Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  April 2014

Eba le Sebete Kudu—Jehofa ke Mothuši wa Gago!

Eba le Sebete Kudu—Jehofa ke Mothuši wa Gago!

‘Eba le sebete kudu gomme o re: “Jehofa ke mothuši wa ka.”’—BAHEB. 13:6.

1, 2. Bafaladi ba bantši ba lebeletšana le ditlhohlo dife ge ba boela gae? (Bona seswantšho se se lego ka mo godimo.)

EDUARDO o gopola ka gore: “Ge ke be ke le nageng e nngwe e šele, ke be ke šoma mošomo wa maemo a godimo gomme ke gola tšhelete ya go bonagala. * Eupša ge ke be ke thoma go ithuta Beibele le Dihlatse tša Jehofa, ke ile ka lemoga gore ke na le boikarabelo bja bohlokwa kudu bja go hlokomela lapa la ka moyeng, e sego feela nameng. Ka gona ke ile ka boela gae.”—Baef. 6:4.

2 Eduardo o be a tseba gore o be a kgahliša Jehofa ka go boela gae a yo dula le lapa la gagwe. Eupša go etša Marilyn, yo go boletšwego ka yena sehlogong se se fetilego, Eduardo o ile a swanelwa ke go thoma mogato wo o tšeago nako e telele wa go tsošološa ditswalano tša lapa. Le gona o ile a lebeletšana le tlhohlo ya go hlokomela mosadi wa gagwe le bana ikonoming yeo e fokolago kudu. O be a tla iphediša bjang? O be a ka letela go hwetša thušo efe go ba bangwe ka phuthegong?

GO LOKIŠA BOMOYA LE BOPHELO BJA LAPA

3. Bana ba kgomega bjang ge motswadi a sa dule le bona ka gae?

3 Eduardo o dumela ka gore: “Ke ile ka lemoga gore ke be ke hlokomologile bana ba ka ka nako yeo ba bego ba hloka tlhahlo le lerato la ka kudu. Ke be ke se gona go ka ba balela dikanegelo tša Beibele,  go rapela le bona, go ba gokarela le go bapala le bona.” (Doit. 6:7) Morwedi wa gagwe yo mogolo e lego Anna, o gopola ka gore: “Ke be ke ikwa ke sa šireletšega maikwelong ge tate a be a sa dule le rena ka gae. Le ge a boile gae, go be go no swana le ge a se gona. Ke be ke sa kgomege ge a nkgokarela.”

4. Tema ya monna ya go ba hlogo e kgomega bjang ge a sa dule le lapa la gagwe?

4 Le gona ge tate a sa dule le lapa la gagwe ga a kgone go phetha tema ya gagwe ya go ba hlogo ya lapa. Mosadi wa Eduardo e lego Ruby o hlalosa gore: “Ke ile ka swanelwa ke go kgatha ditema tše pedi—go ba mma le tate—e bile ke ile ka tlwaela go dira bontši bja diphetho tša ka lapeng. Ge Eduardo a boile gae, ke ile ka swanelwa ke go ithuta go ikokobeletša bohlogo. Gaešita le gona bjale, ka dinako tše dingwe ke swanelwa ke go ikgopotša gore monna wa ka o gona.” (Baef. 5:22, 23) Eduardo o oketša ka gore: “Banenyana ba rena ba be ba tlwaetše go kgopela tumelelo ya go dira dilo go mmago bona. Bjalo ka batswadi, re ile ra lemoga gore re swanetše go ba ngatana e tee baneng ba rena, le gona ke ile ka swanelwa ke go ithuta go etelela pele ka tsela ya Bokriste.”

