Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) DECEMBER 2013

Go Lebeletšana le go Hwelwa ke Molekane

Go Lebeletšana le go Hwelwa ke Molekane

BEIBELE e bolela ka mo go kwagalago gore: Monna o swanetše go “[rata] mosadi wa gagwe bjalo ka ge a ithata.” Mosadi le yena o swanetše “go ba le tlhompho e tseneletšego go monna wa gagwe.” Bobedi bja bona ba swanetše go phetha dikarolo tša bona e le “nama e tee.” (Baef. 5:33; Gen. 2:23, 24) Ge nako e dutše e eya, tswalano ya banyalani e a matlafala gomme lerato la bona le a gola. O ka bapetša se le medu e logaganego ya mehlare e mebedi yeo e bapelanego. Maikwelo a banyalani bao ba thabilego le ona a a logagana.

Eupša go thwe’ng ge e ba monna goba mosadi a ka hwa? Gona tlemo yeo e bego e le gona ya lenyalo e a fela. Gantši mohlolo goba mohlologadi o šala a le manyaming a magolo, a jewa ke bodutu e bile a ka galefa goba a ka ipona molato. Daniella yo a bego a nyetšwe ka nywaga e 58, o be a tseba batho ba bantši bao ba hwetšwego ke balekane. * Eupša ka morago ga gore monna wa gagwe a hwe, o itše: “Mathomong ke be ke sa kwešiše se. O ka se tsoge o kwešišitše bohloko bjo go fihlela o bo kwa.”

BOHLOKO BJO BO BONAGALAGO BO SA FELE

Banyakišiši ba bangwe ba re ga go kgateletšego e kotsi go feta yeo e ka bakwago ke lehu la molekane yo o mo ratago. Ba bantši bao ba hwetšwego ke balekane ba dumelelana le seo. Monna wa Millie o hwile nywaga e mentši e fetilego. Ge a hlalosa bophelo bja gagwe e le mohlologadi, o re: “Ke ikwa ke golofetše.” O be a bolela ka maikwelo a gagwe ao a bakilwego ke go hwelwa ke molekane wa gagwe yo a bego a nyalane le yena ka nywaga e 25.

 Susan o be a nagana gore bahlologadi bao ba llelago balekane ba bona ka nywaga e mentši ba a feteletša. Ke moka monna wa gagwe yo a bego a nyalane le yena ka nywaga e 38 o ile a hwa. Le ge go fetile nywaga e 20, o re: “Ke nagana ka yena letšatši le letšatši.” Gantši megokgo e no tšwa ka gobane a mo gopola kudu.

Beibele e re kgonthišetša gore go hwelwa ke molekane go bohloko kudu e bile ga go lebalege. Ge Sara a hwile, monna wa gagwe e lego Aborahama o ile “a tla a hlokofalela Sara le go mo llela.” (Gen. 23:1, 2) Gaešita le ge Aborahama a be a dumela tsogong, o ile a lla gabohloko ge moratiwa wa gagwe a hwile. (Baheb. 11:17-19) Ka morago ga gore Jakobo a hwelwe ke mosadi yo a rategago e lego Ragele, ga se a ka a mo lebala ka pela. O ile a bolela ka tsela e lerato ka yena go barwa ba gagwe.—Gen. 44:27; 48:7.

Re swanetše go ithuta’ng mehlaleng ye ya Mangwalo? Bahlolo le bahlologadi gantši ba kwa bohloko ka nywaga e mentši ka morago ga go hwelwa. Ga se ra swanela go nagana gore ba a fokola ge ba fela ba lla goba ba nyama, eupša re swanetše go kwešiša gore maikwelo ao a bakwa ke tahlegelo ya bona e kgolo. Go ka nyakega gore re ba kwele bohloko le go ba thekga ka nako e telele.

GO SE BELAELE KA TŠA KA MOSO

Ga go bonolo gore mohlolo goba mohlologadi a boele a phele bjalo ka ge eka ga se a ka a tsena lenyalong. Ka morago ga nywaga e mentši lenyalong, monna gantši o tseba kamoo a ka homotšago mosadi wa gagwe le go mo kgothatša ge a gateletšegile. Ge a se sa le gona, ga go sa na moo a tla hwetšago lerato le khomotšo. Ka mo go swanago, ge nako e dutše e eya mosadi le yena o ithuta kamoo a ka thabišago monna wa gagwe le go mo dira gore a ikwe a ratwa. Ga go na seo se ka bapetšwago le go mo kgoma ka tsela e borutho, go mmotša mantšu a homotšago le go kgahlegela dinyakwa tša gagwe. Ge mosadi yoo a ka hwa, monna a ka ikwa eka o šetše a nnoši lefaseng. Ka baka leo, ba bangwe ba bao ba hwetšwego ke balekane ba lebelela bokamoso ka go se kgodišege le ka poifo. Ke molao ofe wa motheo wa Beibele woo o ka ba thušago go ba le khutšo le go se boife?

