Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  OCTOBER 2013

Ba Ile ba Ikgafa ka go Rata Kua Philippines

Ba Ile ba Ikgafa ka go Rata Kua Philippines

NYWAGA e ka bago e lesome e fetilego, Gregorio le Marilou e lego banyalani bao ba lego nywageng ya bo-30, e be e le babulamadibogo kua Manila gomme ka nako e swanago ba šoma. Go be go le thata, eupša ba ile ba atlega. Ke moka Marilou o ile a hlatlošwa go ba molaodi wa panka yeo a bego a šoma go yona. O re: “Mešomo ya rena yeo e lefago gabotse e ile ya dira gore re phele bophelo bja manobonobo.” Ge e le gabotse, dilo di be di ba sepelela gabotse kudu moo ba ilego ba phetha ka go aga ntlo ya ditoro tša bona lefelong la maemo a godimo kudu leo le lego dikhilomithara tše e ka bago tše 19 ka bohlabela bja Manila. Ba ile ba hira khamphani ya go aga gomme ba rulaganya go lefa kgwedi le kgwedi ka nywaga e lesome.

“KE BE KE IKWA EKA KE UTSWETŠA JEHOFA”

Marilou o re: “Mošomo wa ka o mofsa o be o nyaka nako e ntši le matla moo ke ilego ka se sa fišegela mediro ya Bokriste. Ke be ke ikwa eka ke utswetša Jehofa.” O hlalosa gore: “Ke be ke se sa kgona go nea Jehofa nako yeo ke bego ke e neetše tirelong ya gagwe.” Ka ge Gregorio le Marilou ba be ba sa thabišwe ke maemo ao, ka letšatši le lengwe ba ile ba dula fase gomme ba boledišana ka tsela yeo ba bego ba diriša maphelo a bona. Gregorio o re: “Re be re nyaka go dira diphetogo eupša  re sa tsebe seo re swanetšego go se dira. Re ile ra boledišana mabapi le kamoo re ka dirišago maphelo a rena ka mo go tletšego tirelong ya Jehofa, kudukudu ka ge re se na bana. Re ile ra rapela Jehofa gore a re hlahle.”

Ka nako yeo, ba ile ba kwa dipolelo tše mmalwa mabapi le go hlankela moo go nyakegago bagoeledi ba oketšegilego ba Mmušo. Gregorio o re: “Re ile ra nagana gore dipolelo tše e be e le tsela ya Jehofa ya go araba dithapelo tša rena.” Banyalani ba ba ile ba rapela gore ba be le tumelo e oketšegilego e le gore ba be le sebete sa go dira diphetho tše di nepagetšego. Lepheko la bona le legolo e be e le ntlo yeo ba bego ba e aga. Ba be ba šetše ba e lefeletše ka nywaga e meraro. Ba be ba tla dira’ng? Marilou o re: “Ge re be re ka kgaotša go lefa, re be re tla lahlegelwa ke sohle seo re bego re šetše re se lefile go fihla ka nako yeo—e lego tšhelete e ntši kudu. Eupša re ile ra lebelela seo e le go kgetha magareng ga go etiša thato ya Jehofa pele goba dikganyogo tša rena.” Ba naganne ka mantšu a moapostola Paulo a mabapi le ‘go amogela go loba,’ ba ile ba kgaotša modiro wa go aga ntlo, ba tlogela go šoma, ba rekiša bontši bja dithoto tša bona ke moka ba hudugela motsaneng wo o lego lekatana sehlakahlakeng sa Palawan, dikhilomithara tše e ka bago tše 480 ka borwa bja Manila.—Bafil. 3:8.

BA “ITHUTILE SEPHIRI”

Pele ba ka huduga, Gregorio le Marilou ba ile ba leka go itokišeletša go phela bophelo bjo bonolo, eupša ba be ba sa tsebe kamoo bophelo bja bona bo bego bo tla ba bonolo ka gona go ba go fihlela ge ba fihlile mo ba yago gona. Marilou o re: “Re ile ra šala re ahlame. Go be go se na mohlagase, go se na dilo tšeo di dirago gore bophelo bo be bonolo. Go e na le go diriša pitša ya mohlagase ya go apea reise, re ile ra swanela ke go rema dikgong gomme re apee mollong. Ke be ke hlologela go ya mabenkeleng a magolo, go ja mabenkeleng a go jela le dilo tše dingwe tša metseng ya ditoropong.” Lega go le bjalo, banyalani ba ba ile ba dula ba ikgopotša lebaka la bona la go huduga gomme go se go ye kae ba ile ba tlwaelana le maemo. Marilou o re: “Ga bjale ke thabela go bogela tlhago, go akaretša le dinaledi tše di phadimago bošego. Sa bohlokwa kudu, go a thabiša go bona batho ba thaba ge re ba botša ditaba tše dibotse. Ka go hlankela mo, re ‘ithutile sephiri’ sa go kgotsofala.”—Bafil. 4:12.

