Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  January 2014

“Mmušo wa Gago a o tle”—Eupša Neng?

“Mmušo wa Gago a o tle”—Eupša Neng?

“Ge le bona dilo tše ka moka, le tsebe gore Morwa wa motho o kgauswi mejakong.”—MAT. 24:33.

1, 2. (a) Ke’ng seo se ka dirago gore re se bone dilo tše di lego mo pele ga rena? (b) Re tseba’ng ka Mmušo wa Modimo?

MOHLOMONGWE o lemogile gore batho bao ba bonego tiragalo e itšego gantši ba e gopola ka ditsela tše di sa swanego. Ka mo go swanago, motho a ka hwetša go le thata go gopola seo ngaka e mmoditšego sona ka morago ga go mmotša bolwetši bja gagwe. Goba motho a ka fo ba a na le bothata bja go se bone dinotlelo tša gagwe goba digalase tša mahlo le ge di le mo pele ga gagwe. Maemo a ka moka a tswalana le seo banyakišiši ba se bitšago mohuta o itšego wa bofofu—go se bone selo se itšego goba go se lebala ka baka la ge o swaregile ka selo se itšego. Go thwe ye ke tsela yeo bjoko bja rena bo šomago ka yona.

2 Batho ba bantši lehono ba na le bofofu bja mohuta woo mabapi le ditiragalo tša lefase. Ba ka dumela gore lefase le fetogile kudu ga e sa le go tloga ka 1914, eupša ga ba bone seo se bolelwago ke ditiragalo tše. Ka ge re le barutwana ba Beibele, re a tseba gore ka kgopolo e itšego Mmušo wa Modimo o tlile ka 1914 ge Jesu a be a bewa go ba Kgoši legodimong. Lega go le bjalo, re a tseba gore go na le dilo tše dintši tše di akaretšwago karabong ya thapelo yeo e rego: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mat. 6:10) Ga go pelaelo  gore dilo tšeo di akaretša go fedišwa ga tshepedišo ye ya dilo. Ke feela ge seo se diragetše moo thato ya Modimo e tlago go direga lefaseng bjalo ka ge e direga legodimong.

3. Go ithuta Lentšu la Modimo go re hola ka eng?

3 Ka baka la ge re ithuta Lentšu la Modimo ka mehla, re kgona go bona gore boporofeta bo a phethagala gona bjale. Re fapana kudu le batho ba bangwe! Ba swaregile kudu moo ba hlokomologago bohlatse bjo bo lego molaleng bja gore Kriste o be a dutše a buša go tloga ka 1914 le gore kgauswinyane o tla tliša kahlolo ya Modimo. Lega go le bjalo, ipotšiše gore: Ge e ba ke hlanketše Modimo ka nywaga e mentši, na ke sa dutše ke ntšhitše mahlo dinameng le go tshwenyega ka seo se bolelwago ke mehla ya rena go etša nywageng e fetilego? Ge e ba o sa tšwa go ba Hlatse, o dula o naganne ka eng? Go sa šetšwe gore karabo ya rena ke efe, anke re ahlaahleng mabaka a mararo a bohlokwa ao a dirago gore re kgodišege gore Kgoši e tloditšwego ya Modimo e tla tloga e gata megato e mengwe go dira gore thato ya Modimo e direge ka botlalo mo lefaseng.

BANAMEDI BA DIPERE BA TŠWELETŠE

4, 5. (a) Jesu o be a dutše a dira’ng ga e sa le go tloga ka 1914? (Bona seswantšho seo se lego mathomong a sehlogo.) (b) Banamedi ba bararo ba dipere ba swantšhetša’ng, gona seo se phethagetše bjang?

