Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2013

Dira Dilo ka go Dumelelana le Thapelo ya Jesu e Lerato

Dira Dilo ka go Dumelelana le Thapelo ya Jesu e Lerato

“Tate, . . . tagafatša morwa wa gago, gore morwa wa gago a go tagafatše.”—JOH. 17:1.

1, 2. Hlalosa seo Jesu a ilego a se direla baapostola ba gagwe ba botegago ka morago ga gore ba keteke Paseka ka 33 C.E.

E BE e le bošegong bja Nisani 14 ka ngwaga wa 33 C.E. Jesu le barutiwa ba gagwe ba be ba sa tšwa go keteka Paseka, yeo e ba gopotšago kamoo Modimo a phološitšego borakgolokhukhu ba bona bokgobeng kua Egipita. Eupša barutiwa ba gagwe bao ba botegago ba be ba sa tlo bona “phološo e sa felego” e kgolo kudu go feta yeo. Letšatšing le le latelago, Moetapele wa bona yo a se nago sebe o be a tlo bolawa ke manaba a gagwe. Eupša tiro ye ya lehloyo e be e tlo fetoga tšhegofatšo. Madi a Jesu ao a tšholotšwego e be e tla ba motheo wa go phološwa ga batho sebeng le lehung.—Baheb. 9:12-14.

2 Go kgonthišetša gore ga re lebale tokišetšo ye e lerato, Jesu o ile a hloma segopotšo se sefsa sa ngwaga le ngwaga seo se ilego sa tšeela Paseka legato. O dirile se ka go ngwathaganya senkgwa seo se sa omelwago ke moka a se nea baapostola ba gagwe ba botegago ba 11, a re: “Se se bolela mmele wa ka wo o tlago go newa ka baka la lena. Dulang le dira se e le go nkgopola.” O ile a dira se se swanago ka senwelo sa beine e khwibidu, a re go bona: “Senwelo se se bolela kgwerano e mpsha ka baka la madi a ka ao a tlago go tšhollelwa lena.”—Luka 22:19, 20.

3. (a) Ke phetogo efe e kgolo yeo e bilego gona ka morago ga lehu la Jesu? (b) Re swanetše go ipotšiša dipotšišo dife mabapi le thapelo ya Jesu yeo e begilwego go Johane kgaolo 17?

3 Kgwerano ya kgale ya Molao ya magareng ga Modimo le Baisiraele ba tlhago e be e le kgauswi le go fela. E be e tlo tšeelwa legato ke kgwerano e mpsha ya magareng ga Jehofa le balatedi ba Jesu bao ba tloditšwego. Jesu o be a sa nyake gore setšhaba se se sefsa sa moya se swane le sa Baisiraele. Baisiraele ba tlhago ba be ba arogane bodumeding le ditabeng tša setšhaba, e lego seo se ilego sa goboša leina le lekgethwa la Modimo. (Joh. 7:45-49; Dit. 23:6-9) Ka mo go fapanego, Jesu o be a kganyoga  gore balatedi ba gagwe ba dule ba le boteeng e le gore ba ka šoma ka botee go tagafatša leina la Modimo. Ka gona, Jesu o ile a dira’ng? O ile a rapela thapelo e kgahlišago kudu yeo motho le ge e le ofe a ka thabelago go e bala. (Joh. 17:1-26; bona seswantšho sa mathomong a sehlogo.) Re ka lebelela morago gomme ra ipotšiša gore: “Na Modimo o arabile thapelo ye ya Jesu?” Le gona re swanetše go itlhahloba ke moka re ipotšiše gore: “Na ke dira dilo ka go dumelelana le thapelo yeo?”

DILO TŠEO JESU A DI ETIŠITŠEGO PELE

4, 5. (a) Re ithuta’ng matsenong a thapelo ya Jesu? (b) Jehofa o ile a araba Jesu bjang mabapi le selo seo a ilego a ikgopelela sona?

