Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2014

Nywaga e 100 ya Pušo ya Mmušo—E go Kgoma Bjang?

Nywaga e 100 ya Pušo ya Mmušo—E go Kgoma Bjang?

“Mediro ya gago ke e megolo le e makatšago, wena Jehofa Modimo, . . . Kgoši ya bosafelego.”—KUT. 15:3.

1, 2. Mmušo wa Modimo o tla dira’ng, gona ke ka baka la’ng re ka kgodišega gore Mmušo woo o tla tla?

E BE e le ka seruthwane sa 31 C.E. thabeng ya kgauswi le Kaperenaume ge Jesu Kriste a be a ruta balatedi ba gagwe go rapela ka gore: “Mmušo wa gago a o tle.” (Mat. 6:10) Ba bantši lehono ba ipotšiša ge e ba Mmušo woo o tla tsoga o tlile. Lega go le bjalo, re kgodišegile gore dithapelo tša rena tše di tšwago pelong tša gore Mmušo wa Modimo o tle di tla arabja.

2 Jehofa o tla diriša Mmušo woo go kopanya lapa la gagwe la legodimong le la lefaseng. Morero woo wa Modimo o tla phethagala. (Jes. 55:10, 11) Ge e le gabotse, ge re bolela ka se sebaka, Jehofa e šetše e le Kgoši! Ditiragalo tše di kgahlišago tša nywageng e 100 e fetilego di hlatsela seo. Modimo o direla balata ba gagwe ba dimilione mediro e megolo le e makatšago. (Sak. 14:9; Kut. 15:3) Eupša go ba ga Jehofa Kgoši ga go swane le go tla ga Mmušo wa Modimo woo Jesu a re rutilego go o rapelela. Go fapana bjang, gona seo se re kgoma bjang?

KGOŠI YEO JEHOFA A E KGETHILEGO E GATA MOGATO

3. (a) Jesu o kgethilwe neng gore e be Kgoši, gona kae? (b) O ka hlalosetša motho yo mongwe bjang gore Mmušo o hlomilwe ka 1914? (Bona mongwalo wa ka tlase.)

3 Mo e ka bago nywaga e 20 pele ga 1900, seetša se ile sa thoma go hlaba boporofeteng bjo bo nago le nywaga e 2 500 bjoo bo begilwego ke Daniele, bjo bo rego: “Mehleng ya dikgoši tšeo Modimo  wa legodimo o tla hloma mmušo wo o ka se kego wa fedišwa.” (Dan. 2:44) Barutwana ba Beibele ba feditše nywaga e mentši ba bolela gore ngwaga wa 1914 e tla ba ngwaga o bohlokwa kudu. Ka nako yeo batho ba bantši ba be ba na le kholofelo ka bokamoso, go etša ge mongwadi yo mongwe a itše: “Lefase la pele ga 1914 le be le tletše ka kholofelo le kholofetšo.” Lega go le bjalo, ge Ntwa ya Pele ya Lefase e phulega ka morago wona ngwageng woo, boporofeta bja Beibele bo ile bja phethagala. Ditlala tšeo di ilego tša latela, ditšhišinyego tša lefase le mauba a malwetši gotee le go phethagala ga diporofeto tše dingwe tša Beibele di ile tša hlatsela tlwaa gore Jesu Kriste o thomile go buša legodimong e le Kgoši ya Mmušo wa Modimo ka 1914. * Ka go bea Morwa wa gagwe sedulong sa bogoši e le Kgoši Mesia, ruri Jehofa e bile Kgoši ka kgopolo e mpsha!

4. Ke’ng seo Kgoši yeo e bego e sa tšwa go bewa e ilego ya se dira ntle le go senya nako, gona ka morago ga moo e ile ya thoma go dira’ng?

4 Selo sa pele seo Kgoši ya Modimo yeo e bego e sa tšwa go bewa e ilego ya se dira e bile go lwa le Lenaba le legolo la Tatago yona e lego Sathane. Jesu le barongwa ba gagwe ba ile ba raka Diabolo le batemona ba gagwe legodimong. Se se ile sa tliša lethabo le legolo legodimong eupša sa tliša masetlapelo ao a sa kago a bonwa mo lefaseng. (Bala Kutollo 12:7-9, 12.) Ka morago ga moo, Kgoši ye e ile ya thoma go hlwekiša balata ba yona ba mo lefaseng, ya ba ruta le go ba rulaganyetša go dira thato ya Modimo. Anke re ahlaahleng kamoo go arabela ga bona gabotse dilong tše tše tharo go re beelago mohlala o mobotse lehono.

