Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2014

Na o Lebelela Mafokodi a Batho go Etša Jehofa?

Na o Lebelela Mafokodi a Batho go Etša Jehofa?

“Ditho tša mmele tšeo di bonagalago e le tše di fokolago, ke tšona tše di nyakegago.”—1 BAKOR. 12:22.

1, 2. Ke ka baka la’ng Paulo a ile a kwela bohloko batho bao ba fokolago?

KA MOKA ga rena re na le go fela re ikwa re fokola. Mokgohlwanenyana goba bolwetšinyana bjo itšego bo ka re fetša matla moo re feleletšago re thatafalelwa ke go dira mediro ya rena ya letšatši le letšatši. Bjale anke o akanye o ikwa ka tsela yeo ka dikgwedikgwedi. Ge o le boemong bjo bjalo, na o be o ka se thabele gore ba bangwe ba go bontšhe kwelobohloko?

2 Moapostola Paulo o be a tseba bohloko bja go fokodišwa ke dikgateletšo tša ka ntle ga phuthego le tša ka phuthegong. Dinakong tše dingwe o ile a ikwa a se sa na matla a go tšwela pele. (2 Bakor. 1:8; 7:5) Ge Paulo a be a nagana ka bophelo bja gagwe le mathata a mantši ao a bilego le ona e le Mokriste yo a botegago, o dumetše ka gore: “Ke mang yo a fokolago nna ka se fokole?” (2 Bakor. 11:29) Mabapi le ditho tše di fapafapanego tša phuthego ya Bokriste tšeo di swantšhwago le mmele wa motho, Paulo o boletše gore tšeo “di bonagalago e le tše di fokolago, ke tšona tše di nyakegago.” (1 Bakor. 12:22) O be a e ra go re’ng? Ke ka baka la’ng re swanetše go lebelela bao ba bonagalago ba fokola ka tsela yeo Jehofa a ba lebelelago ka yona? Le gona go dira bjalo go tla re hola bjang?

 KAMOO JEHOFA A LEBELELAGO MAFOKODI A BATHO

3. Ke’ng seo se ka dirago gore re be le pono e fošagetšego ka bao ba dulago ba nyaka thušo ka phuthegong?

3 Re phela lefaseng la phadišano moo matla le bofsa gantši di etišwago pele. Ba bantši ba dira selo le ge e le sefe gore ba hwetše seo ba se nyakago, gantši ba sa naganele maikwelo a bao ba fokolago. Rena ga re kgothaletše mokgwa o bjalo, eupša re ka ba le pono e fošagetšego re sa lemoge ka bao ba dulago ba nyaka thušo, gaešita le ka phuthegong. Lega go le bjalo, re ka ba le pono e lekalekanego kutšwanyana go etša Modimo.

4, 5. (a) Papišo yeo e lego go 1 Bakorinthe 12:21-23 e re thuša bjang go kwešiša tsela yeo Jehofa a lebelelago mafokodi a batho? (b) Re ka holega bjang ge re thuša bao ba fokolago?

4 Re ka kwešiša tsela yeo Jehofa a lebelelago mafokodi a batho go tšwa papišong yeo e begilwego lengwalong la pele la Paulo leo le yago go Bakorinthe. Go kgaolo 12, Paulo o re gopotša gore gaešita le setho seo se sa bogegego goba seo se fokolago kudu mmeleng wa motho se na le mošomo. (Bala 1 Bakorinthe 12:12, 18, 21-23.) Batho ba bangwe bao ba dumelago thutong ya tlhagelelo ba be ba dutše ba ganetša taba ye. Lega go le bjalo, dilo tšeo di hweditšwego ge go ithutwa mmele wa motho di bontšha gore ditho tša mmele tšeo go bego go naganwa gore ga di na mohola ge e le gabotse di phetha mošomo wa bohlokwa. * Ka mohlala, batho ba bangwe ba be ba nagana gore monwana o monyenyane wa leotong ga o na mohola; lega go le bjalo, ga bjale go lemogilwe gore o thuša gore motho a kgone go ema gabotse.

