Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2014

Kamoo re ka Dulago re na le Pono e Botse

Kamoo re ka Dulago re na le Pono e Botse

“Ge motho a ka phela nywaga e mentši, gona a a e thabele ka moka ga yona.”—MMO. 11:8.

1. Ke ditšhegofatšo dife tše di tšwago go Jehofa tšeo di ka re thušago go thaba?

JEHOFA o nyaka gore re thabe, e bile o re nea ditšhegofatšo tše dintši tšeo di swanetšego go re dira gore re thabe. Ka mohlala, re a phela. Ka gona, re ka diriša maphelo a rena go tumiša Modimo, ka gobane o re gogetše borapeding bja therešo. (Ps. 144:15; Joh. 6:44) Jehofa o re kgonthišetša gore o a re rata e bile o re thuša go kgotlelela tirelong ya gagwe. (Jer. 31:3; 2 Bakor. 4:16) Re thabela paradeise ya moya, yeo go yona re hwetšago motlalo wa dijo tša moya le bana babo rena bao ba re ratago. Go oketša moo, re na le kholofelo e kgahlišago ka bokamoso.

2. Bahlanka ba bangwe ba botegago ba Modimo ba lwantšhana le eng?

2 Go sa šetšwe mabaka a ao re nago le ona a go thaba, bahlanka ba bangwe ba botegago ba Modimo ba lwantšhana le dikgopolo tše di fošagetšego ka bona. Ba ka nagana gore ga ba na mohola go Jehofa goba gore tirelo ya bona go yena ga se selo. Go bao ba tlaišwago ke maikwelo a a fošagetšego, taba ya go thabela “nywaga e mentši” e ka kwagala e le toro feela. Go bona bophelo bo ka bonagala e le matšatši a leswiswi la go se fele.—Mmo. 11:8.

3. Ke’ng seo se ka bakago maikwelo a fošagetšego?

3 Go bana babo rena ba bjalo goba dikgaetšedi, maikwelo a fošagetšego a ka bakwa ke go nyama, go babja goba go palelwa ke go  dira dilo tše itšego ka baka la botšofadi. (Ps. 71:9; Die. 13:12; Mmo. 7:7) Go oketša moo, Mokriste yo mongwe le yo mongwe o swanetše go lebeletšana le therešo ya gore pelo e boradia le gore e ka re ahlola gaešita le ge re ka ba re kgahliša Modimo. (Jer. 17:9; 1 Joh. 3:20) Diabolo o latofatša ka maaka bahlanka ba Modimo. E bile bao ba naganago go swana le Sathane ba ka leka go re imetša ka dikgopolo tša go swana le tša Elifase yo a bego a se na tumelo—tša gore ga re selo mahlong a Modimo. Ao e be e le maaka mehleng ya Jobo, go fo swana le lehono.—Jobo 4:18, 19.

4. Re tlo ahlaahla’ng sehlogong se?

4 Jehofa o boletše phaa ka Mangwalong gore o tla ba le bao ba “[sepelago] moeding wa kgampi ya leswiswi.” (Ps. 23:4) Tsela e nngwe yeo a nago le rena ka yona ke ka Lentšu la gagwe. Modimo o dirile gore Beibele e “be matla bakeng sa go phekgola dilo tše di tsemilwego,” go akaretša maaka le dikgopolo tše di fošagetšego. (2 Bakor. 10:4, 5) Ka gona, anke re ahlaahleng kamoo re ka dirišago Beibele go re thuša go hlagolela pono e botse le go dula re na le yona. Mohlomongwe se se ka go hola e bile sa go thuša go hwetša ditsela tša go kgothatša ba bangwe.

DIRIŠA BEIBELE GO HLAGOLELA PONO E BOTSE

5. Ke go itekola gofe moo go ka re thušago go ba le pono e botse?

5 Moapostola Paulo o boletše dilo tše itšego tšeo di ka re thušago go hlagolela pono e botse. O kgothaleditše phuthego ya kua Korinthe gore: “Dulang le itekola go bona ge e ba le sa le tumelong.” (2 Bakor. 13:5) ‘Tumelo’ ke dithuto ka moka tša Bokriste tšeo di utolotšwego ka Beibeleng. Ge e ba mantšu a rena le ditiro tša rena di dumelelana le dithuto tšeo, gona re atlegile go itekoleng ga rena gomme re bontšha gore re “sa le tumelong.” Eupša gape re swanetše go bapetša maphelo a rena le dithuto ka moka tša Bokriste. Re ka se ikgethele gore re nyaka go latela dithuto dife.—Jak. 2:10, 11.

