Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2014

Na o a Gopola?

Na o a Gopola?

Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

Kwana ya Paseka e be e swanetše go hlabja ka nako mang ka Nisani 14?

Diphetolelo tše dingwe tša Beibele di re e be e swanetše go hlabja “magareng ga mantšiboa a mabedi,” ke gore ge šwahlane e tšeatšea goba pele leswiswi le swara—ka morago ga ge letšatši le diketše eupša go sa bona. (Ek. 12:6)—12/15, matlakala 18-19.

Bafsa ba ka diriša melao efe ya motheo ya Beibele go dira diphetho tše bohlale?

Melao ya motheo e meraro ke ye: (1) Tsoma Mmušo wa Modimo pele le toko ya gagwe. (Mat. 6:19-34) (2) Hwetša lethabo ka go hlankela ba bangwe. (Dit. 20:35) (3) Thabela go hlankela Modimo bofseng bja gago. (Mmo. 12:1)—1/15, matlakala 19-20.

Ke banamedi bafe ba bane ba dipere bao ba bego ba dutše ba kata ga e sa le go tloga ka 1914?

Jesu, e lego monamedi wa pere e tšhweu, o gatile mogato wa go raka Sathane le batemona ba gagwe legodimong. Monamedi wa pere ya mmala wa bohwibidu bja mollo o swantšhetša dintwa tšeo e bego e dutše e le tlhobaboroko bathong. Monamedi wa pere e ntsho o swantšhetša tlala. Monamedi wa pere e tshehla o tliša lehu ka bolwetši bjo bo bolayago, a bolaya batho ba dimilione. (Kut. 6:2-8)—2/1, matlakala 6-7.

“Lenyalo la Kwana” le tla ba neng? (Kut. 19:7)

“Lenyalo la Kwana” le tla ba gona ka morago ga ge Kgoši Jesu Kriste a feleleditše phenyo ya gagwe, ke gore, ka morago ga go fedišwa ga Babilona o Mogolo le ka morago ga ntwa ya Haramagedone.—2/15, letlakala 10.

Ke ka baka la’ng Bajuda ba mehleng ya Jesu ba be ba “letile” Mesia? (Luka 3:15)

Re ka se nape re kgonthišega gore Bajuda ba lekgolong la pele la nywaga ba be ba kwešiša boporofeta bja Daniele bja mabapi le Mesia ka tsela yeo re bo kwešišago ka yona ga bjale. (Dan. 9:24-27) Lega go le bjalo, ba ka ba ba kwele ka tsebišo yeo morongwa a e boditšego badiši ba itšego goba ba kwele ka seo Anna moporofeta wa mosadi a ilego a se bolela ge a se na go bona Jesu yo monyenyane ka tempeleng. Le gona balepi ba dinaledi ba ile ba tla ba nyaka “yo a belegwego e le kgoši ya Bajuda.” (Mat. 2:1, 2) Ka morago, Johane Mokolobetši o ile a bolela gore Kriste o be a le kgauswi le go tla.—2/15, matlakala 26-27.

Re ka dira’ng gore Ee ya rena e se be Aowa? (2 Bakor. 1:18)

Ke therešo gore ka dinako tše dingwe go ka tšwelela maemo ao re ka se kgonego go a laola ao a ka dirago gore re se sa kgona go phetha seo re bego re se rulagantše. Eupša re swanetše go dira sohle seo re ka se kgonago go phetha kholofetšo goba keno yeo re e dirilego.—3/15, letlakala 32.

Re ka ganetša bjang teko ya go bogela diswantšho tšeo di kgothaletšago bootswa?

Megato e meraro yeo e ka thušago ke ye: (1) Re swanetše go lebelela thoko kapejana ge e ba re ka wela diswantšho tšeo di tsošago kganyogo ya thobalano. (2) Re swanetše go diša dikgopolo tša rena ka go nagana ka dilo tše di agago le ka go rapela Modimo. (3) Re swanetše go diša dikgato tša rena ka go phema difilimi goba Diwepesaete tše di nago le diswantšho tšeo di kgothaletšago bootswa.—4/1, matlakala 10-12.

Go ka ba le ditlamorago dife tše di bego di sa letelwa ge Mokriste a tlogela lapa la gagwe gore a yo šoma nageng e šele?

Ge batswadi ba dira phetho ya gore lapa le se dule gotee, bana ba ka gobala maikwelong le boitshwarong. Ba ka galefela motswadi goba batswadi ba bona. Le gona batho ba bagolo bao ba sa dulego le balekane ba bona ba ka lebeletšana le dikgoketšo tša botona le botshadi.—4/15, matlakala 19-20.

Ke ka baka la’ng disenyi tšeo di bego di bolaelwa koteng di be di robja maoto?

Baroma ba be ba bolaela disenyi tše dingwe koteng. Bajuda ba ile ba kgopela gore maoto a disenyi tšeo di bego di kokotetšwe kgauswi le Jesu a robje. Seo se be se tla dira gore disenyi tšeo di thatafalelwe ke go hema gomme di hwe kapejana. Ka go re’alo, di be di ka se robale bošego ka moka koteng. (Doit. 21:22, 23)—5/1, letlakala 11.

Ke dipotšišo dife tše nne tšeo re swanetšego go dula re di gopola ge re boledišana le batho bodireding?

Ke boledišana le bomang? Ke boledišana le bona kae? Nako ya go boledišana le bona ke efe? Ke swanetše go boledišana le bona bjang?—5/15, matlakala 12-15.

Go kgoga go bile le mafelelo afe a kotsi?

Nywageng e lekgolo e fetilego, go kgoga go bolaile batho ba 100 000 000. Gona bjale, go bolaya batho ba e ka bago ba 6 000 000 ka ngwaga.—6/1, letlakala 3.