Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2014

Ekiša Tumelo ya Moshe

Ekiša Tumelo ya Moshe

“Ka tumelo Moshe ge a godile o ile a gana go bitšwa morwa wa morwedi wa Farao.”—BAHEB. 11:24.

1, 2. (a) Moshe o ile a dira phetho efe ge a be a na le nywaga e 40? (Bona seswantšho se se lego ka mo godimo.) (b) Ke ka baka la’ng Moshe a ile a kgetha go swarwa gampe le batho ba Modimo?

MOSHE o be a tseba seo a bego a ka se thabela Egipita. O be a bone dintlo tša kgoparara tša bahumi. E be e le ngwana wa ka bogošing. O be a “[rutilwe] ka bohlale ka moka bja Baegipita,” mohlomongwe go akaretša tša bokgabo, thuto ya dinaledi, dipalo le mehuta e mengwe ya thutamahlale. (Dit. 7:22) O be a lebanwe ke mahumo, matla le tokelo tšeo go Baegipita ba bangwe e bego e le toro feela!

2 Lega go le bjalo, ge Moshe a be a na le nywaga e 40, o ile a dira phetho yeo e swanetšego go ba e ile ya tlaba lapa la ka bogošing la Baegipita leo le mo godišitšego. Go e na le gore a kgethe go phela go swana le Moegipita le ge e le ofe, o ile a kgetha go phela le makgoba! Ka baka la’ng? Moshe o be a na le tumelo. (Bala Baheberu 11:24-26.) Ka tumelo o ile a bona seo mahlo a nama a sa kgonego go se bona. Ka ge e be e le monna wa moya, Moshe o be a na le tumelo go “Yo a sa bonagalego,” e lego Jehofa, le tumelo ya gore dikholofetšo tša Modimo di tla phethagala.—Baheb. 11:27.

3. Ke dipotšišo dife tše tharo tšeo di tlago go arabja sehlogong se?

3 Le rena re swanetše go bona seo mahlo a nama a sa kgonego go se bona. Re swanetše go ba “mohuta wo o nago le tumelo.” (Baheb. 10:38, 39) E le go re thuša go matlafatša tumelo ya rena, anke re ahlaahleng seo se ngwadilwego ka Moshe go Baheberu 11:24-26. Ge re dutše re dira bjalo, nyaka dikarabo tša dipotšišo tše: Tumelo  e thušitše Moshe bjang go gana dikganyogo tša nama? Ge a be a gobošwa, tumelo e mo thušitše bjang go tšeela godimo ditokelo tša gagwe tša tirelo? Gona ke ka baka la’ng Moshe a ile a “[tsepelela] go amogeleng moputso”?

O ILE A GANA DIKGANYOGO TŠA NAMA

4. Ke’ng seo Moshe a ilego a se lemoga ka ‘boipshino bja sebe’?

4 Ka mahlo a tumelo, Moshe o ile a lemoga gore ‘boipshino bja sebe’ e be e le bja nakwana. Ba bangwe ba ka ba ba ile ba bolela gore le ge Egipita e be e nweletše go rapeleng medimo ya diswantšho le go dirišaneng le meoya, ka nako yeo e be e le mmušo wa lefase, mola batho ba Jehofa bona ba be ba tlaišega e le makgoba! Lega go le bjalo, Moshe o be a tseba gore Modimo a ka fetoša dilo. Gaešita le ge batho bao ba babe go be go bonagala dilo di ba sepelela gabotse, Moshe o be a na le tumelo ya gore ka letšatši le lengwe ba kgopo ba tla šulafalelwa. Ka baka leo, ga se a ka a goketšwa ke “boipshino bja nakwana bja sebe.”

5. Ke’ng seo se tlago go re thuša go gana “boipshino bja nakwana bja sebe”?

5 Wena o ka ganetša bjang “boipshino bja nakwana bja sebe”? O se ke wa lebala gore boipshino bja sebe ke bja nakwana. Diriša mahlo a gago a tumelo go bona gore ‘lefase le a feta le kganyogo ya lona.’ (1 Joh. 2:15-17) Naganišiša ka seo se tlago go diragalela badiradibe bao ba sa itsholego. Ba sepela ‘mo go thedimošago, ge ba fihlile pheletšong ya bona!’ (Ps. 73:18, 19) Ge o lekega go dira sebe, ipotšiše gore: ‘Ke ikganyogela bokamoso bja mohuta mang?’