6. Ke ka baka la’ng re swanetše go itekola go bona ‘ge e ba re sa le tumelong’? (Bona seswantšho seo se lego mathomong a sehlogo.)

6 O ka dikadika go itekola, kudukudu ge e ba o nagana gore o ka palelwa. Lega go le bjalo, tsela yeo Jehofa a re lebelelago ka yona e bohlokwa kudu go feta kamoo rena re itebelelago ka gona, e bile menagano ya gagwe e phagametše ya rena. (Jes. 55:8, 9) O hlahloba barapedi ba gagwe gore a hwetše dika tše dibotse go bona le go ba thuša, e sego gore a ba ahlole. Ge o diriša Lentšu la Modimo go itekola go bona “ge e ba [o] sa le tumelong,” o tla itebelela ka tsela yeo Modimo a go lebelelago ka yona. Seo se ka go thuša gore o lebale ka kgopolo le ge e le efe ya gore ga o bohlokwa mahlong a Modimo gomme wa thoma go nagana ka kgonthišetšo ye yeo e lego ka Beibeleng: O bohlokwa kudu mahlong a Jehofa. Mafelelo a seo a ka swana le ge o bula digareteine gore seetša se bonege ka phapošing ya leswiswi.

7. Mehlala ya batho bao ba botegago ba ka Beibeleng e ka re hola bjang?

7 Tsela e atlegago ya go itekola mo ke ka go naganišiša ka mehlala ya batho ba botegago bao go boletšwego ka bona ka Beibeleng. Bapetša maemo goba maikwelo a bona le a gago gomme o ipotšiše gore wena o ka be o ile wa arabela bjang ge nkabe o be o le maemong a bona. Anke re ahlaahleng mehlala e meraro yeo e bontšhago kamoo o ka dirišago Beibele go kgonthišetša gore o “sa le tumelong,” ka go re’alo wa hlagolela pono e botse ka wena.

MOHLOLOGADI WA MOHLOKI

8, 9. (a) Maemo a mohlologadi wa mohloki e be e le afe? (b) Ke maikwelo afe a fošagetšego ao mohlologadi yo a ka bago a bile le ona?

8 Jesu o ile a bona mohlologadi yo mongwe wa mohloki a neela tempeleng kua Jerusalema. Mohlala wa mohlologadi yo o ka re thuša go dula re na le pono e botse gaešita le ge re sa kgone go dira dilo ka moka tšeo re ka ratago go di dira. (Bala Luka 21:1-4.) Ela hloko maemo a mohlologadi yo. O be a sa swanelwa feela ke go kgotlelela go hwelwa ke  monna eupša gape o be a swanetše go kgotlelela baetapele ba bodumedi ba mehleng yeo bao ba bego ba “[eja] dintlo tša bahlologadi” go e na le go ba thuša. (Luka 20:47) O be a diila kudu moo a bego a ka kgona feela go neela tempeleng ka tšheletiana yeo mošomi wa maemo a tlasana a bego a ka e gola ka metsotso e sego kae.

9 Leka go nagana kamoo mohlologadi yo a ilego a ikwa ka gona ge a be a tsena lapeng la tempele a swere ditšheletiana tša tšhipi tše pedi. Na go ka direga gore o be a nagana gore tšhelete yeo a yago go e neela ga se selo ge e bapetšwa le yeo mohlomongwe a bego a kgona go e ntšha ge monna wa gagwe a be a sa phela? Na o be a tla lewa ke dihlong ge a bona bao ba mo etilego pele ba ntšha meneelo ya go tsebalega, mohlomongwe a bile a ipotšiša ge e ba mpho ya gagwe e tloga e le bohlokwa go Modimo? Gaešita le ge a ka ba a ile a tlelwa ke megopolo e bjalo, o ile a dira seo a bego a ka se kgona go thekga borapedi bja therešo.