KGOŠI MESIA O HLWEKIŠA BALATA BA GAGWE BA BOTEGAGO

5. Ke go hlwekišwa gofe mo go diragetšego magareng ga 1914 le mathomong a 1919?

5 Ka morago ga gore Kgoši ye ya legodimong e lego Jesu a rake Sathane le batemona ba gagwe legodimong, Jehofa o ile a mo laela gore a yo hlahloba le go hlwekiša boemo bja moya bja balatedi ba gagwe ba lefaseng. Moporofeta Maleaki o hlalositše se e le go hlwekišwa moyeng. (Mal. 3:1-3) Histori e bontšha gore se se diragetše magareng ga 1914 le mathomong a 1919. * E le gore re be karolo ya lapa la Jehofa la legohleng, re swanetše go hlweka goba re be ba bakgethwa. (1 Pet. 1:15, 16) Ga se ra swanela go šilafatšwa ke bodumedi bja maaka goba dipolotiki tša lefase le.

6. Re hwetša dijo tša moya bjang, gona ke ka baka la’ng di le bohlokwa?

6 Ke moka Jesu o ile a diriša matla a gagwe e le Kgoši go kgetha “mohlanka yo a botegago le wa temogo.” Ka mehla mohlanka yo o be a tla nea bohle bao ba bopago “mohlape o tee” wo o hlokometšwego ke Jesu dijo tša moya tše di nago le phepo. (Mat. 24:45-47; Joh. 10:16) Ga e sa le go tloga ka 1919, sehlopha se senyenyane sa bana babo rena ba ba tloditšwego se be se dutše se phetha ka potego boikarabelo bjo bjo bogolo bja go fepa “ba ntlo.” Motlalo wa dijo tša moya tšeo di abjago ka mokero wo di a re fepa e le gore tumelo ya rena e gole. Di re matlafaletša go dula re hlwekile moyeng, boitshwarong, monaganong le mmeleng. Le gona dijo tše tša moya di a re ruta le go re thuša go tšea karolo ka botlalo modirong o bohlokwahlokwa wo o dirwago mo lefaseng lehono. Na o iphepa ka mehla ka dijo tše?

KGOŠI E RUTA BALATA BA YONA GO DIRA BOBOLEDI LEFASENG KA BOPHARA

7. Ke modiro ofe wa bohlokwa woo Jesu a ilego a o thoma ge a be a le mo lefaseng, gona o tla tšwela pele go fihla neng?

7 Ge Jesu a be a thoma bodiredi bja gagwe mo lefaseng o itše: “Le metseng e mengwe ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.” (Luka 4:43) Ka nywaga e meraro le seripa, Jesu o ile a etiša pele modiro  wo bophelong bja gagwe. O ile a laela barutiwa ba gagwe gore: “Ge le dutše le sepela, le bolele le re: ‘Mmušo wa magodimo o batametše.’” (Mat. 10:7) Ka morago ga tsogo ya gagwe, Jesu o ile a bolela e sa le pele gore balatedi ba gagwe ba be ba tla phatlalatša molaetša wo “go fihla karolong ya kgole ya lefase.” (Dit. 1:8) O ile a ba holofetša gore yena ka noši o be a tla ba le bona modirong wo wa bohlokwa go fihla le lehono.—Mat. 28:19, 20.