Modimo a ka go thuša gore o kgotlelele go hwelwa ke molekane o sa belaele ka tša ka moso

“Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.” (Mat. 6:34) Mantšu ao a Jesu a šupa go dinyakwa tša nama, eupša a thušitše ba bantši go kgotlelela bohloko bja go hwelwa ke moratiwa. Ka morago ga dikgwedi mosadi wa gagwe a hwile, Charles o ngwadile gore: “Ke sa dutše ke gopola Monique kudu, e bile ka dinako tše dingwe ke mo gopola le go feta. Lega go le bjalo, ke lemogile gore ke ga tlhago go ikwa ka tsela yeo le gore ge nako e dutše e eya bohloko bjo ke bo kwago bo tla okobala.”

Ee, Charles o ile a swanelwa ke go kgotlelela go feta ga “nako.” O kgonne bjang? O itše: “Jehofa o nthušitše gore ke se belaele ka tša ka moso.” Charles o be a sa nolwa moko ke manyami. Bohloko bja gagwe ga se bja fo nyamelela ka bošego bjo tee, e bile ga se bja mo fetša matla. Ge e ba le wena o hwetšwe ke molekane, leka go se belaele ka tša ka moso. Ga o tsebe gore letšatši le le latelago le tla go tlišetša mehola goba kgothatšo efe.

 Lehu e be e se karolo ya morero wa Jehofa wa mathomong. Go fapana le moo, ke karolo ya “mediro ya Diabolo.” (1 Joh. 3:8; Baroma 6:23) Sathane o diriša lehu le go boifa go hwa go bea batho ba bantši bokgobeng le go ba dira gore ba se be le kholofelo. (Baheb. 2:14, 15) Sathane o a thaba ge motho a nagana gore a ka se tsoge a hweditše lethabo la kgonthe le kgotsofalo, gaešita le lefaseng le lefsa la Modimo. Ka gona, kgateletšego ya motho yo a hwetšwego ke molekane ke ditlamorago tša sebe sa Adama le makatika a Sathane. (Baroma 5:12) Jehofa o tla tloša ka mo go feletšego tshenyo yeo e bakilwego ke Sathane, a fediša sebetša sa gagwe se kgopo e lego lehu. Bohle bao ba hwetšwego ke balekane, go akaretša le wena, ba tla lokologa go boifeng lehu leo le bakilwego ke Sathane.

Go molaleng gore ka morago ga tsogo ya bahu, tsela yeo batho ba tla bego ba dirišana ka yona e tla fetoga. Nagana ka batswadi, borakgolo le bomakgalo gotee le borakgolokhukhu ba bangwe ba rena bao ba tlago go tsošwa le go phethagala ganyenyane-ganyenyane le bana ba bona gotee le ditlogolo tša bona. Ditlamorago tša botšofadi di tla fedišwa ka mo go feletšego. Na go ka direga gore moloko o mofsa o tle o ithute go lebelela borakgolokhukhu ba bona ka tsela yeo e fapanego kudu le yeo ba ba lebelelago ka yona lehono? Le gona na ga re dumele gore diphetogo tše bjalo e tla ba karolo ya go kaonefatšwa ga malapa?

Re ka ba le dipotšišo tše dintši ka bao ba tlago go tsošwa, bjalo ka tša bao ba hwetšwego ke balekane ba babedi goba go feta moo. Basadutsei ba ile ba  rotoša potšišo ya mabapi le mosadi yo a hwetšwego ke monna wa gagwe wa pele, gwa latela wa bobedi, go fihlela ka wa bošupa. (Luka 20:27-33) Ge ba tsoga go tlo direga’ng? Ga re tsebe, e bile ga go hlokagale gore re ikopiše hlogo goba go tshwenywa ke dilo tšeo re sa di tsebego. Seo re swanetšego go se dira gona bjale ke go bota Modimo. Go na le selo seo re kgodišegilego ka sona—selo le ge e ka ba sefe seo Jehofa a tlago go se dira nakong e tlago se tla re thabiša, e tla ba selo seo re ka se fagahlelago, e sego go se boifa.

KHOLOFELO YA TSOGO—MOTHOPO WA KHOMOTŠO

E nngwe ya dithuto tše di kwagalago kudu ka Lentšung la Modimo ke ya gore bahu ba tla tsošwa. Dipego tša Beibele tša batho bao ba ilego ba tsošwa di re kgonthišetša gore ‘bohle bao ba lego mabitleng ba tla kwa lentšu la Jesu gomme ba tšwa.’ (Joh. 5:28, 29) Batho bao ba tla bego ba phela ka nako yeo ba tla thabišwa ke go kopana le bao ba lokolotšwego lehung. Ka lehlakoreng le lengwe, re ka se kgone le go akanya ka lethabo leo bao ba tsošitšwego ba tlago go ba le lona.

