Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2013

 PHIHLELO

Go Ithekga ka Jehofa e Bile mo go Putsago

Go Ithekga ka Jehofa e Bile mo go Putsago

Ditla-le-meso ga di tsebje, e bile go ka ba thata go lebeletšana le bophelo. Eupša Jehofa o šegofatša bao ba ithekgago ka yena, e sego ka tlhaologanyo ya bona. Se ke seo nna le mosadi wa ka re se lemogilego bophelong bja rena ka moka bjo bo thabišago. E re ke le nyetlele tša bophelo bja rena.

TATE le mma ba kopane ka 1919 kopanong ya Barutwana ba Beibele ba Ditšhabatšhaba kua Cedar Point, Ohio, U.S.A. Ba ile ba nyalana ka morago wona ngwageng woo. Ke belegwe ka 1922 gomme ngwanešo e lego Paul, a belegwa nywaga e mebedi ka morago ga moo. Mosadi wa ka e lego Grace, o belegwe ka 1930. Batswadi ba gagwe e lego Roy le Ruth Howel, ba godišitšwe e le Barutwana ba Beibele gomme rakgolo’agwe le makgolo’agwe le bona e be e le Barutwana ba Beibele e bile e le bagwera ba Charles Taze Russell.

Ke kopane le Grace ka 1947, ke moka ra nyalana ka July 16, 1949. Pele re ka nyalana, re ile ra ntšhetšana sa mafahleng ka bokamoso bja rena. Re ile ra ipotša gore re nyaka go tsenela tirelo ya nako e tletšego le go se be le bana. Ka October 1, 1950, re ile ra tsenela tirelo ya bobulamadibogo. Ke moka ka 1952, ra kgopelwa go ba balebeledi ba tikologo.

MODIRO WA BOSEPEDI LE TLWAETŠO YA GILEAD

Re ile ra nagana gore re sa hloka thušo e kgolo gore re kgone go phetha kabelo ye e mpsha. Ge ke dutše ke ithuta phihlelong ya bana babo rena bao ba nago le phihlelo, ke ile ka kgopelela Grace thušo. Ke ile ka boledišana le Marvin Holien, e lego mogwera wa kgale wa lapa lešo yo a bego a na le phihlelo modirong wa bosepedi. Ke ile ka re go yena: “Grace e sa le yo mofsa e bile ga a na phihlelo. Na go na le motho yo o naganago gore a ka šoma le yena ka nakwana gore a mo tlwaetše?” O ile a re: “Ee. Edna Winkle ke mmulamadibogo yo a nago le phihlelo yo a ka mo thušago kudu.” Ka morago, Grace o ile a re ka Edna: “O ile a ntira gore ke ikwe ke lokologile ge re eya ka ntlo le ntlo, o be a tseba go araba baganetši gomme a nthuta gore ke theetše ge beng ba dintlo ba bolela e le gore ke kgone go ba araba ka tsela ya maleba. O ile a nthuša kudu.”

Go tloga ka go le letshadi: Nathan Knorr, Malcolm Allen, Fred Rusk, Lyle Reusch le Andrew Wagner

Nna le Grace re hlanketše ditikologong tše pedi seleteng sa Iowa, go akaretša le dikarolo tša dileteng tša Minnesota le South Dakota. Ke moka re ile ra romelwa New York Tikologo 1, yeo e bego e akaretša ditoropo tša Brooklyn le Queens. Re ka se tsoge re lebetše kamoo re ilego ra ikwa re sa swanelege ka gona kabelong yeo. Tikologo ye e be e akaretša  Phuthego ya Brooklyn Heights, yeo e bego e kopanela Holong ya Mmušo ya Bethele gomme e na le ditho tša Bethele tše dintši tše di nago le phihlelo. Ka morago ga gore ke nee polelo ya ka ya pele ya tirelo phuthegong yeo, Ngwanabo rena Nathan Knorr o ile a tla go nna gomme a re: “Malcolm, o re neile keletšo e matla ya maleba. O se ke wa lebala, ge e ba o sa re thuše ka go re nea keletšo e botho, ga o na mohola ka mokgatlong wa Jehofa. O e sware bjalo.” Ka morago ga diboka, ke ile ka botša Grace. Ke moka, re ile ra ya phapošing ya ka godimo yeo re bego re gorogetše go yona Bethele. Ra fihla ra se kgitla ka ge re be re tshwenyegile.

“Ge e ba o sa re thuše ka go re nea keletšo e botho, ga o na mohola ka mokgatlong wa Jehofa. O e sware bjalo”

Ka morago ga dikgwedi tše sego kae, re ile ra amogela lengwalo la go re laletša klaseng ya bo-24 Sekolong sa Gilead, yeo e bego e tla aloga ka February 1955. Re be re boditšwe pele re ka ya sekolong gore ga se gore ka morago ga tlwaetšo re tlo ba baromiwa. Go e na le moo, sekolo se be se tla re hlamela go ba balebeledi ba basepedi bao ba atlegago kudu. Go ba gona sekolong seo e bile phihlelo e kgahlišago le yeo e re rutilego boikokobetšo.

