Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2013

Ekwa Badiši ba Jehofa

Ekwa Badiši ba Jehofa

“Kwang bao ba etelelago pele gare ga lena gomme le ikokobetše, gobane ba hlokomela meoya ya lena.” —BAHEB. 13:17.

1, 2. Ke ka baka la’ng go le bohlokwa gore Jehofa a itshwantšhe le modiši?

JEHOFA o itshwantšha le modiši. (Hesek. 34:11-14) Se se bohlokwa ka gobane se re thuša go kwešiša kamoo Jehofa a lego ka gona. Modiši yo lerato o ikarabela ka mo go feletšego ka tšhireletšego le go phela gabotse ga mohlape wa dinku tšeo a di hlokometšego. O di iša mafulong a matala le moo go nago le meetse a mantši (Ps. 23:1, 2); o di diša mosegare le bošego (Luka 2:8); o di šireletša go dibata (1 Sam. 17:34, 35); o kuka tšeo di sa tšwago go tswalwa (Jes. 40:11); o tsoma tšeo di lahlegilego gomme a oka tšeo di gobetšego.—Hesek. 34:16.

2 Ka ge batho ba Jehofa ba mehleng ya bogologolo ba be ba dula moo batho ba bantši e bego e le barui le balemi, ba ile ba kwešiša di tloga fase seo se bolelwago ke go itshwantšha ga Jehofa Modimo le modiši yo lerato. Ba be ba tseba gore dinku di swanetše go hlokomelwa gore di gole gabotse. Ka kgopolo ya moya, go bjalo le ka batho. (Mar. 6:34) Ge batho ba sa hlokomelwe moyeng le go etelelwa pele gabotse, ba tla tlaišega. Ba ba kotsing le go aroga boitshwarong—go etša ge “dinku tšeo di se nago modiši” di šwalalana. (1 Dikg. 22:17) Lega go le bjalo, Jehofa ka lerato o nea batho ba gagwe dinyakwa tša bona.

3. Re tlo ahlaahla’ng sehlogong se?

3 Taba ya gore Jehofa o itshwantšha le modiši e na le seo e se bolelago le lehono. Jehofa o sa dutše a hlokomela batho ba gagwe bao ba swanago le dinku. Anke re boneng kamoo a hlahlago dinku tša gagwe ka gona le go di nea dinyakwa tša tšona lehono. Le gona re tlo ahlaahla seo dinku di swanetšego go se dira gore di holwe ke lerato leo Jehofa a di bontšhago lona.

MODIŠI YO BOLETA O KGETHA BADIŠI BA BANGWE GORE BA MO THUŠE

4. Jesu o kgatha tema efe go hlokomeleng dinku tša Jehofa?

4 Jehofa o kgethile Jesu gore e be Hlogo ya phuthego ya Bokriste. (Baef. 1:22, 23) Ka ge Jesu e le “modiši yo  boleta,” o bonagatša lerato la Tatagwe, dika tša gagwe ka moka le go phetha merero ya gagwe. E bile Jesu ‘o gafile moya wa gagwe ka baka la dinku.’ (Joh. 10:11, 15) Ruri sehlabelo sa Kriste sa topollo ke tšhegofatšo go batho! (Mat. 20:28) Le gona ke morero wa Jehofa gore “yo mongwe le yo mongwe yo a dumelago go [Jesu] a se ke a fedišwa, eupša a be le bophelo bjo bo sa felego.”—Joh. 3:16.

5, 6. (a) Jesu o kgethile bomang gore ba hlokomele dinku tša gagwe, gona dinku di swanetše go dira’ng gore di holwe ke tokišetšo ye? (b) Lebaka le legolo la gore re nyake go kwa bagolo ba phuthego e swanetše go ba lefe?

5 Dinku di arabela bjang go Modiši yo Boleta e lego Jesu Kriste? Jesu o itše: “Dinku tša ka di theetša lentšu la ka e bile ke a di tseba gomme di a ntatela.” (Joh. 10:27) Go theetša lentšu la Modiši yo Boleta go bolela go latela tlhahlo ya gagwe dilong tšohle. Se se akaretša go dirišana le badiši ba moya bao a ba kgethilego gore ba mo thuše. Jesu o boletše gore baapostola le barutiwa ba gagwe ba be tla tšwetša pele modiro wo a bego a o thomile. Ba be ba tla “ruta” le go ‘fepa dinku tša Jesu tše dinyenyane.’ (Mat. 28:20; bala Johane 21:15-17.) Ge ditaba tše dibotse di be di dutše di phatlalala lefaseng ka bophara gomme palo ya barutiwa e oketšega, Jesu o ile a rulaganya gore Bakriste bao ba godilego moyeng ba diše diphuthego.—Baef. 4:11, 12.