6. (a) Ke ka baka la’ng Moshe a ile a gana “go bitšwa morwa wa morwedi wa Farao”? (b) Ke ka baka la’ng o nagana gore Moshe o dirile phetho e botse?

6 Tumelo ya Moshe e ile ya mo thuša le go kgetha mošomo ge a šetše a godile. “Ka tumelo Moshe ge a godile o ile a gana go bitšwa morwa wa morwedi wa Farao.” (Baheb. 11:24) Moshe ga se a ka a nagana gore o be a ka hlankela Modimo e le setho sa ka bogošing gomme a diriša mahumo le matla a taolo ao a bego a tla ba le wona go thuša bana babo ba Baisiraele. Go e na le moo, Moshe o be a ikemišeditše go rata Jehofa ka pelo ya gagwe ka moka, moya wa gagwe ka moka le ka matla a gagwe ka moka. (Doit. 6:5) Phetho ya Moshe e ile ya mo efoša mathata a mantši. Go se go ye kae, mahumo a mantši a Egipita ao a ilego a se iše felo ka ona a ile a thopša ke bona Baisiraele. (Ek. 12:35, 36) Farao o ile a kokobetšwa gomme a bolawa. (Ps. 136:15) Lega go le bjalo, Moshe o ile a phologa gomme Modimo a mo diriša go etelela pele setšhaba sa gagwe ka moka go se iša nageng e šireletšegilego. Bophelo bja gagwe bo bile le morero wa kgonthe.

7. (a) Go ya ka Mateo 6:19-21, ke ka baka la’ng re sa swanela go tshwenyega feela ka bokamoso bja nakwana? (b) Anega phihlelo yeo e bontšhago phapano gare ga matlotlo a kgonthe le a moya.

7 Ge e ba o le mofsa yo a hlankelago Jehofa, tumelo e ka go thuša bjang go kgetha mošomo? O tla ba o le bohlale ge e ba o rulaganyetša bokamoso e sa le gona bjale. Eupša na go ba le tumelo dikholofetšong tša Modimo go tla go tutueletša go tshwenyega ka bokamoso bja nakwana goba bja ka mo go sa felego? (Bala Mateo 6:19-21.) Sophie, e lego sekgwari sa motantsho wa ballet, o ile a lebeletšana le potšišo yeo. Dikhamphani tša motantsho wa ballet kua United States di be di mo holofeditše go lefelela dithuto tša gagwe le go mo nea mešomo ya maemo a godimo kudu. O dumela ka gore: “Ke be ke thabela go retwa. Ge e le gabotse, ke be ke ikwa ke phagametše dithaka tša ka. Eupša ke be ke sa thaba.” Ke moka Sophie o ile a bogela bidio ya Young People Ask—What Will I Do With My Life? O re: “Ke ile ka lemoga gore lefase le be le mphile katlego yeo ke bego ke e nyaka le go retwa ke batho, eupša lona lefase leo le be le dirile gore ke se sa hlankela Jehofa ka pelo ka moka. Ke ile ka rapela Jehofa go tšwa pelong. Ke moka ka tlogela go tantsha.” Sophie o ikwa bjang ka phetho ya gagwe? O re: “Ga ke hlologele selo ka bophelo bja ka bja kgale. Lehono ke na le lethabo la kgonthe. Ke bula madibogo le monna wa ka. Ga se ra tuma, e bile ga re na sa rena. Eupša  re na le Jehofa, dithuto tša Beibele le dipakane tša moya. Ga ke itshole le gatee.”

8. Ke keletšo efe ya Beibele yeo e ka thušago mofsa go dira phetho ya seo a tlago go se dira ka bophelo bja gagwe?

8 Jehofa o tseba seo se tlago go go hola. Moshe o itše: “Ke eng seo Jehofa Modimo wa gago a go kgopelago sona ge e se gore o boife yena Jehofa Modimo wa gago, e le gore o sepele ditseleng tša gagwe ka moka le go mo rata gotee le go hlankela Jehofa Modimo wa gago ka pelo ya gago ka moka le ka moya wa gago ka moka? Na ga se gore o lote ditaelo tša Jehofa le melao ya gagwe yeo ke go laelago yona lehono gore o holege?” (Doit. 10:12, 13) Ka ge o sa le yo mofsa, kgetha mošomo wo o tlago go thuša go rata Jehofa le go mo hlankela “ka pelo ya gago ka moka le ka moya wa gago ka moka.” O ka kgodišega gore seo se tla ‘go hola.’