Ge bahu ba dutše ba tsošwa, lefase le tla tlala ka lethabo le legolo leo le sa kago la bonwa. Batho ba dibilione bao ba tsošitšwego ba tla boela ba ba gare ga bao ba phelago. (Mar. 5:39-42; Kut. 20:13) Go naganišiša ka mohlolo wo wa nakong e tlago go swanetše go homotša bohle bao ba hwetšwego ke bao ba ba ratago.

Na go na le yo a tlago go ba le lebaka le le kwagalago la go nyama ge tiragalo yeo e kgahlišago ya go tsošwa ga bahu e direga? Beibele e re aowa. Go ya ka Jesaya 25:8, Jehofa “o tla metša lehu ka mo go sa felego.” Se se akaretša go fediša ka mo go feletšego kgateletšego yeo e bakwago ke lehu, ka ge boporofeta bjo bo tšwela pele ka gore: “Mmuši Morena Jehofa o tla phumola megokgo difahlegong ka moka.” Ge e ba ga bjale o ikwa o nyamile ka baka la ge molekane wa gago a hwile, ruri tsogo e tla go fa lebaka la gore o thabe.

Ga go na motho yo a kwešišago ka botlalo dilo ka moka tšeo Modimo a tlago go di dira lefaseng le lefsa. Jehofa o re: “Go etša ge magodimo a phagametše lefase, le ditsela tša ka di phagametše ditsela tša lena, gomme menagano ya ka e phagametše menagano ya lena.” (Jes. 55:9) Kholofetšo ya Jesu ya gore  go tla ba le tsogo e re fa sebaka sa go bota Jehofa, go etša ge Aborahama a dirile. Selo sa bohlokwa seo Mokriste yo mongwe le yo mongwe a swanetšego go se dira gona bjale ke go dira seo Modimo a se nyakago go rena. Ka go re’alo, re tla ‘tšewa re swanelwa ke go hwetša tshepedišo yeo ya dilo’ gotee le bao ba tlago go tsošwa.—Luka 20:35.

LEBAKA LA GO BA LE KHOLOFELO

Go e na le go boifa, eba le kholofelo. Go ya ka pono ya motho, ga go na kholofelo ka bokamoso. Eupša Jehofa o re holofeditše dilo tše kaone. Re ka se tsebe tlwaa kamoo Jehofa a tlago go kgotsofatša dinyakwa tša rena ka moka, lega go le bjalo ga se ra swanela go belaela gore o tla dira bjalo. Moapostola Paulo o ngwadile gore: “Kholofelo yeo e bonwago ga se kholofelo, gobane ge motho a bona selo, na o a se holofela? Eupša ge e ba re holofela seo re sa se bonego, ka go fagahla re dula re se letile ka kgotlelelo.” (Baroma 8:24, 25) Go bota dikholofetšo tša Modimo go tla go thuša go kgotlelela. Ge o ka kgotlelela, o tla ba gona lefaseng le lefsa moo Jehofa a tlago go “go nea tše pelo ya gago e di kgopelago.” O tla kgotsofatša “kganyogo ya sephedi se sengwe le se sengwe.”—Ps. 37:4; 145:16; Luka 21:19.

Bota kholofetšo ya Jehofa ya gore o tla tliša bokamoso bjo bo thabišago

Ge nako ya lehu la Jesu e batamela, baapostola ba gagwe ba ile ba nyama kudu. Jesu o ile a ba homotša ka mantšu a: “Le se dumelele dipelo tša lena di huduega. Bontšhang tumelo go Modimo le go nna.” O ba boditše gore: “Nka se le tlogele bošuaneng. Ke tla go lena.” (Joh. 14:1-4, 18, 27) Mantšu ao a gagwe a be a tla fa balatedi ba gagwe bao ba tloditšwego go theoša le nywagakgolo lebaka la go ba le kholofelo le go kgotlelela. Gaešita le bao ba fagahletšego go bona baratiwa ba bona ba tsošwa, ga ba na lebaka la go nolega moko. Jehofa le Morwa wa gagwe ba ka se ba tlogele ba nyamile. Ruri o ka kgodišega ka seo!

^ ser. 3 Maina a fetotšwe.

Ithute ka mo go oketšegilego

Ga go na Seo se Kago re “Aroxanya le Leratô la Modimo”

Lahla kgopolo ya maaka ya gore Modimo ga a go rate goba ga o bohlokwa go yena.