Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2014

“O Rate Jehofa Modimo wa Gago”

“O Rate Jehofa Modimo wa Gago”

“O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.”—MAT. 22:37.

1. Ke ka baka la’ng lerato la Modimo le Morwa wa gagwe le ile la gola?

MORWA wa Jehofa e lego Jesu Kriste o itše: “Ke rata Tate.” (Joh. 14:31) O boletše le gore: “Tate o rata Morwa.” (Joh. 5:20) Seo ga se sa swanela go re makatša. Go ba gona, nywaga e mentši pele Jesu a ka tla lefaseng, e be e le “mošomi yo a nago le bokgoni” wa Modimo. (Die. 8:30) Ge Jehofa le Jesu ba dutše ba šoma gotee, Morwa yo o ile a ithuta dilo tše dintši ka dika tša Tatagwe le gona o be a na le mabaka a mantši kudu a go mo rata. Ge e le gabotse, go šoma gotee go ile gwa dira gore lerato la bona le gole.

2. (a) Lerato le akaretša’ng? (b) Re tlo ahlaahla dipotšišo dife?

2 Lerato le akaretša go ba le maikwelo a tseneletšego ka motho yo a itšego. Mopsalme Dafida o opetše ka gore: “Ke tla go rata, wena Jehofa matla a ka.” (Ps. 18:1) Le rena re swanetše go ikwa ka tsela yeo ka Modimo ka gobane o a re rata. Ge e ba re ekwa Jehofa, o tla re rata. (Bala Doiteronomio 7:12, 13.) Eupša na go a kgonega gore re rate Modimo e le ka kgonthe, le ge re sa kgone go mmona? Go rata Jehofa go bolela’ng? Ke ka baka la’ng re swanetše go mo rata? Gona re ka bontšha bjang gore re a mo rata?

 SEO SE KA DIRAGO GORE RE KGONE GO RATA MODIMO

3, 4. Ke ka baka la’ng go kgonega gore re rate Jehofa?

3 “Modimo ke Moya”; ka baka leo re ka se kgone go mmona. (Joh. 4:24) Lega go le bjalo, go a kgonega gore re rate Jehofa e bile Mangwalo a re laela go dira bjalo. Ka mohlala, Moshe o ile a botša Baisiraele gore: “O rate Jehofa Modimo wa gago ka pelo ya gago ka moka, ka moya wa gago ka moka le ka matla a gago ka moka.”—Doit. 6:5.

4 Ke ka baka la’ng go ka kgonega gore re rate Modimo ka dipelo tša rena ka moka? Ke ka gobane o re bopile re na le kganyogo ya dilo tša moya gomme a re nea bokgoni bja go bontšha lerato. Ge re kgotsofatša kganyogo ya rena ya dilo tša moya, lerato la rena go Jehofa le a gola gomme seo sa dira gore re be le mabaka a kgonthe a go thaba. Jesu o itše: “Go thaba bao ba lemogago gore ba nyaka dilo tša moya, ka ge Mmušo wa magodimo e le wa bona.” (Mat. 5:3) A. C. Morrison o boletše ka pukung ya gagwe ya Man Does Not Stand Alone mabapi le seo ba bangwe ba se bitšago kganyogo ya batho ya tlhago ya go nyaka go rapela gore: “Re swanetše go makala, go tlabega le go kgotsa ge re bona batho lefaseng ka moka ba tsoma motho yo a phagamego le go dumela go yena.”