8. Kgoši e ile ya tutueletša balata ba yona ba lefaseng bjang gore ba dire boboledi?

8 Ka 1919, ‘ditaba tše dibotse tša Mmušo’ di ile tša ba le tlhaloso e nngwe e mpsha. (Mat. 24:14) Ka nako yeo, Kgoši e be e buša legodimong gomme e kgobokeditše sehlopha se senyenyane sa balata ba lefaseng bao ba hlwekilego. Sehlopha seo se ile sa latela ka mafolofolo taelo ya Jesu e rego: Bolelang lefaseng ka bophara ditaba tše dibotse tša Mmušo wa Modimo wo o hlomilwego! (Dit. 10:42) Ka mohlala, bagoeledi ba Mmušo ba e ka bago ba 20 000 ba ile ba tla kopanong ya ditšhabatšhaba kua Cedar Point, Ohio, U.S.A., ka September 1922. Akanya ka lethabo leo ba bilego le lona ge Ngwanabo rena Rutherford a be a nea polelo yeo e bego e na le sehlogo se se rego, “Mmušo” gomme a goeletša ka gore: “Bonang, Kgoši e a buša! Lena le batseta ba yona. Ka gona tsebatšang, tsebatšang, tsebatšang Kgoši le mmušo wa yona.” Baeng ba dikete tše pedi ba ile ba arabela mantšung ao ka go kgatha tema “Letšatšing la Tirelo” le le kgethegilego ka go dira boboledi magaeng ao a bego a le bokgole bja dikhilomithara tše 72 go tloga lefelong la kopano. Ngwanabo rena yo mongwe o ile a bolela ka mafolofolo gore: “Nka se tsoge ke lebetše kgoeletšo ya gore re tsebatše Mmušo le phišego yeo mašabašaba ao a bego a le moo a ilego a ba le yona! O be a se nnoši.

9, 10. (a) Ke dithulaganyo dife tše di dirilwego go tlwaetša bagoeledi ba Mmušo? (b) Wena tlwaetšo ye o go hotše bjang?

9 Ka 1922, go be go na le bagoeledi ba Mmušo ba ka godimo ga 17 000 bao ba bego ba dira boboledi dinageng tše 58 lefaseng ka bophara. Lega go le bjalo, ba be ba hloka tlwaetšo. Lekgolong la pele la nywaga, Kgoši ya Nakong e Tlago e ile ya nea barutiwa ba yona ditaelo tše di kwagalago tša seo ba bego ba swanetše go se bolela, moo ba bego ba swanetše go ya le kamoo ba bego ba swanetše go bolela ka gona. (Mat. 10:5-7; Luka 9:1-6; 10:1-11) E le go latela mohlala wo, le lehono Jesu o kgonthišetša gore bohle bao ba kgathago tema modirong wa go bolela ka Mmušo ba newa ditaelo le didirišwa tšeo ba di hlokago gore ba dire modiro wo ka katlego. (2 Tim. 3:17) Jesu o tlwaeletša balata ba gagwe bodiredi a diriša phuthego ya Bokriste. Tsela e nngwe yeo a dirago se ka yona ke ka Sekolo sa Bodiredi sa Pušo ya Modimo, seo se swarwago diphuthegong ka moka tša ka godimo ga tše 111 000 lefaseng ka bophara. Ka go diriša sekolo se ka botlalo, ga bjale bagoeledi ba fetago dimilione tše šupago ba hlametšwe go dira boboledi le go ruta ka tsela yeo e kgomago  dipelo tša “batho ba mehuta ka moka.”—Bala 1 Bakorinthe 9:20-23.

10 Go tlaleletša Sekolong sa Bodiredi sa Pušo ya Modimo, go hlomilwe dikolo tše dingwe tša Beibele bakeng sa go tlwaetša bagolo ba phuthego, babulamadibogo, bana babo rena bao ba sego lenyalong, banyalani ba Bakriste, ditho tša Komiti ya Lekala le basadi ba tšona, balebeledi ba basepedi le basadi ba bona le baromiwa. * Barutwana ba klaseng e nngwe ya Sekolo sa Beibele sa Banyalani ba Bakriste ba boletše kamoo ba lebogago sekolo se ka gona ka gore: “Tlwaetšo e kgethegilego yeo re e hweditšego e dirile gore re rate Jehofa le go feta e bile e re hlamile gakaone go thuša ba bangwe.”