4 Ka 1914, Jesu Kriste—yoo a hlaloswago a nametše pere e tšhweu—o ile a newa mphapahlogo wa gagwe wa legodimong. Gateetee o ile a ya go feleletša phenyo ya gagwe ka go fediša tshepedišo e kgopo ya Sathane. (Bala Kutollo 6:1, 2.) Boporofeta bjo bo lego go Kutollo kgaolo ya botshelela bo hlalositše gore ka morago ga ge Mmušo wa Modimo o hlomilwe, maemo a lefase a be a tla phuhlama ka lebelo—go be go tla ba le dintwa, go hlaelela ga dijo, malwetši le dilo tše dingwe tšeo di bakago lehu. Ditiragalo tše di swantšhetšwa ke banamedi ba bararo ba dipere bao ba latelago Jesu Kriste kgauswiuswi.—Kut. 6:3-8.

5 Go etša ge go boletšwe e sa le pele, khutšo ‘e ile ya tlošwa lefaseng,’ go sa šetšwe dikholofetšo tša ditšhaba tša gore di tla dirišana ka khutšo. Ntwa ya Pele ya Lefase e ka lebelelwa e le mathomo a dintwa tše dikgolo, bjalo ka ge seo se hlatselwa ke ditiragalo tša morago bjale tša lefase. Le gona go sa šetšwe tšwelopele ya tša ikonomi le thutamahlale ga e sa le go tloga ka 1914, go hlaelela ga dijo e sa dutše e le tlhobaboroko lefaseng. Go oketša moo, ke mang a ka ganago gore mehuta ka moka ya malwetši, dikotsi tša tlhago le ‘malwetši a mangwe a bolayago’ di tšwela pele go bolaya batho ba dimilione ngwaga le ngwaga? Ditiragalo tše di direga gantši e bile ke tše šoro kudu go feta le ge e le neng pele historing. Na o kwešiša seo se bolelwago ke ditiragalo tše?

Ka ge banamedi ba dipere ba kata, maemo a lefase a mpefala le go feta (Bona serapa 4 le 5)

6. Ke bomang bao ba ilego ba lemoga go phethagala ga boporofeta bja Beibele, gona seo se ile sa dira gore ba dire’ng?

6 Batho ba bantši ba ile ba hlorega boroko ka baka la go thoma ga Ntwa ya Pele ya Lefase gotee le bolwetši bja Kwatama. Eupša Bakriste ba tloditšwego ba be ba dutše ba fagahletše 1914 e le bofelo bja Mabaka a Bantle, goba “dinako tše di beilwego tša ditšhaba.” (Luka 21:24) Ba be ba sa kgonthišege ka botlalo ka seo se tlago go direga. Lega go le bjalo, ba be ba tseba gore ka 1914 go be go tla ba le diphetogo pušong ya Modimo. Gateetee ge ba lemogile go phethagala ga boporofeta bja Beibele, ka sebete ba ile ba botša ba bangwe gore Mmušo wa Modimo o thomile go buša. Maiteko a bona a go tsebatša Mmušo a ile a dira gore ba tlaišwe o šoro. Taba ya gore se se diragetše ditšhabeng tše dintši e be e le go phethagala ga boporofeta. Nywagasomeng e latetšego, manaba a Mmušo a ile a “dira gore maanomabe ao [a] a logago a be molaong.” Le gona a ile a tlaiša bana babo rena ka go ba betha, go ba golega le ka go ba bolaya ka go ba lekeletša, ka go ba thuntšha goba ka go ba kgaola dihlogo.—Ps. 94:20; Kut. 12:15.

7. Ke ka baka la’ng batho ba bantši ba sa lemoge seo se bolelwago ke ditiragalo tša lefase?

 7 Ka ge go na le bohlatse bjo bontši kudu bja gore Mmušo wa Modimo o šetše o hlomilwe legodimong, ke ka baka la’ng batho ba bantši ba sa lemoge seo? Ke ka baka la’ng ba sa kgone go bona gore ditiragalo tša lefase di phethagatša diporofeto tša Beibele ka tsela yeo batho ba Modimo e lego kgale ba bolela gore di tla phethagala ka yona? Na e ka ba e le gore batho ba bantši ba lebeletše feela dilo tšeo ba kgonago go di bona ka mahlo a bona? (2 Bakor. 5:7) Na go swarega ga bona go ba foufaditše gore ba se bone seo Modimo a se dirago? (Mat. 24:37-39) Na ba bangwe ba bona ba fahlwa ke maaka a Sathane? (2 Bakor. 4:4) Go nyakega tumelo le go kgona go bona dilo tše di sa bonwego gore motho a kwešiše seo Mmušo wa Modimo o se dirago. Re thaba gakaakang gore rena ga se ra foufala gore re se bone seo se diregago!

