Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2014

“O Rate Moagišani wa Gago ka Mokgwa wo o Ithatago ka Wona”

“O Rate Moagišani wa Gago ka Mokgwa wo o Ithatago ka Wona”

‘Taelo ya bobedi ke ye: “O rate moagišani wa gago ka mokgwa wo o ithatago ka wona.”’—MAT. 22:39.

1, 2. (a) Jesu o itše taelo ya bobedi e kgolokgolo ke efe Molaong wa Moshe? (b) Ga bjale re tlo ahlaahla dipotšišo dife?

MOFARISEI yo mongwe o kile a leka Jesu ka go mmotšiša gore: “Morutiši, taelo e kgolokgolo Molaong wa Moshe ke efe?” Go etša ge go boletšwe sehlogong se se fetilego, Jesu o arabile ka gore “taelo e kgolokgolo” ke ye: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” Jesu o okeditše ka gore: “Ya bobedi ya go swana le yona ke ye: ‘O rate moagišani wa gago ka mokgwa wo o ithatago ka wona.’”—Mat. 22:34-39.

2 Jesu o itše re swanetše go rata moagišani wa rena ka tsela yeo re ithatago ka yona. Ka gona, re swanetše go ipotšiša gore: Ge e le gabotse moagišani wa rena ke mang? Re ka bontšha bjang gore re rata moagišani wa rena?

GE E LE GABOTSE MOAGIŠANI WA RENA KE MANG?

3, 4. (a) Jesu o ile a diriša seswantšho sefe go araba potšišo e rego: “Ge e le gabotse, ke mang yo e lego moagišani wa ka”? (b) Mosamaria o ile a thuša bjang monna yo a bego a hlakotšwe, a iteilwe e bile a tlogetšwe a le makgatheng a lehu le bophelo? (Bona seswantšho se se lego ka mo godimo.)

3 Re ka nagana ka moagišani e le motho yo a dulago kgauswi le  rena yoo e lego mogwera yo a ka re thušago. (Die. 27:10) Eupša ela hloko seo Jesu a se boletšego ge monna yo mongwe wa go itira moloki a be a mmotšiša gore: “Ge e le gabotse, ke mang yo e lego moagišani wa ka?” Jesu o ile a mo araba ka go laodiša seswantšho sa Mosamaria wa kgaugelo. (Bala Luka 10:29-37.) Re be re letetše gore moperisita wa Moisiraele le Molefi ba bontšhe lerato la boagišani ge ba be ba bona monna yo a bego a hlakotšwe, a iteilwe e bile a tlogetšwe a le makgatheng a lehu le bophelo. Lega go le bjalo, ba ile ba fo mo feta gomme ba se mo thuše ka selo. Monna yoo o ile a thušwa ke Mosamaria—motho yo a tšwago setšhabeng seo se bego se hlompha Molao wa Moshe eupša Bajuda ba se hloile.—Joh. 4:9.

4 Mosamaria wa kgaugelo o ile a leka go thuša monna yoo gore a fole ka go tšhela dintho tša gagwe ka makhura le beine. Ditenariase tše pedi tšeo a ilego a di nea mohlokomedi wa ntlo ya baeti di be di lekana le mogolo wa matšatši a e ka bago a mabedi. (Mat. 20:2) Ka gona go bonolo go bona gore ke mang yo e bego e le moagišani wa kgonthe wa monna yo a gobetšego. Ruri seswantšho se sa Jesu se re ruta gore re bontšhe baagišani ba rena kwelobohloko le go ba rata.

Bahlanka ba Jehofa ba bontšha baagišani ba bona lerato ntle le go senya nako (Bona serapa 5)

5. Bahlanka ba Jehofa ba ile ba bontšha bjang gore ba rata baagišani ba bona morago bjale nakong ya kotsi e nngwe ya tlhago?