4 Jesu o ile a bolela go fihla bošego, a ruta barutiwa ba gagwe dilo tše bohlokwa tše di tšwago go Modimo. Ke moka a emišetša mahlo legodimong a rapela a re: “Tate, nako e fihlile; tagafatša morwa wa gago, gore morwa wa gago a go tagafatše, e le gore go etša ge o mo neile matla godimo ga batho bohle, a nee bohle bao o mo neilego bona bophelo bjo bo sa felego. . . . Ke go tagafaditše lefaseng ka go phetha modiro wo o nneilego wona gore ke o dire. Bjale wena Tate, ntagafatše ke le kgauswi le wena ka letago leo ke bego ke na le lona ke le kgauswi le wena pele lefase le eba gona.”—Joh. 17:1-5.

5 Ela hloko dilo tšeo Jesu a thomilego ka tšona thapelong ya gagwe. Selo se segolo seo a bego a tshwenyegile ka sona ke go tagafatšwa ga Tatagwe wa legodimong, le gona se se dumelelana le kgopelo ya pele thapelong ya gagwe ya mohlala yeo e rego: “Tate, leina la gago a le kgethagatšwe.” (Luka 11:2) Selo sa bobedi seo Jesu a bego a tshwenyegile ka sona ke dinyakwa tša barutiwa ba gagwe, gore Modimo ‘a ba nee bophelo bjo bo sa felego.’ Ka morago ga moo, Jesu o ile a ikgopelela selo se itšego, a re: “Tate, ntagafatše ke le kgauswi le wena ka letago leo ke bego ke na le lona ke le kgauswi le wena pele lefase le eba gona.” Jehofa o ile a putsa Morwa wa gagwe yo a botegago ka selo seo se fetago se a se kgopetšego, ka go mo nea “leina le lebotse go phala” la borongwa ka moka.—Baheb. 1:4.

‘GO TSEBA MODIMO A NNOŠI WA THEREŠO’

6. Baapostola ba be ba swanetše go dira’ng gore ba tle ba hwetše bophelo bjo bo sa felego, gona re tseba bjang gore ba ile ba atlega?

6 Jesu o ile a rapela le ka seo rena badiradibe re swanetšego go se dira gore re swanelege go hwetša mpho e kgolo ya bophelo bjo bo sa felego. (Bala Johane 17:3.) O itše re swanetše go tšwela pele re hwetša ‘tsebo’ ka Modimo le Kriste. Tsela e nngwe ya go dira se ke ka go diriša mahlo le ditsebe tša rena go ithuta ka mo go oketšegilego ka Jehofa le Morwa wa gagwe. Tsela e nngwe e bohlokwa ya go hwetša tsebo ka Modimo ke ka go latswa lethabo leo le tlišwago ke go diriša seo re ithutago sona ka yena. Baapostola ba ile ba gata megato ye yeo e neago bophelo, ka ge Jesu a ile a iša pele a rapela ka gore: “Dipolelo tšeo o nneilego tšona ke ba neile tšona, le gona ba di amogetše.” (Joh. 17:8) Eupša gore ba hwetše bophelo bjo bo sa felego, ba be ba swanetše go tšwela pele ba naganišiša ka dipolelo tša Modimo le go di diriša maphelong a bona a letšatši le letšatši. Na baapostola bao ba botegago ba ile ba atlega go dira se go fihla mafelelong a maphelo a bona mo lefaseng? Ee, ba ile ba atlega. Re tseba se ka gobane maina a bona a ngwaletšwe sa ruri maswikeng a 12 a motheo wa Jerusalema e Mpsha ya legodimong.—Kut. 21:14.

7. ‘Go tseba’ Modimo go bolela’ng, gona ke ka baka la’ng go le bohlokwa?