11. Bagoeledi ba Mmušo ba kgona bjang go kgotlelela go sa šetšwe kganetšo?

11 Lenaba la rena Sathane o tomoletše mahlo maiteko a magolo ao re a dirago modirong wa go bolela ka Mmušo le wa go ruta. O diriša mekgwa e bonagalago le e sa bonagalego go hlasela molaetša wa Mmušo le bagoeledi ba ona e le gore modiro wo o kgaotše. Eupša lenaba le le ka se tsoge le atlegile. Jehofa o beile Morwa wa gagwe “ka godimodimo ga mmušo o mongwe le o mongwe, bolaodi, matla [le] borena.” (Baef. 1:20-22) Ka ge e le Kgoši, Jesu o diriša matla a gagwe a taolo go šireletša le go hlahla barutiwa ba gagwe go kgonthišetša gore thato ya Tatagwe e a direga. * Ditaba tše dibotse di a bolelwa gomme batho ba dimilione ba dipelo tše dibotse ba rutwa ditsela tša Jehofa. A tokelo e kgolo gakaakaang ya gore le rena re kgathe tema modirong wo o bohlokwa!

KGOŠI E RULAGANYA BALATA BA YONA GO DIRA MODIRO O MOGOLO

12. Hlalosa tše dingwe tša diphetogo tše di dirilwego ka mokgatlong ga e sa le Mmušo o theilwe.

12 Ga e sa le Mmušo o thewa ka 1914, Kgoši e dirile diphetogo tseleng yeo bahlanka ba Modimo ba bego ba rulaganyeditšwe go dira thato ya Tatago yona. (Bala Jesaya 60:17.) Ka 1919, phuthegong e nngwe le e nngwe go ile gwa kgethwa molaodi wa tirelo gore a etelele pele modirong wa boboledi. Ka 1927 go ile gwa rulaganywa modiro wa ka mehla wa ntlo le ntlo ka Disontaga. Bathekgi ba Mmušo ba ile ba tutueletšega go fišega kudu modirong wo ka 1931 ge ba be ba amogela leina la Mangwalo la Dihlatse tša Jehofa. (Jes. 43:10-12) Ka 1938, go kgethwa ka go boutelwa ga banna bao ba nago le boikarabelo ka diphuthegong go ile gwa tšeelwa legato ke go kgethwa go ya ka pušo ya Modimo. Ka 1972, phuthego e ile ya okamelwa ke sehlopha sa bagolo go e na le go okamelwa ke molebeledi o tee wa phuthego. Banna ka moka bao ba swanelegago ba ile ba kgothaletšwa gore ba katanele go ‘diša mohlape wa Modimo  woo ba o hlokometšego.’ (1 Pet. 5:2) Ka 1976, Sehlopha se Bušago se ile sa rulaganywa ka dikomiti tše tshelelago gore di okamele modiro wa Mmušo lefaseng ka bophara. Ga e sa le go tloga ka nako yeo, Kgoši yeo Jehofa a e kgethilego e ile ya rulaganya balata ba Mmušo ka tsela ya pušo ya Modimo, goba ka tsela ya Modimo ya go buša.

13. Dilo tšeo pušo ya Mmušo e di fihleletšego nywageng ye e 100 di kgomile bophelo bja gago bjang?

13 Nagana ka seo Kgoši Mesia a se fihleletšego nywageng ya mathomo e 100 ya pušo ya gagwe. O hlwekišitše batho bao ba bitšwago ka leina la Jehofa. O okametše modiro wa go bolela ditaba tše dibotse tša Mmušo dinageng tše 239 e bile o rutile batho ba dimilione ditsela tša Jehofa. O kopantše balata ba botegago ba ka godimo ga dimilione tše šupago, bao yo mongwe le yo mongwe wa bona a ithaopago ka go rata go dira thato ya Tatagwe. (Ps. 110:3) Ruri dilo tšeo Jehofa a di fihleletšego ka Mmušo wa Mesia ke tše kgolo le tšeo di makatšago! Go sa na le ditiragalo tše dingwe tše di kgahlišago le go feta tšeo di sa letšego ka pele!

DITŠHEGOFATŠO TŠA NAKONG E TLAGO TŠA MMUŠO WA MESIA

14. (a) Ke’ng seo re kgopelago Modimo gore a se dire ge re rapela ka gore: “Mmušo wa gago a o tle”? (b) Temana ya rena ya ngwaga ya 2014 e re’ng, gona ke ka baka la’ng e swanetše?

