Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) MARCH 2014

Na Seo o se Bolelago ke—“Ee Yeo e Lego Aowa”?

Na Seo o se Bolelago ke—“Ee Yeo e Lego Aowa”?

Nagana ka boemo bjo: Mogolo yo e lego setho sa Komiti ya go Hloma Kwano le Sepetlele o rulagantše go šoma le ngwanabo rena wa mofsa tirelong ya tšhemo mesong ya Sontaga. Mesong yona yeo, ka tšhoganetšo mogolo yo o hwetša mogala go tšwa go ngwanabo rena yo mongwe yoo mosadi wa gagwe a sa tšwago go hwetša kotsi ya koloi gomme a kitimišetšwa sepetlele. O kgopela mogolo yo gore a ba thuše go hwetša ngaka yeo e tlago go dumela go thuša mosadi wa gagwe ntle le go diriša madi. Ka gona mogolo yo o botša ngwanabo rena yola wa mofsa gore a ka se sa kgona go sepela le yena tšhemong e le gore a kgone go thekga lapa leo le wetšwego ke bothata bja tšhoganetšo.

Nagana ka boemo bjo bjo bongwe: Mma yo a se nago molekane yoo a nago le bana ba babedi o laletšwa ke banyalani ba bangwe ba phuthegong ya gabo go tlo etiša le bona. Ge a tsebiša bana ba gagwe ka seo, ba thaba kudu. Ba fela pelo gore mantšiboa ao a tla neng. Lega go le bjalo, letšatši pele ga ge ba ka ya go eta, banyalani ba tsebiša mma yoo gore go tšweletše boemo bja tšhoganetšo gomme ba ka se sa kgona go ba gotee. Ka morago mma yo o ile a kwa lebaka leo le dirilego gore banyalani bao ba fetoše ditaba. Ka morago ga gore banyalani bao ba mo laletše go tlo etiša le bona, bagwera ba bangwe ba bona ba ile ba ba laletša legaeng la bona bjona bošegong bjoo gomme ba dumela.

Ka ge re le Bakriste, re swanetše go phetha seo re se boletšego. Ga se ra swanela go ikhwetša re re ‘ee mola ge e le gabotse re re aowa.’ (2 Bakor. 1:18) Lega go le bjalo, go etša ge mehlala e mebedi yeo go boletšwego ka yona e bontšha, maemo ga a swane. Ka dinako tše dingwe, re ka gapeletšega go fetoša seo re se boletšego ka baka la maemo. Moapostola Paulo o kile a ikhwetša a le boemong bjo bjalo.

PAULO O ILE A LATOFATŠWA KA GO BOLELA MAAKA

Ka 55 C.E., ge Paulo a be a le Efeso leetong la gagwe la boraro la boromiwa, o ile a rulaganya go phatša Lewatle la Aegean a lebe Korinthe ke moka go tloga moo a ye Matsedonia. Ge a boela Jerusalema, o ile a rulaganya go etela phuthego ya Korinthe ka lekga la bobedi, mohlomongwe gore a yo tšea mpho e botho ya bana babo ba kua Jerusalema. (1 Bakor. 16:3) Seo se bonagala gabotse go 2 Bakorinthe 1:15, 16 moo re balago gore: “Ka kgodišego ye, pele ke be ke ikemišeditše go tla go lena ka lekga la bobedi, e le gore le buše le thabe, gomme ka morago ga go feta go lena ke ye Matsedonia ke boele go lena ke etšwa moo gomme le mphelegetše sebakanyana go ya Judea.”