BOKGOPO BO FETELETŠE

8-10. (a) Lengwalo la 2 Timotheo 3:1-5 le phethagala bjang? (b) Ke ka baka la’ng re ka re bokgopo bo feteletše?

8 Lebaka la bobedi leo ka lona re tsebago gore kgauswinyane Mmušo wa Modimo o tla laola lefase ke le: Bokgopo bja batho bo feteletše. Ka nywaga e ka bago e lekgolo, maemo ao a boletšwego e sa le pele go 2 Timotheo 3:1-5 a be a dutše a bonagala. Le ona ke kgale a direga, a direga gantši kudu e bile a apareditše lefase. Na o a bona gore boporofeta bjo bo phethagala go feta le ge e le neng pele? Anke re ahlaahleng e mengwe ya mehlala yeo e bontšhago se gabotse.—Bala 2 Timotheo 3:1, 13.

9 Nagana ka phapano magareng ga selo seo se bego se tšhabiša dinama tša mmele ka bo-1940 goba ka bo-1950 le seo lehono se diregago mešomong, boithabišong, dipapading le difešeneng. Ga bjale bošoro bjo bo feteletšego le boitshwaro bjo bo gobogilego di tlwaelegile. Batho ba phadišana ka go ba šoro, go hloka mekgwa goba go se be le lešoko. Seo ka bo-1950 se bego se lebelelwa se sa swanela go gašwa thelebišeneng, lehono se tšewa se swanela go bogelwa ke malapa. Le gona ba bantši ba lemogile gore batho bao ba ratanago le batho ba bong bjo bo swanago le bja bona ba ratwa kudu boithabišong le fešeneng le gore ba phatlalatša  mokgwa wa bona wa bophelo. Re leboga gakaakang gore re tseba pono ya Modimo!—Bala Juda 14, 15.

10 Goba Mokriste a ka nagana ka seo se bego se lebelelwa e le borabele bja bafsa ka bo-1950 le seo se diregago lehono. Ga go makatše ge ka nako yeo batswadi ba be ba tshwenyega mabapi le ge e ba bana ba bona ba kgoga motšoko, ba nwa bjala goba ba tantsha ka tsela e gobogilego. Lehono, dipego tše tše di tšhošago di tlwaelegile: Morutwana wa nywaga e 15 o bolaile barutwana ba babedi bao a tsenago le bona ka klaseng ka sethunya gomme a gobatša ba 13. Sehlopha sa bafsa bao ba tagilwego se bolaile ka sehlogo ngwanenyana wa nywaga e senyane gomme sa itia tatagwe le motswalagwe. Go begilwe gore bafsa ba nageng e nngwe ya Asia ba ikarabela ka seripagare sa melato ya bosenyi yeo e dirilwego nywageng e lesome e fetilego. Na go na le yo a nago le lebaka la go gana gore maemo a mpefetše?

11. Ke ka baka la’ng batho ba bantši ba sa lemoge gore maemo a lefase a a mpefala?

11 Moapostola Petro o boletše ka mo go nepagetšego gore: “Mehleng ya bofelo go tla tla bakweri ka dikwero tša bona, ba yago ka dikganyogo tša bona ba re: ‘Go ba gona mo ga gagwe mo go holofeditšwego go kae? Ruri, ga e sa le go tloga letšatšing leo borakgolokhukhu ba rena ba robetšego ka lona lehung, dilo tšohle di sa le ka tsela yeo di bego di le ka yona mathomong a tlholo.’” (2 Pet. 3:3, 4) Re ka re ke ka baka la’ng batho ba bangwe ba itshwara ka tsela ye? Go bonagala eka ge batho ba thoma go tlwaelana le boemo bjo itšego, ga ba sa bo šetša. Go phuhlama ganyenyane-ganyenyane ga boitshwaro bja batho go ka fo se tšhoše kudu go swana le ge motho yo o mo tlwaetšego a fetoša mekgwa ya gagwe kapejana. Lega go le bjalo, go phuhlama ganyenyane-ganyenyane mo ga boitshwaro go kotsi kudu.