Fern le George Couch ba na le nna le Grace sekolong sa Gilead ka 1954

Ka morago ga sekolo, re ile ra abelwa modiro wa go ba balebeledi ba selete. Selete sa rena se be se akaretša sa Indiana, sa Michigan le sa Ohio. Re ile ra šala re maketše ge ka December 1955 re amogela lengwalo leo le tšwago go Ngwanabo rena Knorr le re: “O se ke wa tšhaba go bolela, ke kgopela o mpotše therešo. Ge e ba o nyaka go tlo hlankela Bethele . . . goba ge e ba o ka rata go hlankela nageng e šele ka morago ga gore o hlankele Bethele ka nakwana, o mpotše. Ge e ba o kgetha go ba molebeledi wa selete goba wa tikologo, le gona o mpotše.” Re ile ra araba ka gore re tla thabela go dira selo le ge e le sefe seo re abelwago go se dira. Mo e nyakilego go ba ka yona nako yeo, re ile ra kgopelwa go tla Bethele!

NYWAGA E THABIŠAGO BETHELE

Nywaga ya ka e thabišago tirelong ya Bethele e ile ya akaretša dikabelo tša go ruta United States ka moka. Ke bile le karolo go tlwaetšeng le go thušeng bafsa ba bantši bao ka morago ba ilego ba newa maikarabelo a magolo mokgatlong wa Jehofa. Mafelelong, ke ile ka ba mongwaledi wa Ngwanabo rena Knorr ka ofising yeo e bego e rulaganya modiro wa boboledi wa lefase ka bophara.

Ge ke be ke šoma Lefapheng la Tirelo ka 1956

Ke thabetše kudu nywaga yeo ke e feditšego ke šoma Lefapheng la Tirelo. Moo ke ile ka ba le tokelo ya go šoma le T. J. (Bud) Sullivan. O okametše lefapha leo ka nywaga e mentši. Eupša go na le ba bangwe bao le bona ke ithutilego mo gontši go bona. Yo mongwe wa bona ke Fred Rusk, yo a ilego a abelwa go ntlwaetša. Ke sa gopola gabotse ge ke be ke  mmotšiša gore: “Fred, ke ka baka la’ng o phošolla gakaakaa mangwalo ao ke a ngwadilego?” O ile a sega, eupša ka botho a re: “Malcolm, ge o bolela selo, se ka hlaloswa ka mantšu a mangwe gore se kwagale, eupša seo o se ngwadilego, kudukudu ge se etšwa mo, se swanetše go kwagala le go nepagala ka mo go ka kgonegago.” Ke moka o ile a re ka botho: “O se ke wa nyama—o e swere, e bile ge nako e dutše e eya, o tla tlwaela.”

Go theoša le nywaga Bethele, Grace o ile a newa dikabelo tše di fapafapanego tšeo di akaretšago go hlwekiša diphapoši tša bodulo le go di boloka di le boemong bjo bobotse. O be a tloga a thabela mošomo wa gagwe. Go fihla le lehono, ge re kopana le ba bangwe ba bana babo rena bao ka nako yeo e bego e sa le masogana Bethele, ba botša Grace ba myemyela gore: “Ruri o re rutile go alola malao a rena, e bile bommago rena ba thabela seo.” Le gona Grace o ile a šoma le lefapheng la Dimakasine, la go Ngwala Mangwalo le la go dira dikopi tša Dikhasete. Go šoma dikabelong tše tše di fapafapanego go mo thušitše go bona gore selo le ge e le sefe seo re se dirago ka mokgatlong wa Jehofa go sa šetšwe gore ke kae, ke tokelo le tšhegofatšo. Go fihla le lehono, o sa ikwa bjalo.

DIPHETOGO TŠEO RE DI DIRILEGO

Magareng ga bo-1970, re ile ra lemoga gore batswadi ba rena bao ba tšofalago ba be ba hloka thušo ya rena. Mafelelong, re ile ra swanelwa ke go dira phetho e thata kudu. Re be re sa nyake go tloga Bethele le go šia bahlankagotee le rena ba Jehofa bao re bego re ba rata kudu. Lega go le bjalo, ke ile ka lemoga gore ke boikarabelo bja ka go hlokomela batswadi ba rena. Ka go re’alo, ge nako e dutše e eya re ile ra tloga Bethele, eupša ra ipotša gore ge maemo a ka fetoga re tla boa.

