Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  April 2014

Na o Leboga Tlhokomelo ya Jehofa e Lerato?

Na o Leboga Tlhokomelo ya Jehofa e Lerato?

“Mahlo a Jehofa a gohle, a lebeletše ba babe le ba ba lokilego.”—DIE. 15:3.

1, 2. Tsela yeo Jehofa a re šetšago ka yona e fapana bjang le dibidio tšeo di tšewago ke dikhamera tša go hlapetša?

DINAGENG tše dintši, mokgwa wa go diriša dikhamera go hlapetša sephethephethe sa dikoloi le go tšea dibidio tša dikotsi tša dikoloi o atile. Ge e ba dikhamera di ka rekhota mootledi yo a dirilego kotsi ke moka a tšhaba, bidio yeo e tšerwego e ka thuša balaodi go mo hwetša ke moka ba mo golega. Ka ge dikhamera tše di atile, go thata kudu gore batho ba tšhabele ditlamorago tša ditiro tša bona.

2 Lega go le bjalo, na mokgwa o atilego wa go dirišwa ga dikhamera tša go hlapetša o swanetše go re gopotša ka Tatago rena yo lerato e lego Jehofa? Beibele e re mahlo a gagwe “a gohle.” (Die. 15:3) Eupša na se se ra gore o dula a tomoletše mahlo seo re se dirago? Na Modimo o re šeditše feela go kgonthišetša gore re latela melao ya gagwe, e le gore a re otle ge e ba re sa dire bjalo? (Jer. 16:17; Baheb. 4:13) Aowa! Lebaka le legolo la gore Jehofa a re šetše ke gore o rata yo mongwe le yo mongwe wa rena le gona o nyaka gore re atlege.—1 Pet. 3:12.

3. Re tlo ahlaahla dikarolo dife tše hlano tšeo di bontšhago gore Modimo o re šeditše ka lerato?

3 Ke’ng seo se tlago go re thuša go leboga gore Modimo o dula a re šeditše ka ge a re rata? Anke re eleng hloko kamoo a dirago se  ka gona. O dira bjalo (1) ka go re lemoša ge re thoma go ba le ditshekamelo tše mpe, (2) ka go re phošolla ge re dira diphošo, (3) ka go re hlahla ka melao ya motheo yeo e hwetšwago ka Lentšung la gagwe, (4) ka go re thuša ge re lebane le diteko tše di fapafapanego le (5) ka go re putsa ge a lemoga gore re dira dilo tše dibotse.

MODIMO YO A RE HLOKOMELAGO O A RE LEMOŠA

4. Maikemišetšo a Jehofa e be e le afe ge a be a lemoša Kaine gore sebe se be se ‘mo laletše mojako’?

4 Sa pele, anke re ahlaahleng kamoo Modimo a re lemošago ka gona ge re thoma go ba le ditshekamelo tše mpe. (1 Dikor. 28:9) E le gore o kwešiše karolo ye ya tlhokomelo e lerato ya Modimo, ela hloko kamoo a ilego a dirišana le Kaine, yoo a ilego “a tuka bogale kudu” ge Modimo a be a sa mo amogele. (Bala Genesi 4:3-7.) Jehofa o ile a kgothaletša Kaine gore a ‘fetoge a dire botse.’ Jehofa o ile a mo lemoša gore ge a ka se dire bjalo, sebe se be se ‘mo laletše mojako.’ Modimo o ile a mmotšiša gore: “A wena o ka se fenya?” Modimo o be a nyaka gore Kaine a kwe temošo yeo gomme a mo amogele. Go amogelwa ke Modimo go be go tla dira gore a dule a na le tswalano e botse le yena.