5. Tate yo mongwe o ile a lokiša bjang tshenyo yeo e bakilwego ke go se dule le lapa la gagwe, gona mafelelo e bile afe?

5 Eduardo o be a ikemišeditše go dira sohle seo a ka se kgonago gore a lokiše tswalano ya gagwe le lapa la gagwe le go le matlafatša moyeng. O re: “Pakane ya ka e be e le go ruta bana ba ka therešo ka lentšu le ka mohlala—e sego go fo re ke rata Jehofa, eupša ke bontšhe seo.” (1 Joh. 3:18) Na Jehofa o ile a šegofatša ditiro tša Eduardo tša go bontšha gore o na le tumelo? Anna o araba ka gore: “Go bona maiteko a gagwe ka moka a go ba tate yo botse le go batamela go rena gape, go ile gwa dira phapano e kgolo. Re ile ra ikwa re ikgantšha ka yena ge re be re mmona a katanela go fihlelela ditokelo tše itšego ka phuthegong. Lefase le be le leka go re aroganya le Jehofa. Eupša re ile ra bona batswadi ba rena ba swaregile therešong, ka gona ra leka go dira se se swanago. Tate o ile a holofetša gore a ka se tsoge a re tlogetše gape, gomme o ile a phetha kholofetšo ya gagwe. Ge nkabe a ile a re tlogela gape, mohlomongwe nkabe lehono ke se ka mokgatlong wa Jehofa.”

GO AMOGELA BOIKARABELO

6. Batswadi ba bangwe ba ile ba ithuta thuto efe nakong ya ntwa?

6 Diphihlelo tše itšego di bontšha gore nakong ya ntwa kua Balkan, bana ba Dihlatse tša Jehofa ba moo ba be ba thabile gaešita le ge ba be ba phela maemong a thata. Ka baka la’ng? Ka gobane batswadi ba bona bao ba bego ba sa kgone go ya mošomong ba be ba dula ka gae gomme ba ithuta le bona, ba bapala le bona e bile ba boledišana le bona. Re ithuta’ng go se? Re ithuta gore bana ba nyaka gore batswadi ba dule le bona go feta go ba nea tšhelete goba dimpho. Go etša ge Lentšu la Modimo le bolela, bana ba tla holega ge e ba ba hwetša tlhokomelo le tlwaetšo ya batswadi.—Die. 22:6.

7, 8. (a) Ke phošo efe yeo batswadi ba bangwe bao ba boago gae ba e dirago? (b) Batswadi ba ka lokiša bjang tswalano ya bona le bana ba bona?

7 Ka manyami, batswadi ba bangwe ge ba boa gae gomme ba hwetša gore bana ba bona ga ba ba amogele gabotse goba ba ba galefetše, ba arabela ka gore: “Go re’ng le se na tebogo bakeng sa dilo ka moka tšeo ke le diretšego tšona?” Lega go le bjalo, tsela e sa kgahlišego yeo bana ba arabelago ka yona e ka ba e bakilwe ke go se be gona ga motswadi. Motswadi a ka dira’ng gore a lokiše bothata bjo?

8 Kgopela Jehofa gore a go thuše go kwešiša kamoo ditho tša lapa la gago di ikwago ka gona. Ke moka ge o boledišana le lapa la gago, amogela gore o bile le karolo bothateng bjo bo lego gona. Go kgopela tshwarelo ka go tšwa pelong go ka thuša. Ge molekane wa gago le bana ba gago ba lemoga gore ka mehla o leka go lokiša dilo, ba tla bona gore ga o bolele maaka. Ka boikemišetšo le ka go se fele pelo, ganyenyane-ganyenyane lapa la gago le ka boela la go rata le go go hlompha.

 GO HLOKOMELA LAPA LA GAGO

9. Ke ka baka la’ng ‘go babalela ba gabo’ rena go sa re gore re dule re katanela go hwetša dilo tše di oketšegilego tše di bonagalago?

9 Moapostola Paulo o ile a laela gore ge Bakriste bao ba tšofetšego ba se sa kgona go itlhokomela, bana ba bona le ditlogolo ba swanetše “go lefa batswadi le borakgolo le bomakgolo ba bona seo se ba swanetšego.” Eupša Paulo o tšwetše pele ka go kgothaletša Bakriste ka moka gore ba kgotsofalele dinyakwa tša bona tša letšatši le letšatši—dijo, diaparo le madulo. Ga se ra swanela go katanela go phela bophelo bja manobonobo goba go dula re naganne ka go ikgobokeletša tšhelete bakeng sa bokamoso. (Bala 1 Timotheo 5:4, 8; 6:6-10.) E le gore Mokriste a hlokomele goba ‘a babalele ba gabo,’ ga go hlokagale gore a nyake mahumo a dilo tše di bonagalago lefaseng le leo le lego kgauswi le go feta. (1 Joh. 2:15-17) Ga se ra swanela go dumelela “matla a forago a mahumo” goba “dipelaelo tša bophelo” di bea kotsing ‘go swarelela ga malapa a rena ka go tia bophelong bja kgonthe’ lefaseng le lefsa la Modimo la go loka!—Mar. 4:19; Luka 21:34-36; 1 Tim. 6:19.

