Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2014

Jehofa ke Mogwera wa Rena yo Mogolo

Jehofa ke Mogwera wa Rena yo Mogolo

“[Aborahama] a tla a bitšwa ‘mogwera wa Jehofa.’”—JAK. 2:23.

1. Ka ge re bopilwe ka seswantšho sa Modimo, re na le bokgoni bofe?

BATHO ba bantši ba fela ba re: “Banna! Ngwana yo a tla a swana le tatagwe!” Ee, bana ba bantši ba swana le batswadi ba bona. Seo ga se makatše ka gore tate le mma ba fetišetša dikarolwana tša leabela go bana ba bona. Jehofa, yena Tatago rena wa legodimong, ke Monei wa bophelo. (Ps. 36:9) Ka gona, ka ge re le bana ba gagwe ba batho, re swana le yena ka tekanyo e itšego. Ka ge re bopilwe ka seswantšho sa gagwe, re na le bokgoni bja go nagana, bja go dira diphetho gotee le bja go dira segwera le go se kgomarela.—Gen. 1:26.

2. Ke’ng seo se dirago gore go kgonege gore Jehofa e be Mogwera wa rena?

2 Jehofa e ka ba Mogwera wa rena yo mogolo. Segwera se se bjalo se a kgonega ka gobane Modimo o a re rata e bile re na le tumelo go yena le go Morwa wa gagwe. Jesu o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Go na le mehlala e mentši ya batho bao ba ilego ba ba le tswalano ya kgauswi le Jehofa. Anke re ahlaahleng ba babedi ba bona.

“ABORAHAMA MOGWERA WA KA”

3, 4. Segwera sa Jehofa le Aborahama se be se fapana bjang le seo a bilego le sona le ditlogolo tša gagwe?

3 Jehofa o ile a bitša mopatriareka le rakgolokhukhu wa Baisiraele  gore ke “Aborahama mogwera wa ka.” (Jes. 41:8) Ke’ng seo se dirilego gore segwera sa monna yo yo a botegago le Mmopi wa gagwe se swarelele? Ke tumelo ya Aborahama.—Gen. 15:6; bala Jakobo 2:21-23.

4 Mathomong Jehofa e be e le Mogwera le Tatago ditlogolo tša Aborahama tšeo e ilego ya ba setšhaba sa Isiraele ya bogologolo. Ka maswabi, segwera seo se ile sa fela. Ka baka la’ng? Ka gobane di ile tša palelwa ke go tšwela pele di bontšha tumelo go Jehofa le dikholofetšong tša gagwe.

5, 6. (a) Jehofa e bile Mogwera wa gago bjang? (b) Ke dipotšišo dife tšeo re swanetšego go ipotšiša tšona?

5 Ge o tšwela pele o ithuta ka Jehofa, tumelo ya gago go yena e tla matlafala le go feta, e bile o tla mo rata kudu. Nagana ge o be o thoma go tseba gore Modimo ke Motho wa kgonthe, motho yoo o ka bago le tswalano ya kgauswi le yena. O ithutile le gore ka moka ga rena re belegetšwe sebeng ka baka la go se kwe ga Adama. O ile wa hwetša gore batho ka moka ba arogile go Modimo. (Bakol. 1:21) Ke moka wa lemoga gore Tatago rena yo lerato wa legodimong ga a kgole le rena le gore o na le taba le rena. Ge re be re ithuta ka tokišetšo yeo a e dirilego ya sehlabelo sa Jesu sa topollo le go bontšha tumelo go sona, re ile ra thoma go gwerana le Modimo.

6 Ge re gadima morago, re ka ipotšiša gore: ‘Na segwera sa ka le Modimo se a gola? Na ke tloga ke bota Mogwera yo wa ka yo a rategago e lego Jehofa, le gona na lerato leo ke mo ratago ka lona le a gola letšatši le letšatši?’ Motho yo mongwe wa mehleng ya bogologolo yo a bego a na le tswalano ya kgauswi le Jehofa ke Gideone. Anke ga bjale re ahlaahleng mohlala wa gagwe o mobotse e le gore re o ekiše.