5 Papišo ya Paulo e bontšha gore ditho ka moka tša phuthego ya Bokriste di na le mohola. Ka go se swane le Sathane yoo a amogago batho seriti, Jehofa o lebelela bahlanka ba gagwe ka moka e le bao ba “nyakegago” goba ba le bohlokwa, gaešita le bao ba bonagalago ba fokola. (Jobo 4:18, 19) Kgopolo yeo e swanetše go thuša yo mongwe le yo mongwe wa rena go thabela tema yeo a e kgathago ka phuthegong ya gabo le ka go ba karolo ya mokgatlo wa Modimo lefaseng ka bophara. Ka mohlala, nagana ge o be o thuša motšofadi yo a itšego. Na go ile gwa holega yena feela? Aowa. Le wena o ile wa holega. Ee, ge re thuša batho ba bangwe re hwetša lethabo, ga re fele pelo, re ba le lerato e bile re gola moyeng. (Baef. 4:15, 16) Tatago rena yo lerato o a tseba gore phuthego yeo e lebelelago ditho tša yona ka moka di le bohlokwa, go sa šetšwe mafokodi a tšona, e bontšha tekatekano le lerato.

6. Ka dinako tše dingwe Paulo o ile a diriša bjang lentšu “fokolago” le “tiilego”?

6 Ka mo go kgahlišago, ge Paulo a be a ngwalela Bakorinthe o ile a diriša lentšu “fokolago” le “fokola” go hlalosa kamoo a bego a ikwa ka gona le go hlalosa tsela yeo batho bao e sego badumedi ba bego ba lebelela Bakriste ba lekgolong la pele la nywaga. (1 Bakor. 1:26, 27; 2:3) Ge Paulo a be a bolela ka bao ba “tiilego,” o be a sa re gore Bakriste ba bangwe ba ikwe ba phagametše ba bangwe. (Baroma 15:1) Go e na le moo, o be a e ra gore Bakriste bao ba nago le phihlelo ba se felele pelo bao ba sa hlwago ba tielela therešong.

NA RE SWANETŠE GO FETOŠA PONO YA RENA?

7. Ke’ng seo se ka re thibelago go thuša bao ba hlokago thušo?

7 Ge re thuša “mmotlana,” re ekiša Jehofa e bile o tla re amogela. (Ps. 41:1; Baef. 5:1) Lega go le bjalo, gantši go ba le pono e fošagetšego ka bao ba nyakago thušo go ka re thibela go ba thuša. Goba ka ge re tla ba re sa kgodišege ka seo re swanetšego go se botša  bao ba lego mathateng, re ka ikwa re lewa ke dihlong gomme ra fo ba hlokomologa. Cynthia, * e lego kgaetšedi yoo monna wa gagwe a mo tlogetšego o re: “Go kweša bohloko kudu ge bana babo rena ba go hlokomologa goba ba dira dilo ka tsela yeo ekego ga se bagwera ba gago. Ge o lebeletšane le mathata, o hloka batho.” Dafida wa bogologolo o be a tseba bohloko bja go hlokomologwa.—Ps. 31:12.

8. Ke’ng seo se tla re thušago go ba le kwelobohloko kutšwanyana?

8 Ga go pelaelo gore re tla ba le kwelobohloko kutšwanyana ge re gopola gore ba bangwe ba bana babo rena le dikgaetšedi ba ba rategago ba fokodišitšwe ke maemo a thata—go babja, go dula le ditho tša lapa tšeo e sego Bakriste goba go lebeletšana le kgateletšego. Ka letšatši le lengwe le rena re ka ikhwetša re le boemong bjo bo swanago. Pele ba ka tsena Nageng ya Kholofetšo, Baisiraele bao ba bego ba diila e bile ba fokola kua nageng ya Egipita, ba ile ba gopotšwa gore ba se ‘thatafiše dipelo tša bona’ gomme ba lebala bana babo bona bao ba hlakago. Jehofa o be a letetše gore ba thuše badiidi.—Doit. 15:7, 11; Lef. 25:35-38.