10. Jesu o bontšhitše bjang gore mohlologadi yo o be a le bohlokwa go Modimo?

10 Jesu o ile a bontšha gore mohlologadi yo o be a le bohlokwa go Jehofa le gore le moneelo wa gagwe o be o le bohlokwa. O boletše gore mohlologadi yoo “o lahletše go feta kamoo [bahumi] bohle ba lahletšego.” Le ge moneelo wa gagwe o be o tla kopanywa le wa ba bangwe, eupša Jesu o ile a kgetha go mo reta. E bile go ka direga gore baswari ba ditšhelete bao ka morago ba ilego ba bala meneelo yeo ga se ba ka ba tseba kamoo mohlologadi yoo a bego a le bohlokwa ka gona go Jehofa gotee le ditšheletiana tša gagwe tše pedi. Lega go le bjalo, sa bohlokwa e be e le tsela yeo Modimo a bego a mo lebelela ka yona, e sego seo ba bangwe ba bego ba se nagana goba gaešita le kamoo mohlologadi yoo a bego a itebelela ka gona. Na o ka diriša pego ye go bona ge e ba o sa le tumelong?

Ke’ng seo o ithutago sona mohlaleng wa mohlologadi wa mohloki? (Bona dirapa 8-10)

11. O ka ithuta’ng pegong ya mohlologadi?

11 Maemo a gago a ka kgoma seo o ka kgonago go se nea Jehofa. Ba bangwe ga ba kgone go fetša nako e ntši ba bolela ditaba tše dibotse ka baka la botšofadi goba bolwetši. Na ba swanetše go nagana gore ga go bohlokwa gore ba bege modiro wa bona? Gaešita le ge maemo a gago e se a mabe gakaalo, o ka ikwa  eka maiteko a gago ga se selo ge a bapetšwa le diiri ka moka tšeo batho ba Modimo ba di fetšago ngwaga le ngwaga ba mo hlankela. Lega go le bjalo, pegong ya mohlologadi wa mohloki re ithuta gore Jehofa o bona selo se sengwe le se sengwe seo re mo direlago sona e bile o se tšeela godimo, kudukudu ge re se dira maemong a thata. Nagana ka tirelo ya gago go Jehofa ngwageng o fetilego. Na e nngwe ya diiri tšeo o ilego wa di diriša go mo hlankela e be e nyaka gore o tloge o ikgafa? Ge e ba go le bjalo, o ka kgodišega gore Jehofa o tšeela godimo seo o ilego wa mo direla sona iring yeo. Ge o dira sohle seo o ka se kgonago tirelong ya Jehofa go swana le mohlologadi yola wa mohloki, o na le lebaka le le kwagalago la go dumela gore o “sa le tumelong.”

“TŠEA MOYA WA KA”

12-14. (a) Maikwelo a fošagetšego a ile a kgoma Eliya bjang? (b) Go ka ba go tlile bjang gore Eliya a ikwe ka tsela yeo a bego a ikwa ka yona?

12 Moporofeta Eliya o be a botegela Jehofa e bile a na le tumelo e matla. Lega go le bjalo, ka nako e nngwe o ile a ikwa a nyamile moo a ilego a kgopela Jehofa gore a mmolaye, a re: “Go lekane! Bjale wena Jehofa, tšea moya wa ka.” (1 Dikg. 19:4) Bao ba sa kago ba lebeletšana le maikwelo a bjalo ba ka nagana gore thapelo ye ya Eliya e be e le feela ‘mantšu a bošilo.’ (Jobo 6:3) Eupša o be a tloga a imetšwe. Lega go le bjalo, hlokomela gore go e na le gore Jehofa a omanye Eliya ka go nyaka go hwa, o ile a mo thuša.