5 Gantši ga go bonolo go hwetša batho bao ba nago le kwelobohloko go etša Mosamaria wa kgaugelo. Se se bjalo kudukudu “mehleng [ye] ya bofelo” moo batho ba bantši ba se nago lerato la tlhago, ba lego bogale e bile ba sa ratego go loka. (2 Tim. 3:1-3) Ka mohlala, maemo a thata a ka tšwelela dinakong tša dikotsi tša tlhago. Ela hloko seo se ilego sa direga ge Ledimo la Sandy le be le hlasela New York City mafelelong a October 2012. Karolong e nngwe ya motse wo yeo e bego e sentšwe kudu, batho ba ile ba utswetša badudi bao ba bego ba šetše ba tlaišega ka baka la go hloka mohlagase le dinyakwa tše dingwe tša bohlokwa. Yona tikologong yeo, Dihlatse tša Jehofa di ile tša rulaganya lenaneo la go thušana gotee le go thuša batho ba bangwe. Bakriste ba dira dilo tše bjalo ka gobane ba rata baagišani ba bona. Ditsela tše dingwe tša go bontšha gore re rata baagišani ba rena ke dife?

KAMOO RE KA BONTŠHAGO KA GONA GORE RE RATA BAAGIŠANI

6. Modiro wa rena wa boboledi o bontšha bjang gore re baagišani ba kgonthe?

6 Thuša batho moyeng. Re dira se ka go katanela go ba bontšha “khomotšo e tšwago Mangwalong.” (Baroma 15:4) Re bontšha gore re baagišani ba kgonthe ge re botša ba bangwe therešo ya Beibele modirong wa rena wa boboledi. (Mat. 24:14) Ruri re na le tokelo e kgolo ya go tsebatša molaetša wa Mmušo wo o tšwago go “Modimo yo a neago kholofelo”!—Baroma 15:13.

7. Molao wa Gauta ke ofe, gona re šegofatšwa bjang ge re o diriša?

7 Diriša Molao wa Gauta. Molao wo o tšwelela mantšung ao a boletšwego ke Jesu Thutong ya gagwe ya Thabeng ge a be a re: “Dilo tšohle tše le nyakago batho ba le dira tšona, le lena le ba dire tšona. Se ge e le gabotse, ke seo se bolelwago ke Molao le Baporofeta.” (Mat. 7:12) Ge re swara batho ba bangwe ka tsela yeo Jesu a re eleditšego ka yona, re dira seo se kgothaletšwago ke “Molao” (Genesi go fihla go Doiteronomio) le “Baporofeta” (dipuku tša boporofeta tša Mangwalo a Seheberu). Mangwalo ao a bontšha gabotse gore Modimo o šegofatša bao ba ratago ba bangwe. Ka mohlala, Jehofa o boletše a diriša Jesaya gore: “Bolokang toka le dire go loka. . . . Go thaba motho yo a dirago se.” (Jes. 56:1, 2) Ruri re a šegofatšwa ka gobane re swara baagišani ba rena ka lerato le ka toka.

8. Ke ka baka la’ng re swanetše go rata manaba a rena, gona go ka ba le mafelelo afe ge re dira bjalo?

8 Rata manaba a gago. Jesu o itše: “Le kwele  gore go ile gwa thwe: ‘O rate moagišani wa gago gomme o hloye lenaba la gago.’ Eupša ke re go lena: Tšwelang pele le rata manaba a lena le go rapelela bao ba le tlaišago, e le gore le itlhatsele le le barwa ba Tatago lena yo a lego magodimong.” (Mat. 5:43-45) Moapostola Paulo o ile a bolela ntlha e swanago ge a be a ngwala gore: “Ge e ba lenaba la gago le swerwe ke tlala, le fepe; ge e ba le nyorilwe, le nee sa go nwa.” (Baroma 12:20; Die. 25:21) Go ya ka Molao wa Moshe, motho o be a swanetše go thuša lenaba la gagwe go thuša pokolo ya lona yeo e welego le morwalo wa yona. (Ek. 23:5) Ka go šoma gotee ka tsela yeo, batho bao e kilego ya ba manaba e ka ba bagwera ba paale. Ka ge Bakriste ba rata manaba a bona, a mantši a fetošitše tsela yeo a bego a re swara ka yona. Ge e ba re bontšha manaba a rena lerato—gaešita le ao a re tlaišago o šoro—re tla thaba kudu ge a mangwe a ona a ka amogela therešo!