12, 13. (a) Ke ka baka la’ng re se ra swanela go nolwa moko ke maemo a lefase? (b) Ke go lemoga eng moo go tlago go re thuša go lebeletšana le maemo ao go lego ‘thata go lebeletšana le ona’?

12 Moapostola Paulo o re lemošitše gore “mehleng ya bofelo,” go tla ba le maemo ao go tla bago “thata go lebeletšana le [ona].” (2 Tim. 3:1) Eupša ga se gore ga go kgonege go lebeletšana le ona, ka gona re swanetše go lebeletšana le ditlhohlo tša bophelo. Ka thušo ya Jehofa, moya wa gagwe le phuthego ya Bokriste, re ka fenya ka katlego manyami le ge e le afe goba dilo tšeo re di boifago tšeo re ka lebeletšanago le tšona. Re ka dula re botega. “Matla a fetago a tlwaelegilego” ke a Modimo, ga se a rena.—2 Bakor. 4:7-10.

13 Ke mo gobotse go lemoga gore Paulo o thomile boporofeta bja mabapi le mehla ya bofelo ka polelwana e rego, “tseba gore.” Mantšu ao a kgonthišetša gore seo se latelago ditemaneng tšeo ruri se tla direga. Ga go pelaelo gore batho bao ba sa boifego Modimo ba tla fetelela go fihlela Jehofa a tsena ditaba gare ka go ba fediša. Boradihistori ba begile gore batho ba itšego goba setšhaba se ile sa phuhlama kudu boitshwarong moo se ilego sa feleletša se hlakahlakane. Lega go le bjalo, le ka mohla boitshwaro bja batho ka kakaretšo lefaseng ka moka ga se bja ka bja phuhlama ka tsela yeo bo phuhlamego ka yona lehono. Batho ba bantši ba ka hlokomologa seo se bolelwago ke se, eupša ditiragalo tše tša moswananoši tšeo di thomilego ka 1914 di swanetše go bontšha gabotse gore re ka bota gore kgauswinyane Mmušo wa Modimo o tla gata mogato wa makgaolakgang.

MOLOKO WO O KA SE FETE

14-16. Lebaka la boraro la go dumela gore Mmušo wa Modimo o kgauswi le go ‘tla’ ke lefe?

14 Go na le lebaka la boraro leo le dirago gore re be le kgodišego ya gore bofelo bo kgauswi. Seo se diragetšego gare ga batho ba Modimo se hlatsela seo. Ka mohlala, pele ga ge Mmušo wa Modimo o ka thewa legodimong, sehlopha sa batlotšwa ba botegago  se be se hlankela Modimo ka mafolofolo. Ba ile ba dira’ng ge tše dingwe tša dilo tšeo ba bego ba letetše gore di tla direga ka 1914 di be di sa phethagale? Ba bantši ba bona ba ile ba dula ba botega ka tlase ga diteko le tlaišo gomme ba tšwela pele ba hlankela Jehofa. Go theoša le nywaga, ba bantši ba batlotšwa bao—ge e ba e se bona ka moka—ba feditše bophelo bja bona bja mo lefaseng ka potego.

15 Boporofeteng bja gagwe bja mabapi le bofelo bja tshepedišo ye ya dilo, Jesu o itše: “Moloko wo o ka se fete le ka mohla go fihla ge dilo tše ka moka di direga.” (Bala Mateo 24:33-35.) Re kwešiša gore ge Jesu a be a bolela ka “moloko wo” o be a bolela ka dihlopha tše pedi tša Bakriste bao ba tloditšwego. Sehlopha sa pele se be se le gona ka 1914 gomme se ile sa lemoga pontšho ya go ba gona ga Kriste ngwageng woo. Bao ba bopago sehlopha se ga se feela gore ba be ba phela ka 1914, eupša ba be ba bile ba tloditšwe ka moya e le barwa ba Modimo ngwageng woo goba pele ga moo.—Baroma 8:14-17.

