Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2014

Mohlologadi wa Tsarepata o Ile a Putswa ka Baka la Tumelo ya Gagwe

Mohlologadi wa Tsarepata o Ile a Putswa ka Baka la Tumelo ya Gagwe

MOHLOLOGADI wa modiitšana o gokarela mošemanyana wa gagwe, e lego ngwana a nnoši wa gagwe. Ga a kgolwe mahlo a gagwe. Pejana ga moo, o be a lla a gokaretše mošemanyana yoo wa gagwe yo a bego a hwile. Gona bjale o thabile le go myemyela ge a dutše a lebeletše morwa wa gagwe yo a tsošitšwego bahung. Ke moka monna yo a etetšego mosadi yo o re go yena: “Bona, morwa wa gago o a phela.”

Tsogo ye e kgahlišago e diragetše mo e ka bago nywaga e 3 000 e fetilego. O ka bala ka yona go Dikgoši tša Pele kgaolo 17. Monna yo a bego a etetše mosadi yoo ke moporofeta wa Modimo e lego Eliya. Mosadi yoo yena e be e le mang? E be e le mohlologadi yo Beibele e sa mmolelego ka leina yoo a bego a dula motseng wa Tsarepata. Go tsošwa ga morwa wa gagwe e bile e nngwe ya ditiragalo tšeo di ilego tša matlafatša tumelo ya gagwe kudu. Ge re dutše re ahlaahla pego ya mabapi le yena, re tla ithuta dithuto tša bohlokwa kudu.

ELIYA O HWETŠA MOHLOLOGADI YO A NAGO LE TUMELO

Jehofa o ile a re go be go tla ba le komelelo yeo e bego e tla tšea nako e telele ge go be go buša Ahaba kgoši e kgopo ya Isiraele. Ka morago ga gore Eliya a tsebiše gore go tlo ba le komelelo, Modimo o ile a mo uta gore Ahaba a se ke a tla a mmolaya ke moka ka mohlolo a fepa moporofeta yo wa gagwe ka senkgwa le nama tšeo a bego a di tlišetšwa ke magokobu. Ke moka Jehofa o ile a botša Eliya gore: “Ema o ye Tsarepata ya Sidone o dule moo. Tseba gore ke tla laela mosadi yo mongwe wa mohlologadi gona moo gore a go fe dijo.”—1 Dikg. 17:1-9.

Ge Eliya a fihla Tsarepata, o ile a bona mohlologadi wa modiitšana a topelela dikgong. Na mosadi yo ke yena a bego a tla nea moporofeta yo dijo? O be a tla mo nea dijo tša go tšwa kae ka ge e be e le modiitšana? Go sa šetšwe dipelaelo le ge e le dife tšeo Eliya a ka bago a be a na le tšona, o ile a thoma go bolela le mosadi yoo. O ile a re: “Hle ntlišetše meetsana ka segwana gore ke nwe.” Ge mosadi yoo a tloga a yo mo gela meetse, Eliya o ile a oketša ka gore: “Hle ntlišetše le  senkgwanyana.” (1 Dikg. 17:10, 11) Mosadi yo o be a se na bothata bja go nea moeng wa gagwe meetse, bothata e be le go mo nea senkgwa.

Mosadi yoo o ile a araba ka gore: “Ke ikana ka Jehofa Modimo wa gago yo a phelago gore ga ke na senkgwa, eupša ke na le bupi bjo bo ka tlalago seatla ka pitšeng e kgolo le makhura a manyenyane ka legapaneng; bjale šefa ke topelela dikgong tše sego kae gore ke yo apeela nna le morwa wa ka gomme re je ke moka re hwe.” (1 Dikg. 17:12) Anke re boneng seo poledišano ye e re rutago sona.

Mohlologadi yo o ile a lemoga gore Eliya e be e le Moisiraele yo a boifago Modimo. Seo re se bona mantšung a gagwe ao a rego: “Ke ikana ka Jehofa Modimo wa gago yo a phelago.” Go bonagala eka le ge mosadi yo a be a tseba ganyenyane ka Modimo wa Isiraele, o be a sa nape a mo tseba gakaalo moo a bego a ka bolela ka Jehofa gore “Modimo wa ka.” O be a dula Tsarepata, e lego motsana woo go bonagalago ‘e be e le wa’ motse wa Fenikia kua Sidone goba o laolwa ke wona. Go na le kgonagalo e kgolo ya gore Tsarepata go be go dula barapedi ba Baali. Go sa šetšwe seo, Jehofa o ile a bona selo se itšego se sebotse ka pelong ya mohlologadi yo.

Gaešita le ge mohlologadi yo wa modiitšana wa Tsarepata a be a phela gare ga barapedi ba medimo ya diswantšho, o be a na le tumelo. Jehofa o ile a romela Eliya go mosadi yo gore a thuše yena le moporofeta yo wa gagwe. Re ka ithuta thuto ya bohlokwa tabeng ye.