9. Jesu o boletše’ng mabapi le go dira khutšo le ngwanabo rena?

9 ‘Phegelela khutšo le batho bohle.’ (Baheb. 12:14) Ke therešo gore se se akaretša le bana babo rena, ka gobane Jesu o itše: “Ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge. Thoma ka go dira khutšo le ngwaneno, ke moka ge o boile, o iše mpho ya gago.” (Mat. 5:23, 24) Modimo o tla re šegofatša ge re rata ngwanabo rena e bile re gata mogato wa kapejana wa go dira khutšo le yena.

10. Ke ka baka la’ng re sa swanela go ba baswayadiphošo?

10 O se ke wa ba moswayadiphošo. Jesu o itše: “Tlogelang go ahlola gore le se ahlolwe, gobane kahlolo ye le ahlolago ka yona, le tla ahlolwa ka yona; kelo yeo le elago ka yona, ba tla le elela ka yona. Ka gona, ke ka baka la’ng o lebelela lehlokwa le le lego ka leihlong la ngwaneno eupša o sa šetše kota ye e lego ka leihlong la gago? Goba o ka botša bjang ngwaneno wa re: ‘Anke ke ntšhe lehlokwa le le lego ka leihlong la gago,’ mola wena o na le kota ka leihlong la gago? Wena moikaketši! Ntšha pele kota ka leihlong la gago, ke moka o tla bona gabotse kamoo o ka ntšhago lehlokwa ka leihlong la ngwaneno.” (Mat. 7:1-5) A tsela e matla gakaakaang ya go re botša gore re se ke ra sola diphošo tše dinyenyane tša ba bangwe mola rena re ka ba re na le diphošo tše dikgolo kudu!

 TSELA E KGETHEGILEGO YA GO BONTŠHA GORE RE RATA BAAGIŠANI

11, 12. Ke ka tsela efe e kgethegilego yeo re bontšhago gore re rata baagišani ba rena?

11 Re nyaka go bontšha ka tsela e kgethegilego gore re rata baagišani ba rena. Ka go swana le Jesu, re bolela ditaba tše dibotse tša Mmušo. (Luka 8:1) Jesu o laetše balatedi ba gagwe gore ba “dire batho ba ditšhaba ka moka barutiwa.” (Mat. 28:19, 20) Ka go kgatha tema ya rena go phethagatšeng taelo yeo, re thuša baagišani ba rena go tloga tseleng e petleke le yeo e phatlaletšego yeo e išago tshenyegong gomme ba sepele tseleng e pitlaganego yeo e išago bophelong. (Mat. 7:13, 14) Ga go pelaelo gore Jehofa o šegofatša maiteko a bjalo.

12 Ka go swana le Jesu, re thuša batho go lemoga gore ba nyaka dilo tša moya. (Mat. 5:3) Bao ba arabelago gabotse, re ba thuša go kgotsofatša senyakwa seo ka go ba botša “ditaba tše dibotse tša Modimo.” (Baroma 1:1) Bao ba amogelago molaetša wa Mmušo ba boelanywa le Modimo ka Jesu Kriste. (2 Bakor. 5:18, 19) Ka gona, ge re bolela ditaba tše dibotse re tloga re bontšha gore re rata baagišani ba rena ka tsela ya bohlokwa kudu.

