Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2014

Ga go yo a ka Hlankelago Marena a Mabedi

Ga go yo a ka Hlankelago Marena a Mabedi

“Ga go yo a ka bago lekgoba la marena a mabedi. . . . Le ka se be makgoba a Modimo le a Mahumo.”—MAT. 6:24.

1-3. (a) Batho ba bantši lehono ba lebeletšane le mathata afe a tša ditšhelete, gomme ba bangwe ba leka go a rarolla bjang? (Bona seswantšho se se lego ka mo godimo.) (b) Ke dilo dife tšeo batswadi ba tshwenyegago ka tšona mabapi le go godiša bana?

MARILYN o hlalosa gore: “Monna wa ka e lego James ka mehla o be a boa mošomong a lapile kudu, eupša mogolo wa gagwe o be o kgona feela go reka dinyakwa tša rena tša letšatši le letšatši. * Ke be ke nyaka go mo rwadiša morwalo gomme ke thuše ka go rekela morwa wa rena e lego Jimmy tše dingwe tša dilo tše di kgahlišago tšeo bana bao a tsenago le bona sekolo ba nago le tšona.” Le gona Marilyn o be a nyaka go thuša le ba leloko le go boloka tšhelete bakeng sa nakong e tlago. Ba bantši ba bagwera ba gagwe ba be ba hudugetše dinageng tše dingwe e le gore ba hwetše tšhelete e oketšegilego. Eupša ge a be a nagana ka go huduga, o ile a se tsebe gore a dire eng. Ka baka la’ng?

2 Marilyn o be a boifa go tlogela lapa la gagwe le bohlokwa le lenaneo la bona la ka mehla la dilo tša moya. Lega go le bjalo, o ile a ipotša gore bana babo rena ba bangwe ba kgonne go ya dinageng dišele ka nakwana gomme go bonagala malapa a bona a se na bothata moyeng. Eupša o be a ipotšiša gore o tla godiša Jimmy bjang a le kgole. Na o be a ka kgona go godiša morwa wa gagwe “ka tayo le temošo ya Jehofa” a diriša Inthanete?—Baef. 6:4.

3 Marilyn o ile a tsoma tlhahlo. Monna wa gagwe o be a sa nyake a eya go šoma nageng e šele, gaešita le ge a ile a bolela gore a ka  se mo thibele. Bagolo le ba bangwe ka phuthegong ba ile ba mo eletša gore a se ke a huduga, eupša dikgaetšedi tše mmalwa di ile tša mo kgothaletša go huduga. Di ile tša mmotša gore: “Ge e ba o rata lapa la gago, o tla sepela. Akere o sa dutše o tla kgona go hlankela Jehofa le gona moo.” Gaešita le ge a be a sa kgodišege ka seo a se dirago, Marilyn o ile a laela James le Jimmy gomme a yo šoma moše wa mawatle. O ile a ba holofetša gore: “Nka se sepelele ruri.”

BOIKARABELO BJA LAPA LE MELAO YA MOTHEO YA BEIBELE

4. Ke ka baka la’ng batho ba bantši ba huduga, eupša ke bomang bao gantši ba feleletšago ba ba hlokomelela bana?

4 Jehofa ga a nyake gore bahlanka ba gagwe ba phele bodiiding, gomme se sengwe sa dihlare tša kgale tša go alafa bodiidi ke go huduga. (Ps. 37:25; Die. 30:8) Mopatriareka Jakobo o ile a roma barwa ba gagwe Egipita go yo reka dijo e le gore ba se bolawe ke tlala. * (Gen. 42:1, 2) Batho ba bantši lehono ga ba huduge dinageng tša gabo bona ka baka la tlala. Lega go le bjalo, ba ka ba ba na le dikoloto tše dikgolo. Ba bangwe ba fo ba ba nyaka go kaonefatša tsela yeo malapa a bona a phelago ka yona. E le gore ba fihlelele dipakane tša bona ikonoming ye yeo e phuhlamago, ba bantši ba feleletša ba dula kgole le malapa a bona, e ka ba e le nageng ya gabo bona goba nageng e šele. Gantši ba tlogela bana ba bona ba banyenyane ba hlokometšwe ke motswadi o tee, ngwana wa bona yo mogolo, borakgolo le bomakgolo, ba bangwe ba leloko goba bagwera ba bona. Gaešita le ge batho bao ba hudugago ba kwešwa bohloko ke go tlogela molekane goba bana, ba bantši bao ba hudugelago dinageng dišele ba ipotša gore ga ba na kgetho.