O ILE A TŠEELA GODIMO DITOKELO TŠA GAGWE TŠA TIRELO

9. O nagana gore ke ka baka la’ng go ka ba go bile thata gore Moshe a phethe kabelo ya gagwe?

9 Moshe “o ile a tšea kgobošo ya Kriste e le mahumo a fetago matlotlo a Egipita.” (Baheb. 11:26) O ile a newa thomo e le “Kriste,” goba “Motlotšwa,” ka kgopolo ya gore Jehofa o ile a mo kgetha gore a etelele pele Baisiraele go ba ntšha Egipita. Moshe o be a tseba gore go phetha thomo ye go be go tla ba thata, gaešita le go ba “kgobošo.” Moisiraele yo mongwe o be a kile a mo fotlela ka gore: “Ke mang yo a go beilego gore o be kgošana le moahlodi wa rena?” (Ek. 2:13, 14) Ka morago ga nako e itšego, Moshe o ile a botšiša Jehofa gore: “Farao yena o tla ntheetša bjang?” (Ek. 6:12) E le gore Moshe a itokišeletše go gobošwa le go lebeletšana le seo ka katlego, o ile a botša Jehofa dilo tšeo a di boifago le tšeo di mo tshwenyago. Jehofa o ile a mo thuša bjang go phetha kabelo ya gagwe e thata?

10. Jehofa o ile a hlama Moshe bjang gore a phethe kabelo ya gagwe?

10 Sa pele, Jehofa o ile a kgonthišetša Moshe ka gore: “Ke tla ba le wena.” (Ek. 3:12) Sa bobedi, Jehofa o ile a mo nea sebete ka go mo hlalosetša se sengwe sa dilo tšeo di bolelwago ke leina la gagwe ge a be a re: “KE TLA BA SEO KE NYAKAGO GO BA SONA.” * (Ek. 3:14) Sa boraro, o ile a nea Moshe matla a go dira mehlolo yeo e ilego ya hlatsela gore ruri o be a romilwe ke Modimo. (Ek. 4:2-5) Sa bone, Jehofa o ile a nea Moshe modirišani le mmoleledi e lego Arone, gore a mo thuše go phetha kabelo ya gagwe. (Ek. 4:14-16) Ge Moshe a le kgauswi le go hwa, o be a tloga a kgodišegile gore Modimo o hlama bahlanka ba Gagwe go phetha kabelo le ge e le efe yeo a ba neago yona, moo ka kgodišego a bego a ka botša mohlatlami wa gagwe e lego Joshua gore: “Jehofa ke yena a sepelago a le etile pele. Ke yena a tlago go dula a na le lena. A ka se le lahle goba a le tlogela. Le se ke la boifa goba la tšhoga.”—Doit. 31:8.

11. Ke ka baka la’ng Moshe a ile a tšeela godimo kabelo ya gagwe?

11 Ka thušo ya Jehofa, Moshe o ile a tšeela godimo kabelo ya gagwe e thata gomme a e lebelela e “[feta] matlotlo a Egipita.” Go ba gona, go hlankela Farao e be e le eng ge go bapetšwa le go hlankela Modimo Ramatlaohle? Go ba kgošana ya Egipita go be go hola ka’ng ge go bapetšwa le go ba “Kriste,” goba motlotšwa wa Jehofa? Moshe o ile a putswa ka baka la go tšeela godimo kabelo ya gagwe. O ile a ba le tswalano e kgethegilego le Jehofa, yena yo a mo neilego matla a go dira ‘ditiro tše di makatšago’ ge a be a eteletše Baisiraele pele go ba iša Nageng ya Kholofetšo.—Doit. 34:10-12.

12. Ke ditokelo dife tše di tšwago go Jehofa tšeo re swanetšego go di tšeela godimo?

12 Le rena re neilwe thomo. Jehofa o re abetše bodiredi ka Morwa wa gagwe, go etša ge a dirile bjalo go moapostola Paulo le ba bangwe. (Bala 1 Timotheo 1:12-14.) Ka moka ga rena re na le tokelo ya go tsebatša ditaba tše dibotse. (Mat. 24:14; 28:19, 20) Ba bangwe ba rena re tirelong ya nako e tletšego. Bana babo  rena ba godilego tsebong bao ba kolobeditšwego ba hlankela ba bangwe ka phuthegong e le bahlanka ba bodiredi le bagolo. Lega go le bjalo, ditho tša lapa leno tšeo e sego Dihlatse le ba bangwe ba ka nagana gore o itapišetša lefeela goba ba go kwera ka ge o bontšha moya wa boikgafo. (Mat. 10:34-37) Ge ba ka kgona go go nola moko, o ka thoma go ipotšiša ge e ba boikgafo bjo o bo dirago bo le bohlokwa goba ge e ba ruri o ka kgona go phetha kabelo ya gago. Ge e ba seo se ka go diragalela, tumelo e tla go thuša bjang go kgotlelela?

