Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2013

“Ebang Makgoba a Jehofa”

“Ebang Makgoba a Jehofa”

“Fišegang, le se ke la tšwafa. . . . Ebang makgoba a Jehofa.”—BAROMA 12:11.

1. Bontšha phapano magareng ga pono ya batho ka bokgoba le bokgoba bjoo bo kgothaletšwago go Baroma 12:11.

BOKGOBA bja Bokriste bo fapana kudu le seo batho ba bantši ba se naganago ka taba ya bokgoba. Bona ba nagana gore go ba lekgoba ke go bušwa ka thata, go gatelelwa le go swarwa ka go hloka toka. Eupša Lentšu la Modimo leo le buduletšwego le bolela ka bokgoba bjo bo akaretšago go hlankela Mong yo lerato ka go ithatela. Ge e le gabotse, ge moapostola Paulo a be a eletša Bakriste ba lekgolong la pele la nywaga gore e be “makgoba a Jehofa,” o be a ba kgothaletša go dira tirelo e kgethwa yeo e tutuetšwago ke go rata Modimo. (Baroma 12:11) Bokgoba bja mohuta wo bo akaretša’ng? Re ka phema bjang go ba makgoba a Sathane le lefase la gagwe? Le gona meputso ya go hlankela Jehofa ka potego re le makgoba a gagwe ke efe?

“KE TLOGA KE RATA MONG WA KA”

2. Ke’ng seo se bego se ka tutueletša lekgoba la Moisiraele gore le se ke la nyaka go lokollwa? (b) Ke’ng seo se bego se bolelwa ke go phula tsebe ya lekgoba leo le bego le nyaka go tšwela pele le hlankela mong wa lona?

2 Molaong woo Modimo a bego a o neile Baisiraele, re ithuta gore Jehofa o nyaka re eba makgoba a mohuta ofe. Lekgoba la Moheberu le be le swanetše go lokollwa bokgobeng ka ngwaga wa bošupa. (Ek. 21:2) Lega go le bjalo, Jehofa o be a dirile tokišetšo e kgahlišago bakeng sa lekgoba leo le bego le tloga le rata mong wa lona e bile le nyaka go tšwela pele le mo hlankela. Mong wa lona o be a swanetše go le bapetša le lebati goba foreime ke moka a le phule tsebe ka nalete. (Ek. 21:5, 6) Taba ya gore mogato wo o be o akaretša tsebe e na le seo e se bolelago. Ka Seheberu, kgopolo ya go kwa e fetišetšwa ka lentšu leo le tswalanago le go theetša. Lekgoba leo le bego le sa nyake go lokollwa le be le kganyoga go tšwela pele le hlankela mong wa lona ka go mo kwa. Se se re thuša gore re kwešiše seo se akaretšwago ke go ineela ga rena go Jehofa, e lego go mo kwa go tšwa pelong re tutuetšwa ke go mo rata.

3. Ke’ng seo se dirago gore re ineele go Modimo?

 3 Ge re be re kolobetšwa gore re be Bakriste, re be re šetše re dirile phetho ya go hlankela Jehofa gore re be makgoba a gagwe. Boineelo bja rena bo tutueditšwe ke go kganyoga go kwa Jehofa le go dira thato ya gagwe. Ga go na motho yo a re gapeleditšego go dira se. Ge e le gabotse, gaešita le bafsa bao ba kolobetšwago ba dira seo ka morago ga gore ba ineele go Jehofa ka bobona, e sego feela go kgahliša batswadi ba bona. Re ineela gore re be Bakriste ka baka la ge re rata Jehofa Mong wa rena wa legodimong. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe.”—1 Joh. 5:3.

RE LOKOLOGILE EUPŠA RE MAKGOBA

4. Go nyakega’ng gore re be “bahlanka ba toko”?

4 Re leboga Jehofa kudu ge a dirile gore re kgone go ba makgoba a gagwe. Go ba le tumelo sehlabelong sa topollo sa Kriste go re lokolla jokong ya sebe. Gaešita le ge re sa dutše re sa phethagala, re ikgethetše go bušwa ke Jehofa le Jesu. Paulo o hlalositše taba ye ka mo go kwagalago go le lengwe la mangwalo a gagwe a buduletšwego ka gore: “Itšeeng le hwile e le ka kgonthe mabapi le sebe, eupša le phela mabapi le Modimo ka Kriste Jesu.” Ke moka a lemoša ka gore: “Na ga le tsebe gore ge e ba le tšwela pele le ikgafela motho le ge e le mang le le bahlanka ba ba kwago, le bahlanka ba yoo le mo kwago? Le ba bahlanka ba sebe se se lebišago lehung goba ba go kwa mo go lebišago tokong. Eupša a go lebogwe Modimo gore le be le le bahlanka ba sebe, eupša le bile ba kwago go tšwa pelong, la kwa mohuta woo wa thuto wo le ilego la gafelwa go wona. Ee, ka ge le lokolotšwe sebeng, le bile bahlanka ba toko.” (Baroma 6:11, 16-18) Ela hloko gore moapostola o bolela ka ‘go kwa go tšwa pelong.’ Ruri go ineela ga rena go Jehofa go re dira makgoba goba “bahlanka ba toko.”