14 Le ge Jehofa a beile Morwa wa gagwe Jesu Kriste sedulong sa bogoši e le Kgoši Mesia ka 1914, seo e be e se karabo e feletšego ya thapelo ya rena yeo e rego: “Mmušo wa gago a o tle.” (Mat. 6:10) Beibele e boletše e sa le pele gore Jesu o be a tla ‘ya a fenye gare ga manaba a gagwe.’ (Ps. 110:2) Mebušo ya batho yeo e laolwago ke Sathane e sa dutše e lwantšha Mmušo woo. Ge re rapela gore Mmušo wa Modimo o tle, re kgopela Modimo gore Kgoši Mesia le babušigotee le yena ba tle ba fediše mebušo ya batho le baganetši ba Mmušo woo. Mogato woo o tla phethagatša Daniele 2:44 yeo e rego Mmušo wa Modimo “o tla pšhatlaganya mebušo ye ka moka wa e fediša.” O tla fediša mebušo ya dipolotiki yeo e lego manaba a Mmušo woo. (Kut. 6:1, 2; 13:1-18; 19:11-21) Nako ya gore se se direge e kgauswi kudu. Ruri ke mo go swanetšego gore temana ya rena ya ngwaga ya 2014, e lego ngwaga wa bo-100 Mmušo wa Modimo o theilwe legodimong, e be Mateo 6:10 yeo e rego: “Mmušo wa gago a o tle”!

Temana ya rena ya ngwaga ya 2014 e re: Mmušo wa Gago a o tle.”—Mateo 6:10

15, 16. (a) Ke ditiragalo dife tše di kgahlišago tšeo di tlago go direga nakong ya Pušo ya Nywaga e Sekete? (b) Ke selo sefe sa mafelelo seo Jesu a tlago go se dira e le Kgoši Mesia, gona seo se tla ra go re’ng ka morero wa Jehofa bakeng sa dibopiwa tša gagwe ka moka?

15 Ka morago ga gore Kgoši Mesia a fediše manaba a Modimo, o tla lahlela Sathane le batemona ba gagwe sekoting gomme a ba tswalelela moo ka nywaga e sekete. (Kut. 20:1-3) Ge tutuetšo yeo e kgopo e se gona, Mmušo o tla diriša mehola ya sehlabelo sa Jesu sa topollo le go fediša ditlamorago tša sebe sa Adama. Kgoši ye e tla tsoša batho ba dimilionemilione bao ba robetšego mabitleng gomme ya rulaganya modiro o mogolo wa gore ba rutwe ka Jehofa. (Kut. 20:12, 13) Lefase ka moka le tla fetoga paradeise go swana le serapa sa Edene. Batho ka moka bao ba botegago ba tla phethagala.

16 Ge Pušo ya Kriste ya Nywaga e Sekete e fedile, Mmušo wa Mesia o tla ba o phethile morero wa wona. Ke moka Jesu o tla bušetša Mmušo go Tatagwe. (Bala 1 Bakorinthe 15:24-28.) Go ka se sa nyakega mmaditsela gare ga Jehofa le bana ba gagwe ba lefaseng. Barwa ba Modimo ka moka ba legodimong le bana ba gagwe ba mo lefaseng e tla ba selo setee le Tatago bona wa legodimong e le karolo ya lapa la gagwe la legohleng.

17. O ikemišeditše go dira’ng mabapi le Mmušo?

17 Ditiragalo tše di kgahlišago tšeo di diragetšego nywageng e 100 ya pušo ya Mmušo di re kgonthišetša gore Jehofa o laola dilo le gore morero wa gagwe ka lefase o tla phethagala. Anke re tšweleng pele re le balata ba gagwe ba botegago gomme re tsebatše Kgoši le Mmušo wa yona. Le gona a re direng bjalo re tloga re kgodišegile gore kgauswinyane Jehofa o tla araba thapelo ya rena e tšwago pelong, yeo e rego: “Mmušo wa gago a o tle”!

^ ser. 10 Bona sehlogo se se rego, “Dikolo tša Pušo ya Modimo—Bohlatse bja Gore Jehofa o a re Rata” ka go tokollo ya Morokami wa September 15, 2012, matlakala 13-17.

^ ser. 11 Bakeng sa mehlala ya diphenyo tša semolao tšeo re bilego le tšona dinageng tše di fapafapanego, bona tokollo ya Morokami wa December 1, 1998, matlakala 19-22.