Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) FEBRUARY 2014

‘Bona Botse bja Jehofa’

‘Bona Botse bja Jehofa’

Maemo a gateletšago a ka re kgoma ka tsela e sa kgahlišego. Re ka dula re nagana ka wona, a re fetša matla le go kgoma pono ya rena ka bophelo. Kgoši Dafida wa Isiraele ya bogologolo o ile a welwa ke mathata a mantši. O ile a lebeletšana le ona bjang? Psalmeng e nngwe e kgomago pelo, Dafida o araba ka gore: “Ke ile ka goeletša Jehofa ka lentšu la ka ke kgopela thušo; ke ile ka llela Jehofa ka lentšu la ka ke kgopela gore a nkgaugele. Pele ga gagwe ka tšhollela seo se ntshwenyago; pele ga gagwe ka bolela seo se mpeago tlalelong, ge moya wa ka o be o felelwa ke matla ka go nna. Wena o be o tseba tsela ya ka.” Ee, ka boikokobetšo Dafida o ile a rapela Modimo gore a mo thuše.—Ps. 142:1-3.

Dinakong tše thata, Dafida o ile a rapela Jehofa ka boikokobetšo gore a mo thuše

Psalmeng e nngwe, Dafida o opetše ka gore: “Ke selo setee seo ke se kgopetšego go Jehofa—ke sona seo ke tlago go se nyaka, ke gore ke dule ka ntlong ya Jehofa matšatši ohle a bophelo bja ka, gore ke bone botse bja Jehofa le gore ke kgahlwe ke go lebelela tempele ya gagwe.” (Ps. 27:4) Dafida e be e se Molefi, eupša akanya a eme ka ntle ga lapa le lekgethwa kgauswi le lefelo la borapedi bja therešo. Pelo ya Dafida e be e tletše ka tebogo moo a bego a nyaka go fetša matšatši a gagwe ka moka a le moo gore a “bone botse bja Jehofa.”

Lentšu “botse” le tswalanywa le boemo goba seka seo se “thabišago goba seo se kgahlišago monagano, maikwelo goba dikwi.” Dafida ka mehla o be a kgahlwa ke tokišetšo ya Modimo ya borapedi. Re ka ipotšiša gore: ‘Na ke ikwa ka tsela yeo Dafida a bego a ikwa ka yona?’

‘KGAHLWA’ KE TOKIŠETŠO YA MODIMO YA BORAPEDI

Mehleng ye ya rena, ga go na moago wo re swanetšego go ya go wona ge re nyaka go batamela Jehofa. Go e na le moo, re diriša tempele ya Modimo e kgolo ya moya, e lego tokišetšo e kgethwa ya borapedi bja therešo. * Ge e ba re ‘kgahlwa’ ke tokišetšo ye ya Modimo ya borapedi, le rena re ka ‘bona botse bja Jehofa.’

Ela hloko aletare ya koporo ya dibego tša go fišwa yeo e bego e beilwe pele ga mojako wa taberenakele. (Ek. 38:1, 2; 40:6) Aletare yeo e be e emela go ikemišetša ga Modimo go amogela bophelo bja Jesu e le sehlabelo. (Baheb. 10:5-10) Nagana ka seo se se se bolelago go rena! Moapostola Paulo o ngwadile gore: “Ge re be re le manaba re ile ra boelanywa le Modimo ka lehu la Morwa wa gagwe.” (Baroma 5:10) Ge re bontšha tumelo mading ao a tšholotšwego a Jesu, Modimo o tla re amogela re le bagwera ba gagwe le go re bota. Ka baka leo, re thabela go ba le “tswalano ya kgauswi le Jehofa.”—Ps. 25:14.

Ka ge ‘dibe tša rena di phumolwa,’ re thabela ‘mehla ya tapologo e tšwago go Jehofa.’ (Dit. 3:19) Boemo bja rena bo swana le bja mogolegwa yo a itsholago ka baka la ditiro tša gagwe tša nakong e fetilego gomme a dira diphetogo tše dikgolo ge a dutše a letile go ahlolelwa lehu. Ge moahlodi yo a lokilego a bona se, o tutueletšega go phumola melato ya mogolegwa yoo gomme a se sa mo ahlolela lehu. Ruri mogolegwa yo o tla ikwa a imologile e bile a thabile kudu! Go swana le moahlodi yoo, Jehofa o gaugela batho bao ba itsholago gomme a se sa ba ahlolela lehu.