5. Re tseba bjang gore go tsoma Modimo ga se ga lefeela?

5 Na go tsoma Modimo ke ga lefeela? Ga se ga lefeela ka gobane o nyaka gore re mo hwetše. Moapostola Paulo o ile a bolela seo ka mo go kwagalago ge a be a nea bohlatse go sehlopha seo se bego se bokane Areopago. Ge o le moo o kgona go bona Parthenon—e lego tempele yeo e neetšwego go modimogadi Athena wa Baathene ba bogologolo. Akanya o be o le moo ge Paulo a bolela ka “Modimo yo a dirilego lefase le dilo ka moka tše di lego go lona” e bile a bolela gore “ga a dule ditempeleng tše di dirilwego ka diatla tša batho.” Moapostola yo o oketša ka gore Modimo “go tšwa mothong o tee o dirile setšhaba se sengwe le se sengwe sa batho, gore ba dule godimo ga lefase ka moka, e bile o laetše gore go be le dinako tše di beilwego le mellwane e beilwego ya moo batho ba bego ba tla dula gona, gore ba tsome Modimo ge e ba ba ka mo phopholetša gomme ba mo hwetša e le ka kgonthe, gobane ge e le gabotse ga a kgole le yo mongwe le yo mongwe wa rena.” (Dit. 17:24-27) Ee, batho ba ka kgona go hwetša Modimo. Dihlatse tša Jehofa tša ka godimo ga dimilione tše šupago le seripa ‘di mo hweditše e le ka kgonthe’—e bile di tloga di mo rata.

SEO SE BOLELWAGO KE GO RATA MODIMO

6. Jesu o boletše gore “taelo e kgolokgolo le ya pele” ke efe?

6 Re swanetše go rata Jehofa go tšwa pelong. Jesu o ile a bolela seo ka mo go kwagalago ge Mofarisei yo mongwe a be a mmotšiša gore: “Morutiši, taelo e kgolokgolo Molaong wa Moshe ke efe?” Jesu o arabile ka gore: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele.”—Mat. 22:34-38.

7. Go bolela’ng go rata Modimo ka (a) ‘pelo ka moka’? (b) ‘moya ka moka’? (c) ‘monagano ka moka’?

7 Jesu o be a e ra go re’ng ge a be a re re swanetše go rata Modimo ka ‘pelo ka moka’? O be a e ra gore re swanetše go rata Jehofa ka dipelo tša rena ka moka tša seswantšhetšo, e lego seo se akaretšago dikganyogo tša rena le maikwelo. Le gona re swanetše go mo rata ka ‘moya ka moka’ goba ka maphelo a rena ka moka le seo re lego sona. Ka godimo ga moo, re swanetše go rata Modimo ka ‘monagano ka moka’ goba tlhaologanyo ka moka. Ge e le gabotse, re swanetše go rata Jehofa ka mo go feletšego, re se ke ra tlogela selo.

8. Go rata Modimo ka mo go feletšego go tla re tutueletša go dira’ng?

8 Ge e ba re rata Modimo ka pelo ka moka, moya ka moka le ka monagano ka moka, re tla ithuta Lentšu la gagwe ka mafolofolo, ra phetha merero ya gagwe ka pelo ka moka le go tsebatša ditaba tše dibotse tša Mmušo ka phišego. (Mat. 24:14; Baroma 12:1, 2) Go rata  Jehofa e le ka kgonthe go tla re batametša kgauswi kudu le yena. (Jak. 4:8) Ke therešo gore re ka se bolele mabaka ka moka a gore re rate Modimo. Lega go le bjalo, anke re ahlaahleng a sego kae a ona.

MABAKA A GORE RE RATE JEHOFA

9. Ke ka baka la’ng o rata Jehofa ka ge e le Mmopi le Mohlokomedi wa rena?

9 Jehofa ke Mmopi wa rena le Mohlokomedi wa rena. Paulo o itše: “Ka yena re na le bophelo, re a sepela e bile re gona.” (Dit. 17:28) Jehofa o re neile lefase gore e be legae la rena le lebotsebotse. (Ps. 115:16) E bile o re nea dijo le dilo tše dingwe tšeo re di hlokago gore re tšwele pele re phela. Ke ka baka leo Paulo a bego a ka botša barapedi ba medimo ya diswantšho ba kua Lisitara gore “Modimo yo a phelago . . . [o] ile a se lese go nea bohlatse ka dilo tše botse tše a di dirilego, ka go le nea dipula go tšwa legodimong le dihla tše di enywago, a khoriša dipelo tša lena ka mo go feletšego ka dijo le lethabo.” (Dit. 14:15-17) Na leo ga se lebaka le lebotse la gore re rate Mmopi wa rena yo Mogolo le Mohlokomedi wa rena yo lerato?—Mmo. 12:1.