6 Ge moapostola Paulo a be a ngwalela balebeledi ba phuthego ya Efeso ya lekgolong la pele la nywaga, o boletše gore moya o mokgethwa o ba kgethile go ba balebeledi “gore [ba] diše phuthego ya Modimo.” (Dit. 20:28) Go bjalo le ka balebeledi ba Bakriste lehono, ka gobane le bona ba kgethwa go ya ka ditshwanelego tšeo di lego ka Mangwalong ao a buduletšwego ka moya o mokgethwa. Ka go re’alo, ge re ekwa balebeledi ba Bakriste re bontšha gore re hlompha Badiši ba babedi ba bagolo e lego Jehofa le Jesu. (Luka 10:16) Ga go pelaelo gore le e swanetše go ba lebaka le legolo la gore re nyake go ikokobeletša bagolo. Lega go le bjalo, go sa na le mabaka a mangwe ao a dirago gore e be gabohlale go dira se.

7. Bagolo ba go thuša bjang gore o dule o na le tswalano e botse le Jehofa?

7 Ge bagolo ba hlahla badumedigotee le bona, ba ba nea kgothatšo le keletšo tšeo di theilwego Mangwalong goba melaong ya motheo ya Mangwalo. Morero wa bona ge ba nea tlhahlo e bjalo ga se go laela bana babo bona kamoo ba swanetšego go phela ka gona. (2 Bakor. 1:24) Go e na le moo, ke go nea Bakristegotee le bona tlhahlo ya Mangwalo yeo e tlago go ba thuša go dira diphetho tše dibotse le go dira gore go be le thulaganyo le khutšo ka phuthegong. (1 Bakor. 14:33, 40) Bagolo ba “hlokomela meoya” ka kgopolo ya gore ba rata go thuša setho se sengwe le se sengwe sa phuthego gore se dule se na le tswalano e botse le Jehofa. Ka gona ba tla akgofela go thuša ngwanabo rena goba kgaetšedi ge ba lemoga gore o kgauswi le go gata “kgato e fošagetšego” goba ge a šetše a dirile bjalo. (Bagal. 6:1, 2; Juda 22) Na a ga se mabaka a kwagalago a gore re “[kwe] bao ba etelelago pele”?—Bala Baheberu 13:17.

8. Bagolo ba šireletša bjang mohlape wa Modimo?

8 Moapostola Paulo, yo e bego e le modiši yo a godilego moyeng, o ile a ngwalela bana babo ba Kolose gore: “Kgonthišetšang gore go se be le yo a le thopago ka filosofi le bofora bja lefeela go ya ka tlwaelo ya batho, go ya ka dilo tša motheo tša lefase, e sego go ya ka Kriste.” (Bakol. 2:8) Temošo ye e re nea lebaka le lengwe le le kwagalago la gore re kwe keletšo ya Mangwalo yeo bagolo ba re neago yona. Ba šireletša mohlape ka go fahloša bana babo bona gore ba itiše malebana le bao ba ka lekago go fokodiša tumelo ya bona. Moapostola Petro o lemošitše ka “baporofeta ba maaka” le “barutiši ba maaka” bao ba bego ba tla leka go “goketša bao ba sa  tsepamago” gore ba dire dibe. (2 Pet. 2:1, 14) Bagolo ba mehleng yeno le bona ba swanetše go nea ditemošo tše di swanago ge go nyakega. Ka ge e le banna ba Bakriste bao ba godilego moyeng, ke bo-mahlwa-a-di-bona. Go oketša moo, pele ba ka kgethwa, ba ile ba bontšha gore ba kwešiša Mangwalo gabotse le gore ba swanelega go ruta thuto e phelago. (1 Tim. 3:2; Tito 1:9) Kgolo ya bona ya moya, tekatekano ya bona le bohlale bja bona bjo bo theilwego Beibeleng di ba thuša go hlahla mohlape ka bokgoni.

Go etša ge modiši a šireletša dinku tša gagwe, bagolo ba šireletša dinku tšeo ba gafetšwego go di hlokomela (Bona serapa 8)

MODIŠI YO BOLETA O FEPA DINKU TŠA GAGWE LE GO DI ŠIRELETŠA

9. Lehono Jesu o hlahla bjang phuthego ya Bokriste le go e fepa?

9 Jehofa o nea mokgatlo wohle wa bana babo rena ba lefase ka bophara motlalo wa dijo tša moya a diriša mokgatlo wa gagwe. Tlhahlo e ntši ya Mangwalo e newa ka dikgatišo tša rena. Go oketša moo, ka dinako tše dingwe mokgatlo o nea bagolo tlhahlo ka go lebanya, e ka ba ka mangwalo goba ka keletšo yeo ba e newago ke balebeledi ba basepedi. Ka ditsela tše bjalo, dinku di hwetša tlhahlo e kwagalago.

