Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  November 2013

Go Hlankela Modimo ke Sehlare sa Gagwe!

Go Hlankela Modimo ke Sehlare sa Gagwe!

Ge bana babo rena ba babedi ba babulamadibogo ba be ba amogetšwe ntlong e nngwe kua Kenya, ba ile ba makala ge ba bona motho wa mmele o monyenyane a robetše malaong. O be a na le mmejana o monyenyane le matsogo a makopana. Ge ba dutše ba boledišana le yena ka kholofetšo ya Modimo ya gore “sehlotša se tlo taboga bjalo ka kgama,” monna yo o ile a arabela ka go myemyela.—Jes. 35:6.

Babulamadibogo ba ba ile ba kwa gore Onesmus yo a lego nywageng ya gagwe ya mafelelong a bo-30, o belegwe a na le bolwetši bja marapo bjo bo bitšwago osteogenesis imperfecta goba go palega gabonolo ga marapo. Marapo a gagwe a be a fokola kudu—moo e lego gore le kgateletšo e nyenyane e be e a roba. Ka ge bolwetši bjo bo se na kalafo, Onesmus o be a nagana gore o tla fetša bophelo bja gagwe ka moka a le bohlokong le go phela setulong sa digole.

Onesmus o ile a amogela thuto ya legae ya Beibele. Lega go le bjalo, mmagwe o ile a gana gore a ye dibokeng tša Bokriste, a no fa mabaka ka gore se se ka mmakela dikgobalo le go mo okeletša dihlabi. Ka gona bana babo rena ba be ba mo gatišetša diboka, gomme Onesmus a di theetša a le gae. Ka morago ga gore Onesmus a ithute ka dikgwedi tše hlano, o ile a dira phetho ya gore o nyaka go ba gona dibokeng go sa šetšwe gore a ka gobala.

Na go ba gona dibokeng tša Bokriste go ile gwa okeletša Onesmus dihlabi? Aowa. Onesmus o gopola ka gore: “Dihlabi tšeo ke bego ke phela ka tšona di be di okobala nakong ya diboka.” O be a nagana gore kholofelo ya gagwe yeo a sa tšwago go e hwetša ke yona e bego e mo dira gore a ikwe a le kaone. Mmago Onesmus o ile a bona go fetoga ga semelo sa morwa wa gagwe gomme se se ile sa mo thabiša kudu moo le yena a ilego a dumela go ithuta Beibele. O be a fela a re: “Go hlankela Modimo ke sehlare sa morwa wa ka.”

Go se go ye kae, Onesmus o ile a ba mogoeledi yo a sa kolobetšwago. Ge nako e dutše e eya, o ile a kolobetšwa gomme ga bjale ke mohlanka wa bodiredi. Gaešita le ge Onesmus a sa kgone go diriša maoto a gagwe le letsogo la gagwe le lengwe, o be a kganyoga go dira sohle seo a ka se kgonago tirelong ya Jehofa. O be a nyaka go ba mmulamadibogo wa go thuša eupša a dikadika go tlatša fomo. Ka baka la’ng? Ka gobane o be a tseba gore o tla swanelwa ke go dula a kgopela motho yo mongwe gore a mo kgorometše ka setulo sa gagwe sa digole. Ge a boditše Bakristegotee le yena ka bothata bjo, ba ile ba holofetša go mo thekga. Ba ile ba dira seo, ba mo thuša go tšea bobulamadibogo bja go thuša.

Onesmus o ile a tshwenyega ka bothata bjo swanago ge a be a nyaka go ba mmulamadibogo wa ka mehla. Lega go le bjalo, temana ya letšatši e ile ya mo fa kgothatšo yeo a bego a tloga a e hloka. Temana ya letšatši leo e be e theilwe go Psalme 34:8 yeo e rego: “Latswang le be le boneng gore Jehofa o lokile.” Ka morago ga go naganišiša ka lengwalo leo, Onesmus o ile a phetha ka go ba mmulamadibogo wa ka mehla. Ga bjale o dira boboledi ka matšatši a mane mo bekeng e bile o na le dithuto tše mmalwa tša Beibele tšeo di dirago tšwelopele e botse ya moya. Ka 2010, o ile a ya Sekolong sa Tirelo ya Bobulamadibogo. Ruri Onesmus o ile a thaba ge a hwetša gore mohlahli wa gagwe ke yo mongwe wa bana babo rena ba babedi bao ba ilego ba mo etela ka lekga la pele!

Ga bjale batswadi ba Onesmus ba hlokofetše, eupša bana babo rena le dikgaetšedi ka phuthegong ba mo thuša ka go hlokomela dinyakwa tša gagwe tša letšatši le letšatši. O leboga ditšhegofatšo ka moka tšeo a nago le tšona ga bjale, e bile o fagahletše letšatši leo go tla bego go se “na modudi yo a tla rego: ‘Ke a babja.’”—Jes. 33:24.