Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) NOVEMBER 2013

 GO TŠWA BOBOLOKELONG BJA RENA

“Ke be ke Etša Khudu ka Legaping la Yona”

“Ke be ke Etša Khudu ka Legaping la Yona”

NAKONG ya lesolo la matšatši a senyane la go nea bohlatse ka August/September 1929, bagoeledi ba ka godimo ga 10 000 ba ile ba phatlalala le naga ya United States. Ba ile ba sepedišetša batho dipuku le dipukwana tše e ka bago kotara ya milione. Gare ga baboledi bao ba Mmušo go be go na le babapatši ba dipuku tša bodumedi ba sekete. Ruri palo ya bona e ile ya oketšega! Bulletin * e ile ya re “se ke semaka” ka gore palo ya babulamadibogo e ile ya oketšega ka makga a mararo go tloga ka 1927 go fihla ka 1929.

Mafelelong a 1929, go ile gwa ba le mathata a tša ditšhelete. Ka Labobedi—October 29, 1929—go phuhlama ga ditheko go New York Stock Exchange go ile gwa baka tlalelo yeo e lahletšego tshepedišo ya ikonomi ya lefase ka bophara Tšhaparegong e Kgolo. Dipanka tše dikete di ile tša wa. Dipolasa di ile tša se sa šoma. Difeketori tše dikgolo di ile tša tswalelwa. Ke moka ba dimilione ba ile ba lahlegelwa ke mešomo. Ka 1933, baadimiši ba ditšhelete kua U.S. ba be ba tšea dintlo tše 1 000 ka letšatši tša batho bao ba bego ba sa di lefe.

Baebangedi ba nako e tletšego ba be ba tla lebeletšana bjang le khuduego yeo? Tharollo e nngwe e be e le go ba le ntlo yeo e bego e na le maotwana. Ka ge koloyana ya ntlo goba kharabane di sa lefelelwe rente le motšhelo, babulamadibogo ba bantši ba ile ba kgona go tšwela pele ka tirelo ya bona ba se na ditshenyagalelo tše dintši. * E bile nakong ya dikopano tša selete, koloyana ya ntlo e be e dirišwa e le phapoši ya hotele yeo e sa lefelelwego. Ka 1934, Bulletin e ile ya bolela ka dipolane tša dintlo tša dikoloyana tšeo di nago le ditlabakelo tše bjalo ka tshepedišo ya meetse, setofo, malao a go phuthwa le selo sa go šireletša phefo.

Bagoeledi ba bangwe go dikologa lefase ba ile ba thoma go ikagela dintlo tša dikoloyana. Victor Blackwell o gopola ka gore: “Noa o be a se na phihlelo ya go aga sekepe, gomme le nna ke be ke se na phihlelo goba tsebo ya go aga kharabane.” Eupša o ile a kgona go e aga.

Ntlo ya koloyana e kgauswi le go tshedišwa noka ka seketswana sehleng sa dipula tše matla kua India

Avery le Lovenia Bristow ba be ba na le ntlo ya koloyana. Avery o itše: “Ke be ke etša khudu ka legaping la yona—ke šika le ntlo ya ka.” Banyalani ba ba be ba bula madibogo le Harvey le Anne Conrow, bao maboto a ntlo ya bona ya koloyana a bego a pharilwe ka dipampiri. Dikgapetla tša dipampiri di be di wela fase nako le nako ge ba thotha. Avery o gopola ka gore: “Ga go na motho yo a kilego a bona kharabane ya mohuta wo, e bile ga go na yo a kilego a bona ya go swana le yona!” Eupša Avery o itše ba ga Conrow le barwa ba bona ba babedi e be e le “lapa le le thabilego kudu.” Harvey Conrow o ngwadile gore: “Ga se ra ka ra hloka selo, e bile re be re ikwa re šireletšegile ka mo go feletšego tirelong ya Jehofa le ka tlase ga tlhokomelo ya gagwe e lerato.” Ka morago, ditho tše nne tša lapa la ga Conrow di ile tša ya Sekolong sa Gilead gomme tša abelwa go ba baromiwa nageng ya Peru.