10. Ke boikarabelo bofe bjoo badiši ba moya ba nago le bjona ka bao ba arogilego mohlapeng?

10 Ge re bolela ka kgopolo ya moya, balebeledi ba na le boikarabelo bja go šireletša ditho tša phuthego, go di fepa le go kgonthišetša gore di phetše gabotse moyeng, kudukudu tše di ikgobaditšego goba tšeo di babjago moyeng. (Bala Jakobo 5:14, 15.) Ba bangwe ba bona ba ka ba ba arogile mohlapeng gomme ba kgaoditše  go hlankela Modimo. Maemong a bjalo, na mogolo yo lerato a ka se dire sohle seo a ka se kgonago go hwetša nku e nngwe le e nngwe yeo e timetšego gomme a e kgothaletša go boela mohlapeng, ke gore, ka phuthegong? Ruri o tla dira bjalo! Jesu o itše: “Tate yo a lego legodimong ga a rate gore gaešita le yo mongwe wa ba banyenyane ba a lobe.”—Mat. 18:12-14.

RE SWANETŠE GO LEBELELA BJANG MAFOKODI A BAGOLO?

11. Ke ka baka la’ng ba bangwe ba ka thatafalelwa ke go kwa tlhahlo ya bagolo?

11 Jehofa le Jesu ke Badiši ba phethagetšego. Eupša badiši bao ba ba kgethilego gore ba hlokomele phuthego ga se ba phethagala. Se se ka dira gore ba bangwe ba thatafalelwe ke go kwa tlhahlo ya bagolo. Batho ba bjalo ba ka fahlela ka gore: ‘Ba fo itshwanela le rena ka gore le bona ga se ba phethagala. Go re’ng re swanetše go kwa keletšo ya bona?’ Ke therešo gore bagolo ga se ba phethagala. Lega go le bjalo, re swanetše go ba le pono e botse ka mafokodi a bona le diphošo tša bona.

12, 13. (a) Re ka re’ng ka mafokodi a ba bangwe ba bao Jehofa a ilego a ba nea maikarabelo? (b) Ke ka baka la’ng mafokodi a banna bao ba nago le maikarabelo a begilwe ka Beibeleng?

12 Mangwalo a bolela phaa ka diphošo tša banna ba mehleng ya bogologolo bao Jehofa a ilego a ba diriša go etelela pele batho ba gagwe. Ka mohlala, Dafida e be e le kgoši e tloditšwego le moetapele wa Isiraele. Lega go le bjalo, o ile a wela molekong gomme a ba le molato wa go hlotlola le wa go bolaya. (2 Sam. 12:7-9) Nagana le ka moapostola Petro. Gaešita le ge a be a neilwe boikarabelo bjo bogolo ka phuthegong ya Bokriste ya lekgolong la pele la nywaga, o ile a dira diphošo tše dikgolo. (Mat. 16:18, 19; Joh. 13:38; 18:27; Bagal. 2:11-14) Ka ntle le Jesu, ga go na motho yo mongwe yo a ilego a phethagala ka morago ga Adama le Efa.

13 Ke ka baka la’ng Jehofa a ile a dira gore bangwadi ba Beibele ba ngwale mafokodi a banna bao a bego a ba kgethile? Le lengwe la mabaka ke gore Modimo o dirile se go re bontšha gore a ka diriša banna ba sa phethagalago go etelela batho ba gagwe pele. Ge e le gabotse, o be a dutše a dira bjalo. Ka gona, ga se ra swanela go diriša mafokodi a bao ba re etelelago pele lehono e le dihlare tša ntšhirela tša gore re ngongorege ka bona goba go se ba kwe. Jehofa o letetše gore re hlomphe bana babo rena ba le go ba kwa.—Bala Ekisodo 16:2, 8.

14, 15. Re ka ithuta’ng tseleng yeo Jehofa a ilego a boledišana le batho ba gagwe mehleng ya bogologolo?