10. Re ka bontšha bjang bohlale bja Modimo tabeng ya dikoloto?

10 Jehofa o a tseba gore re hloka tšhelete ya go iphediša. Eupša tšhelete e ka se kgone go re šireletša le go re phediša ka tsela yeo bohlale bja Modimo bo dirago ka yona. (Mmo. 7:12; Luka 12:15) Maemong a mantši, batho ba nyatša dikotsi tšeo di tlišwago ke go yo šoma dinageng dišele, le gona ga go na kgonthišetšo ya gore ba tla ba le tšhelete ge ba le moo. Ge e le gabotse, go na le dikotsi tše dikgolo kudu. Bafaladi ba bantši ba boa gae ba na le dikoloto tše dintši le go feta. Go e na le gore ba hlankele Modimo ka bolokologi, ba feleletša ba hlankela batho bao ba ba kolotago. (Bala Diema 22:7.) Ke gabohlale gore di sa tloga fase, motho a se be le dikoloto.

11. Go kgomarela lenaneo la go diriša tšhelete go ka thuša malapa bjang gore a fokotše kgateletšego ya tša ditšhelete?

11 Eduardo o be a tseba gore o swanetše go diriša tšhelete ka bohlale e le gore phetho ya gagwe ya go dula le lapa la gagwe e tle e atlege. Yena le mosadi wa gagwe ba ile ba dira lenaneo la go diriša tšhelete la dilo tšeo ba bego ba tloga ba di hloka. Go ba gona, lenaneo leo le be le sa ba dumelele go ba le dilo tšeo lapa la gagwe le bego le tlwaetše go ba le tšona. Eupša ka moka ga bona ba ile ba dirišana gomme ba se diriše tšhelete dilong tšeo di sego bohlokwa. * Eduardo o re: “Ka mohlala, ke ile ka tloša bana ba ka dikolong tša maemo a godimo gomme ka ba hweletša dikolo tšeo di rutago gabotse tša mmušo.” Yena le lapa la gagwe ba ile ba rapelela gore a hwetše mošomo wa boiphedišo wo o bego o ka se šitišane le lenaneo la bona la dilo tša moya. Jehofa o ile a araba bjang dithapelo tša bona?

12, 13. Ke megato efe yeo tate yo mongwe a ilego a e gata gore a hlokomele lapa la gagwe, gona Jehofa o ile a šegofatša bjang boikemišetšo bja gagwe bja go phela bophelo bjo bonolo?

12 Eduardo o gopola ka gore: “Nywageng e mebedi ya mathomo re be re ewa re tsoga. Tšhelete yeo ke bego ke e bolokile e be e fela, ga se ka mehla mogolo wa ka o monyenyane o bego o kgona go lefelela ditshenyagalelo ka moka le gona ke be ke phela ke lapile. Eupša re be re kgona go ba gona dibokeng ka moka le go ya tirelong ya tšhemo re le gotee.” Eduardo o be a ipoditše gore a ka se amogele mošomo woo o bego o tla mo aroganya le lapa la gagwe ka dikgwedi goba nywaga e mentši. O re: “Go e na le moo, ke ile ka ithuta go dira mešomo e fapafapanego e le gore ge ke sa hwetše mošomo o itšego, ke kgone go dira o mongwe.”

Na o ka ithuta go dira mešomo e fapafapanego gore o kgone go hlokomela lapa la gago? (Bona serapa 12)

13 Ka ge Eduardo a be a swanetše gore a lefe dikoloto tša gagwe ganyenyane-ganyenyane, o ile a swanelwa ke go lefa tšhelete e ntši ya tswalo tšheleteng yeo a bego a e adimile. Eupša Eduardo o be a ikemišeditše go lefa tšhelete yeo e le gore a ka hlankela Jehofa gotee le lapa la gagwe. Eduardo o re: “Ga bjale ke hwetša tšhelete ya ka tlase ga 10 lekgolong ge e bapetšwa le yeo ke bego ke e hwetša nageng  e šele, eupša ga re robale ka tlala. ‘Seatla sa Jehofa ga se se sekopana.’ Ge e le gabotse, re ile ra dira phetho ya go tšea bobulamadibogo. Se se makatšago ke gore ka morago ga moo ikonomi e ile ya kaonefala gomme gwa ba bonolo kudu go hwetša dilo tšeo re di hlokago.”—Jes. 59:1.

