Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JANUARY 2014

Seo ke se Kgethilego ge ke be ke sa le Ngwana

Seo ke se Kgethilego ge ke be ke sa le Ngwana

Ge ke be ke sa le mošemanyana

Ke be ke na le nywaga e lesome feela ka 1985 ge bana ba go tšwa Cambodia ba goroga sekolong seo ke bego ke tsena go sona kua Columbus, Ohio, U.S.A. Mošemanyana yo mongwe gare ga bona o be a tseba mantšu a sego kae a Seisemane. A diriša diswantšho, o ile a thoma go nkanegela dinonwane tše di boifišago tšeo di bego di tletše tlaišo, polao le batho ba go tšhaba. Ke be ke lla bošego ge ke be ke nagana ka bana bao. Ke be ke nyaka go ba botša ka kholofelo ya Paradeise le tsogo, eupša ba be ba sa kwešiše segagešo. Gaešita le ge ke be ke sa le mošemanyana, ke ile ka phetha ka go ithuta se-Cambodia gore ke tle ke kgone go botša barutwanagotee le nna ka Jehofa. Ka nako yeo ke be ke sa lemoge kamoo phetho yeo e bego e tla kgoma bophelo bja ka ka gona.

Go ithuta se-Cambodia go be go le thata. Ke nyakile ke tlogela ka makga a mabedi, eupša Jehofa o ile a nkgothatša a diriša batswadi ba ka. Ge nako e dutše e eya, barutiši le barutwanagotee le nna ba ile ba ntlhohleletša go phegelela mošomo wa maemo. Eupša ke be ke nyaka go ba mmulamadibogo, ka gona sekolong se se phagamego ke ile ka kgetha dithuto tšeo di bego di tla nthuša go hwetša mošomo wa nakwana e le gore ke fihlelele pakane ya ka. Ka morago ga sekolo, ke be ke fela ke šoma le babulamadibogo ba bangwe bodireding. Le gona ke ile ka ithaopela go ruta barutwana ba bangwe Seisemane e lego selo seo se ilego sa nkhola kudu ka morago.

Ge ke be ke na le nywaga e 16, ke ile ka kwa gore go na le sehlopha sa leleme la se-Cambodia kua Long Beach, California, U.S.A. Ke ile ka etela moo gomme ka ithuta go bala se-Cambodia. Gateetee ge ke feditše sekolo, ke ile ka ba mmulamadibogo gomme ka tšwela pele ke nea bohlatse go batho ba Cambodia bao ba bego ba dula kgauswi le gagešo. Ge ke be ke na le nywaga e 18, ke ile ka nagana ka go hudugela Cambodia. E be e sa dutše e le lefelo le kotsi, eupša ke be ke tseba gore batho ba sego kae go ba dimilione tše lesome bao ba dulago nageng yeo ba be ba kwele ditaba tše dibotse tša Mmušo. Ka nako yeo, go be go na le phuthego e tee feela ya bagoeledi ba 13 nageng ka bophara. Ke ile ka etela Cambodia ka lekga la pele ge ke be ke na le nywaga e 19. Ka morago ga nywaga e mebedi, ke ile ka hudugela moo. Ke ile ka hwetša mošomo wa nakwana wa go fetolela le go ruta Seisemane gore ke iphediše bodireding. Ge nako e dutše e eya, ke ile ka nyala mosadi yo a nago le dipakane tša go swana le tša ka. Bobedi bja rena re thabetše go thuša batho ba bantši ba Cambodia gore ba ineele go Modimo.

Jehofa o nneile ‘tše pelo ya ka e di kgopetšego.’ (Ps. 37:4) Go dira batho barutiwa ke mošomo wo o kgotsofatšago kudu go feta mešomo e mengwe ka moka. Nywageng e 16 yeo ke e feditšego ke le Cambodia, phuthego yela e nyenyane ya bahlanka ba Jehofa ba 13 e tšwile diphuthego tše 12 le dihlopha tše nne tšeo di lego lekatana!—Ka ge go anega Jason Blackwell.