Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  February 2014

Dipotšišo tše Tšwago go Babadi

Dipotšišo tše Tšwago go Babadi

Bajuda ba lekgolong la pele la nywaga ba be ba na le mabaka afe a go ‘letela’ Mesia?

Mehleng ya Johane Mokolobetši, “batho ba be ba letile, bohle ba be ba eleletša ka Johane dipelong tša bona ba re: ‘Na mohlomongwe ke yena Kriste?’” (Luka 3:15) Ke ka baka la’ng Bajuda ba ka ba ba ile ba letela gore Mesia a tšwelele ka nako yeo? Go na le mabaka a mmalwa.

Ka morago ga gore Jesu a belegwe, morongwa wa Jehofa o ile a iponagatša go badiši bao ba bego ba dišitše mehlape ya bona lefelong leo le lego kgauswi le Betlelehema. Morongwa yoo o ile a re: “Lehono le belegetšwe Mophološi, yo e lego Kriste Morena, motseng wa Dafida.” (Luka 2:8-11) Ka morago ga moo, morongwa o ile a tlatšwa ke “lešaba la madira a legodimo, la tumiša Modimo la re: * ‘Letago a le ye go Modimo magodimodimong, lefaseng go be le khutšo bathong bao a ba amogelago.’”—Luka 2:13, 14.

Ga go pelaelo gore tsebišo yeo e bile le tutuetšo e matla go badiši bao ba ikokobeditšego. Gateetee ba ile ba tloga ba ya Betlelehema, gomme ge ba hweditše Josefa, Maria le Jesu wa lesea, ba ile “ba tsebatša mantšu ao ba a boditšwego mabapi le ngwana yoo.” Ka baka leo, “bohle ba ba kwelego ba ile ba kgotsa dilo tšeo ba di boditšwego ke badiši.” (Luka 2:17, 18) Polelwana yeo e rego, “bohle ba ba kwelego” e bolela gore badiši ba ile ba botša le batho ba bangwe ka ntle le Josefa le Maria ka taba yeo. Ke moka ge badiši bao ba boela gae, ba ile ba tšwela pele “ba tumiša le go reta Modimo ka dilo ka moka tšeo ba di kwelego le go di bona ka wona mokgwa wo ba di boditšwego ka wona.” (Luka 2:20) Ruri badiši bao ga se ba ka ba fo homola ka dilo tše dibotse tšeo ba di kwelego ka Kriste!

Ge Maria a be a tlišitše morwa wa gagwe wa leitšibulo Jerusalema gore a mo tšweletše pele ga Jehofa, ka ge go be go nyakega gore a dire bjalo go ya ka Molao wa Moshe, Anna moporofeta wa mosadi o ile “a batamela gomme a leboga Modimo le go bolela ka ngwana yoo go bohle bao ba bego ba letetše tlhakodišo ya Jerusalema.(Luka 2:36-38; Ek. 13:12) Ka baka leo, ditaba tša mabapi le go tšwelela ga Mesia di ile tša tšwela pele go phatlalala.

Ka morago ga moo, “balepi ba dinaledi ba tšwago ka Bohlabela [ba ile] ba tla Jerusalema, ba re: ‘O kae yo a belegwego e le kgoši ya Bajuda? Gobane re bone naledi ya gagwe ge re be re le ka Bohlabela gomme re tletše go mo khunamela.’” (Mat. 2:1, 2) “Kgoši Heroda ge a ekwa se a ferekana, le Jerusalema ka moka ya ferekana gotee le yena. Ge a kgobokantše gotee baperisita ba bagolo ka moka le bamangwalo ba setšhaba, a  thoma go ba botšišiša moo Kriste a bego a tla belegelwa gona.” (Mat. 2:3, 4) Ka go re’alo batho ba bantši ba be ba botšwa gore: Mesia yo a bego a letilwe o fihlile! *

Luka 3:15 yeo e tsopotšwego pejana, e bontšha gore Bajuda ba bangwe ba be ba nagana gore Johane Mokolobetši e ka ba e be e le yena Kriste. Lega go le bjalo, Johane o ile a phošolla kgopolo yeo ka go bolela gore: “Yo a tlago ka morago ga ka o mpheta ka matla, yo ke sa swanelegego go rola diramphašane tša gagwe. Yena Yoo o tla le kolobetša ka moya o mokgethwa le ka mollo.” (Mat. 3:11) Mantšu a a Johane a boikokobetšo a ile a dira gore ba fagahlele le go feta go tla ga Mesia.