13. O ikwa bjang ka go tšea karolo modirong wa rena re le bagoeledi ba Mmušo?

13 Ka go dira maeto a go boela le go swara dithuto tša magae tša Beibele tšeo di atlegago, re kgotsofatšwa ke go thuša batho go phela ka go dumelelana le ditekanyetšo tša Modimo tša go loka. Se se ka dira gore morutwana wa Beibele a dire diphetogo tše dikgolo bophelong. (1 Bakor. 6:9-11) Ruri ke mo go thabišago go bona kamoo Modimo a thušago bao “ba nago le tshekamelo e swanetšego ka bophelo bjo bo sa felego” go dira diphetogo tše di nyakegago gomme ba ba le tswalano ya kgauswi le yena. (Dit. 13:48) Bao ba bego ba nyamile e bile ba tshwenyegile ba thoma go thaba le go ba le kgodišego go Tatago rena wa legodimong. Go thabiša kudu go bona tšwelopele ya moya yeo e dirwago ke bao ba sa tšwago go thoma go kopanela! Na ga o dumele gore ke tšhegofatšo go bontšha gore re rata baagišani ka tsela ye e kgethegilego re le bagoeledi ba Mmušo?

TLHALOSO E BUDULETŠWEGO YA LERATO

14. Ka mantšu a gago, bolela tše dingwe tša dibopego tša lerato tšeo di hlalositšwego go 1 Bakorinthe 13:4-8.

14 Go latela seo Paulo a se ngwadilego mabapi le lerato ge re dirišana le baagišani ba rena go ka thibela mathata a mantši, gwa re tlišetša lethabo gomme gwa dira gore Modimo a re šegofatše. (Bala 1 Bakorinthe 13:4-8.) Anke re ahlaahleng ka bokopana seo Paulo a se boletšego mabapi le lerato gomme re bone kamoo re ka dirišago mantšu a gagwe ge re dirišana le baagišani ba rena.

15. (a) Ke ka baka la’ng re swanetše go se fele pelo le go ba botho? (b) Ke ka baka la’ng re swanetše go phema lehufa le go ikgantšha?

15 “Lerato ga le fele pelo e bile le botho.” Go etša ge Modimo a bontšhitše go se fele pelo le botho ge a dirišana le batho ba sa phethagalago, le rena re swanetše go se felele ba bangwe pelo le go ba bontšha botho ge ba dira diphošo e bile ba sa re naganele goba ba re kgopiša. “Lerato ga le hufege,” ka gona lerato la kgonthe le ka se dire gore re dume dilo tša motho yo mongwe goba ditokelo tša gagwe ka phuthegong. Go feta moo, ge e ba re na le lerato, re ka se ikgantšhe goba ra ikgogomoša. Beibele e re “mahlo a boikgogomošo le pelo e ikgantšhago, e lego lebone la ba kgopo, tšona ke sebe.”—Die. 21:4.

16, 17. Re ka dira dilo bjang ka go dumelelana le 1 Bakorinthe 13:5, 6?

16 Lerato le tla dira gore re sware baagišani ba rena ka seriti. Re ka se ba botše maaka, re ka se ba utswetše goba ra dira selo le ge e le sefe seo se tla dirago gore re tshele melao le melao ya motheo ya Jehofa. Le gona lerato le tla re thibela gore re se kgahlegele ditaba tša rena feela, eupša re kgahlegele le tša ba bangwe.—Bafil. 2:4.

17 Lerato la kgonthe ga le rumolege gabonolo  le gona “ga le boloke pego ya bobe” bjalo ka ge eka re ngwala fase ge ba bangwe ba re dira selo se itšego seo se bontšhago go hloka lerato. (1 Bathes. 5:15) Ge re ka boloka sekgopi, re ka se kgahliše Modimo, ge e le gabotse re tla ba re kgohletša mollo wo o ka laumago gomme wa gobatša rena le ba bangwe. (Lef. 19:18) Lerato le dira gore re thabe le therešo, eupša le ka se dire gore re “thabele go se loke,” gaešita le ge motho yo a re hloilego a swarwa gampe goba a tlaišega.—Bala Diema 24:17, 18.