10. Re swanetše go arabela bjang tokišetšong ya Modimo ya go tloša sebe le lehu?

10 Modimo o tla tloša sebe le lehu tšeo re di abetšwego go Adama. (Baroma 5:12) “Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:8) Ga go na pelaelo gore re rata Jehofa ka pelo ka moka ka gobane o tla re lebalela dibe ge re sokologa gomme re bontšha tumelo sehlabelong sa Jesu sa topollo.—Joh. 3:16.

11, 12. Ke dikholofelo dife tšeo Jehofa a re neilego tšona?

11 Jehofa ‘o re nea kholofelo yeo e re tlatšago lethabo le khutšo.’ (Baroma 15:13) Kholofelo yeo Modimo a re neilego yona e dira gore re kgone go kgotlelela diteko tša tumelo. Batlotšwa bao ba ‘botegago gaešita le go iša lehung ba tla newa mphapahlogo wa bophelo.’ (Kut. 2:10) Babotegi bao ba nago le kholofelo ya go tlo phela mo lefaseng ba tla thabela ditšhegofatšo tša ka mo go sa felego Paradeiseng e holofeditšwego. (Luka 23:43) Re arabela bjang dikholofetšong tše? Na ga re tlale lethabo le khutšo gotee le lerato bakeng sa Monei wa “mpho e nngwe le e nngwe e botse le neo e nngwe le e nngwe e phethagetšego”?—Jak. 1:17.

12 Modimo o re neile kholofelo e kgahlišago ya tsogo. (Dit. 24:15) Ke therešo gore ge motho yo re mo ratago a ehwa re nyama kudu, eupša ka baka la ge re na le kholofelo ya tsogo, ‘ga re nyame go etša bao ba se nago kholofelo.’ (1 Bathes. 4:13) Ka baka la lerato, Jehofa Modimo o hlologetše go tsoša bahu, kudukudu babotegi ba bjalo ka Jobo. (Jobo 14:15) Anke o akanye ka lethabo leo le tlago go ba gona ge re kopana gape le bao ba tsošeditšwego bophelong mo lefaseng. Ruri re ikwa re rata Tatago rena wa legodimong ka dipelo tša rena ka moka, yena yoo a re neilego kholofelo e kgahlišago ya tsogo!

13. Go na le bohlatse bofe bja gore Modimo o a re hlokomela?

13 Jehofa o a re hlokomela. (Bala Psalme 34:6, 18, 19; 1 Petro 5:6, 7.) Ka ge re tseba gore Modimo wa rena yo lerato o dula a ikemišeditše go thuša bao ba mmotegelago, re ikwa re šireletšegile ka ge re le karolo ya ‘mohlape wa mafulo a gagwe.’ (Ps. 79:13) Go feta moo, lerato leo Modimo a re ratago ka lona le tla bonagala go seo a tlago go re direla sona ka Mmušo wa Mesia. Ka morago ga gore Kgoši yeo a e kgethilego e lego Jesu Kriste a fediše bošoro, kgatelelo le bokgopo mo lefaseng, batho bao ba kwago ba tla šegofatšwa ka khutšo ya ka mo go sa felego le katlego. (Ps. 72:7, 12-14, 16) Na ga o dumele gore dikholofelo tše bjalo di re nea lebaka la go rata Modimo wa rena yo lerato ka pelo ka moka, moya ka moka, matla ka moka le ka monagano ka moka?—Luka 10:27.