5. Ke ka ditsela dife Jehofa a re lemošago ka ditshekamelo tše mpe tšeo re ka bago re na le tšona?

5 Go thwe’ng ka rena lehono? Mahlo a Jehofa a bona le ka dipelong tša rena; re ka se mo fihlele ditshekamelo tša rena le maikemišetšo a rena a kgonthe. Tatago rena yo lerato o nyaka gore re sepele ditseleng tša go loka; lega go le bjalo, ga a re gapeletše go fetoša tsela yeo re sepelago go yona. O diriša Lentšu la gagwe e lego Beibele go re lemoša ge re leba tseleng e šele. O dira seo bjang? Ge re bala Beibele letšatši le letšatši, gantši re hwetša ditemana tšeo di re thušago go fenya mekgwa e mebe le ditshekamelo tše mpe. Go oketša moo, dikgatišo tša rena tša Bokriste di ka bolela ka bofokodi bjo bo ka bago bo re tshwenya gomme tša re bontšha kamoo re ka bo fenyago ka gona. Le gona dibokeng tša rena tša Bokriste, ka moka ga rena re hwetša keletšo yeo e tlago ka nako ya maleba!

6, 7. (a) Re na le bohlatse bofe bja gore Modimo o rata yo mongwe le yo mongwe wa rena? (b) O ka holwa bjang ke tlhokomelo yeo Jehofa a go bontšhago yona?

6 Ditemošo tše bjalo ka moka e tloga e le bohlatse bja gore Jehofa o rata yo mongwe le yo mongwe wa rena. Ke therešo gore mantšu ao a lego ka Beibeleng a na le nywagakgolo a le gona, dikgatišo tšeo di tšweletšwago ke mokgatlo wa Modimo di ngwalelwa batho ba dimilione le gona keletšo yeo e newago dibokeng e lebišwa go phuthego ka moka. Lega go le bjalo, maemong a ka moka, Jehofa o nyaka gore o kwe keletšo yeo e lego ka Lentšung la gagwe e le gore o kgone go lokiša ditshekamelo tša gago. Ka go re’alo, bjo ke bohlatse bja gore Jehofa o go hlokomela ka lerato.

Matswalo a rena ao a tlwaeditšwego ka Beibele a re thuša go phema dikotsi tšeo di re dikologilego (Bona serapa 6 le 7)

7 E le gore re holwe ke ditemošo tša Modimo, sa pele re swanetše go lemoga gore o tloga a tshwenyegile ka rena. Ke moka re swanetše go arabela gabotse go seo Lentšu la gagwe le re botšago sona, re tlogele go nagana dilo le ge e le dife tšeo di sa kgahlišego Modimo. (Bala Jesaya 55:6, 7.) Ge e ba re ekwa ditemošo tšeo re di newago, re tla phema mathata a mantši. Lega go le bjalo, a re re re ineela ditshekamelong tša rena tše mpe. Tatago rena yo lerato o tla re thuša bjang?

TATAGO RENA YO LERATO O A RE PHOŠOLLA

8, 9. Keletšo yeo Jehofa a re neago yona a diriša bahlanka ba gagwe e bontšha bjang gore o tloga a re hlokomela? Bontšha.

8 Re ka lemoga kudu tlhokomelo ya Jehofa ge re phošollwa. (Bala Baheberu 12:5, 6.) Ke therešo gore go eletšwa goba go laiwa ga go bose. (Baheb. 12:11) Lega go le bjalo, nagana ka seo yo a re eletšago a swanelwago ke go se ela hloko. O swanetše go tseba seo re se dirago seo se ka kgomago tswalano ya rena  le Jehofa Modimo, o swanetše go naganela maikwelo a rena, le gona o swanetše go ikemišetša go diriša nako le go dira boiteko gore a re bontšhe go tšwa ka Beibeleng kamoo re ka lokišago maemo a rena e le gore re kgahliše Modimo. Jehofa, e lego Mothopo wa keletšo yeo, le yena o tshwenyega kudu.