13 Go tlile bjang gore Eliya a ikwe ka tsela yeo? Pejana ga moo, o be a sa tšwa go etelela pele tiragalong e itšego kua Isiraele yeo e ilego ya bontšha gore Jehofa ke Modimo wa therešo gomme seo sa dira gore baporofeta ba 450 ba Baali ba bolawe. (1 Dikg. 18:37-40) Mohlomongwe Eliya o ile a nagana gore bjale batho ba Modimo ba be ba tla boela borapeding bjo bo sekilego, eupša seo ga se sa ka sa direga. Mohumagadi yo kgopo e lego Isebele o ile a romela molaetša go Eliya wa gore o tlo mmolaya. E le gore a phološe bophelo bja gagwe, Eliya o ile a tšhabela ka borwa go phatša naga ya kgauswi ya Juda ke moka a fihla lešokeng, tikologong e omilego ya leganata.—1 Dikg. 19:2-4.

14 Ge a le noši gona moo a dutše a eja marapo a hlogo, Eliya o ile a bona eka mošomo wa gagwe wa go ba moporofeta ke wa lefeela. O ile a botša Jehofa gore: “Ga ke phale borakgolokhukhu ba ka ka selo.” Gabotsebotse o be a bolela gore o be a ikwa a se na mohola go fo swana le mobu le marapo a borakgolokhukhu ba gagwe. Ge e le gabotse, Eliya o be a itekotše go ya ka pono ya gagwe gomme a ipoditše gore o paletšwe le gore ga a na mohola go Jehofa goba go motho le ge e le ofe.

15. Modimo o ile a kgonthišetša Eliya bjang gore O be a sa mo lebelela e le wa bohlokwa?

15 Eupša Ramatlaohle o be a lebelela Eliya ka tsela e fapanego. Jehofa o ile a dula a lebelela Eliya e le wa bohlokwa e bile a gata megato ya go mo kgonthišetša seo. Modimo o ile a roma morongwa gore a yo matlafatša Eliya. Le gona Jehofa o ile a nea Eliya dijo le meetse tšeo di bego di tla mo matlafaletša leeto la gagwe la matšatši a 40 la go ya ka borwa Thabeng ya Horebe. Go feta moo, ka botho Modimo o ile a phošolla Eliya ge a be a nagana gore ga go na Baisiraele ba bangwe bao ba sa dutšego ba botegela Jehofa ka ntle le yena. Le gona Modimo o ile a nea Eliya dikabelo tše dingwe tšeo a ilego a di amogela. Eliya o ile a holwa ke thušo ya Jehofa gomme a boela mošomong wa gagwe wa go porofeta a na le matla a mafsa.—1 Dikg. 19:5-8, 15-19.

16. Ke ditsela dife tše dingwe tšeo go ka diregago gore Modimo o go thušitše ka tšona?

16 Mohlala wa Eliya o ka go thuša go kgonthišetša ge e ba o sa le tumelong e bile o ka go thuša gore o be le pono e botse. Sa pele, nagana ka ditsela tšeo Jehofa a go hlokometšego ka tšona. Na go ka direga gore yo mongwe wa bahlanka ba gagwe, mohlomongwe mogolo goba Mokriste yo mongwe yo a godilego tsebong, o ile a go thuša ge o be o hloka thušo? (Bagal. 6:2) Na Beibele, dikgatišo tša rena tša Bokriste le diboka tša phuthego di go  fepile moyeng? Nakong e tlago ge o thušwa ka e nngwe ya ditsela tše, naganišiša ka Mothopo wa kgonthe wa thušo yeo gomme o Mo leboge ka thapelo.—Ps. 121:1, 2.

17. Ke’ng seo Jehofa a se tšeelago godimo go bahlanka ba gagwe?

17 Sa bobedi, tseba gore pono e fošagetšego e ka go lahletša. Sa bohlokwa ke tsela yeo Modimo a re lebelelago ka yona. (Bala Baroma 14:4.) Jehofa o tšeela godimo boineelo bja rena le go mmotegela ga rena; ga a re lebelele go ya ka seo re se fihleletšego. Le gona go swana le Eliya, go ka direga gore o diretše Jehofa mo gontši go feta ka mo o ka naganago. Go ka direga gore go na le ba bangwe ka phuthegong bao ba kgomilwego ke mohlala wa gago o mobotse e bile go ka direga le gore o thušitše batho ba tšhemong ya gabo lena go tseba therešo.