“Ga go na selo seo se ka bapetšwago le lethabo la go bona phuthego e gola. Ga bjale re bona gore maphelo a rena a na le morero go feta le ge e le neng pele.”—Gregorio le Marilou

Gregorio o re: “Ge re be re fihla mo, go be go na le dihlatse tše nne feela. Di be di thabile kudu ge ke be ke thoma go nea polelo ya phatlalatša beke e nngwe le e nngwe le ge ke be ke letša katara ya ka ge re opela dikopelo tša Mmušo.” Ka ngwaga feela, banyalani ba ba ile ba bona sehlopha seo se senyenyane se gola e eba phuthego ya bagoeledi ba 24. Gregorio o re: “Lerato leo re le hwetšago ka phuthegong ye le re kgoma kudu.” Lehono, ge ba lebelela morago nywageng e tshelelago ya go hlankela tikologong yeo e lego lekatana ba re: “Ga go na selo seo se ka bapetšwago le lethabo la go bona phuthego e gola. Ga bjale re bona gore maphelo a rena a na le morero go feta le ge e le neng pele.”

 “KE ‘LATSWITŠE KA BONA GORE JEHOFA O LOKILE’!”

Kua Philippines, bana babo rena le dikgaetšedi ba e ka bago ba 3 000 ba hudugetše ditikologong tšeo go nyakegago bagoeledi ba oketšegilego ba Mmušo. Ba e ka bago ba 500 ba bona ke dikgaetšedi tšeo di sa nyalwago. A re lebelele mohlala wa Karen.

Karen

Karen, yoo ga bjale a lego nywageng ya magareng ga bo-20, o goletše toropong ya Baggao, Cagayan. Ge a be a sa le mahlalagading, o be a dula a nagana ka go katološa bodiredi bja gagwe. O re: “Ka ge ke tseba gore nako e šetšego ke e nyenyane le gore batho ba mehuta ka moka ba swanetše go kwa molaetša wa Mmušo, ke ile ka nyaka go hlankela moo go nyakegago bagoeledi ba oketšegilego ba Mmušo.” Gaešita le ge ditho tše dingwe tša lapa la gabo di ile tša mo kgothaletša gore a hwetše thuto e phagamego go e na le go hudugela lefelong leo le lego lekatana go yo bolela ditaba tše dibotse moo, Karen o ile a rapela Jehofa gore a mo hlahle. Le gona o ile a boledišana le bao ba bego ba hlankela ditikologong tšeo di lego lekatana. Ge a be a na le nywaga e 18, o ile a hudugela tikologong yeo e lego lekatana yeo e lego kgole le ga gabo ka dikhilomithara tše e ka bago tše 64.

Phuthego e nyenyane yeo Karen a ilego a ya go yo e thuša e šoma tšhemo yeo e lego tikologong ya dithabeng Lebopong la Pacific. Karen o gopola ka gore: “Gore re fihle phuthegong e mpsha go tloga Baggao, re be re sepela matšatši a mararo, re namela le go fologa dithaba gotee le go tshela dinoka ka makga a ka godimo ga a 30.” O oketša ka gore: “Gore ke fihle go barutwana ba bangwe ba Beibele, ke sepela diiri tše tshelelago, ka robala magaeng a bona, ke moka letšatšing le le latelago ka sepela diiri tše dingwe tše tshelelago go boela gae.” Na seo a se dirago se bohlokwa gakaalo gore a ka ba a dira boiteko bjo bokaakaa? Karen o oketša a thabile ka gore: “Ka dinako tše dingwe maoto a ka a a opa, eupša ke swara dithuto tša Beibele tša go fihla go tše 18. Ke ‘latswitše ka bona gore Jehofa o lokile’!”—Ps. 34:8.

“KE ITHUTILE GO ITHEKGA KA JEHOFA”

Sukhi

Ke’ng seo se tutueleditšego Sukhi, kgaetšedi yo a sa nyalwago wa nywageng ya mathomong a bo-40 yo a dulago United States, gore a hudugele Philippines? Ka 2011 o ile a ba gona kopanong ya tikologo moo go ilego gwa boledišanwa le banyalani ba itšego. Ba ile ba anega kamoo ba ilego ba rekiša bontši bja dithoto tša bona gore ba hudugele Mexico go yo thuša ka modiro wa boboledi moo. Sukhi o re: “Poledišano yeo e ile ya dira gore ke nagane ka dipakane tšeo ke bego ke sa ka ka nagana ka tšona.” Ge Sukhi, yo e lego wa setlogo sa Maindia, a be a ekwa gore go be go nyakega thušo e kgolo go fihlelela batho ba go bolela Sepunjabi bao ba dulago Philippines, o ile a phetha ka gore a yo thuša. Na o ile a lebana le ditlhohlo?