Go bonagala Paulo lengwalong la gagwe le itšego leo a ilego a le ngwalela bana babo ba kua Korinthe a ile a ba tsebiša gore o tla ba etela.  (1 Bakor. 5:9) Lega go le bjalo, nakwana ka morago ga gore a ngwale lengwalo leo, ba lapeng la Klowe ba ile ba tsebiša Paulo gore go be go na le diphapano ka phuthegong. (1 Bakor. 1:10, 11) Paulo o ile a fetoša seo a bego a se rulagantše gomme a ngwala lengwalo leo ga bjale re le tsebago e le Bakorinthe ba Pele. Lengwalong leo Paulo o ile a nea keletšo e lerato le phošollo. Le gona o ile a ba botša gore o fetošitše leeto la gagwe, gore o be a tla thoma ka go ya Matsedonia ke moka a tla Korinthe.—1 Bakor. 16:5, 6. *

Go bonagala eka ge bana babo ba kua Korinthe ba be ba amogela lengwalo la gagwe, ba bangwe ba ‘baapostola ba go loka kudu’ ka phuthegong yeo ba ile ba mo latofatša ka gore o boletše maaka, gore ga a phethe seo a se boletšego. Ge Paulo a be a itwela o ile a botšiša gore: “Bjale ge ke be ke na le boikemišetšo bjo bjalo, na ke ile ka tšea taba yeo gabohwefo? Goba na ke rera dilo go ya ka nama, e le gore ke re ‘Ee, Ee’ ke moka ke tle ke re ‘Aowa, Aowa’?”—2 Bakor. 1:17; 11:5.

Re ka botšiša gore: Na ruri maemong a moapostola Paulo o be a “tšea taba yeo gabohwefo?” Le gatee! Lentšu leo le fetoletšwego e le “gabohwefo” le na le kgopolo ya go bolela maaka, bjalo ka ge eka motho ga a botege, ga a phethe seo a se boletšego. Potšišo ya Paulo yeo e sa nyakego karabo yeo e rego, “na ke rera dilo go ya ka nama?” nkabe e ile ya dira gore Bakriste ba Korinthe ba kwešiše gore phetho ya Paulo ya go se tle go bona e be e se ka gobane a sa botege.

Paulo o ile a gana tatofatšo yeo a tiišitše ka go ngwala gore: “Eupša Modimo a ka holofelwa gore seo re le botšago sona ga se Ee yeo e lego Aowa.” (2 Bakor. 1:18) Ruri Paulo o be a tshwenyegile ka bana babo le dikgaetšedi ba kua Korinthe ge a be a fetoša dithulaganyo tša leeto la gagwe. Go 2 Bakorinthe 1:23 re bala gore o ile a fetoša dithulaganyo tša gagwe tša mathomong tša go ya Korinthe ‘ka gobane a be a ba babalela.’ O be a ba neile sebaka sa go lokiša mathata a bona pele a ka ba etela. Go etša ge Paulo a be a holofetše gore bana babo ba Korinthe ba be ba tla lokiša ditaba tša bona, ge a be a le Matsedonia, Tito o ile a mo tsebiša gore lengwalo la gagwe ka kgonthe le ile la ba dira gore ba nyame le go itshola, e lego seo se ilego sa mo thabiša kudu.—2 Bakor. 6:11; 7:5-7.

“AMENE” YEO E BOLELWAGO GO MODIMO

Go latofatšwa ga Paulo ka gore o bolela maaka go ka ba go ile gwa bolela gore ge e ba a sa phethe dilo tšeo a di bolelago, go ra gore o be a ka se botwe modirong wa gagwe wa boboledi. Lega go le bjalo, Paulo o ile a gopotša Bakorinthe gore o kile a ba botša ka Jesu Kriste. O itše: “Morwa wa Modimo, Kriste Jesu yo a boletšwego gare ga lena ka rena, ke gore ka nna le Silibano le Timotheo, ga se ya ba Ee yeo e lego Aowa, eupša go yena Ee e bile Ee.” (2 Bakor. 1:19) Na se se ra gore Jesu Kriste, yoo Paulo a bego a latela mohlala wa gagwe, o be a sa botege? Aowa! Bophelong bja gagwe ka moka le bodireding, Jesu ka mehla o be a bolela therešo. (Joh. 14:6; 18:37) Ge e ba seo Jesu a bego a se ruta e be e le therešo e bile se ka botwa gomme Paulo le yena a be a ruta molaetša o swanago, gona go ra gore seo moapostola yo a bego a se ruta se be se ka botwa.