5. Ke ntwa efe yeo ka moka ga rena re lebeletšanego le yona, gona ka baka la’ng?

5 Lega go le bjalo, go na le mapheko ao re swanetšego go a fenya e le gore re phelele boineelo bja rena. Re lwa dintwa tše pedi. Ntwa ya pele ke yeo Paulo a ilego a lebeletšana le yona. O ngwadile gore: “Ruri ke kgahlwa ke molao wa Modimo go ya ka motho yo ke lego yena ka gare, eupša mmeleng wa ka ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe wo o lego dithong tša ka.” (Baroma 7:22, 23) Le rena re katana le go se phethagale ga leabela. Ka baka leo, re dula re lwantšhana le ditshekamelo tša rena tša nama. Moapostola Petro o re kgothaleditše gore: “Ebang bjalo ka batho ba lokologilego, le sa sware tokologo ya lena e le bjalo ka selo sa go bipa go dirwa ga bobe, eupša le le bahlanka ba Modimo.”—1 Pet. 2:16.

6, 7. Sathane o dira bjang gore lefase le le bonagale eka le a kgahliša?

6 Ntwa ya bobedi yeo re lebanego le yona ke ya go lwa le lefase le leo le lego ka tlase ga tutuetšo ya batemona. Mmuši wa lefase le e lego Sathane o lebiša mesebe ya gagwe go rena e le ge a leka go dira gore re se sa botegela Jehofa le Jesu. O nyaka go re dira makgoba ka go re leka gore re ineele tutuetšong ya gagwe e senyago. (Bala Baefeso 6:11, 12.) Tsela e nngwe yeo Sathane a dirago se ka yona ke ka go dira gore lefase la gagwe le bonagale le gogela, eka le a kgahliša. Moapostola Johane o lemošitše ka gore: “Ge e ba motho a rata lefase, lerato la Tate ga le gona go yena; gobane dilo tšohle tše di lego lefaseng—kganyogo ya nama le kganyogo ya mahlo le pontšho ya bomponeng ya dilo tša motho tša boiphedišo—ga di tšwe go Tate, eupša di tšwa lefaseng.”—1 Joh. 2:15, 16.

7 Go rata go huma go aparetše lefase ka moka. Sathane o kgothaletša batho go dumela gore ge ba na le tšhelete ba tla thaba. Mabenkele a magolo ke mantšha-o-tlogele.  Dipapatšo di kgothaletša mokgwa wa bophelo wa go ba le dithoto le go phelela boithabišo. Barulaganyi ba maeto ba rulaganya maeto a go ya mafelong a kgahlišago kudu gomme gantši go sepelwa le batho bao ba nago le pono ya lefase. Ee, gohle moo re yago re kgothaletšwa go kaonefatša maphelo a rena eupša ka go dumelelana le lefase.

8, 9. Go na le kotsi efe ya kgonthe, gona ka baka la’ng?

8 Ge Petro a be a bolela ka bao ba bego ba na le pono ya lefase phuthegong ya Bokriste ya lekgolong la pele la nywaga o lemošitše gore: “Ba thabela go kgotsofatša dikganyogo tša bona tša nama, gaešita le mosegare wa sekgalela. Ke dipatso le dikodi, ke bao ba nweletšego dithutong tša bona tše di forago ge ba dutše ba eja menyanya le lena. Ba bolela dipolelo tša boikgogomošo tše di sa rego selo. Ba diriša dikganyogo tša nama le ditiro tše di lešago dihlong go goketša bao ba sa tšwago go phonyokga bathong bao ba phelago ka mokgwa o fošagetšego. Le ge bona bao ba holofetša tokologo, fela bona ka noši ke bahlanka ba tshenyego. Gobane mang le mang yo a fenywago ke yo mongwe, e ba mohlanka wa yena yoo.”—2 Pet. 2:13, 18, 19.

9 Go kgotsofatša “kganyogo ya mahlo” ga go lokolle motho. Go e na le moo, e ba lekgoba la mong wa lefase le yo a sa bonagalego e lego Sathane Diabolo. (1 Joh. 5:19) Go na le kotsi ya kgonthe ya go ba lekgoba la go rata dilo tše di bonagalago—e lego bokgoba bjoo go lego thata go tšwa go bjona.

MOŠOMO WO O KGOTSOFATŠAGO

10, 11. Ke bomang bao lehono e lego bahlaselwa ba bagolo ba Sathane, gona thuto ya lefase e ka ba bakela bjang mathata?