Ke ile ka thoma go rekiša diinšorense gore re kgone go iphediša. Nka se tsoge ke lebetše seo molaodi wa ka a ilego a mpotša sona ge a be a sa ntlwaetša. O ile a re: “Kgwebo ye e emišitšwe ke go leletša batho mantšiboa. Ke nako ya maleba ya go leletša batho. Ga go na selo sa bohlokwa go feta go leletša batho mantšiboa a mangwe le a mangwe.” Ke ile ka mo araba ka gore: “Ke a kgolwa o mahlwa-a-di-bona, e bile ke hlompha seo. Eupša le nna go na le boikarabelo bja moya bjoo le ka mohla ke sa kago ka bo hlokomologa, e bile ga ke nyake go thoma. Ke tla fela ke leletša batho mantšiboa a mangwe, eupša mantšiboa a Labobedi le a Labone, ke swanetše go ya dibokeng tše bohlokwa kudu.” Ruri Jehofa o ile a ntšhegofatša ka ge ke sa ka ka foša diboka ka baka la mošomo.

Re be re le kgauswi le malao a mma ge a be a ehwa legaeng la go hlokomela batšofadi ka July 1987. Yo mogolo wa bahlokomedi o ile a tla go Grace gomme a re: “Mma Allen, eya gae o yo khutša. Bohle ba a tseba gore ka mehla o be o thuša mmatswalago. O se ke wa tshwenyega e bile o se ke wa inyatša.”

 Ka December 1987, re ile ra tlatša fomo ya go kgopela go hlankela Bethele gape, legae la rena la mmamoratwa. Eupša ka morago ga matšatši a sego kae, go ile gwa hwetšwa gore Grace o na le kankere ya lela le legolo. Ge a se na go buiwa le go fola, o ile a botšwa gore ga a sa na kankere. Ka tšona dinako tšeo, re ile ra amogela lengwalo le le tšwago Bethele le re botša gore re tšwele pele re hlankela tšhemong ya phuthego ya moo re dulago. Re be re ikemišeditše go tšwela pele ka modiro wa rena wa Mmušo.

Ge nako e dutše e eya, ke ile ka hwetša mošomo kua Texas. Re ile ra phetha ka gore go tla ba kaone ge re ka hudugela moo ka ge boemo bja leratadima bja moo bo ruthetše, gomme go bile bjalo. Mo Texas, re phetše nywaga e 25 le bana babo rena le dikgaetšedi ba lerato bao re ratanago kudu le bona.

DILO TŠEO RE ITHUTILEGO TŠONA

Grace o bile le mathata a kankere ya lela le legolo le ya mogolo gomme morago bjale o bile le kankere ya matswele. Eupša ga sa nka a lla ka bophelo goba go ngongorega ka bohlogo goba tsela yeo re dirišanago ka yona. Gantši batho ba fela ba mmotšiša gore: “Le thušwa ke’ng gore le atlege le le banyalani le go dula le thabile?” O ba nea mabaka a a mane: “Re bagwera ba paale. Re dula re boledišana letšatši le letšatši. Re rata go fetša nako re le gotee letšatši le letšatši. Le gona ga re ke re robala re sa galefelane.” Ke therešo gore re fela re kgopišana, eupša ga re bolokelane dikgopi—mokgwa wo o thuša kudu.

“Ka mehla ithekge ka Jehofa gomme o amogele seo a se dumelelago”

Ditekong ka moka tšeo re kilego ra lebeletšana le tšona, re ithutile dilo tše di latelago tše mmalwa:

  1.  Ka mehla ithekge ka Jehofa gomme o amogele seo a se dumelelago. Le ka mohla o se ke wa ithekga ka tlhaologanyo ya gago.—Die. 3:5, 6; Jer. 17:7.

  2.  Ithekge ka tlhahlo ya Lentšu la Jehofa selong le ge e le sefe. Go bohlokwa gore o kwe Jehofa le melao ya gagwe. Ga go tselapedi—o swanetše go kgetha go mo kwa goba go se mo kwe.—Baroma 6:16; Baheb. 4:12.

  3.  Go na le selo se sengwe se bohlokwahlokwa—go itirela leina le lebotse le Jehofa. Etiša dikgahlego tša gagwe pele, e sego go phegelela mahumo.—Die. 28:20; Mmo. 7:1; Mat. 6:33, 34.

  4.  Rapela Jehofa gore a go thuše go atlega le go ba mafolofolo ka mo o ka kgonago ka gona tirelong ya gagwe. Dira seo o ka kgonago go se dira, o se ke wa tshwenyega ka seo o ka se kgonego go se dira.—Mat. 22:37; 2 Tim. 4:2.

  5.  Tseba gore ga go na mokgatlo o mongwe woo Jehofa a o šegofatšago le go o amogela.—Joh. 6:68.

Yo mongwe le yo mongwe wa rena o hlanketše Jehofa ka nywaga ya ka godimo ga e 75, gomme ra mo hlankela mo e nyakilego go ba nywaga e 65 re nyalane. Ruri re bile le nako e thabišago kudu tirelong ya Jehofa nywagasomeng yeo ka moka. Re holofela le go rapelela gore bana babo rena ka moka le dikgaetšedi le bona ba ka latswa gomme ba bona kamoo bophelo bo lego bose ka gona ge o ithekga ka Jehofa.