re reta badumedigotee  le rena ge ba phethile dikabelo tša bona gabotse goba ba dirile maiteko a mabotse, re ba matlafaletša go hlankela Jehofa ka botlalo. Sylvie, * yo a nago le nywaga e mentši a hlankela Bethele ya kua Fora, o boletše gore dikgaetšedi le tšona di ka tšea karolo go reteng bana babo rena. Kgaetšedi yo o hlalositše gore basadi ba na le bokgoni bja go lemoga maiteko goba dilo tšeo banna ba sa kgonego go di bona. Ka go re’alo, “mantšu a [tšona] a kgothatšo a ka tlatšana le a bana babo rena bao ba nago le phihlelo.” O okeditše ka gore: “Ke lebelela go reta ba bangwe e le boikarabelo bja ka.” (Die. 3:27) Jérôme, e lego moromiwa kua French Guiana, o thušitše masogana a mantši go swanelegela tirelo ya boromiwa. O re: “Ke lemogile gore ge ke reta bana babo rena ba bafsa dikarolong tše itšego tša bodiredi bja bona goba ge ba neile dikarabo tše di kwagalago, ba kgothala kudu. Ke moka seo se dira gore ba kaonefatše bokgoni bja bona le go feta.”

18. Ke ka baka la’ng go šoma gotee le bana babo rena ba bafsa go le bohlokwa?

18 Le gona re ka tutueletša badumedigotee le rena go dira tšwelopele ya moya ka go šoma le bona. Mogolo a ka kgopela ngwanabo rena wa mofsa yo a nago le bokgoni bja dikhomphutha gore a mo phrinthele boitsebišo bjo itšego wepesaeteng ya jw.org bjoo bo ka kgothatšago batšofadi bao ba se nago dikhomphutha. Goba ge e ba o yo dira mešongwana e itšego Holong ya Mmušo, go re’ng o sa kgopele ngwanabo rena wa mofsa gore a šome gotee le wena? Ge o ka dira bjalo, o tla ba le dibaka tša go bona bokgoni bja bafsa, go ba reta le go bona kamoo ba arabelago ka gona.—Die. 15:23.

NAGANELANG KA MOSO

19, 20. Ke ka baka la’ng re swanetše go thuša ba bangwe go dira tšwelopele?

19 Ge Jehofa a be a kgetha Joshua gore a etelele Baisiraele pele, O ile a laela le Moshe gore a “kgothatše” le go ‘matlafatša’ Joshua. (Bala Doiteronomio 3:28.) Lehono batho ba bantši ba kgeregela ka phuthegong lefaseng ka bophara. Bakriste ka moka bao ba nago le phihlelo—e sego bagolo feela—ba ka thuša bana babo rena ba bafsa le bao ba sa tšwago go kolobetšwa go fihlelela bokgoni bja bona ka botlalo. Ka go re’alo, ba bantši ba bona ba tla tsenela tirelo ya nako e tletšego gomme ba bangwe ba bantši ba “swanelegela gabotse go ruta ba bangwe.”—2 Tim. 2:2.

20 Go sa šetšwe gore re kopanela le phuthego goba le sehlopha se senyenyane seo kgauswinyane se tla fetogago phuthego, anke re naganeleng ka moso. E le gore re kgone go dira bjalo, re swanetše go ekiša Jehofa, yoo ka mehla a lebelelago dika tše dibotse go bahlanka ba gagwe.

^ ser. 17 Leina le fetotšwe.