Ba ga Battaino le bona ba be ba bula madibogo e le lapa. Ka morago ga gore Giusto le Vincenza ba hwetše gore kgauswinyana ba tlo ba le ngwana, ba ile ba fetoša lori ya bona ya Model A Ford ya 1929 gore e be ntlo yeo e bego e “bonagala eka ke hotele e botse” ge e bapetšwa le ditente tšeo ba bego ba dula go tšona mathomong. Ba ile ba tšwela pele kabelong ya bona ya mmamoratwa ba  na le ngwanenyana wa bona yo monyenyane, ba bolela ditaba tše dibotse go Mataliana ao a dulago United States.

Batho ba bantši ba ile ba theetša ditaba tše dibotse, eupša badiidi le bao ba sa šomego ba be ba sa kgone go neela ka tšhelete ge ba newa dikgatišo tša Beibele. Go e na le moo, ba be ba neela ka dithoto tša mehutahuta. Babulamadibogo ba bangwe ba babedi ba ile ba bolela mehuta e 64 ya dilo tšeo ba di filwego ke bao ba bego ba thabela. Lelokelelo leo “le be le etša la dithoto tša kgwebo ya magaeng.”

Fred Anderson o ile a gahlana le molemi yo a bego a nyaka dipuku tša rena gomme a re o tla neela ka digalase tša mahlo tšeo e bego e le tša mmagwe. Polaseng e latelago, monna yo mongwe o ile a thabela dikgatišo tša rena eupša a re: “Ga ke na digalase tšeo nka balago ka tšona.” Lega go le bjalo, ka morago ga gore a rwale digalase tša moagišani wa gagwe, o ile a kgona go bala dipuku tša rena gabotse gomme a neela ka lethabo bakeng sa dipuku tšeo le digalase.

Herbert Abbott o be a sepela le ngwakwana wa dikgogo ka koloing ya gagwe. Nako le nako ge a hwetša dikgogo tše tharo goba tše nne go bao a ba neilego dikgatišo, o be a di iša mmarakeng, a di rekiše ke moka a tšhele koloi ya gagwe peterole. Na go be go eba le dinako tšeo ka tšona re bego re hloka le sente ya lešidi? Herbert o ngwadile gore: “Ee. Eupša ga se ra ka ra dumelela seo se re dira gore re kgaotše. Ge feela re be re na le peterole, re be re tšwela pele, re na le tumelo e bile re botile Jehofa.”

Go ithekga ka Jehofa le go se šišinyege go thušitše batho ba gagwe nywageng yeo e thata. Nakong e nngwe ge go be go ena pula ya matlakadibe, Maxwell le Emmy Lewis ba ile ba kgona go tšhaba kharabaneng ya bona pele e ripaganywa ke mohlare ka bogare. Maxwell o ngwadile gore: “Dilo tše e be e se mapheko go rena, re be re di tlwaetše e bile ga se ra ka ra nagana go lahlela toulo. Modiro e be e le o montši, gomme re be re ikemišeditše go o phetha.” Maxwell le Emmy ba ile ba tsošološa ntlo ya bona ya koloyana ba sa boife selo e bile ba thušwa ke bagwera ba bona ba rategago.

Mehleng ye ya rena e hlobaetšago, Dihlatse tša Jehofa tše mafolofolo tše dimilione di na le moya o swanago wa boikgafo. Go ba gona, go etša babulamadibogo bao ba mehleng ya pele, re ikemišeditše go tšwela pele ka modiro wa boboledi go fihla ge Jehofa a re go lekane.

^ ser. 3 Ga bjale e bitšwa Tirelo ya Rena ya Mmušo.

^ ser. 5 Mehleng yeo, babulamadibogo ba bantši ba be ba sa šome. Ba be ba amogela dikgatišo tša Beibele ka theko ya tlase gomme ba diriša meneelo yeo ba e hwetšago ge ba di sepediša go lefa ditshenyagalelo tša bophelo bja bona bjo bonolo.