14. Modimo o re neile tokelo efe e kgolokgolo?

14 Jehofa o re neile tokelo e kgolokgolo ya go hlankela re le Dihlatse tša gagwe. (Jes. 43: 10-12) Re rata Modimo ka ge a re neile sebaka sa go thekga bogoši bja gagwe le go botša batho ka kholofelo ya kgonthe lefaseng le leo le tletšego mathata. Go feta moo, re ka bolela le batho bao re kgodišegile le ka tumelo ka gobane re tsebatša ditaba tše dibotse tšeo di theilwego Lentšung la Modimo wa therešo, yoo dikholofetšo tša gagwe ka mehla di phethagalago. (Bala Joshua 21:45; 23:14.) Le ka ba la dikela re bala ditšhegofatšo le mabaka a gore re rate Jehofa. Eupša re ka bontšha bjang gore re a mo rata?

KAMOO RE KA BONTŠHAGO KA GONA GORE RE RATA MODIMO

15. Go ithuta Lentšu la Modimo le go dira seo le se bolelago go ka re thuša bjang?

15 Ithute Lentšu la Modimo ka mafolofolo le go dira seo le se bolelago. Go dira bjalo go bontšha gore re rata Jehofa le gore re tloga re nyaka gore lentšu la gagwe e be ‘seetša tseleng ya rena.’ (Ps. 119:105) Ge e ba re ikwa re nyamile, re ka homotšwa ke dikholofetšo tše lerato tše bjalo ka tše di rego: “Pelo e robegilego le e setlegilego o ka se e nyatše, wena Modimo.” “Botho bja gago bo ile bja dula bo nthekgile, wena Jehofa. Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.” (Ps. 51:17; 94:18, 19) Jehofa o šokela bao ba tlaišegago, gomme Jesu le yena o kwela batho bohloko. (Jes. 49:13; Mat. 15:32) Go ithuta Beibele go ka re thuša go lemoga gore Jehofa o tshwenyegile ka rena ka tsela e lerato, ka go re’alo ra mo rata ka pelo ka moka.

16. Go rapela ka mehla go ka dira bjang gore lerato la rena go Modimo le gole?

16 Rapela Modimo ka mehla. Dithapelo tša rena di re batametša kgauswi kudu le “Mokwi wa thapelo.” (Ps. 65:2) Ge re lemoga gore Modimo o araba dithapelo tša rena, lerato la rena go yena le a gola. Ka mohlala, re ka ba re bone gore ga a re dumelele re lekwa go feta kamoo re ka kgonago go kgotlelela. (1 Bakor. 10:13) Ge e ba re na le dilo tšeo di re tshwenyago gomme re lopa Jehofa, gona re ka ba le “khutšo ya Modimo” yeo e sa bapišwego le selo. (Bafil. 4:6, 7) Ka dinako tše dingwe, re ka rapelela ka pelong—go etša Nehemia—gomme ra lemoga gore thapelo ya rena e arabilwe. (Neh. 2:1-6) Ge re dutše re ‘phegelela thapelong’ gomme re lemoga gore Jehofa o araba dithapelo tša rena, lerato la rena  go yena le a gola. Go oketša moo, re ba le kgodišego e oketšegilego ya gore o tla re thuša go lebeletšana le diteko tše dingwe tša tumelo.—Baroma 12:12.

17. Ge e ba re rata Modimo, re tla lebelela bjang go ba gona dibokeng?

17 Itlwaetše go ba gona ka mehla dibokeng tša Bokriste le dikopanong tše dikgolo le tše dinyenyane. (Baheb. 10:24, 25) Baisiraele ba be ba bokana go tlo theetša le go ithuta ka Jehofa e le gore ba mmoife le go phetha Molao wa gagwe. (Doit. 31:12) Ga go boima go dira dilo ka go dumelelana le thato ya Modimo ge e ba re mo rata e le ka kgonthe. (Bala 1 Johane 5:3.) Ka go re’alo, anke le ka mohla re se ke ra nagana gore go foša diboka ga se bothata. Ruri ga re nyake go eba le selo seo se dirago gore re tlogele lerato leo re bego re na le lona pele la go rata Jehofa.—Kut. 2:4.