5, 6. (a) Jesu o rutile’ng mabapi le lethabo le tšhireletšego? (b) Jesu o rutile balatedi ba gagwe gore ba rapelele dilo dife tša nama? (c) Jehofa o re šegofatša ka tsela efe?

5 Ka mo go swanago, mehleng ya Jesu batho ba bantši ba be ba diila gomme ba ka ba ba ile ba nagana gore ba be ba tla thaba le go šireletšega kutšwanyana ge nkabe ba na le tšhelete. (Mar. 14:7) Eupša Jesu o be a nyaka gore ba holofele selo se sengwe. O be a nyaka gore ba ithekge ka Jehofa, yena Mothopo wa mahumo a ka mo go sa felego. Thutong ya gagwe ya Thabeng, Jesu o hlalositše gore lethabo la kgonthe le tšhireletšego ga se tša ithekga ka dilo tše di bonagalago goba ka maiteko a rena, eupša di ithekgile ka tswalano ya rena le Tatago rena wa legodimong.

6 Thapelong ya gagwe ya mohlala, Jesu o re rutile go rapelela go hwetša dinyakwa tša rena tša letšatši le letšatši, “dijo tša rena tša letšatši le,” e sego go ba le tšhelete e ntši. O ile a botša batheetši ba gagwe ka go lebanya gore: “Tlogelang go ipolokela matlotlo lefaseng. . . . Go e na le moo, ipolokeleng matlotlo legodimong.” (Mat. 6:9, 11, 19, 20) Re ka bota gore Jehofa o tla re šegofatša go etša ge a holofetša. Tšhegofatšo ya Modimo ga se feela gore o a re amogela; eupša e bile ke kgonthišetšo ya gore o tla re nea dilo tšeo re di hlokago. Tsela e nnoši ya go hwetša lethabo la kgonthe le tšhireletšego ke go bota Tatago rena yo lerato, e sego tšhelete.—Bala Mateo 6:24, 25, 31-34.

7. (a) Jehofa o neile bomang boikarabelo bja go godiša bana? (b) Ke ka baka la’ng batswadi ka bobedi ba swanetše go tšea karolo ka botlalo go godišeng bana ba bona?

7 ‘Go tsoma pele toko ya Modimo’ go akaretša go lebelela boikarabelo bja lapa ka tsela yeo Jehofa a bo lebelelago ka yona. Molao wa Moshe o na le molao wo wa motheo woo o šomago go Bakriste: Batswadi ba swanetše go ruta bana ba bona dilo tša moya. (Bala Doiteronomio 6:6, 7.) Modimo o neile batswadi boikarabelo bjo, e sego borakgolo le bomakgolo goba motho le ge e le ofe yo mongwe. Kgoši Solomone o itše: “Morwa wa ka, theetša tayo ya tatago gomme o se ke wa lahla molao wa  mmago.” (Die. 1:8) Jehofa o be a nyaka gore batswadi ka bobedi ba be gona gore ba thušane go hlahla bana ba bona le go ba ruta. (Die. 31:10, 27, 28) Bontši bja dilo tšeo bana ba ithutago tšona go batswadi ba bona, kudukudu dilo tša moya, ba di kwa ge batswadi ba bolela ka Jehofa letšatši le letšatši le ka go bona mohlala wa bona.

DITLAMORAGO TŠE DI BEGO DI SA LETELWA

8, 9. (a) Ke diphetogo dife tšeo gantši di diregago ge motswadi a sa dule le lapa la gagwe? (b) Ge lapa le sa dule gotee le ka gobala bjang maikwelong le boitshwarong?

8 Pele ga ge ba ka ya dinageng dišele, bafaladi ba leka go lebelela dikotsi le dilo tšeo ba tlago go di gafa, eupša ke ba sego kae bao ba bonago e sa le pele ditlamorago ka moka tša go tlogela malapa a bona. (Die. 22:3) * Gateetee ka morago ga gore Marilyn a huduge, o ile a thoma go kwa bohloko bja go arogana le lapa la gagwe. Go bile bjalo le ka monna wa gagwe le morwa wa bona. Jimmy yo monyenyane o ile a dulela go mmotšiša gore: “Go re’ng o ntlogetše?” Le gona ge dikgwedi tšeo Marilyn a bego a rulagantše go dula nageng e šele ka tšona di fetoga nywaga, o ile a lemoga diphetogo tšeo di bego di sa mo robatše ka ditho tša lapa la gagwe. Jimmy o be a se sa nyaka go ntšhetša mmagwe sa mafahleng e bile tswalano ya bona e be e thoma go fokola. A nyamile, Marilyn o gopola ka gore: “Jimmy o ile a feleletša a se sa nthata.”