10 Le lehono Sathane o hlasela batho bao ba se nago phihlelo go etša ge a ile a dira bjalo kua Edene. O hlasela bafsa kudu. Sathane ga a thabe ge a bona mofsa, goba motho le ge e le ofe, a ithaopela go ba lekgoba la Jehofa. Lenaba le la Modimo le nyaka gore batho ka moka bao ba neelago maphelo a bona go Jehofa ba palelwe ke go phelela boineelo bja bona le go botega.

11 Anke re boeleng mohlaleng wa lekgoba leo le bego le dumela gore tsebe ya lona e phulwe. Lekgoba le le swanetše go ba le ile la kwa bohloko ka nakwana; eupša go se go ye kae la fola gomme gwa šala leswao la sa ruri la gore ke lekgoba. Ka mo go swanago, go ka ba thata gaešita le go ba bohloko gore mofsa a kgethe tsela yeo e fapanego le ya dithaka tša gagwe. Sathane o kgothaletša kgopolo ya gore go ba le mošomo lefaseng la gagwe go tla kgotsofatša motho, eupša Bakriste ba swanetše go nagana ka bohlokwa  bja go kgotsofatša go nyaka ga bona dilo tša moya. Jesu o rutile gore: “Go thaba bao ba lemogago gore ba nyaka dilo tša moya.” (Mat. 5:3) Bakriste bao ba ineetšego ba phelela go dira thato ya Modimo, e sego ya Sathane. Ba kgahlwa ke molao wa Jehofa gomme ba naganišiša ka wona mosegare le bošego. (Bala Psalme 1:1-3.) Lega go le bjalo, lehono thuto ya lefase ga e nee mohlanka wa Jehofa nako ya go naganišiša le go kgotsofatša go nyaka ga gagwe dilo tša moya.

12. Bafsa ba bantši ba lebane le kgetho efe lehono?

12 Mongmošomo wa lefase a ka thatafaletša Mokriste yo e lego mohlanka wa Modimo bophelo. Lengwalong la gagwe la pele leo le yago go Bakorinthe, Paulo o botšišitše gore: “Na o biditšwe o le mohlanka?” Ke moka o ile a ba eletša ka gore: “O se ke wa tshwenywa ke seo; eupša ge e ba o ka kgona go lokologa, gona o diriše sebaka seo.” (1 Bakor. 7:21) Motho o be a swanetše go kgetha go lokologa bokgobeng. Dinageng tše dintši lehono, molao o nyaka gore motho a tsene sekolo go fihla ka nywaga e itšego. Ka morago ga moo, barutwana ba ka ikgethela seo ba nyakago go se dira. Go tšwela pele ka thuto e le gore o hwetše mošomo lefaseng le go ka lekanyetša tokologo ya gago ya go tsenela tirelo ya nako e tletšego.—Bala 1 Bakorinthe 7:23.

O tla kgetha go ba lekgoba la mang?

NA O TLA KGETHA THUTO E PHAGAMEGO GOBA E PHAGAMEGO KUDU?

13. Ke thuto efe yeo e tlago go hola bahlanka ba Jehofa kudu?

13 Paulo o lemošitše Bakriste ba Bakolose gore: “Kgonthišetšang gore go se be le yo a le thopago ka filosofi le bofora bja lefeela go ya ka tlwaelo ya batho, go ya ka dilo tša motheo tša lefase, e sego go ya ka Kriste.” (Bakol. 2:8) “Filosofi le bofora bja lefeela go ya ka tlwaelo ya batho” di bonagala tseleng ya go nagana ya lefase yeo e kgothaletšwago ke dirutegi tše dintši. Thuto e phagamego, yeo e akaretšago dithuto tše bjalo, gantši ga e rute barutwana mešomo ya diatla gomme seo se ba tlogela ba sa itokišeletša go lebana le bophelo. Ka mo go fapanego, bahlanka ba Jehofa ba kgetha thuto yeo e ba thušago go ba le bokgoni bjo bo nyakegago gore ba phele bophelo bjo bonolo bja go hlankela Modimo. Ba tšeela godimo keletšo yeo Paulo a e neilego Timotheo ge a be a re: “Ka kgonthe, boineelo go Modimo bo tliša leruo le legolo ge e ba re kgotsofaletše seo re nago le sona. Ka gona ge re na le dijo le diaparo re tla kgotsofala ka tšona.” (1 Tim. 6:6, 8) Go e na le gore ba nyake go ba le di-degree le go tuma, Bakriste ba therešo ba nyaka go hwetša ‘mangwalo a go ba bolelela’ ka go tšea karolo ka botlalo kamoo ba ka  kgonago tirelong ya tšhemo.—Bala 2 Bakorinthe 3:1-3.