7 Go ya ka diithuti tša leleme la Segerika, polelwana ya Segerika yeo e fetoletšwego e le ‘go tseba’ e ka fetolelwa gape e le “go tšwela pele o tseba.” Dipolelwana tše tše pedi di a tlatšana gomme bobedi bja tšona di bohlokwa. Mongwalo wa ka tlase wa Johane 17:3  ka go Reference Bible o nea phetolelo e nngwe yeo e rego, “go go tseba.” Ka go re’alo, ‘go tseba’ go šupa go mogato o tšwelago pele wo o feleletšago ka tokelo ya “go tseba” Modimo. Lega go le bjalo, go tseba Motho yo a phagamego kudu legohleng go akaretša go feta go fo kwešiša dika le morero wa Modimo. Go tseba Jehofa go akaretša go mo rata kudu le go rata badumedigotee le rena. Beibele e hlalosa gore: “Yo a se nago lerato ga a tsebe Modimo.” (1 Joh. 4:8) Ka gona go tseba Modimo go akaretša go mo kwa. (Bala 1 Johane 2:3-5.) Ruri ke tokelo e kgolo go ba gare ga bao ba tsebago Jehofa! Eupša ka go swana le Judase Isikariote, re ka lahlegelwa ke tswalano ye ya bohlokwa. Anke re šomeng ka thata go e kgomarela. Ge e ba re dira bjalo, mafelelong re tla hwetša mpho e kgolo ya bophelo bjo bo sa felego.—Mat. 24:13.

“KA BAKA LA LEINA LA GAGO”

8, 9. Jesu o be a tshwenyegile kudu ka eng nakong ya bodiredi bja gagwe bja lefaseng, gona ke tumelo efe ya bodumedi yeo a ka bago a ile a e ganetša?

8 Ka morago ga go bala thapelo ya Jesu yeo e begilwego go Johane kgaolo 17, ke mang a ka belaelago gore Jesu o be a rata ka mo go tseneletšego baapostola ba gagwe gotee le barutiwa ba gagwe ba nakong e tlago? (Joh. 17:20) Ka nako e swanago, re swanetše go kwešiša gore Jesu o be a se a tshwenyega kudu ka go phologa ga rena. Morero wa gagwe o mogolo go tloga mathomong go fihla mafelelong a bodiredi bja gagwe bja lefaseng e be e le go kgethagatšwa le go tagafatšwa ga leina la Tatagwe. Ka mohlala, ge a be a bolela ka seo a se tletšego lefaseng kua sinagogeng ya Natsaretha, o ile a bala go tšwa lengwalong la go phuthwa la Jesaya gore: “Moya wa Jehofa o go nna, gobane o ntloleditše go tsebiša badiidi ditaba tše dibotse.” Ga go pelaelo gore Jesu o ile a bitša leina la Modimo gabotse ge a be a bala taelo ye.—Luka 4:16-21.

9 Go ya ka tumelo ya Sejuda, baetapele ba bodumedi ba ile ba ganetša batho go diriša leina la Modimo nako e telele pele Jesu a etla lefaseng. Re ka kgodišega gore Jesu o ile a ganetša tumelo e bjalo yeo e sa thewago mangwalong. O boditše baganetši ba gagwe gore: “Ke tlile ka leina la Tate, eupša ga le nkamogele; ge nkabe yo mongwe a be a ka tla ka leina la gagwe, le be le tla mo amogela.” (Joh. 5:43) Ke moka, matšatši a sego  kae pele ga lehu la gagwe, Jesu o ile a bolela selo seo a bego a tshwenyegile ka sona kudu bophelong ka go rapela ka gore: “Tate tagafatša leina la gago.” (Joh. 12:28) Ka gona ga se ra swanela go makatšwa ke gore Jesu o tšama a tsenya go tshwenyega ka leina la Tatagwe thapelong ye ka moka yeo re e ahlaahlago.

10, 11. (a) Go tsebatša ga Jesu leina la Tatagwe go be go akaretša’ng? (b) Barutiwa ba Jesu ba swanetše go šomela go fihlelela pakane efe?

10 Jesu o rapetše ka gore: “Ke utolotše leina la gago bathong bao o nneilego bona go tšwa lefaseng. E be e le ba gago, wa nnea bona gomme ba bolokile lentšu la gago. Le gona nna ga ke sa le lefaseng, eupša bona ba lefaseng gomme nna ke tla go wena. Tate yo Mokgethwa, ba šireletše ka baka la leina la gago leo o nneilego lona, e le gore e be batee go etša ge re le batee.”—Joh. 17:6, 11.