9 Ge batswadi le bana ba sa dule gotee e le lapa, ba ka gobala maikwelong le boitshwarong. * Ge bana e le ba banyenyane kudu gomme ba tšea nako e telele ba arogane le batswadi ba bona, ba ka gobala kudu. Marilyn o ile a botša Jimmy gore o be a dira tše ka moka go hola yena. Eupša Jimmy o be a bona eka mmagwe ga a sa na taba le yena. Mathomong o be a galefišwa ke gore mmagwe o mo tlogetše. Eupša ka morago ge a be a ba etela, Jimmy o be a sa thabele seo. Go etša ge go tlwaelegile ka bana bao batswadi ba bona ba ba tlogetšego, Jimmy o be a nagana gore ga go sa le bohlokwa gore a rate mmagwe le go mo kwa.—Bala Diema 29:15.

O ka se kgone go gokarela ngwana wa gago Inthaneteng (Bona serapa 10)

10. (a) Ngwana a ka kgomega bjang ge motswadi a sa dule le yena eupša a mo nea dimpho tša dilo tše di bonagalago? (b) Ke’ng seo motswadi a ka se kgonego go se dira ge a leka go godiša bana ba gagwe a dula kgole le bona?

10 Gaešita le ge Marilyn a ile a leka go thiba sekgoba sa go se be gona ga gagwe ka go romela tšhelete le dimpho, o ile a bona gore o be a ikarola go morwa wa gagwe a sa hlokomele le go mo ruta go etiša dilo tša nama pele ga tša moya le ditswalano tša lapa. (Die. 22:6) Jimmy o be a fela a re go yena: “O se sa boa. E fo tšwela pele o romela dimpho.” Marilyn o ile a thoma go lemoga gore o be a ka se godiše morwa wa gagwe ka go mo ngwalela mangwalo, go  mo leletša mogala goba ka go boledišana le yena a diriša Inthanete. O hlalosa gore: “O ka se kgone go gokarela ngwana wa gago Inthaneteng goba go mo atla pele a robala.”

O ka lebeletšana le kotsi efe ge o sa dule gotee le molekane wa gago? (Bona serapa 11)

11. (a) Ge banyalani ba sa dule gotee ka baka la mošomo, seo se kgoma bjang lenyalo la bona? (b) Ke’ng seo se ilego sa dira gore kgaetšedi yo mongwe a lemoge gore o swanetše go boela gae?

11 Tswalano ya Marilyn le Jehofa gotee le monna wa gagwe James, le yona e be e gobala. O be a eba gona dibokeng tša Bokriste le bodireding letšatši letee feela mo bekeng goba a sa ye, le gona o ile a swanelwa ke go lwantšhana le dikgoketšo tša mothwadi wa gagwe tša gore a robale le yena. Ka ge ba be ba sa dule gotee gore ba ka thekgana ge ba lebeletšane le mathata, Marilyn le James ba ile ba ratana le batho ba bangwe gomme gwa šala ganyenyane gore ba ineele boitshwarong bjo bo gobogilego bja botona le botshadi. Marilyn o ile a lemoga gore gaešita le ge yena le monna wa gagwe ba se ba ka ba dira bohlotlolo, eupša ka baka la go se dule gotee ba be ba sa kgone go latela keletšo ya Beibele ya gore ba kgotsofatšane maikwelong le go kgotsofatša dinyakwa tša bona tša botona le botshadi. Ba be ba sa kgone go swara magang, go lebelelana ba myemyela, go swarana ka tsela e borutho, go gokarelana, go bontšhana ‘dipontšho tša lerato’ goba go fana “tshwanelo” ya lenyalo. (Sefela 1:2; 1 Bakor. 7:3, 5) Le gona ba be ba sa kgone go hlankela Jehofa ka botlalo le morwa wa bona. Marilyn o gopola ka gore: “Ge kopanong e nngwe ya selete ke be ke ekwa gore go swara borapedi bja lapa ka mehla go bohlokwa gore re tle re phologe letšatši le legolo la Jehofa, ke ile ka lemoga gore ke swanetše go boela gae. Ke ile ka swanelwa ke go tsošološa tswalano ya ka le Jehofa le go aga lefsa lapa la ka.”