9 Anke re eleng hloko mohlala wa kamoo batho bao ba neago keletšo ba ekišago tsela yeo Modimo a tshwenyegago ka yona. Ngwanabo rena yo mongwe o be a tlwaetše go bogela diswantšho tše di kgothaletšago bootswa pele e ka ba Mokriste, eupša a fenya bothata bjoo. Lega go le bjalo, o be a sa na le tshekamelo ya gagwe ya kgale, e kunyelela bjalo ka dikgonyana tša mollo. Ka morago ga gore a be le mogalatheka o mofsa, kganyogo ya gagwe e mpe e ile ya tsoga lefsa. (Jak. 1:14, 15) O ile a diriša mogala wa gagwe go tsena diwepesaeteng tšeo di nago le diswantšho tše di kgothaletšago bootswa. Ka letšatši le lengwe ge a be a nea bohlatse ka mogala, o ile a adima mogolo yo mongwe mogala wa gagwe gore a nyake diaterese tše itšego. Ge mogolo yo a thoma go diriša mogala woo, go ile gwa tšwelela diwepesaete tše di belaetšago. Se se ile sa thuša ngwanabo rena yo yoo a bego a le kotsing ya moya. O ile a newa keletšo yeo e ilego ya mo hola gomme mafelelong a fenya ditshekamelo tše mpe. Ruri re leboga Tatago rena yo lerato wa legodimong yo a bonago gaešita le dibe tša rena tša ka sephiring gomme a re phošolla le pele go senyega!

RE HOLWA KE GO DIRIŠA MELAO YA MOTHEO YA BEIBELE

10, 11. (a) O ka tsoma tlhahlo go Modimo bjang? (b) Lapa le lengwe le ile la bona bjang bohlale bja go latela tlhahlo ya Jehofa?

10 Mopsalme o opeletše Jehofa ka gore: “O tla ntlhahla ka morero wa gago.” (Ps. 73:24) Ka mehla ge re nyaka tlhahlo, re ka ‘ela Jehofa hloko’ ka go lebelela ka Lentšung la gagwe gore re bone kamoo a lebelelago ditaba ka gona. Go diriša melao ya motheo ya Beibele ga go re hole feela moyeng eupša ka dinako tše dingwe go re thuša go hwetša dinyakwa tša rena tša nama.—Die. 3:6.

11 Mohlala wa kamoo Jehofa a ilego a hlahla ba bangwe o ka bonwa phihlelong ya molemi yo a bego a hirile ntlo polaseng ya dithabeng tša Masbate kua Philippines. Yena le mosadi wa gagwe ba be ba hlankela e le babulamadibogo ba ka mehla ge ba dutše ba hlokomela lapa le legolo. Ka letšatši le lengwe ba ile ba makala ge ba be ba hwetša lengwalo la go tšwa go mong wa polase yeo le ba botša gore ba tloge. Molato e be e le  eng? Ba be ba latofaditšwe ka maaka gore ga ba botege. Gaešita le ge ngwanabo rena yo a be a tshwenyegile ka gore o tla hweletša kae lapa la gagwe bodulo, o ile a re: “Jehofa o tla re hlokomela. Ka mehla o re nea dilo tšeo re di hlokago, go sa šetšwe seo se diregago.” Ngwanabo rena yo o be a rerešitše. Matšatši a sego kae ka morago, lapa leo le ile la kwa gore ga go sa hlokagala gore le huduge. Go be go diragetše’ng? Mong wa polase o be a lemogile gore gaešita le ge lapa leo la Dihlatse le be le latofaditšwe ka maaka, le ile la se tsoše dintwa ka ge le be le hlahlwa ke melao ya motheo ya Beibele. Se se ile sa mo kgahliša kudu moo a sa kago a ba dumelela feela gore ba dule eupša a ilego a ba nea le naga e oketšegilego gore ba e leme. (Bala 1 Petro 2:12.) Ee, Jehofa o re hlahla ka Lentšu la gagwe go re thuša go lebeletšana le mathata a bophelo.

MOGWERA YO A RE THUŠAGO GO KGOTLELELA DITEKO

12, 13. Ke maemong afe moo ba bangwe ba ka ipotšišago ge e ba ruri Modimo a bona mohlako wa bona?

12 Lega go le bjalo, ka dinako tše dingwe mathata a tšea lebaka le letelele. Re ka ba re swerwe ke bolwetši bjo šoro, e ka ba e le kgale re ganetšwa ke ditho tša lapa goba re phela re tlaišwa. Le gona go thwe’ng ka go fela re kgopišana le ba bangwe ka phuthegong?