GO LEBELETŠANA LE KGATELETŠO YA BA LELOKO

14, 15. Malapa a ka lebeletšana bjang le kgateletšo ya ba leloko ya go etiša dilo tša nama pele ga tša moya, gona mohlala wa ona o mobotse o ka ba le mafelelo afe?

14 Mafelong a mantši, batho ba ikwa ba gapeletšega go nea ba leloko le bagwera tšhelete le dimpho. Eduardo o hlalosa gore: “Go nea ke setšo sa gabo rena le gona re a go thabela,” eupša o oketša ka gore: “Go na le moo re fihlago gona. Ka bohlale ke hlalosetša ba leloko gore ke tla ba nea seo nka se kgonago ke sa bee dinyakwa tša lapa la ka tša moya kotsing.”

15 Bafaladi bao ba boilego gae gotee le batho bao ba ganago go tlogela malapa a bona gore ba yo šoma dinageng dišele, gantši ba a kwerwa le go galefelwa ke ba leloko bao ba nyamilego bao ba bego ba letetše gore ba tlo ba hlokomela. Ba bangwe ba botšwa gore ga ba na lerato. (Die. 19:6, 7) Morwedi wa Eduardo e lego Anna o re: “Lega go le bjalo, ge re gana go gafa dilo tša moya e le gore re hwetše dilo tša nama, mafelelong ba bangwe ba leloko ba ka lemoga kamoo bophelo bja rena bja Bokriste bo lego bohlokwa ka gona. Eupša ba tla lemoga seo bjang ge e ba re dumelelana le bona?”—Bapiša le 1 Petro 3:1, 2.

GO BONTŠHA TUMELO GO MODIMO

16. (a) Motho a ka ‘iphora bjang ka kgopolo ya maaka’? (Jak. 1:22) (b) Jehofa o šegofatša diphetho tša mohuta ofe?

16 Ka morago ga gore kgaetšedi yo mongwe a goroge nageng e humilego a tlogetše molekane wa gagwe le bana gae, o ile a botša bagolo gore: “Re ile ra swanelwa ke go dira boikgafo bjo bogolo gore ke tle mo. Monna wa ka o ile a ba a swanelwa ke go kgaotša go hlankela e le mogolo. Ka gona ke tloga ke holofela gore Jehofa o tla šegofatša phetho ya rena.” Ka mehla Jehofa o šegofatša diphetho tše di bontšhago gore re na le tumelo go yena, eupša a ka šegofatša bjang diphetho tšeo di sa dumelelanego le thato ya gagwe, kudukudu ge e ba di akaretša go fo tlogela ditokelo tše kgethwa go sa hlokagale?—Bala Baheberu 11:6; 1 Johane 5:13-15.

17. Ke ka baka la’ng re swanetše go tsoma tlhahlo ya Jehofa pele re dira diphetho, gona re ka dira seo bjang?

17 Tsoma tlhahlo ya Jehofa pele o dira diphetho  le go itlama, e sego ka morago ga ge o di dirile. Rapelela moya wa gagwe o mokgethwa, bohlale le tlhahlo. (2 Tim. 1:7) Ipotšiše gore: ‘Ke ikemišeditše go kwa Jehofa ka tlase ga maemo afe? Na ke tla mo kwa le ge ke tlaišwa?’ Ge e ba go le bjalo, na o ikemišeditše go se tlogele lapa la gago le ge seo se ka ba se bolela gore le tla phela bophelo bjo bonolo? (Luka 14:33) Kgopela bagolo gore ba go nee keletšo ya Mangwalo gomme o bontšhe tumelo go Jehofa le go bota kholofetšo ya gagwe ya gore o tla go thuša ka gore o latele keletšo ya gagwe. Bagolo ba ka se go direle diphetho, eupša ba ka go thuša go dira diphetho tšeo di tlago go dira gore mafelelong o thabe.—2 Bakor. 1:24.