11 Jesu ga se a tsebiša barutiwa ba gagwe leina la Tatagwe ka go fo le bitša. Go e na le moo, o ile a ba thuša le go tseba seo leina la Modimo le se emelago, e lego dika tše di kgahlišago tša Modimo le tsela yeo a dirišanago le rena ka yona. (Ek. 34:5-7) Go feta moo, Jesu o tšwela pele go thuša barutiwa ba gagwe go tsebatša leina la Jehofa lefaseng ka moka a le boemong bja letago legodimong. Pakane ya gagwe ke efe? Ke gore go kgoboketšwe barutiwa ba oketšegilego pele bofelo bja tshepedišo ye e kgopo ya dilo bo fihla. Ke moka, Jehofa o tla itirela leina le legolo kudu ge a gata mogato wa go phološa dihlatse tša gagwe tšeo di botegago.—Hesek. 36:23.

“GORE LEFASE LE DUMELE”

12. Re hloka dilo dife tše tharo gore re atlege modirong wa rena wa go phološa maphelo?

12 Ge Jesu a be a le mo lefaseng, o ile a šoma ka thata go thuša barutiwa ba gagwe go fenya mafokodi a bona. Se e be e le sa bohlokwa gore ba tle ba phethe modiro woo Jesu a bego a o thomile. Jesu o rapetše ka gore: “Go etša ge o nthomile lefaseng, le nna ke ba roma lefaseng.” Jesu o gateletše dilo tše tharo tša bohlokwa tšeo ba bego ba di hloka gore ba tle ba atlege modirong wo wa go phološa maphelo. Sa pele, o rapeletše gore barutiwa ba gagwe e se be karolo ya lefase la Sathane. Sa bobedi, o rapeletše gore ba kgethagatšwe, goba e dule e le ba bakgethwa, ka go diriša therešo ya Lentšu la Modimo maphelong a bona. Sa boraro, Jesu o kgopetše leboelela gore barutiwa ba gagwe ba be boteeng tlemong ya lerato yeo e lego gona magareng ga gagwe le Tatagwe. Se se ra gore re itlhahlobe. Yo mongwe le yo mongwe wa rena o swanetše go ipotšiša gore: ‘Na ke dira dilo ka go dumelelana le dikgopelo tša Jesu tše tharo?’ Ge re ela hloko dilo tše, Jesu o na le kholofelo ya ‘gore lefase le tla dumela gore Modimo o mo romile.’—Bala Johane 17:15-21.

Bakriste ba lekgolong la pele la nywaga ba ile ba dirišana le moya o mokgethwa gore ba boloke botee (Bona serapa 13)

13. Thapelo ya Jesu e ile ya arabja bjang lekgolong la pele la nywaga C.E.?

13 Re ka bona gore Modimo o ile a araba thapelo ya Jesu ka go ithuta puku ya Beibele yeo e latelago Diebangedi tše nne, e lego Ditiro tša Baapostola. Nagana ka karogano yeo e bego e ka ba gona gare ga Bakriste ba lekgolong la pele bao ba bego ba bopša ke Bajuda le Bantle, bahumi le badiidi gotee le makgoba le beng ba makgoba. Lega go le bjalo, bohle ba ile ba ba boteeng moo ba ilego ba swantšhwa le ditho tše di fapafapanego tša mmele gomme Jesu e le hlogo ya bona. (Baef. 4:15, 16) A mohlolo o mogolo gakaakang lefaseng la Sathane leo le aroganego! Theto e swanetše go išwa go Jehofa, yoo a dirilego gore se se kgonege ka moya wa gagwe o mokgethwa o matla.—1 Bakor. 3:5-7.