16 Sehlopha sa bobedi seo se akaretšwago ‘molokong wo’ ke batlotšwa bao ba phetšego mehleng ya batlotšwa ba sehlopha sa pele. Ga se feela gore ba phetše mehleng ya bona, eupša ba tloditšwe ka moya o mokgethwa ge ba sehlopha sa pele ba be ba sa le mo lefaseng. Ka gona, ga se gore motlotšwa yo mongwe le yo mongwe yo a phelago lehono o akaretšwa ‘molokong wo’ woo Jesu a boletšego ka wona. Lehono, batlotšwa bao ba bopago sehlopha sa bobedi sa “moloko wo” ba tšofetše. Lega go le bjalo, mantšu a Jesu ao a lego go Mateo 24:34 a re nea kgodišego ya gore ba bangwe ba ‘moloko wo ba ka se fete’ pele ba bona go thoma ga masetlapelo a magolo. Se se swanetše go oketša kgodišego ya rena ya gore go šetše nako e nyenyane pele Kgoši ya Mmušo wa Modimo e gata mogato wa go fediša batho ba kgopo gomme e tliše lefase le lefsa la go loka.—2 Pet. 3:13.

KGAUSWINYANE KRISTE O TLA FELELETŠA PHENYO YA GAGWE

17. Re ka phetha ka go re’ng mabapi le diporofeto tše tharo tšeo re di ahlaahlilego?

17 Re ka phetha ka go re’ng mabapi le diporofeto tše tharo tšeo re di ahlaahlilego? Jesu o lemošitše gore re ka se tsebe letšatši goba iri ya gore bofelo bo tla neng. (Mat. 24:36; 25:13) Eupša bjalo ka ge Paulo a boletše, re tseba “nako” goba mehla. (Bala Baroma 13:11.) Re phela nakong yeo, mehleng ya bofelo. Ge e ba re ela hloko ka botlalo boporofeta bja Beibele le seo Jehofa Modimo le Jesu Kriste ba se dirago, re ka se palelwe ke go bona bohlatse bjo bo kgodišago bja gore ruri re phela kgauswi le go fedišwa ga tshepedišo ye ya dilo.

18. Bao ba ganago go lemoga Mmušo wa Modimo ba tla diragalelwa ke’ng?

18 Bao ba ganago go lemoga matla a taolo ao a neilwego Jesu Kriste, yena Monamedi yo a fentšego wa pere e tšhweu, go se go ye kae ba tla gapeletšega go dumela phošo ya bona. Go tla ba go se tselapedi. Ka nako yeo, ba bantši ba tla be ba goeletša ka poifo ba re: “Ke mang yo a ka kgonago go ema?” (Kut. 6:15-17) Kgaolo ya bošupa ya Kutollo e nea karabo. Ruri letšatšing leo batlotšwa le bao ba nago le kholofelo ya go tlo phela mo lefaseng ba tla ‘kgona go ema’ ba amogetšwe ke Modimo! Ke moka “lešaba le legolo” la dinku tše dingwe le tla phologa masetlapelo a magolo.—Kut. 7:9, 13-15.

19. Ka ge o kgodišegile gore mehla ya bofelo e kgauswi le go fela, o fagahletše eng?

19 Ge re ka ela hloko tsela yeo boporofeta bja Beibele bo phethagalago ka yona gona bjale mo dinakong tše tše di kgahlišago, re ka se šitišwe ke lefase la Sathane; le gona re ka se foufale gore re se bone seo se bolelwago ke ditiragalo tša lefase. Kgauswinyane Kriste o tla feleletša phenyo ya gagwe bathong bao ba sa boifego Modimo ka go lwa ntwa ya makgaolakgang ka toka. (Kut. 19:11, 19-21) Nagana gore re tla thaba gakaakang ge dikholofetšo tša Beibele di phethagetše!—Kut. 20:1-3, 6; 21:3, 4.