18. Kabelo yeo o e neilwego ke Jehofa e hlatsela’ng?

18 Sa mafelelo, lebelela kabelo e nngwe le e nngwe yeo e tšwago go Jehofa e le bohlatse bja gore o na le wena. (Jer. 20:11) Go swana le Eliya, o ka nyama ka gobane tirelo ya gago e bonagala e sa tšweletše dienywa goba o bona eka o ka se tsoge o fihleletše dipakane tše itšego tša moya. Lega go le bjalo, o sa thabela tokelo e kgolokgolo yeo ka moka ga rena re e thabelago—go bolela ditaba tše dibotse le go nea bohlatse ka leina la Modimo. Dula o botega. Ke moka ka kgopolo e itšego, le wena o ka botšwa mantšu ao a lego papišong e nngwe ya Jesu. Mantšu ao a re: “Thaba le mong wa gago.”—Mat. 25:23.

“THAPELO YA MOHLAKI”

19. Mongwadi wa Psalme 102 o ile a lebeletšana le boemo bofe?

19 Mongwadi wa Psalme 102 o be a le tlalelong. O be a ‘hlaka,’ a tlaišega kudu mmeleng goba a gateletšegile maikwelong, e bile o be a se na matla a go lebeletšana le mathata a gagwe. (Ps. 102, mantšu a ketapele) Mantšung a gagwe re hwetša bohlatse bja gore o be a hlakišwa ke bohloko bjo a bego a bo kwa, bodutu le maikwelo a gagwe ka noši. (Ps. 102:3, 4, 6, 11) O be a feditše le pelo gore Jehofa o nyaka go mo lahla.—Ps. 102:10.

20. Thapelo e ka thuša bjang motho yo a lwantšhanago le dikgopolo tše di fošagetšego?

20 Lega go le bjalo, mopsalme yo o be a sa dutše a ka diriša bophelo bja gagwe go tumiša Jehofa. (Bala Psalme 102:19-21.) Go etša ge re bona go Psalme 102, gaešita le bao ba lego tumelong ba ka ba mahlokong gomme ba se nagane gabotse. Mopsalme o ile a ikwa a “etša nonyana yeo e ituletšego e nnoši tlhakeng,” go le bjalo ka ge eka o dutše moo le mathata a gagwe. (Ps. 102:7) Ge e ba o ka ikwa ka tsela yeo, ntšhetša Jehofa sa mafahleng go etša ge mopsalme a dirile. Dithapelo tša mohlaki—ke gore dithapelo tša gago—di ka go thuša ge o dutše o lwantšhana le dikgopolo tše di fošagetšego. Jehofa o holofetša gore “o tla araba dithapelo tša bao ba hutšwego dilo ka moka, [le gore] a ka se nyatše thapelo ya bona.” (Ps. 102:17) O se ke wa belaela kholofetšo yeo.

21. Motho yo a lwantšhanago le maikwelo a fošagetšego a ka dira’ng gore a be le pono e botse kutšwanyana?

21 Le gona Psalme 102 e bontšha kamoo o ka bago le pono e botse kutšwanyana. Mopsalme o ile a ba le yona ka go thoma go nagana ka tswalano ya gagwe le Jehofa. (Ps. 102:12, 27) O ile a homotšwa ke go tseba gore Jehofa o tla dula a thekga batho ba Gagwe dinakong tše thata. Ka gona, ge e ba maikwelo a fošagetšego ka nakwana a go šitiša go dira ka mo o bego o ka rata go dira ka gona tirelong ya Modimo, rapela ka seo. Kgopela Modimo gore a kwe thapelo ya gago, e sego feela gore a go ntšhe ka gare ga mathata eupša le gore “leina la Jehofa le tsebatšwe.”—Ps. 102:20, 21.

22. Yo mongwe le yo mongwe wa rena a ka thabiša Jehofa bjang?

22 Ee, re ka diriša Beibele go bona ge e ba re sa le tumelong le gore re bohlokwa kudu go Jehofa. Ke therešo gore tshepedišong ye ya dilo re ka fo se kgone go fediša maikwelo ka moka a fošagetšego goba go nyama. Lega go le bjalo, yo mongwe le yo mongwe wa rena a ka thabiša Jehofa le go tlo phološwa ka go kgotlelela ka potego tirelong ya gagwe.—Mat. 24:13.