18. Re ithuta’ng ka lerato go 1 Bakorinthe 13:7, 8?

18 Ela hloko tsela yeo Paulo a tšwetšego pele go hlalosa lerato. O itše lerato “le tiišetša tšohle.” Ge e ba motho yo a itšego a re fošeditše eupša a kgopela tshwarelo, lerato le re tutueletša go mo lebalela. Lerato “le dumela [dilo] tšohle” tšeo di lego ka Lentšung la Modimo gomme le dira gore re leboge dijo tša moya tšeo re di hwetšago. Lerato “le holofela [dilo] tšohle” tšeo di begilwego ka Beibeleng e bile le re tutueletša go nea ba bangwe mabaka a kholofelo ya rena. (1 Pet. 3:15) Le gona ge re lekwa, re rapela Modimo le go holofela gore o tla re thuša. Lerato “le kgotlelela tšohle,” e ka ba diphošo tše dikgolo tšeo motho yo mongwe a re diretšego tšona, tlaišo goba diteko tše dingwe. Ka godimo ga tšohle, “lerato le ka mohla ga le fele.” Le tla bontšhwa ke batho bao ba kwago go iša ka mo go sa felego.

TŠWELA PELE O RATA MOAGIŠANI WA GAGO KA MOKGWA WO O ITHATAGO KA WONA

19, 20. Ke keletšo efe ya Mangwalo yeo e swanetšego go re tutueletša go tšwela pele re rata baagišani ba rena?

19 Ka go diriša keletšo ya Beibele, re ka tšwela pele re rata baagišani ba rena. Lerato le bjalo le akaretša go rata batho ka moka, e sego feela ba morafo wa rena. Le gona re swanetše go gopola gore Jesu o itše: “O rate moagišani wa gago ka mokgwa wo o ithatago ka wona.” (Mat. 22:39) Modimo le Kriste ba letetše gore re rate baagišani ba rena. Ge e ba re sa kgonthišege ka seo re swanetšego go se dira boemong bjo itšego bjo bo akaretšago moagišani wa rena, anke re rapeleng Modimo gore a re hlahle ka moya o mokgethwa. Ge re dira bjalo, Jehofa o tla re šegofatša le go re thuša go dira dilo ka tsela e lerato.—Baroma 8:26, 27.

20 Taelo ya gore re rate moagišani wa rena ka mokgwa wo re ithatago ka wona e bitšwa “molao wa bogoši.” (Jak. 2:8) Ka morago ga gore Paulo a bolele ka ditaelo tše dingwe tše di lego Molaong wa Moshe, o itše: “Taelo le ge e le efe e nngwe yeo e lego gona, [e] akaretšwa ka lentšu le, le le rego: ‘O rate wa geno ka mokgwa wo o ithatago ka wona.’ Lerato ga le sware moagišani wa motho gampe; ka baka leo lerato ke phethagatšo ya molao.” (Baroma 13:8-10) Ka gona re swanetše go tšwela pele re rata baagišani ba rena.

21, 22. Ke ka baka la’ng re swanetše go rata Modimo le baagišani ba rena?

21 Ge re dutše re naganišiša ka mabaka a gore re rate baagišani ba rena, e tla ba mo gobotse gore re nagane ka mantšu a Jesu a gore Tatagwe o “hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.” (Mat. 5:43-45) Re swanetše go rata baagišani ba rena, go sa šetšwe gore ba lokile goba ga se ba loka. Go etša ge go bontšhitšwe pejana, tsela ya bohlokwa ya go bontšha lerato le bjalo ke ka go ba botša molaetša wa Mmušo. Ruri baagišani ba rena ba tla hwetša ditšhegofatšo ge e ba ba ka amogela ditaba tše dibotse!

22 Re na le mabaka a mantši a go rata Jehofa ka ditsela tšohle. Le gona go na le ditsela tše dintši tšeo ka tšona re ka bontšhago baagišani ba rena gore re a ba rata. Ka go rata Modimo le baagišani ba rena, re hlompha seo Jesu a se boletšego ka ditaelo tše tša bohlokwa. Ka godimo ga tšohle, re kgahliša Tatago rena wa legodimong e lego Jehofa.