Ga se badudi ka moka ba Tsarepata yeo go yona go bego go rapelwa Baali e bego e le ba kgopo. Taba ya gore Jehofa o ile a romela Eliya go mohlologadi yo, e bontšha gore O ela hloko batho ba dipelo tše dibotse bao ba sego ba hlwa ba Mo hlankela. Ruri “setšhabeng se sengwe le se sengwe motho yo a [boifago Modimo] gomme a dira se se lokilego o a amogelega go yena.”—Dit. 10:35.

Ke batho ba bakae tšhemong ya gabo lena bao ba swanago le mohlologadi wa Tsarepata? Gaešita le ge ba ka ba ba phela gare ditho tša madumedi a maaka, ba ka ba ba nyaka go tseba therešo. Ba ka ba ba na le tsebonyana ka Jehofa goba ba sa mo tsebe le gatee gomme ba hloka thušo e le gore ba amogele borapedi bjo bo sekilego. Na o tsoma batho ba bjalo tšhemong ya geno le go ba thuša?

‘THOMA PELE KA GO NTIRELA SENKGWANYANA’

Ela hloko seo Eliya a ilego a kgopela mohlologadi yo gore a se dire. Mohlologadi yo o be a sa tšwa go mmotša gore ge a fetša go apeela yena le morwa wa gagwe dijo, ba tla ja ke moka ba ikhwela. Eupša Eliya o ile a re’ng? O ile a re: “O se ke wa boifa. Tsena o dire go ya ka lentšu la gago. Fela ka seo o nago le sona o thome pele ka go ntirela senkgwanyana o ntlišetše sona, ke moka e be gona o direlago wena le morwa wa gago. Ka gobane se ke seo Jehofa Modimo wa Isiraele a se boletšego: ‘Bupi bjo bo lego ka pitšeng e kgolo bo ka se ke bja fela, le makhura ao a lego ka legapaneng a ka se ke a fela go fihlela mohlang Jehofa a neša pula nageng ye.’”—1 Dikg. 17:11-14.

Ba bangwe ba ka ba ba ile ba re: ‘Re go fe dijo tša rena tša mafelelo? O nyaka go re’ng?’ Eupša mohlologadi yo ga se a ka a arabela ka tsela yeo. Gaešita le ge a be a sa tsebe Jehofa gakaalo, o be a na le tumelo go Eliya e bile o ile a dira seo a mo kgopetšego sona. A teko e kgolo gakaakaang ya tumelo! Le gona ke mo go thabišago gore mohlologadi yo o ile a arabela ka tsela e bohlale.

Mohlologadi yo o ile a iphološa le go phološa morwa wa gagwe ka baka la go bontšha tumelo go Modimo wa Eliya e lego Jehofa

Modimo ga se a ka lebala mohlologadi yoo wa modiitšana. Go etša ge Eliya a holofeditše, Jehofa o ile a oketša bupi le makhura a manyenyane a mosadi yoo tšeo di bego di tla fepa Eliya, mohlologadi yoo le morwa wa gagwe go fihlela komelelo e fedile. Ruri “bupi bjo bo  bego bo le ka pitšeng e kgolo [bo ile] bja se ke bja fela, le makhura ao a bego a le ka legapaneng a se ke a fela, feela bjalo ka ge Jehofa a boditše Eliya.” (1 Dikg. 17:16; 18:1) Ge nkabe mosadi yo a ile a gana go nea Eliya dijo, mohlomongwe senkgwanyana seo a se apeilego ka bupi bja gagwe le makhura nkabe se ile sa fela gomme le yena a hwa. Go e na le moo, o ile a bontšha tumelo, a bota Jehofa gomme a thoma pele ka go nea Eliya dijo.

Seo re ka ithutago sona mo ke gore Modimo o šegofatša bao ba bontšhago tumelo. Ge potego ya gago e lekwa gomme o bontšha tumelo, Jehofa o tla go thuša. E tla ba Mohlokomedi, Mošireletši le Mogwera wa gago e le gore a go thuše go fenya teko yeo.—Ek. 3:13-15.

Ka 1898, Zion’s Watch Tower e ile ya tšweletša thuto ye go tšwa pegong ya mohlologadi yo: “Ge e ba mosadi yo a bile le tumelo e nyakegago gore a kwe, gona Morena o ile a bona e le mo go swanetšego gore a mo thuše a diriša Moporofeta; eupša ge nkabe a sa bontšha tumelo, mohlomongwe go ka ba go ile gwa hwetšwa mohlologadi yo mongwe yo a bego a ka thuša moporofeta yo. Go bjalo le ka rena—Morena o dumelela maemo a itšego bophelong gore a leke tumelo ya rena. Ge re bontšha tumelo, re tla hwetša ditšhegofatšo; eupša ge e ba re sa e bontšhe, re tla di šupa ka monwana.”