9. Ke selo sefe sa pele seo re swanetšego go tshwenyega ka sona ge re thuša bao ba fokolago? Nea mohlala.

9 Go e na le gore re ahlole bao ba fokolago goba go nagana gore rena re kaone, re swanetše go ba homotša. (Jobo 33:6, 7; Mat. 7:1) Ka mohlala: Na ge motho yo a gobetšego ka sethuthuthu a fihla sepetlele dingaka di thoma pele ka go nyaka go tseba ge e ba e le yena a bakilego kotsi? Aowa, gateetee di mo nea thušo ya kalafo yeo a e hlokago. Ka mo go swanago, ge e ba modumedigotee le rena a fokodišitšwe ke mathata a gagwe, selo sa pele seo re swanetše go tshwenyega ka sona ke go mo thuša moyeng.—Bala 1 Bathesalonika 5:14.

10. Ke bjang ba bangwe ba bao ba ka bonagalago ba fokola ge e le gabotse ba ‘humilego tumelong’?

10 Ge re ka naganišiša go se nene ka maemo a bana babo rena, re tla ba le pono e botse ka mafokodi a bona. Nagana ka dikgaetšedi tšeo di bego di dutše di kgotleletše go ganetšwa ke balekane ba tšona ka nywaga e mentši. Tše dingwe tša tšona di ka bonagala di nyatšega e bile di fokola, eupša na ga di bontšhe tumelo e kgolo le kgotlelelo? Ge o bona mma yo a se nago molekane a etla dibokeng ka mehla le ngwana goba bana ba gagwe, na ga o kgahlišwe ke tumelo le boikemišetšo bja gagwe? Le gona go thwe’ng ka bafsa bao ba kgomarelago therešo go sa šetšwe tutuetšo e mpe sekolong? Ge re nagana ka tše ka moka, re lemoga gore batho ba bjalo bao ba ka bonagalago ba fokola ba ka ba ba ‘humile tumelong’ go etša ba bangwe ba rena bao ba sa phelego maemong a thata.—Jak. 2:5.

DUMELELANYA PONO YA GAGO LE YA JEHOFA

11, 12. (a) Ke’ng seo se tlago go re thuša go fetoša pono ya rena ka mafokodi a batho? (b) Re ithuta’ng tseleng yeo Jehofa a ilego a dirišana le Arone?

11 Re thušwa go dumelelanya pono ya rena le ya Jehofa ka mafokodi a batho ka go ela hloko kamoo a ilego a dirišana le ba bangwe ba bahlanka ba gagwe. (Bala Psalme 130:3.) Ka mohlala, ge nkabe o be o na le Moshe ge Arone a be a dirile seswantšho sa namane ya gauta, o be o tla ikwa bjang ka mabaka a Arone a go fokola? (Ek. 32:21-24) Goba nkabe o ile wa nagana’ng ka boemo bja kgopolo bja Arone ge a be a tutuetšwa ke kgaetšedi ya gagwe e lego Miriamo go nyatša Moshe ka ge a nyetše mosadi o šele? (Num. 12:1, 2) Nkabe o ile wa arabela bjang ge Arone le Moshe ba be ba palelwa ke go godiša Jehofa, ge ka mohlolo A be a ba nea meetse kua Meriba?—Num. 20:10-13.