13 Ka mohlala, ngwanabo rena a ka go kweša bohloko ka mantšu a gagwe. Ke moka o ka re: ‘Selo sa mohuta wo ga se sa swanela go direga ka mokgatlong wa Modimo!’ Lega go le bjalo, ngwanabo rena yoo o hwetša ditokelo ka phuthegong gomme go bonagala ba bangwe ba mo tšeela godimo. O ipotšiša gore: ‘Se se kgonega bjang? Na Jehofa ga a bone? Go re’ng a sa gate mogato?’—Ps. 13:1, 2; Habak. 1:2, 3.

14. Lebaka le lengwe la gore Modimo a se tsene ditaba gare go rarolleng mathata a rena e ka ba e le lefe?

14 Jehofa a ka ba a na le mabaka a kwagalago a go se tsene ditaba gare. Ka mohlala, le ge o ka ba o nagana gore ngwanabo rena yoo ke yena a lego molato kudu, Modimo a ka ba a sa bone dilo ka tsela yeo. Go ya ka yena, o ka hwetša e le wena o lego molato kudu. Ge e le gabotse, wona mantšu ao o ka bago o nagana gore a go kwešitše bohloko, e ka ba e le keletšo e botse yeo o swanetšego go naganišiša ka yona. Ngwanabo rena Karl Klein, yoo e bego e le setho sa Sehlopha se Bušago, o kile a bolela ka phihlelo ya nakong e nngwe ge a be a newa keletšo e lebanyago ke Ngwanabo rena J. F. Rutherford. Ka morago, Ngwanabo rena Rutherford o ile a dumediša Ngwanabo rena Klein ka lethabo a re: “Thobela, Karl!” Lega go le bjalo, ka ge Ngwanabo rena Klein a be a sa kwešitšwe bohloko ke keletšo yeo a bego a e neilwe, o ile a fo dumela a ngunanguna. Ge Ngwanabo rena Rutherford a lemoga gore Ngwanabo rena Klein o be a bolokile sekgopi, o ile a mo lemoša ka gore: “O itlhokomele. Diabolo o go laletše.” Ka morago Ngwanabo rena Klein o ile a ngwala gore: “Ge re bolokela ngwanabo rena sekgopi, kudukudu e le ge a boletše selo seo a nago le tshwanelo ya go se bolela, re bulela Diabolo sebaka sa go re tanya ka melaba ya gagwe.” *

15. Ke’ng seo se ka go thušago go se fele pelo ge o letetše gore Jehofa a go thuše boemong bjo thata?

15 Lega go le bjalo, ka dinako tše dingwe re ka fela pelo ge go bonagala maemo a thata a sa fele. Re ka lebeletšana bjang le boemo bjoo? A re re o otlela koloi tseleng ya lephefo ke moka wa kgakgelwa sephethephetheng. Ga o tsebe gore o tlo kgakgelwa go fihlela neng. Ge o ka fela pelo gomme wa leka go hwetša tsela e nngwe, o ka timela. O ka feleletša o tšere nako e ntši go fihla moo o yago go feta ge nkabe o ile wa leta ka go se fele pelo tseleng yeo o bego o sepela ka yona. Ka mo go swanago, ge o ka kgomarela ditseleng tšeo di boletšwego ka Lentšung la Modimo, mafelelong o tla fihla mo o yago.

16. Lebaka le lengwe leo Jehofa a ka diegago go tsena ditaba gare ge re lekwa ke lefe?

 16 Jehofa a ka diega go tsena ditaba gare ge re lekwa ka ge a nyaka gore re hwetše tlwaetšo ya bohlokwa. (Bala 1 Petro 5:6-10.) Le gona Modimo ga a re leke. (Jak. 1:13) ‘Lenaba la rena e lego Diabolo’ ke lona le bakago mathata a mantši. Lega go le bjalo, Modimo a ka diriša boemo bjo thata go re thuša go gola moyeng. O bona tlaišego ya rena, gomme ‘ka ge a re hlokomela,’ o tla kgonthišetša gore e tšwela pele “ka lebakanyana” feela. Na o leboga tlhokomelo ya Jehofa e lerato ge o lebeletšane le maemo a thata, o kgodišegile gore o tla go bulela tsela?—2 Bakor. 4:7-9.