THABELA BORAPEDI BJA THEREŠO

Gare ga dibopego tša borapedi bja therešo tšeo Dafida a bego a di bona ngwakong wa Jehofa e be e le go kgobokana ga mašaba a Baisiraelegotee le yena, go balwa le go hlaloswa ga Molao phatlalatša,  go fišwa ga diorelo le go bona baperisita le Balefi ba dira tirelo e kgethwa. (Ek. 30:34-38; Num. 3:5-8; Doit. 31:9-12) Dibopego tše tša borapedi bja therešo tša Isiraele ya bogologolo di swana le tša borapedi bja rena bja mehleng yeno.

Go etša mehleng e fetilego, le lehono “ke mo gobotse le mo go kgahlišago gakaakang ge bana ba motho ba dudišana ka botee!” (Ps. 133:1) Go bile le koketšego e kgolo “[mokgatlong] wohle wa bana babo rena” lefaseng ka bophara. (1 Pet. 2:17) Lentšu la Modimo le balwa le go hlaloswa phatlalatša dibokeng tša rena. Ka mokgatlo wa gagwe, Jehofa o diriša lenaneo leo le humilego go re ruta. Le gona go na le motlalo wa dijo tša moya tše di gatišitšwego tšeo re ka di dirišago thutong ya motho ka noši le borapeding bja lapa. Setho se sengwe sa Sehlopha se Bušago se itše: “Go naganišiša ka Lentšu la Jehofa le seo le se bolelago gotee le go tsoma temogo le kwešišo go nkhumišitše moyeng le go nnea kgotsofalo bophelong.” Ee, ‘tsebo e ka thabiša meoya ya rena.’—Die. 2:10

Lehono, dithapelo tša bahlanka ba Modimo tšeo di amogelegago di rotogela go Jehofa letšatši le letšatši. Dithapelo tše bjalo go Jehofa di swana le monko o bose wa diorelo tše di nkgago bose. (Ps. 141:2) Ruri ke mo gobotse go tseba gore Jehofa Modimo o a thaba ge re mmatamela ka thapelo re ikokobeditše!

Moshe o ile a rapela ka gore: “Anke botse bja Jehofa Modimo wa rena bo be godimo ga rena, modiro wa diatla tša rena o re theele wona o o tiiše.” (Ps. 90:17) Ge re dutše re dira bodiredi bja rena ka mafolofolo, Jehofa o šegofatša modiro wa rena. (Die. 10:22) Re ka no ba re thušitše ba bangwe go ithuta therešo. Mohlomongwe re kgotleletše nywaga e mentši bodireding go sa šetšwe go babja, go kwa bohloko maikwelong, go tlaišwa goba gore batho ga ba thabele. (1 Bathes. 2:2) Lega go le bjalo, na ga se ra bona “botse bja Jehofa” gomme ra lemoga gore Tatago rena wa legodimong o tloga a thabišwa ke maiteko a rena?

Dafida o opetše ka gore: “Jehofa ke karolo ya seo ke se abetšwego le ya senwelo sa ka. Wena o swareletše kabelong ya ka ka go tia. Manti a go ela ona a nthaletše mafelong a nkgahlago.” (Ps. 16:5, 6) Dafida o ile a leboga “karolo” ya gagwe, ke gore, go ba le segwera se se amogelegago le Jehofa le tokelo ya go mo hlankela. Go etša Dafida, re ka welwa ke mathata, eupša re šegofaditšwe kudu moyeng! Ka gona anke re tšweleng pele re thabela borapedi bja therešo gomme ka mehla re “kgahlwe ke go lebelela” tempele ya Jehofa ya moya.

^ ser. 6 Bona Morokami wa July 1, 1996, matlakala 14-24.