Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  June 2014

Dipotšišo tše Tšwago go Babadi

Dipotšišo tše Tšwago go Babadi

Na ke ga maleba gore Bakriste ba fiše ditopo?

Mangwalo ga a nee mabaka le ge e le afe a motheo a go iletša mokgwa wa go fiša ditopo.

Go na le dipego tša ka Beibeleng tšeo di re botšago gore ditopo goba marapo a bahu a be a fišwa. (Josh. 7:25; 2 Dikor. 34:4, 5) Se se ka ba se be se e ra gore batho bao ba be ba sa swanelwe ke go bolokwa ka seriti. Eupša ga se ka mehla moo go fišwa ga ditopo go bego go e ra gore batho bao ga ba swanelwe ke go bolokwa ka seriti.

Re ka bona se pegong ya lehu la Kgoši Saulo le barwa ba gagwe ba bararo. Bone bja bona ba hwile ge ba be ba elwa le Bafilisita. Yo mongwe wa barwa bao e be e le Jonathane, mogwera wa paale le mothekgi yo a botegago wa Dafida. Ge bagale ba Baisiraele bao ba bego ba dula Jabeshe-gileada ba ekwa ka seo se diragetšego, ba ile ba yo tšea ditopo tšeo tše nne, ba di fiša ke moka ba boloka marapo a tšona. Ka morago Dafida o ile a reta Baisiraele bao ka seo ba se dirilego.—1 Sam. 31:2, 8-13; 2 Sam. 2:4-6.

Mangwalo a holofetša gore bahu ba tlo tsoga, ke gore Modimo o tlo bušetša batho bophelong. Go sa šetšwe gore mohu o fišitšwe goba go se bjalo, seo ga se re gore Jehofa a ka palelwa ke go mmušetša bophelong ka go mo nea mmele o mongwe. Baheberu ba bararo bao ba botegago bao ba bego ba tlo bolawa sebešong sa mollo ka taelo ya Kgoši Nebukadinetsara, ba be ba sa swanela go boifa gore ge ba ka hwela moo mollong, Modimo o be a ka se kgone go ba tsoša. (Dan. 3:16-18) Go be go le bjalo le ka bahlanka ba Jehofa ba botegago bao ba ilego ba bolawa dikampeng tša tshwenyo tša Nazi gomme ka morago ditopo tša bona tša fišwa. Bahlanka ba bangwe ba botegago ba Modimo ba hwile methuthupong e itšego goba ka ditsela tše dingwe tšeo go sa kago gwa hwetšwa ditopo tša bona. Lega go le bjalo, re kgodišegile gore ba tla tsošwa.—Kut. 20:13.

Ga se gore Jehofa o tlo swanelwa ke gore a kgomaganye lefsa mmele wa kgale wa motho e le gore a kgone go mo tsoša. Seo se hlatselwa ke go tsošetša ga Modimo Bakriste bao ba tloditšwego bophelong bja legodimong. Go etša Jesu, yoo a ilego “a phedišwa moyeng,” Bakriste ba tloditšwego ba tsošwa ka mmele wa moya. Ga ba ye legodimong ba na le karolo le ge e le efe ya mebele ya bona ya nama.—1 Pet. 3:18; 1 Bakor. 15:42-53; 1 Joh. 3:2.

Kholofelo ya rena ya tsogo ga se ya ithekga ka seo se dirilwego ka setopo sa motho, eupša e ithekgile ka tumelo yeo re nago le yona ya gore Modimo o na le bokgoni le kganyogo ya go phethagatša dikholofetšo tša gagwe. (Dit. 24:15) Ke therešo gore re ka fo se kwešiše ka botlalo kamoo Modimo a ilego a dira mohlolo wa go tsoša batho nakong e fetilego goba kamoo a tlago go dira seo nakong e tlago. Go dutše go le bjalo, re a mmota. O “tiišeditše” seo ka go tsoša Jesu.—Dit. 17:31; Luka 24:2, 3.

Bakriste ba swanetše go naganišiša pele ka seo se tlwaetšwego go dirwa setšhabeng, dipolelo tša batho ba tikologong ya gabo bona le dinyakwa tša semolao tša mabapi le go bolokwa ga bahu. (2 Bakor. 6:3, 4) Ke moka, taba ya ge e ba setopo sa motho se tla fišwa goba se tla bolokwa ke phetho ya motho ka noši goba ya lapa.