Ge re lebeletšane le diteko tše itšego, re swanetše go tsoma tlhahlo ya Modimo ka Mangwalong le ka dikgatišong tša rena tše di theilwego Beibeleng. Ke moka re diriše tlhahlo yeo ya Jehofa go sa šetšwe gore go thata gakaakaang go e amogela. Ruri re tla šegofatšwa ge e ba re latela seema se se bohlale: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.”—Die. 3:5, 6.

‘NA O TLILE GO NNA GO TLO BOLAYA MORWA WA KA?’

Tumelo ya mohlologadi yo e be e sa lebanwe ke teko e nngwe gape. Pego ya Beibele e re: “Ka morago ga dilo tše, morwa wa mosadi yoo, yo e lego yena mohumagadi wa ntlong yeo, a babja, gomme bolwetši bja gagwe bja gakala moo a ilego a hwa.” Ge mma yo yo a bego a kwele bohloko a dutše a ipotšiša lebaka la masetlapelo ao a mo wetšego, o ile a re go Eliya: “Ke na le taba mang le wena monna wa Modimo wa therešo? O tlile go nna go tlo nkgopotša molato wa ka le go bolaya morwa wa ka.” (1 Dikg. 17:17, 18) Mantšu a a bogale a ra go re’ng?

Na e ka ba e le gore mosadi yo o be a gopotše sebe sa gagwe seo se bego se sa mo robatše? Na o be a nagana gore lehu la morwa wa gagwe ke kotlo e tšwago go Modimo le gore Eliya e be e le moromiwa wa Modimo yo a tlišitšego lehu leo? Beibele ga e re botše, eupša seo re se tsebago ke se: Mohlologadi yo ga se a ka a bea Modimo molato ka gore ga se a loka.

Eliya o swanetše go ba a ile a kwešwa bohloko ke lehu la morwa wa mohlologadi yo le mantšu a gagwe a gore moporofeta yo ke yena a tlišitšego masetlapelo ao. Ka morago ga gore Eliya a rotogele phapošing ya ka godimo a rwele setopo sa mošemanyana yoo, o ile a goeletša ka gore: “Wena Jehofa Modimo wa ka, na o nyaka gore mohlologadi yo ke diiletšego ga gagwe le yena a kwe bohloko ka gore o bolaye morwa wa gagwe?” Moporofeta yo o be a tshwenyegile ka gore leina la Modimo le be le tla gobošwa ge e ba Modimo a be a ka dumelela gore mosadi yo yo botho le yo a nago le moya wa go amogela baeng a tlaišege go feta moo. Ka gona Eliya o ile a lopa Modimo ka gore: “Wena Jehofa Modimo wa ka, hle anke ngwana yo a boele a phele.”—1 Dikg. 17:20, 21.

“BONA, MORWA WA GAGO O A PHELA”

Jehofa o be a theeditše. Mohlologadi yo o neile moporofeta wa gagwe dijo le go bontšha tumelo. Go bonagala Modimo a ile a dumelela bolwetši bja mošemanyana yoo gore bo mmolaye, a tseba gore tsogo—yeo e bilego ya mathomo go begwa ka Mangwalong—e be e tla direga le go nea batho ba nakong e tlago kholofelo. Ka morago ga gore Eliya a Mo lope, Jehofa o ile a tsoša ngwana yoo. Akanya ka lethabo la mohlologadi yoo ge Eliya a be a re go yena: “Bona, morwa wa gago o a phela”! Ke moka mohlologadi yoo o ile a re go Eliya: “Bjale gona ke a tseba gore o monna wa Modimo le gore lentšu la Jehofa leo le tšwago molomong wa gago ke la therešo.”—1 Dikg. 17:22-24.

Pego ye ya Dikgoši tša Pele kgaolo 17 ga e re botše gore mosadi yo ile a felela kae. Eupša ka ge Jesu a ile a bolela gabotse ka yena, go ka direga gore o ile a fetoga mohlanka yo a botegago wa Jehofa. (Luka 4:25, 26) Pego ya gagwe e re ruta gore Modimo o šegofatša bao ba swarago bahlanka ba gagwe gabotse. (Mat. 25:34-40) E hlatsela gore Modimo o hlokomela bahlanka ba gagwe ba ba botegago, gaešita le ge go le thata kudu. (Mat. 6:25-34) Le gona pego ye e hlatsela gore Jehofa o fagahletše go tsoša bahu le gore o na le bokgoni bja go ba tsoša. (Dit. 24:15) Ruri a ke mabaka a mabotse a gore re gopole mohlologadi wa Tsarepata.