“JEHOFA KE KHUTŠO”

7-9. (a) Gideone o bile le phihlelo efe e makatšago, gona e ile ya mo kgoma bjang? (Bona seswantšho seo se lego mathomong a sehlogo.) (b) Re ka ba bagwera ba Jehofa bjang?

7 Moahlodi Gideone o hlanketše Jehofa mehleng ya ge Baisiraele ba bogologolo ba be ba le tlalelong ka morago ga gore ba tsene Nageng ya Kholofetšo. Baahlodi kgaolo ya botshelela e re botša gore morongwa wa Jehofa o ile a etela Gideone kua Ofura. Ka nako yeo, setšhaba sa kgauswi sa Bamidiane se be se tlaiša Baisiraele. Ka baka leo, Gideone o be a fola korong segatelong sa morara ka kutamong e le gore a akgofele go e tšhabiša ge manaba a bona a etla. Ka ge a be a makaditšwe ke morongwa yo a ilego a iponagatša go yena gomme a mmitša “mogale,” Gideone o ile a mmotšiša ge e ba Jehofa, yo a phološitšego Baisiraele Egipita, a be a tlo ba thuša le lekgeng le. Ge morongwa yo a be a bolelela Mmopi, o ile a kgonthišetša Gideone gore Jehofa o be a tla mo thuša.

8 Gideone o ile a ipotšiša gore o be a tla kgona bjang go “phološa Baisiraele diatleng tša Bamidiane.” Jehofa o ile a mo nea karabo ye e lebanyago: “Ka gobane ke tla ba le wena gomme o tla bolaya Bamidiane bjalo ka ge eka o bolaya motho o tee.” (Baa. 6:11-16) Ka ge Gideone a be a sa na le dipelaelo tša gore seo se be se tla direga bjang, o ile a kgopela go bontšhwa seka. Hlokomela gore poledišanong ye ya Jehofa le Gideone ga go na pelaelo gore Gideone o be a lebelela Jehofa e le Motho wa kgonthe.

9 Seo se ilego sa direga ka morago se ile sa matlafatša tumelo ya Gideone le go mmatametša kgauswi le Modimo. Gideone o ile a apea dijo ke moka a di solela morongwa. Morongwa yoo o ile a di kgwatha ka lehlotlo la gagwe gomme ka mohlolo tša fišwa ke mollo ke moka Gideone a lemoga gore ka kgonthe morongwa yoo e be e le moemedi wa Jehofa. A tšhogile, Gideone o ile a re: “Joo Mmuši Morena Jehofa! Ke bone morongwa wa Jehofa re lebantše difahlego!” (Baa. 6:17-22) Eupša na tiragalo ye e ile ya dira gore Gideone a tšhabe Modimo wa gagwe? Le gatee! Go ile gwa direga se se fapanego le seo. Gideone o ile a tseba Jehofa moo a ilego a ikwa a na le khutšo le Yena. Re tseba seo ka baka  la aletare yeo Gideone a ilego a e aga lefelong leo, yeo e ilego ya bitšwa “Jehofa-shalomo.” Leina leo le ra gore “Jehofa ke Khutšo.” (Bala Baahlodi 6:23, 24; mongwalo wa ka tlase wa Reference Bible.) Ge re naganišiša ka seo Jehofa a re direlago sona letšatši le letšatši, re feleletša re lemoga gore ke Mogwera wa kgonthe. Go rapela Modimo ka mehla go dira gore re be le khutšo ya ka gare e bile go matlafatša segwera sa rena le yena.

KE MANG A TLAGO GO BA ‘MOENG TENTENG YA JEHOFA’?