12 Maemong a ka moka, Jehofa a ka be a ile a otla Arone ka yona nako yeo. Eupša O ile a lemoga gore Arone e be e se motho yo  kgopo. Go bonagala Arone a ile a dumelela maemo goba tutuetšo ya batho ba bangwe e mo aroša tseleng e nepagetšego. Lega go le bjalo, ge a be a bontšhwa diphošo tša gagwe, o ile a di dumela kapejana gomme a thekga dikahlolo tša Jehofa. (Ek. 32:26; Num. 12:11; 20:23-27) Jehofa o ile a kgetha go šetša kudu tumelo ya Arone le go itshola ga gagwe. Nywagakgolo ka morago, Arone le ditlogolo tša gagwe ba be ba sa gopolwa e le batho bao ba boifago Jehofa.—Ps. 115:10-12; 135:19, 20.

13. Re ka hlahlobišiša bjang pono ya rena ka mafokodi a batho?

13 E le gore re dumelelanye pono ya rena le ya Jehofa, re swanetše go hlahlobišiša pono ya rena ka bao ba bonagalago ba fokola. (1 Sam. 16:7) Ka mohlala, re arabela bjang ge mofsa a sa bontšhe temogo ge a kgetha boithabišo goba ge a se na mekgwa? Go e na le gore re mo sole kudu, ke ka baka la’ng re sa nagane ka seo re ka se dirago go mo thuša gore a gole moyeng? Re ka gata mogato wa pele go thuša motho yo a hlokago thušo, ka go dira bjalo re tla ba le kwelobohloko kutšwanyana gomme lerato la rena la gola.

14, 15. (a) Jehofa o ile a ikwa bjang ka go hloka sebete ka nakwana ga Eliya? (b) Re ka ithuta’ng phihlelong ya Eliya?

14 Le gona re thušwa go katološa pono ya rena ka ba bangwe ka go bapetša tsela yeo re naganago ka yona le tsela yeo Jehofa a ilego a arabela ka yona ge ba bangwe ba bahlanka ba gagwe ba be ba ikwa ba gateletšegile. Eliya e be e le yo mongwe wa bona. Gaešita le ge Eliya a ile a ba le sebete sa go kopana le baporofeta ba Baali ba 450, o ile a tšhabela Kgošigadi Isebele ge a ekwa gore o loga leano la go mmolaya. Ka morago ga go sepela dikhilomithara tše e ka bago tše 150 go ya Beresheba, o ile a tsena ka garegare ga lešoka. A lapišitšwe ke go sepela letšatšing le le fišago, moporofeta yo o ile a dula ka fase ga sehlare  gomme a “kgopelela moya wa gagwe gore o hwe.”—1 Dikg. 18:19; 19:1-4.

Jehofa o ile a kwešiša mafokodi a Eliya gomme a romela morongwa gore a mo matlafatše (Bona serapa 14 le 15)

15 Jehofa o ile a ikwa bjang ge a lebelela a le legodimong gomme a bona moporofeta wa gagwe yo a botegago a gateletšegile? Na o ile a se sa amogela mohlanka yo wa gagwe ka ge ka nakwana a ile a gateletšega le go hloka sebete? Le gatee! Jehofa o ile a kwešiša mafokodi a Eliya gomme a romela morongwa. Morongwa yoo o ile a kgothaletša Eliya gabedi gore a je. Ka go re’alo, leeto le lengwe leo a bego a tlo le tšea le be le ka se ‘mo palele.’ (Bala 1 Dikgoši 19:5-8.) Ee, le pele Jehofa a ka nea moporofeta wa gagwe ditaelo le ge e le dife, o ile a mo theetša gomme a gata megato ya go mo matlafatša.

16, 17. Re ka ekiša bjang tsela yeo Jehofa a ilego a hlokomela Eliya?

16 Re ka ekiša bjang Modimo wa rena yo lerato? Ga se ra swanela go akgofela go nea keletšo. (Die. 18:13) E tla ba mo gobotse gore re thome pele ka go ipha nako ya go kwela bohloko bao ba ka bago ba nagana gore ba a ‘nyatšega’ ka baka la maemo a bona. (1 Bakor. 12:23) Ka morago ga moo, re tla ba boemong bjo bobotse bja go nea thušo yeo e nyakegago.