14. Go ya ka Bafilipi 3:8, Paulo o ile a lebelela bjang tokelo ya gagwe ya go ba lekgoba la Modimo le la Kriste?

14 Nagana ka mohlala wa moapostola Paulo. O be a rutilwe ke morutiši wa Molao wa Sejuda e lego Gamaliele. Thuto ya Paulo e ka bapetšwa le thuto ya lehono ya yunibesithi. Eupša Paulo o ile a lebelela thuto ya gagwe bjang ge a e bapetša le tokelo ya gagwe ya go ba lekgoba la Modimo le la Kriste? O ngwadile gore: “Ke sa dutše ke tšea dilo tšohle e le go loba ka baka la mohola o phalago tšohle wa tsebo ka Kriste Jesu Morena wa ka.” Ke moka a oketša ka gore: “Ka baka la gagwe ke amogetše go loba dilo tšohle gomme ke di tšea e le maudi e le gore ke rue Kriste.” (Bafil. 3:8) Go lebelela dilo ka tsela yeo go thuša bafsa ba Bakriste le batswadi ba bona bao ba boifago Modimo gore ba dire kgetho e bohlale tabeng ya thuto. (Bona diswantšho.)

HOLWA KE THUTO E PHAGAMEGO KUDU

15, 16. Mokgatlo wa Jehofa o nea thuto efe, gomme morero wa yona o mogolo ke ofe?

15 Go tletše moya ofe mafelong a thuto e phagamego a lefase le? Na ka dinako tše dingwe ga se moo go bušago moya wa dipolitiki le meferefere? (Baef. 2:2) Ka mo go fapanego, mokgatlo wa Jehofa o re ruta thuto e phagamego kudu ka tlase ga maemo a khutšo a phuthego ya Bokriste. Yo mongwe le yo mongwe wa rena o na le sebaka sa go holwa ke Sekolo sa Bodiredi sa Pušo ya Modimo sa beke le beke. Le gona go na le dikolo tše di kgethegilego go swana le sa bana babo rena ba babulamadibogo bao ba sego lenyalong (Sekolo sa Beibele sa Bana Babo Rena ba Sego Lenyalong) le sa banyalani ba babulamadibogo (Sekolo sa Beibele sa Banyalani ba Bakriste). Thuto e bjalo ya pušo ya Modimo e re thuša go kwa Jehofa, Mong wa rena wa legodimong.

16 Re ka epa mahumo a moya ka go Watch Tower Publications Index goba Watchtower Library go CD-ROM. Morero wa thuto ye ke gore re hlankele Jehofa. E re ruta kamoo re ka thušago ba bangwe go boelana le Modimo. (2 Bakor. 5:20) Ka go re’alo, se se tla ba thuša gore le bona ba rute ba bangwe.—2 Tim. 2:2.

MOPUTSO WA LEKGOBA

17. Go kgetha thuto e phagamego kudu go na le meputso efe?

17 Papišong ya Jesu ya ditalente, bahlanka ba babedi bao ba botegago ba ile ba retwa gomme ba thaba le mong wa bona ka go newa mošomo o oketšegilego. (Bala Mateo 25:21, 23.) Go kgetha thuto e phagamego kudu lehono le gona go tliša lethabo le meputso. Ela hloko mohlala wa Michael. O ile a šoma gabotse kudu sekolong moo barutiši ba gagwe ba ilego ba mo laletša sebokeng seo ba bego ba tlo ahlaahla kgonagalo ya gore a ye yunibesithi. Ba ile ba makatšwa ke gore Michael o ile a kgetha go ithutela mošomo o itšego ka nakwana woo go se go ye kae o ilego wa mo thuša go itlhokomela e le mmulamadibogo wa ka mehla. Na o a itshola? O re: “Thuto ya pušo ya Modimo yeo ke e hweditšego ka go ba mmulamadibogo—le gona bjale ke le mogolo ka phuthegong—ke ya bohlokwa kudu. Ditšhegofatšo le ditokelo tšeo ke nago le tšona di feta kgole tšhelete le ge e le efe yeo nkabego ke bile le yona. Ke thabela gore ga se ka phegelela thuto e phagamego.”

18. Ke’ng seo se go tutueletšago go kgetha thuto e phagamego kudu?

18 Thuto e phagamego kudu e re ruta thato ya Modimo le go re thuša go ba makgoba a Jehofa. E re nea kholofelo ya gore re tle re “lokollwe bokgobeng bja tshenyego” ke moka mafelelong re hwetše “tokologo ya letago ya bana ba Modimo.” (Baroma 8:21) Ka godimo ga tšohle, re ithuta tsela e kaonekaone yeo re ka bontšhago ka yona gore re tloga re rata Jehofa Mong wa rena wa legodimong.—Ek. 21:5.