10. Go ya ka Psalme 15:3, 5, ke dilo dife tšeo Jehofa a di nyakago go rena ge e ba re nyaka go ba bagwera ba gagwe?

10 Lega go le bjalo, e le gore Jehofa e be Mogwera wa rena, re swanetše go dira dilo tše itšego. Go etša ge go begilwe go Psalme 15, Dafida o opetše ka dilo tšeo re swanetšego go di dira le tšeo re sa swanelago go di dira gore re be ‘baeng tenteng ya Jehofa,’ ke gore, gore re be bagwera ba Modimo. (Ps. 15:1) Anke re boleleng ka tše pedi tša tšona, e lego go se thomeletše batho ba bangwe le go botega dilong ka moka. Tšona dilong tše, Dafida o boletše ka moeng wa tenteng ya Jehofa gore: “Ga se a thomeletša ka leleme la gagwe. . . . Ga se a amogela letsogo-le-kobong gore a latofatše motho yo a se nago molato.”—Ps. 15:3, 5.

11. Ke ka baka la’ng re swanetše go phema go thomeletša ba bangwe?

11 Psalmeng e nngwe, Dafida o lemošitše ka gore: “Šireletša leleme la gago go se sebe.” (Ps. 34:13) Ge re ka palelwa ke go kwa keletšo ye e buduletšwego, segwera sa rena le Tatago rena wa go loka wa legodimong se tla senyega. Ge e le gabotse, go thomeletša ke se sengwe sa dika tša lenaba le legolo la Jehofa e lego Sathane. Leina “Diabolo” le tšwa lentšung la Segerika leo le bolelago gore “mothomeletši.” Go šetša seo re se bolelago ka ba bangwe go tla re thuša go dula re le kgauswi le Jehofa. Seo ke sa therešo kudukudu ge re bolela ka banna bao ba kgethilwego ka phuthegong.—Bala Baheberu 13:17; Juda 8.

12, 13. (a) Ke ka baka la’ng re swanetše go botega dilong tšohle? (b) Go botega ga rena go ka kgoma ba bangwe bjang?

12 Go botega, e sego go ikhola ka batho ba bangwe, le gona ke leswao la bahlanka ba Jehofa. Moapostola Paulo o ngwadile gore: “Tšwelang pele le re rapelela, gobane re holofela gore re na le letswalo le botegago, ka ge re rata go itshwara ka go botega dilong tšohle.” (Baheb. 13:18) Ka ge re ikemišeditše go “itshwara ka go botega dilong tšohle,” re phema go ikhola ka bana babo rena ba Bakriste. Ka mohlala, ge e ba re ba hirile, re kgonthišetša gore re ba swara ka toka le go ba lefa go ya ka seo re dumelelanego ka sona. Ka ge re le Bakriste, re dirišana ka potego le bašomi ba rena le batho ba bangwe ka moka. Le gona ge e ba re hirilwe ke Mokristegotee, ga re nyake go ikhola ka yena ka go nyaka gore a re sware eka re kgethegile.

13 Ke mo go thabišago ge re fela re ekwa bengmešomo ba lefase ba reta tsela yeo Dihlatse tša Jehofa di dirišanago le bona ka yona! Ka mohlala, molaodi yo mongwe wa mokgatlo wa ditirelo tša go aga o ile a lemoga gore Dihlatse tša Jehofa di phelela mantšu a tšona. O ile a re: “Ka mehla le phetha seo re dumelelanego ka sona.” (Ps. 15:4) Boitshwaro bjo bjalo bo re thuša go dira gore segwera sa rena le Jehofa se swarelele. Go feta moo, bo tumiša Tatago rena yo lerato wa legodimong.

THUŠA BA BANGWE GORE E BE BAGWERA BA JEHOFA

Re thuša ba bangwe gore e be bagwera ba Jehofa (Bona serapa 14 le 15)

14, 15. Ge re le bodireding, re ka thuša ba bangwe bjang gore e be bagwera ba Jehofa?