Na Bajuda ba lekgolong la pele la nywaga ba ka ba ba ile ba balela nako ya go tla ga Mesia ba diriša boporofeta bja dibeke tše 70 bjo bo begilwego go Daniele 9:24-27? Le ge re ka se ganetše seo, re ka se nape re kgonthišega gore go bile bjalo. Taba ke gore mehleng ya Jesu go be go na le ditlhaloso tše dintši tše di ganetšanago mabapi le dibeke tše 70 gomme ga go le e tee ya tšona yeo e nyakilego e swana le kwešišo ya rena ya gona bjale. *

Baessene, bao batho ba bantši ba naganago gore e be e le sehlotswana sa Bajuda seo se bego se dula se nnoši, ba be ba ruta gore Bomesia ba babedi ba be ba tla tšwelela go ya mafelelong a nywaga e 490, eupša re ka se nape re kgodišega gore Baessene ba ba be ba theile dipalopalo tša bona boporofeteng bja Daniele. Le ge e ba ba dirile bjalo, ga re tsebe gore Bajuda ka kakaretšo ba ka ba ba ile ba tutuetšwa bjang ke dikgopolo tša sehlotswana se.

Lekgolong la bobedi la nywaga C.E., Bajuda ba bangwe ba be ba dumela gore dibeke tše 70 di be di balwa go tloga nakong ya ge go fedišwa tempele ya mathomo ka 607 B.C.E. go fihla ge go fedišwa ya bobedi ka 70 C.E., mola ba bangwe ba be ba tswalanya go phethagala ga boporofeta bja mabapi le go tšwelela ga Mesia le mehla ya Maccabee a lekgolong la bobedi la nywaga B.C.E. Ka gona go be go sa tsebje gabotse gore dibeke tše 70 di swanetše go balwa bjang.

Ge e ba nako ya dibeke tše 70 e ka be e ile ya kwešišwa gabotse lekgolong la pele la nywaga C.E., motho a ka nagana gore baapostola le Bakriste ba bangwe ba lekgolong la pele la nywaga nkabe ba ile ba šupa go yona e le bohlatse bja gore Jesu Kriste, e lego Mesia yo a holofeditšwego, o be a fihlile ka nako. Lega go le bjalo, ga go na bohlatse bja gore Bakriste ba pele ba ile ba šupa go nako yeo.

Go na le ntlha e nngwe yeo re swanetšego go e ela hloko. Bangwadi ba Diebangedi ba boletše gantši gore diporofeto tše dingwe tšeo di lego ka Mangwalong a Seheberu di ile tša phethagala mabapi le Jesu Kriste. (Mat. 1:22, 23; 2:13-15; 4:13-16) Lega go le bjalo, ga go le o tee wa bona yo a tswalanyago go tšwelela ga Jesu mo lefaseng le boporofeta bja dibeke tše 70.

Ka boripana: Re ka se nape re phetha ka gore batho ba mehleng ya Jesu ba be ba kwešiša gabotse boporofeta bja dibeke tše 70. Lega go le bjalo, Diebangedi di re nea mabaka a mangwe a kwagalago ao ka ona batho bao ba ka bago ba ile ba ‘letela’ Mesia.

^ ser. 4 Beibele ga e bolele gore barongwa ba ile ba “opela” letšatšing leo Jesu a belegwego ka lona.

^ ser. 7 Re ka ipotšiša gore: Balepi ba dinaledi ba ile ba kgona bjang go tswalanya go tšwelela ga “naledi” ya ka Bohlabela le go belegwa ga “kgoši ya Bajuda”? Na go ka direga gore ba kwele ka ditaba tše tša go belegwa ga Jesu ge ba dutše ba sepela nageng ya Isiraele?

^ ser. 9 Ge e ba o nyaka go tseba ka kwešišo ya rena ya gona bjale ya mabapi le boporofeta bja dibeke tše 70, bona puku ya Ela Hloko Boporofeta bja Daniele! kgaolo 11.