ŠEGOFATŠWA KA GO AMOGELWA KE MODIMO

17. Jehofa o hlahloba dipelo tša bomang, gona ka baka la’ng?

17 Sa mafelelo, Modimo o hlahloba maphelo a rena ka lebaka leo le kgothatšago kudu. Modimo o ile a diriša Hanani wa mmoni go botša Kgoši Asa gore: “Ge e le Jehofa yena mahlo a gagwe a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.” (2 Dikor. 16:9) Le ge Modimo a ile a hwetša gore Asa ga a mmotegele ka pelo ka moka, o tla go ‘bontšha matla a gagwe’ ge e ba o tšwela pele o dira se se lokilego.

18. Ge o ikwa eka ga go na motho yo a nago le taba le seo o se dirago, o swanetše go gopola’ng ka Jehofa? (Bona seswantšho seo se lego mathomong a sehlogo.)

18 Modimo o nyaka gore re ‘tsome se se lokilego,’ ‘re rate se se botse’ le go ‘dira se sebotse’ e le gore a re ‘gaugele.’ (Amose 5:14, 15; 1 Pet. 3:11, 12) Jehofa o bona baloki le go ba šegofatša. (Ps. 34:15) Ka mohlala, nagana ka babelegiši ba Baheberu e lego Shifira le Pua. Ge Baisiraele ba be ba le bokgobeng kua Egipita, basadi ba ba babedi ba ile ba boifa Modimo go feta Farao yo a bego a ba laetše gore ba bolaye bana ba bašemane ka moka ba Baheberu ge ba belegwa. Go molaleng gore matswalo a bona a go boifa Modimo a ile a ba tutueletša go se bolaye bana bao. Jehofa o ile a šegofatša Shifira le Pua ka go dira gore ba be le malapa a bona. (Ek. 1:15-17, 20, 21) Jehofa o ile a bona ditiro tša bona tše dibotse. Ka dinako tše dingwe re ka nagana gore ga go na motho yo a lemogago dilo tše dibotse tšeo re di dirago. Eupša Jehofa o a di lemoga. O lemoga dilo ka moka tše dibotse tšeo re di dirilego gomme o tla re putsa.—Mat. 6:4, 6; 1 Tim. 5:25; Baheb. 6:10.

19. Kgaetšedi yo mongwe o ile a lemoga bjang gore Jehofa o ela hloko dilo tše dibotse tše re di dirago?

19 Kgaetšedi yo mongwe wa kua Austria o ile a lemoga gore Modimo o be a etše hloko go šoma ga gagwe ka thata. Ka ge e be e le Mohungari, o ile a newa aterese ya motho yo a bolelago Sehungari gore a mo etele. Gateetee o ile a etela ntlong yeo, eupša a hwetša go se na motho ka gae. O ile a boela gantšintši. Ka dinako tše dingwe o be a ekwa gore go na le motho, eupša go se na yo a arabago. O ile a tlogela dikgatišo, mangwalo, dinomoro tša gagwe tša mogala le tše dingwe. Ka morago ga go ya ntlong yeo lebaka la ngwaga le seripa, mafelelong motho yo a itšego o ile a bula mojako! Kgaetšedi yo o ile a dumedišwa ke mosadi yo a nago le bogwera yo a ilego a re: “Hle, tsena. Ke badile dilo ka moka tšeo o ntlogeletšego tšona gomme ke be ke go letetše.” Mong yo wa ntlo o be a alafiwa bolwetši bjo šoro gomme a sa kganyoge go bolela le batho ka nako yeo. Go ile gwa thongwa thuto ya Beibele le yena. Ee, Modimo o ile a putsa kgaetšedi yo ka baka la maiteko a gagwe a tseneletšego!

20. O ikwa bjang ka tlhokomelo ya Jehofa e lerato?

20 Jehofa o bona dilo ka moka tšeo o di dirago gomme mafelelong o tla go putsa. Ge o thoma go lemoga gore Modimo o go šeditše, o se ke wa ikwa eka o beilwe leihlo ke dikhamera tša go hlapetša. Go e na le moo, eka o ka ikwa o batametše kgauswi kudu le Modimo yo lerato yo a tlogago a tshwenyegile ka wena!

^ ser. 14 Phihlelo ya Ngwanabo rena Klein e gatišitšwe ka tokollong ya Morokami wa Seisemane wa October 1, 1984.