13. Jehofa o re hlama bjang gore re phethe dikabelo tšeo a re neago tšona?

13 Lopa Jehofa ka tumelo gore a go thekge. Mmotše dilo tšeo o di boifago le tšeo o tshwenyegilego ka tšona. Gopola gore ke Jehofa yo a go romilego, ka gona o tla go thuša gore o atlege. Bjang? Ka yona tsela yeo a thušitšego Moshe. Sa pele, Jehofa o go kgonthišetša gore: “Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.” (Jes. 41:10) Sa bobedi, o go gopotša gore dikholofetšo tša gagwe di a botega ge a re: ‘Ke boletše, ke tla phethagatša. Ke hlamile, e bile ke tla phetha.’ (Jes. 46:11) Sa boraro, Jehofa o go nea “matla a fetago a tlwaelegilego” gore o kgone go phetha bodiredi bja gago. (2 Bakor. 4:7) Sa bone, e le gore o kgotlelele kabelong ya gago, Tatago rena yo lerato o go neile borwarre bja lefase ka bophara bja barapedi ba gagwe ba therešo bao ba ‘tšwelago pele ba kgothatšana e bile ba agana.’ (1 Bathes. 5:11) Ge Jehofa a dutše a go hlamela go phetha dikabelo tša gago, tumelo ya gago go yena e tla matlafala gomme wa kwešiša gore ditokelo tša gago tirelong ya gagwe ke mahumo a fetago matlotlo le ge e le afe a lefase le.

‘O ILE A TSEPELELA GO AMOGELENG MOPUTSO’

14. Ke ka baka la’ng Moshe a be a kgodišegile gore o be a tla putswa?

14 Moshe ‘o ile a tsepelela go amogeleng moputso.’ (Baheb. 11:26) Ee, Moshe o ile a dumelela seo a bego a se tseba ka bokamoso se bopa pono ya gagwe, gaešita le ge ka nako yeo a be a tseba mo gonyenyane. Go etša rakgolokhukhu wa gagwe Aborahama, Moshe o be a kgodišegile gore Jehofa a ka tsoša bahu. (Luka 20:37, 38; Baheb. 11:17-19) Go ba le kholofelo ditšhegofatšong tša nakong e tlago go ile gwa thuša Moshe gore a se lebelele nywaga e 40 yeo a e feditšego e le motšhabi le nywaga e 40 yeo a e feditšego a le lešokeng e le go senya nako. Gaešita le ge a be a sa tsebe ditaba ka botlalo tša kamoo dikholofetšo tša Modimo di bego di tla phethagala ka gona, ka tumelo o ile  a kgona go bona moputso wo o bego o ka se bonwe ka mahlo a nama.

15, 16. (a) Ke ka baka la’ng re swanetše go tsepelela moputsong wa rena? (b) Ke ditšhegofatšo dife tšeo o fagahletšego go di thabela ge Mmušo wa Modimo o tla be o buša?

15 Na le wena o “tsepeletše go amogeleng moputso” wa gago? Go swana le Moshe, le rena ga re tsebe ditaba ka botlalo tša mabapi le dikholofetšo tša Modimo. Ka mohlala, ga re ‘tsebe gore nako e beilwego ya masetlapelo a magolo e neng.’ (Mar. 13:32, 33) Eupša re tseba mo gontši ka Paradeise yeo e holofeditšwego go feta kamoo Moshe a bego a tseba ka gona. Gaešita le ge re se na ditaba ka botlalo, Modimo o re holofeditše dilo tše dintši tša kamoo bophelo bo tlago go ba ka gona ka tlase ga Mmušo wa gagwe, e lego bophelo bjoo re ka bo ‘tsepelelago.’ Go ipopela seswantšhokgopolo ka lefase le lefsa go tla re tutueletša go tsoma Mmušo woo pele. Bjang? Nagana ka se: Na o be o ka reka ntlo yeo o sa tsebego selo ka yona? Ga go bjalo le gatee! Ka mo go swanago, re be re ka se dirišetše maphelo a rena go phegelela dikholofetšo tša lefeela. Ka tumelo, re swanetše go ipona re šetše re phela ka tlase ga pušo ya Mmušo wa Modimo.