17 Ka mohlala, nagana ka Cynthia yo go boletšwego ka yena pejana, yoo monna wa gagwe a ilego a mo tlogela le barwedi ba babedi. Ba ile ba ikhwetša ba nnoši. Dihlatse tše dingwe di ile tša arabela bjang? Cynthia o hlalosa ka gore: “Ka morago ga gore re botše Dihlatsegotee ka mogala seo se diragetšego, di be di šetše di le legaeng la rena ka morago ga metsotso e 45. Di be di lla le rena. Ga sa nka tša re tlogela re nnoši matšatšing a mabedi goba a mararo ka morago ga moo. Ka ge re be re sa je gabotse e bile re tshwenyegile kudu maikwelong, di ile tša re tšea gore re dule le tšona ka nakwana.” Seo mohlomongwe se go gopotša mantšu a Jakobo ao a rego: “Ge e ba ngwanabo rena goba kgaetšedi a hlaelelwa ke diaparo gomme a hloka dijo tše di lekanego tša letšatši, lega go le bjalo, yo mongwe wa lena a re go yena: ‘Sepela ka khutšo, o ruthele gomme o khore,’ eupša le sa mo nee dinyakwa tša mmele wa gagwe, gona go hola’ng? Ka gona tumelo le yona ge e le nnoši, e se na mediro, e hwile.” (Jak. 2:15-17) Ka baka la thekgo yeo bana babo rena le dikgaetšedi ba ilego ba e nea ka nako ya maleba, Cynthia le barwedi ba gagwe ba ile ba hwetša matla a go hlankela e le babulamadibogo ba go thuša dikgwedi tše tshela feela ka morago ga phihlelo ye ya bona e bohloko.—2 Bakor. 12:10.

GO HOLEGA BA BANTŠI

18, 19. (a) Re ka thuša bjang bao ka nakwana ba fokolago? (b) Go holega bomang ge re thuša bao ba fokolago?

18 O ka ba o tseba go tšwa phihlelong ya gago gore go ka tšea nako e telele go boela sekeng ka morago ga go babja o šoro. Ka mo go swanago, Mokriste yo a fokodišitšwego ke mathata a gagwe goba diphošo tše a di dirilego a ka nyaka nako gore a boele a matlafale moyeng. Ke therešo gore modumedigotee le rena yoo o swanetše go matlafatša tumelo ya gagwe ka thuto ya motho ka noši, thapelo le mediro e mengwe ya Bokriste. Eupša na re tla mmontšha go se fele pelo go fihlela a tielela? Le gona nakong yeo ya ge a tla be a boela sekeng, na re tla mmontšha lerato la kgonthe? Na re tla katanela go thuša bao ba fokolago ka nakwana go ikwa ba le bohlokwa le go ikwa ba ratwa ke Bakristegotee le bona?—2 Bakor. 8:8.

19 Anke le ka mohla o se ke wa lebala gore ge re thekga bana babo rena, re hwetša lethabo leo le tlišwago feela ke go nea. Le gona re hlagolela bokgoni bja go bontšha kwelobohloko le go se fele pelo. Seo ga se hole rena feela. Phuthego ka moka e ba le borutho le lerato kutšwanyana. Ka godimo ga tšohle, re ekiša Jehofa, yoo a lebelelago motho yo mongwe le yo mongwe a le bohlokwa. Ee, ka moka ga rena re na le mabaka a kwagalago a go arabela kgothatšong ya gore re “[thuše] bao ba fokolago.”—Dit. 20:35.

^ ser. 4 Ka pukung ya gagwe ya The Descent of Man, Charles Darwin o hlalositše ditho tše mmalwa tša mmele e le tše di “se nago mohola.” Yo mongwe wa bathekgi ba gagwe o gateletše gore mmeleng wa motho go na le “ditho tše di sa hlokagalego” tše dintši kudu, go akaretša appendix le thymus.

^ ser. 7 Leina le fetotšwe.