14 Go bohlokwa kudu gore re kwe bao ba re etelelago pele lehono. Nagana kamoo mehleng ya bogologolo Jehofa a bego a boledišana ka gona le batho ba gagwe dinakong tše thata. Ge Baisiraele ba be ba tloga Egipita, Modimo o ile a ba nea ditaelo a diriša Moshe le Arone. E le gore Baisiraele ba pheme kotlo ya lesome, ba ile ba swanelwa ke go kwa taelo ya gore ba je selalelo se se kgethegilego le gore ba tšee a mangwe a madi a nku yeo ba bego ba e bolaile ba a gaše ka mathokong a mabedi a foreime ya lebati le karolong ya ka godimo ya yona ya dintlo tša bona. Ga se ba kwa lentšu le etšwa legodimong le ba botša taelo yeo. Go e na le moo, ba ile ba swanelwa ke go kwa banna ba bagolo ba Isiraele, bao le bona ba bego ba amogetše ditaelo tše go Moshe. (Ek. 12:1-7, 21-23, 29) Maemong ao, Jehofa o ile a diriša Moshe le banna ba bagolo go fetišetša ditaelo tša gagwe bathong ba gagwe. Bagolo ba Bakriste ba dira mošomo o swanago o bohlokwa lehono.

15 Ga go pelaelo gore o ka nagana ka maemo a mangwe a mmalwa a ka Beibeleng a ge Jehofa a be a nea batho ditaelo tšeo di phološago maphelo a diriša batho goba barongwa. Maemong ao ka moka, Modimo o ile a bona go swanetše gore a diriše  baemedi ba gagwe. Baromiwa ba ile ba bolela melaetša ka leina la gagwe gomme ba botša batho ba gagwe seo ba bego ba swanetše go se dira gore ba se welwe ke bošula. Na ga re nagane gore Jehofa a ka dira se se swanago ka Haramagedone? Go ba gona, mogolo le ge e le ofe yo a neilwego boikarabelo bja go emela Jehofa goba mokgatlo wa gagwe lehono o swanetše go itlhokomela gore a se diriše gampe matla ao a a neilwego.

“MOHLAPE O TEE WA MODIŠI O TEE”

16. Ke “lentšu” lefe leo re swanetšego go le theetša?

16 Batho ba Jehofa ba bopa “mohlape o tee” ka tlase ga “modiši o tee,” e lego Jesu Kriste. (Joh. 10:16) Jesu o itše o tla ba le barutiwa ba gagwe “matšatši ka moka go fihla bofelong bja tshepedišo ya dilo.” (Mat. 28:20) Ka ge e le Kgoši ya legodimong, o laola ditiragalo ka moka tšeo di re lebišago letšatšing leo a tlago go ahlola lefase la Sathane. E le gore re dule re momagane e bile re bolokegile ka mohlapeng wa Modimo, re swanetše go theetša ‘lentšu ka morago ga rena,’ leo le re botšago tsela yeo re swanetšego go sepela ka yona. “Lentšu” le le akaretša seo moya o mokgethwa wa Modimo o se bolelago go etša ge se ngwadilwe ka Beibeleng le seo Jehofa le Jesu ba re botšago sona ba diriša badiši bao ba ba kgethilego.—Bala Jesaya 30:21; Kutollo 3:22.

Bagolo ba nyaka go šireletša malapa a motswadi o tee bagwereng ba babe (Bona serapa 17 le 18)

17, 18. (a) Mohlape o kotsing efe, eupša re ka kgodišega ka’ng? (b) Re tlo ahlaahla’ng sehlogong se se latelago?

17 Beibele e re Sathane o sepelasepela “go swana le tau e rorago, a nyaka yo a kago go mo metša.” (1 Pet. 5:8) Go etša sebata se sešoro seo se swerwego ke tlala, o laletše mohlape, o letetše sebaka sa go hlasela bao ba fokolago goba bao ba arogago. Le ke lebaka le lengwe la gore re dule re le kgauswi kudu le mohlape ka moka le go “modiši le molebeledi wa meoya ya [rena].” (1 Pet. 2:25) Ge Kutollo 7:17 e bolela ka baphologi ba masetlapelo a magolo e re: “Kwana [Jesu] . . . e tla ba diša, e tla ba iša didibeng tša meetse a bophelo. Modimo o tla phumola megokgo ka moka mahlong a bona.” A kholofetšo e kgahlišago gakaakang!

18 Ka ge re ahlaahlile karolo e bohlokwa kudu yeo e kgathwago ke bagolo ba Bakriste e le badiši bao ba kgethilwego ke Jehofa le Jesu, re swanetše go ipotšiša gore: Banna ba bao ba kgethilwego ba ka kgonthišetša bjang gore ba swara dinku tša Jesu gabotse? Karabo ya potšišo ye e tla ahlaahlwa sehlogong se se latelago.