Sukhi o re: “Ke ile ka se tsebe gore ke rekiše dilo dife le gore ke tlogele dife. Le gona ka morago ga go dula ke nnoši ke iketlile ka nywaga e 13, ke ile ka boela gae gomme ka se iketle go etša pele. Go be go se bonolo, eupša e be e le tsela e botse ya go ntokišeletša go phela  bophelo bjo bonolo.” O ile a lebana le ditlhohlo dife ka morago ga gore a hudugele Philippines? “Ditlhohlo tša ka tše kgolokgolo e be e le go tšhaba dikhunkhwane le go hlologela gae. Ke ile ka ithuta go ithekga ka Jehofa go feta le ge e le neng pele!” Na o be a itapišeditše lefeela? Sukhi o boletše a myemyela gore: “Jehofa o re botša gore: ‘Ntekeng le bone ge nka se le tšhollele tšhegofatšo.’ Ga bjale ke bona kamoo mantšu a e lego a therešo ka gona ge mong wa ntlo a mpotšiša gore: ‘O tlo boa neng? Ke na le dipotšišo tše dingwe tše dintši.’ Go a nthabiša e bile go a nkgotsofatša go thuša batho bao ba swerwego ke tlala ya moya!” (Mal. 3:10) Sukhi o oketša ka gore: “Ge e le gabotse, bothata bjo bogolo e bile go dira phetho ya go huduga. Ka morago ga go huduga, ke ile ka makatšwa ke go bona kamoo Jehofa a ilego a ntlhokomela ka gona.”

“KE FENTŠE POIFO YA KA”

Sime, e lego ngwanabo rena yo a nyetšego yoo ga bjale a lego nywageng ya mafelelong a bo-30, o ile a tloga Philippines go yo šoma mošomo wa maemo a godimo nageng ya Bohlabela bja Magareng. Ge a le moo, kgothatšo yeo a ilego a e hwetša go molebeledi wa mosepedi le polelo yeo e ilego ya newa ke setho sa Sehlopha se Bušago e ile ya mo tutueletša go etiša Jehofa pele bophelong bja gagwe. Sime o re: “Ke be ke ikwa ke longwa ke mala ge ke nagana ka go tlogela mošomo wa ka.” Lega go le bjalo, o ile a tlogela mošomo gomme a boela Philippines. Lehono, Sime le mosadi wa gagwe e lego Haidee, ba hlankela karolong ya ka borwa ya Davao del Sur, moo go nyakegago bagoeledi ba oketšegilego ba Mmušo gore ba kgone go akaretša tšhemo ya moo e kgolo. Sime o re: “Ge ke lebelela morago, ke thabela gore ke ile ka fenya poifo ya ka ya go lahlegelwa ke mošomo gomme ka etiša Jehofa pele. Ga go na selo seo se kgotsofatšago bophelong go feta go nea Jehofa sohle seo o nago le sona!”

Sime le Haidee

“GO RE KGOTSOFATŠA KUDU!”

Ge Ramilo le Juliet, e lego banyalani ba babulamadibogo bao ba lego nywageng ya mathomong a bo-30, ba be ba ekwa gore phuthego yeo e lego bokgole bja dikhilomithara tše 30 go tloga legaeng la bona e nyaka thušo, ba ile ba ithaopela go e thuša. Ka gona beke e nngwe le e nngwe, go fiša goba go tonya, Ramilo le Juliet ba sepela maeto a mmalwa ka sethuthuthu sa bona go ya dibokeng le go ya modirong wa boboledi. Gaešita le ge go sepela ditseleng tša mekotikoti le maporogo a go senyega go na le ditlhohlo tša gona, ba thabela gore ba ile ba katološa bodiredi bja bona. Ramilo o re: “Nna le mosadi wa ka re swara dithuto tša Beibele tše 11! Go hlankela moo go nyakegago thušo e kgolo go akaretša go dira boikgafo, eupša go re kgotsofatša kudu!”—1 Bakor. 15:58.

Juliet le Ramilo

Na o ka rata go tseba ka mo go oketšegilego mabapi le go hlankela moo go nyakegago bagoeledi ba oketšegilego ba Mmušo nageng ya geno goba nageng e nngwe? Ge e ba go le bjalo, gona boledišana le molebeledi wa tikologo ke moka o bale sehlogo seo se rego: “Na o ka ‘Tshelela Matsedonia’?” ka go Tirelo ya Rena ya Mmušo ya August 2011.

Ithute ka mo go oketšegilego

KE BOMANG BAO BA DIRAGO THATO YA JEHOFA LEHONO?

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?