Batho ba Jehofa ba boteeng lefaseng ka moka (Bona serapa 14)

14. Thapelo ya Jesu e arabilwe bjang mehleng ya rena?

14 Ka manyami, botee bjo bjoo bo makatšago ga se bja ka bja tšwela pele bo le gona ka morago ga gore baapostola ba hwe. Go e na le moo, ka ge go be go boletšwe e sa le pele, bohlanogi bo ile bja šwahlela ka  phuthegong gomme seo sa tšweletša dihlotswana tšeo di aroganego tša Bojakane. (Dit. 20:29, 30) Eupša ka 1919, Jesu o ile a lokolla balatedi ba gagwe ba tloditšwego bothopša bja bodumedi bja maaka gomme a ba kgoboketša gotee ka “setlemo se se phethagetšego sa botee.” (Bakol. 3:14) Modiro wa bona wa boboledi o ile wa kgoma bjang lefase ka moka? Badirišani ba bona ba “dinku tše dingwe” ba ka godimo ga dimilione tše šupago go tšwa “ditšhabeng tšohle, melokong yohle, merafong yohle le malemeng ohle” ba kgobokeleditšwe mohlapeng o tee le batlotšwa ba Modimo. (Joh. 10:16; Kut. 7:9) Yeo e bile karabo e kgahlišago kudu thapelong ya Jesu ya “gore lefase le tsebe gore [Jehofa] o nthomile le gore o ba ratile go etša ge o nthatile”!—Joh. 17:23.

PHETHO E KGOMAGO PELO

15. Ke selo sefe se se kgethegilego seo Jesu a ilego a se kgopelela barutiwa ba gagwe ba tloditšwego?

15 Bošegong bja Nisani 14, Jesu o ile a tagafatša goba go hlompha baapostola ba gagwe ka go dira kgwerano le bona ya gore ba buše le yena Mmušong wa gagwe. (Luka 22:28-30; Joh. 17:22) Bjale Jesu o ile a rapelela bohle bao e bego e tlo ba balatedi ba gagwe ba tloditšwego gore: “Tate, ke nyaka gore le bao o nneilego bona ba be le nna moo ke lego gona, e le gore ba bone letago la ka leo o nneilego lona, gobane o nthatile pele ga go thewa ga lefase.” (Joh. 17:24) Se se dira gore dinku tše dingwe tša Jesu di hlalale, e sego go ba le lehufa, le gona ke bohlatse bjo bongwe bja botee bjo bo lego gona gare ga Bakriste ka moka ba therešo lefaseng lehono.

16, 17. (a) Ge Jesu a be a phetha thapelo ya gagwe, o ile a re o ikemišeditše go dira’ng? (b) Re swanetše go ikemišetša go dira’ng?

16 Ka baka la maaka a baetapele ba bona ba bodumedi, batho ba bantši lefaseng ba kgetha go hlokomologa bohlatse bjo bo lego molaleng bja gore Jehofa o na le batho bao ba lego boteeng bao ba tlogago ba mo tseba. Go bile bjalo le mehleng ya Jesu. Ka gona o ile a phetha thapelo ya gagwe ka mantšu a a kgomago pelo: “Tate yo a lokilego, ruri lefase ga le go tsebe; eupša nna ke a go tseba gomme ba ba tseba gore o nthomile. Le gona, ke ba tsebišitše leina la gago e bile ke tla le tsebatša, e le gore lerato leo o nthatilego ka lona le be go bona gomme nna ke be boteeng le bona.”—Joh. 17:25, 26.

17 Ke mang a ka ganago gore Jesu o ile a dira dilo ka go dumelelana le thapelo ya gagwe? Ka ge e le Hlogo ya phuthego, o tšwela pele go re thuša go tsebatša leina la Tatagwe le morero wa gagwe. Anke re tšweleng pele re ikokobeletša bohlogo bja gagwe ka go kwa taelo ya gagwe ya gore re dire boboledi ka mafolofolo le go dira barutiwa. (Mat. 28:19, 20; Dit. 10:42) Le gona anke re šomeng ka thata go boloka botee bja rena bjo bohlokwa kudu. Ka go dira bjalo, re tla ba re dira dilo ka go dumelelana le thapelo ya Jesu e le gore go tagafatšwe leina la Jehofa gomme ra thaba ka mo go sa felego.