Ruri e tla ba mo go thabišago go boledišana le bahlanka ba ba botegago ba go swana le Moshe! (Bona serapa 16)

16 E le gore o ipopele seswantšhokgopolo se sebotse ka Mmušo wa Modimo, ‘tsepelela’ goba ipone o phela Paradeiseng. Bona dilo ka leihlo la kgopolo. Ka mohlala, ge o ithuta ka baanegwa ba ka Beibeleng ba pele ga mehla ya Bokriste, nagana ka seo o ka ba botšišago sona ge ba tsošitšwe bahung. Ipone ba go botšiša gore o be o dira’ng mehleng ya bofelo. Akanya ka lethabo le legolo leo o tla bago le lona ge o kopana le borakgolokhukhu ba gago ba kgalekgale gomme o ba ruta dilo ka moka tšeo Modimo a ba diretšego tšona. Ipone o thabela go ithuta ka diphoofolo tše dintši ge di tla be di phela ka khutšo le batho. Akanya ka tswalano ya kgauswiuswi yeo o tla bago le yona le Jehofa ge o dutše o phethagala.

17. Go bona moputso wa rena ka leihlo la kgopolo go ka re thuša bjang lehono?

17 Go bona moputso wa rena ka leihlo la kgopolo go re thuša go gatela pele, go thaba le go dira diphetho tše di theilwego bokamosong bjo re kgodišegilego ka bjona bja ka mo go sa felego. Paulo o ngwaletše Bakriste bao ba tloditšwego gore: “Ge e ba re holofela seo re sa se bonego, ka go fagahla re dula re se letile ka kgotlelelo.” (Baroma 8:25) Mantšu a a ka dirišwa le go Bakriste ka moka bao ba nago le kholofelo ya go phela ka mo go sa felego mo lefaseng. Gaešita le ge re se ra hlwa re amogela moputso wa rena, tumelo ya rena e matla kudu moo re dulago re letile ka go se fele pelo “go amogeleng moputso.” Go swana le Moshe, ga re lebelele nywaga yeo re e feditšego tirelong ya Jehofa e le go senya nako. Go e na le moo, re kgodišegile gore “dilo tše di bonwago ke tša nakwana, eupša dilo tše di sa bonwego ke tša ka mo go sa felego.”—Bala 2 Bakorinthe 4:16-18.

18, 19. (a) Ke ka baka la’ng re swanetše go lwela go dula re na le tumelo? (b) Re tlo ahlaahla’ng sehlogong se se latelago?

18 Tumelo e re thuša go lemoga “bohlatse bjo bo lego molaleng bja dilo tša kgonthe tšeo di sa bonwego.” (Baheb. 11:1) Motho wa nama ga a kgone go bona bohlokwa bja go hlankela Jehofa. Go yena mahumo a moya “ke bošilo.” (1 Bakor. 2:14) Lega go le bjalo, rena re holofetše go ipona re phela ka mo go sa felego le go bona bahu ba tsošwa, e lego dilo tšeo batho ba lefase ba sa kgonego go di bona. Go swana le boradifilosofi ba mehleng ya Paulo bao ba bego ba mo kwera ka gore ke “moratharathi,” batho ba bantši lehono ba nagana gore kholofelo yeo re ba botšago ka yona ke bošilo bja mafelelo.—Dit. 17:18.

19 Ka ge re dikologilwe ke batho bao ba se nago tumelo, re swanetše go lwela go dula re na le tumelo. Lopa Jehofa gore “tumelo ya gago e se ke ya fela.” (Luka 22:32) Dula o nagana ka ditlamorago tša sebe, bohlokwa bja go hlankela Jehofa le kholofelo ya gago ya go phela ka mo go sa felego. Eupša tumelo ya Moshe ga se ya mo thuša feela go bona dilo tše. Sehlogong se se latelago, re tlo ahlaahla kamoo tumelo ya Moshe e mo thušitšego go bona “Yo a sa bonagalego.”—Baheb. 11:27.

^ ser. 10 Seithuti se sengwe sa Beibele se ngwadile ka mantšu a Modimo ao a lego go Ekisodo 3:14 gore: “Ga go na selo seo se ka mo thibelago go phetha thato ya gagwe . . . Leina le [Jehofa] e be e swanetše go ba sebo sa Baisiraele, polokelo ya sa ruri ya dikholofelo le dikhomotšo.”