18. Go rata Modimo go re tutueletša go dira’ng?

18 Botša ba bangwe “therešo ya ditaba tše dibotse” ka phišego. (Bagal. 2:5) Go rata ga rena Modimo go re tutueletša go bolela ka Mmušo wa Modimo woo kgoši ya wona e lego Mesia. Nakong ya Haramagedone, Morwa wa gagwe yo a rategago o tla ‘namela pere go lwela baikokobetši.’ (Ps. 45:4; Kut. 16:14, 16) Ruri re thabela go tšea karolo go direng barutiwa ka go thuša batho go ithuta ka lerato la Modimo le lefase la gagwe le lefsa leo a re holofeditšego lona!—Mat. 28:19, 20.

19. Ke ka baka la’ng re swanetše go leboga tokišetšo ya Jehofa ya go diša mohlape wa gagwe?

19 Leboga tokišetšo ya Modimo ya go diša mohlape wa gagwe. (Dit. 20:28) Bagolo ke tokišetšo e tšwago go Jehofa, gomme ka mehla ba re kganyogela tše dibotse. Bagolo ba “swana le lefelo la go tšhabela phefo le lefelo la go utela ledimo, [ba] swana le melapo nageng e se nago meetse, le moriti wa leswika le legolo nageng e omilego.” (Jes. 32:1, 2) Re thaba kudu ge re hwetša lefelo leo go lona re ka tšhabelago moya o matla goba ledimo leo le boifišago! Re thabela moriti wa leswika le legolo ge letšatši le fiša tšhiritšhiri. Dika tše tša polelo di re thuša go bona gore bagolo ba re nea thušo ya moya le go re lapološa. Ge re ekwa bao ba etelelago pele gare ga rena, re bontšha gore re tšeela godimo “dimpho [tše] tšeo e lego banna” e bile re nea bohlatse bja gore re rata Modimo le Kriste, yena Hlogo ya phuthego.—Baef. 4:8; 5:23; Baheb. 13:17.

Jehofa o re neile badiši bao ba tlogago ba na le taba le mohlape (Bona serapa 19)

ANKE LERATO LA GAGO GO MODIMO LE DULE LE OKETŠEGA

20. Ge e ba o rata Modimo, o tla arabela bjang go Jakobo 1:22-25?

20 Ge e ba o rata Jehofa, o tla ba ‘modiri wa lentšu, e sego mokwi feela.’ (Bala Jakobo 1:22-25.) “Modiri” wa lentšu o na le tumelo yeo e tšweletšago mediro e bjalo ka go dira boboledi ka mafolofolo le go tšea karolo dibokeng tša Bokriste. Ka baka la ge o tloga o rata Modimo, o tla kwa ‘molao o phethagetšego’ wa Jehofa, woo o akaretšago dilo ka moka tšeo a nyakago o di dira.—Ps. 19:7-11.

21. Dithapelo tša gago tše di tšwago pelong di ka swantšhwa le eng?

21 Go rata Jehofa Modimo go tla dira gore o mo rapele ka mehla ka go tšwa pelong. Ge mopsalme Dafida a be a naganne ka go fišwa ga diorelo letšatši le letšatši ka tlase ga kgwerano ya Molao, o opetše ka gore: “Anke thapelo ya ka e lokišetšwe bjalo ka seorelo pele ga gago [Jehofa], anke go emiša ga ka diatla ge ke rapela go be bjalo ka sebego sa mabele sa mantšiboa.” (Ps. 141:2; Ek. 30:7, 8) Anke ditopo tša gago tša boikokobetšo, dikgopelo tša gago tše di tšwago pelong le mantšu a gago a go tumiša Modimo le go mo leboga di be bjalo ka diorelo tše di nkgago bose tšeo di swantšhetšago dithapelo tše di amogelegago.—Kut. 5:8.

22. Re tlo ahlaahla lerato la mohuta ofe sehlogong se se latelago?

22 Jesu o itše re swanetše go rata Modimo le moagišani wa rena. (Mat. 22:37-39) Go etša ge re tla bona ge re tšwela pele ka go ahlaahla seka se, go rata Jehofa le melao ya gagwe ya motheo go tla re thuša go dirišana gabotse le batho ba bangwe le go bontšha gore re rata moagišani wa rena.