KELETŠO E BOTSE LE E MPE

12. Ke keletšo efe ya Mangwalo yeo e ka newago bao ba dulago kgole le malapa a bona?

12 Batho ba ile ba arabela ka go se swane ge Marilyn a be a re o boela gae. Bagolo ba phuthegong yeo a bego a le go yona moše ba ile ba mo reta ka baka la tumelo ya gagwe le go ba le sebete. Eupša bao ba bego ba dula kgole le balekane ba bona le malapa a bona ga se ba ka ba kgahlwa ke seo. Go e na le gore ba latele mohlala wa gagwe o mobotse, ba ile ba leka go mo fetoša monagano. Ba ile ba re: “Go se go ye kae o tla ba o boile. O tlo iphediša ka’ng ge o boela gae?” Go e na le go bolela mantšu a bjalo ao a nolago moko, Bakriste ba swanetše gore “ba gakolle basadi ba bafsa gore ba rate banna ba bona, ba rate bana ba bona, . . . [e be bao] ba šomago ka gae,” ke gore ka magaeng a bona, “e le gore lentšu la Modimo le se bolelwe ka go gobošwa.”—Bala Tito 2:3-5.

13, 14. Ke ka baka la’ng go nyakega tumelo gore re etiše Jehofa pele ga dilo tšeo ba lapa ba di nyakago? Bontšha.

13 Bafaladi ba bantši ba goletše ditšong tšeo di etišago pele setšo le boikarabelo bja go hlokomela lapa, kudukudu batswadi, pele ga dilo ka moka. Ruri Mokriste o bontšha tumelo ge a  sa latele setšo goba dilo tšeo lapa le nyakago a di dira e le gore a kgahliše Jehofa.

14 Nagana ka seo se diragaletšego Carin. O re: “Ge morwa wa ka e lego Don a be a belegwa, nna le monna wa ka re be re šoma nageng e šele gomme ke be ke sa tšwa go thoma go ithuta Beibele. Ba gešo ba be ba letetše gore ke romele Don gae gore a godišwe ke batswadi ba ka go fihlela re eme gabotse ka tša ditšhelete.” Ge Carin a be a re o tla ikgodišetša Don, ba leloko, go akaretša le monna wa gagwe, ba ile ba re o a tšwafa e bile ba mo sega. Carin o re: “Go bolela therešo, ka nako yeo ke be ke sa kwešiše ka botlalo gore bothata bo kae ge nka iša Don go batswadi ba ka ka nywaga e sego kae. Eupša ke be ke tseba gore Jehofa o neile rena batswadi mošomo wa go godiša morwa wa rena.” Ge Carin a be a ima gape, monna wa gagwe yo e sego Mokriste o ile a re o swanetše go ntšha mpa. Phetho e botse yeo Carin a bego a e dirile pejana ya go se iše Don gae e ile ya matlafatša tumelo ya gagwe, gomme le lekgeng le o ile a emela Jehofa ka go tia. Gona bjale yena, monna wa gagwe le bana ba bona ba thabela gore ka moka ga bona ba ile ba dula gotee. Ge nkabe Carin a ile a iša ngwana wa gagwe o tee goba bobedi bja bona gae gore ba yo godišwa ke batho ba bangwe, mafelelo nkabe e bile a fapanego kudu.

15, 16. (a) Vicky o godišitšwe bjang? (b) Ke ka baka la’ng a be a sa nyake gore morwedi wa gagwe a godišwe go swana le yena?