14 Le ge batho ba bantši bao re kopanago le bona tšhemong ba ka ba ba dumela gore Modimo o gona, ga ba mo lebelele e le Mogwera wa bona yo mogolo. Re ka ba thuša bjang? Ela hloko ditaelo tšeo Jesu a ilego a di nea barutiwa ba gagwe ba 70 ge a be a ba roma ka babedi ka babedi gore ba yo dira boboledi. O itše: “Kae le kae mo le tsenago gona  ka ntlong le thome ka gore: ‘Eka ntlo ye e ka ba le khutšo.’ Ge e ba mogwera wa khutšo a le gona, khutšo ya lena e tla ba go yena. Eupša ge e ba a se gona, gona e tla boela go lena.” (Luka 10:5, 6) Re ka gogela batho therešong ka go boledišana le bona ka tsela ya bogwera. Ge re kopana le baganetši, seo se ka thuša gore go se tsoge ntwa gomme sa dira gore dikgoro tša poledišano di dule di butšwe.

15 Ge re kopana le batho bao ba nweletšego bodumeding bja maaka goba bao ba latelago ditšo tšeo di ganetšanago le Mangwalo, re swanetše go bontšha moya wa khutšo le wa bogwera. Dibokeng tša rena re amogela ka borutho batho bao ba kganyogago go ithuta mo go oketšegilego ka Modimo yo re mo rapelago e le ka ge ba lapišitšwe ke dilo tšeo di diregago mo lefaseng. Lelokelelo la dihlogo tše di rego “Beibele e Fetoša Maphelo” di re nea mehlala e mentši e mebotse ya batho ba bjalo.

GO ŠOMA GOTEE LE MOGWERA WA RENA YO MOGOLO

16. Ke ka kgopolo efe re ka bitšwago bagwera ba Jehofa le “bašomigotee” le yena?

16 Gantši batho bao ba šomago gotee e feleletša e le bagwera ba bagolo. Bohle bao ba ineetšego go Jehofa ba na le tokelo ya go bitšwa bagwera ba gagwe le “bašomigotee” le yena. (Bala 1 Bakorinthe 3:9.) Ee, ge re dutše re tšea karolo modirong wa boboledi le wa go dira barutiwa, re ba le tsebo e tseneletšego ka dika tše di kgahlišago tša Tatago rena wa legodimong. Re bona kamoo moya wa gagwe o mokgethwa o re thušago go phetha taelo yeo a re neilego yona ya go bolela ditaba tše dibotse.

17. Dijo tša moya tšeo re di hwetšago dikopanong tše dikgolo le tše dinyenyane di bontšha bjang gore Jehofa ke Mogwera wa rena?

17 Ge re tšea karolo ka botlalo modirong wa go dira barutiwa, ke moo re ikwago re batametše kgauswi le Jehofa. Ka mohlala, re bona kamoo Jehofa a folodišago maano a baganetši. Lebelela morago nywageng e sego kae e fetilego. Na ga go molaleng gore Modimo o a re hlahla? Re šala re makatše ge re bona tsela yeo a re neago dijo tše dintši tša moya ka go se kgaotše. Dikopano tša rena tše dikgolo le tše dinyenyane di utolla gore Tatago rena yo lerato o tseba mehlako ya rena le dilo tše re di hlokago. Lapa le lengwe le ile la ngwala lengwalo la go leboga kopano ya selete ka gore: “Ruri lenaneo le le kgomile dipelo tša rena. Re kwele kamoo Jehofa a ratago yo mongwe le yo mongwe wa rena e bile a nyakago re atlega.” Ka morago ga gore banyalani bao ba tšwago Jeremane ba be gona kopanong ya selete e kgethegilego kua sehlakahlakeng sa Ireland, ba ile ba leboga kudu tsela yeo ba ilego ba amogelwa ka yona le go hlokomelwa, ba okeditše ka gore: “Ka godimo ga tšohle, re leboga Jehofa kudu le Kgoši yeo a e kgethilego e lego Jesu Kriste. Ke bona ba re laleditšego gore re be karolo ya setšhaba se seo se nago le botee. Ga re fo bolela gore re na le botee, eupša re bo thabela letšatši le  letšatši. Diphihlelo tšeo re bilego le tšona kopanong ya selete e kgethegilego kua Dublin di tla dula di re gopotša ka tokelo e kgolo yeo re nago le yona ya go hlankela Modimo wa rena yo mogolo re bapelane ka magetla.”