Ga go pelaelo gore Jehofa ke “Modimo wa therešo.” (Ps. 31:5) Re bona se go tšwa go seo Paulo a ilego a se ngwala ka morago, o itše: “Go sa šetšwe gore dikholofetšo tša Modimo ke tše dintši gakaakang, di bile Ee ka yena,” yena Kriste. Go botega ga Jesu ka tsela e se nago bosodi ge a be a le mo lefaseng go dirile gore re se ke ra ba le pelaelo le ge e le efe ka dikholofetšo tša Jehofa. Paulo o tšwela pela ka gore: “Ka baka leo, gape ka yena [Jesu] go na le ‘Amene’ yeo e bolelwago go Modimo gore go išwe letago go yena ka rena.” (2 Bakor. 1:20) Jesu ke “Amene” goba kgonthišetšo ya gore kholofetšo e nngwe le e nngwe ya Jehofa Modimo e tlo phethagala.

 Go etša ge Jehofa le Jesu ka mehla ba bolela therešo, Paulo le yena o be a bolela therešo ka mehla. (2 Bakor. 1:19) O be a sa bolele maaka, a sa holofetše “dilo go ya ka nama.” (2 Bakor. 1:17) Go e na le moo, o be a “sepela ka moya.” (Bagal. 5:16) Ge a be a dirišana le ba bangwe, o be a ba kganyogela tše botse. Ee ya gagwe e be e le Ee!

NA EE YA GAGO KE EE?

Lehono go tlwaelegile gore batho bao ba sa phelego ka melao ya motheo ya Beibele ba dire dikholofetšo eupša ba se di phethe ge go tšwelela mathatanyana goba dilo tšeo ba di ratago. Ditabeng tša kgwebo ga se ka mehla “ee” e lego “ee,” le ge seo go dumelelanwego ka sona se ngwadilwe. Batho ba bantši ga ba sa lebelela lenyalo e le tumelelano ya batho ba babedi ya bophelo ka moka. Go e na le moo, koketšego e kgolo kudu ya tlhalo e bontšha gore ba bantši ba lebelela lenyalo e le selo seo motho a ka fogo tšwa go sona gabonolo.—2 Tim. 3:1, 2.

Go thwe’ng ka wena? Na Ee ya gago ke Ee? Go etša ge go hlalositšwe mathomong a sehlogo se, ke therešo gore go ka direga gore o se sa kgona go phetha seo o bego o se rulagantše, e se ka gobane o bolela maaka eupša e le ka ge go tšweletše maemo ao o ka se kgonego go a laola. Eupša ka ge o le Mokriste, o swanetše go katanela go phetha kholofetšo goba keno yeo o e dirilego. (Ps. 15:4; Mat. 5:37) Ge o ka dira bjalo, o tla tsebja o le motho yo a botegago, yo a phelelago mantšu a gagwe le yo a bolelago therešo ka mehla. (Baef. 4:15, 25; Jak. 5:12) Ge batho ba lemoga gore o botega dilong ka moka, ba ka go theetša ge o bolela le bona ka therešo ya Mmušo wa Modimo. Ka gona, anke re kgonthišetšeng gore Ee ya rena ke Ee!

^ ser. 7 Ke therešo gore nakwana ka morago ga gore Paulo a ngwale Bakorinthe ba Pele, o ile a feta Teroa ge a be a eya Matsedonia moo a ilego a ngwala Bakorinthe ba Bobedi. (2 Bakor. 2:12; 7:5) Ka morago o ile a etela Korinthe bjalo ka ge a be a boletše.