18. Ke mang a ikarabelago ka go hlokomela lapa, eupša ke maemo afe ao a ka re neago sebaka sa go thuša?

18 Jehofa o rwešitše hlogo ya lapa “morwalo” wa letšatši le letšatši wa go hlokomela lapa. Re swanetše go reta le go rapelela bao ba phethago boikarabelo bjo ntle le go tlogela balekane ba bona goba bana, go sa šetšwe kgateletšo le go lekega go dira bjalo. Maemo a sa letelwago, a bjalo ka dikotsi tša tlhago goba maemo a tšhoganetšo a tša kalafo, a re nea sebaka sa gore re bontšhane lerato la kgonthe la Bokriste le go kwelana bohloko. (Bagal. 6:2, 5; 1 Pet. 3:8) Na o ka thuša ka tšhelete ge go tšweletše boemo bja tšhoganetšo goba go thuša Mokristegotee le wena go hwetša mošomo lefelong la gabo lena? Ge o ka dira bjalo, o ka fokotša kgateletšo yeo a ka bago a lebane le yona ya go tlogela lapa la gagwe go yo nyaka mošomo nageng e nngwe.—Die. 3:27, 28; 1 Joh. 3:17.

GOPOLA GORE JEHOFA KE MOTHUŠI WA GAGO!

19, 20. Ke ka baka la’ng Bakriste ba ka kgodišega gore Jehofa o tla ba thuša?

19 Mangwalo a re kgothaletša gore: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane Modimo o itše: ‘Le ka mohla nka se ke ka go tlogela le ge e le go go lahla.’ E le gore re be le sebete kudu gomme re re: ‘Jehofa ke mothuši wa ka; nka se boife. Motho a ka ntira’ng?’” (Baheb. 13:5, 6) Re diriša bjang keletšo ye maphelong a rena?

20 Ngwanabo rena yo mongwe yo a hlanketšego nako e telele e le mogolo nageng yeo e diilago o re: “Gantši batho ba bolela kamoo Dihlatse tša Jehofa di thabilego ka gona. Le gona ba lemoga le gore gaešita le Dihlatse tše di diilago di dula di apara gabotse e bile di bonagala di phala batho ba bangwe.” Se se dumelelana le seo Jesu a se holofeditšego bao ba etišago Mmušo pele. (Mat. 6:28-30, 33) Ee, Tatago wa legodimong e lego Jehofa o a go rata e bile o kganyogela wena le bana ba gago tše kaone. “Jehofa yena mahlo a gagwe a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.” (2 Dikor. 16:9) O re neile ditaelo tša gagwe—go akaretša tšeo di lego mabapi le bophelo bja lapa le dinyakwa tša nama—gore di re hole. Ge re di latela, re bontšha gore re a mo rata le go mmota. “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”—1 Joh. 5:3.

21, 22. Ke ka baka la’ng o ikemišeditše go bota Jehofa?

21 Eduardo o re: “Ke a tseba gore nka se buše nako yeo ke e sentšego ke sa dule le mosadi wa ka le bana, eupša ga ke dulele go nagana ka dilo tšeo ke itsholelago tšona. Ba bantši ba batho bao ke bego ke šoma le bona ba humile eupša ga se ba thaba. Malapa a bona a na le mathata a magolo kudu. Lega go le bjalo, lapa la ka le thabile kudu! Le gona ke kgahlwa ke go bona kamoo bana babo rena ba bangwe nageng ye, gaešita le ge ba diila, ba etišago pele dilo tša moya maphelong a bona. Ka moka ga rena re bona go rereša ga kholofetšo ya Jesu.”—Bala Mateo 6:33.

22 Eba le sebete kudu! Kgetha go kwa Jehofa gomme o mmote. Anke lerato leo o ratago Modimo ka lona, molekane wa gago le bana ba gago le go tutueletše go phetha boikarabelo bja gago bja go hlokomela lapa la gago. Ge o ka dira bjalo, o tla bona gore ‘Jehofa ke mothuši wa gago.’

^ ser. 1 Maina a fetotšwe.

^ ser. 11 Bona lelokelelo la dihlogo tša “How to Manage Money” ka tokollong ya Phafoga! ya Seisemane ya September 2011.