15 Vicky yoo e lego Hlatse o re: “Ke godišitšwe ke makgolo ka nywaga e sego kae, mola batswadi ba ka ba be ba dula le moratho wa ka. Ge ke be ke thoma go dula le batswadi ba ka, maikwelo a ka ka bona a be a fetogile. Moratho wa ka o be a boledišana le bona ka bolokologi, a ba gokarela e bile a na le tswalano ya kgauswi le bona. Ke be ke ikwa ke se na tswalano ya kgauswi le batswadi ba ka, gaešita le ge ke godile, ke be ke thatafalelwa ke go ba bontšha maikwelo a ka a kgonthe. Nna le moratho wa ka re kgonthišeditše batswadi ba rena gore re tlo ba hlokomela ge ba tšofetše. Eupša nna ke tla fo dira seo ka go ithola kgwara, mola moratho wa ka yena a tlo ba hlokomela ka lerato.”

16 Vicky o re: “Gona bjale mma o nyaka gore ke tliše morwedi wa ka go yena gore a mo godiše, go etša ge a ile a nkiša go mmagwe. Ke ile ka gana ka bohlale. Nna le monna wa ka re nyaka go godiša ngwana wa rena ka ditsela tša Jehofa. Le gona ga ke nyake gore ge morwedi wa ka a godile a tle a thatafalelwe ke go nthata.” Vicky o bone gore tsela e nnoši ya go atlega ke go etiša Jehofa le melao ya gagwe ya motheo pele ga dipakane tša go hwetša tšhelete le dilo tšeo ba lapa ba di letetšego. Jesu o boletše phaa gore: “Ga go yo a ka bago lekgoba la marena a mabedi,” lekgoba la Modimo le la Mahumo.—Mat. 6:24; Ek. 23:2.

JEHOFA O “ATLEGIŠA” MAITEKO A RENA

17, 18. (a) Ke tabeng efe moo Bakriste ka mehla ba nago le kgetho? (b) Sehlogong se se latelago re tlo ahlaahla dipotšišo dife?

17 Tatago rena e lego Jehofa o ikemišeditše go re thuša go hwetša dilo tšeo re tlogago re di hloka ge e ba re tsoma Mmušo pele le toko ya gagwe maphelong a rena. (Mat. 6:33) Ka go re’alo, Bakriste ba therešo ka mehla ba na le kgetho. Jehofa o holofetša gore o tla “bula tsela” yeo e ka se nyakego gore re kwanantšhe melao ya motheo ya Beibele, go sa šetšwe ditlhohlo tšeo re lebanago le tšona. (Bala 1 Bakorinthe 10:13.) Ge re ‘letela Jehofa ka tlhologelo,’ ge re ‘ithekga ka yena’ ka go mo rapela gore a re nee bohlale le tlhahlo le ka go latela ditaelo tša gagwe le melao ya gagwe ya motheo, gona ‘o tla re thuša.’ (Ps. 37:5, 7) O tla šegofatša maiteko a rena a go mo hlankela e le yena feela Morena wa rena wa kgonthe. Ge e ba re mo etiša pele, o tla dira gore re ‘atlege.’—Bapiša le Genesi 39:3.

18 Ke’ng seo se ka dirwago go lokiša tshenyo yeo e bakilwego ke go se dule ga lapa gotee? Re ka gata megato efe e le gore re hlokomele malapa a rena re dutše re dula gotee? Le gona re ka kgothatša ba bangwe bjang ka lerato gore ba dire diphetho tše di nepagetšego tabeng ye? Sehlogo se se latelago se tlo ahlaahla dipotšišo tše.

^ ser. 1 Maina a fetotšwe.

^ ser. 4 Nako le nako ge barwa ba Jakobo ba be ba eya Egipita, ba ka ba ba tšere dibeke tše tharo goba ka tlase ga moo ba tlogetše malapa a bona. Ka morago ge Jakobo le barwa ba gagwe ba be ba hudugela Egipita, ba ile ba sepela le basadi ba bona gotee le bana ba bona.—Gen. 46:6, 7.

^ ser. 8 Bona sehlogo seo se rego, “Bofaladi—Ditoro le Maemo a Gona a Kgonthe” ka tokollong ya Phafoga! ya February 2013.

^ ser. 9 Dipego tšeo di tšwago dinageng tše di fapafapanego di bontšha gore go ba le mathata a magolo ge motho a tlogela molekane goba bana gore a yo šoma nageng e šele. Mathata ao a akaretša go hlotlola ga molekane o tee goba bobedi bja bona, bosodoma goba go ba le dikopano tša botona le botshadi le wa leloko. Go bana, mathata ao a akaretša go ba le mathata a boitshwaro le a go ithuta, pefelo, go tshwenyega, kgateletšego goba go leka go ipolaya.