BAGWERA BA KGONTHE BA NTŠHETŠANA SA MAFAHLENG

18. Re swanetše go ipotšiša eng ka poledišano ya rena le Jehofa?

18 Segwera se a tia ge go na le poledišano e botse. Mehleng ye ya thekinolotši, go boledišana Inthaneteng le go romelana melaetša go ratwa kudu. Lega go le bjalo, re nagana gore poledišano ya rena le Mogwera wa rena yo mogolo e lego Jehofa e bjang ge re e bapetša le seo se boletšwego ka mo godimo? Ee, Jehofa ke “Mokwi wa thapelo.” (Ps. 65:2) Bjale potšišo ke gore re boledišana le yena gakae ka letšatši?

19. Ke’ng seo se tlago go re thuša ge re thatafalelwa ke go ntšhetša Tatago rena wa legodimong sa mafahleng?

19 Bahlanka ba bangwe ba Modimo ba thatafalelwa ke go mo ntšhetša sa mafahleng. Lega go le bjalo, Jehofa o nyaka gore re dire sona seo ge re mo rapela. (Ps. 119:145; Dillo 3:41) Gaešita le ge re sa tsebe gore re re’ng dithapelong tša rena, re na le mothuši. Paulo o ile a ngwalela Bakriste ba kua Roma gore: “Bothata bja seo re swanetšego go se rapelela go etša ge re swanetše ga re bo tsebe, eupša moya ka bowona o re phophothela ditsetselong tše re di hlokelago mantšu. Lega go le bjalo, yo a fetlekago dipelo o tseba seo se bolelwago ke moya, gobane o phophotha ka go dumelelana le Modimo bakeng sa bakgethwa.” (Baroma 8:26, 27) Go naganišiša ka mantšu ao a begilwego ka dipukung tša Beibele tša go swana le Jobo, Dipsalme le Diema go tla re thuša go ntšhetša Jehofa sa mafahleng.

20, 21. Mantšu a Paulo ao a lego go Bafilipi 4:6, 7 a re homotša bjang?

20 Ge re lebeletšane le maemo a thata, anke re lateleng keletšo yeo Paulo a ilego a budulelwa go e ngwalela Bafilipi, yeo e rego: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga.” Ga go pelaelo gore go boledišana ka tsela e bjalo le Mogwera wa rena yo mogolo go tla re homotša le go re kgothatša, ka gobane Paulo o okeditše ka gore: “Khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.” (Bafil. 4:6, 7) Anke ka mehla re tšeeleng godimo “khutšo ya Modimo” e sa bapišwego le selo yeo ruri e dišago dipelo tša rena le matla a rena a monagano!

Thapelo e matlafatša bjang segwera sa rena le Modimo? (Bona serapa 21)

21 Thapelo e re thuša go hlagolela segwera le Jehofa. Ka go re’alo, a re “rapeleng ka mehla.” (1 Bathes. 5:17) Eka sehlogo se se ka matlafatša tswalano ya rena e bohlokwa le Modimo le boikemišetšo bja rena bja go phela ka go dumelelana le melao ya gagwe ya go loka. Le gona, anke re ipheng nako ya go naganišiša ka ditšhegofatšo tšeo re di thabelago ka baka la ge Jehofa e le Tatago rena, Modimo wa rena le Mogwera wa rena.