Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) OCTOBER 2013

Na o ka Dira mo go Oketšegilego go Lemoša ba Bangwe?

Na o ka Dira mo go Oketšegilego go Lemoša ba Bangwe?

Mathomong a nywaga ya bo-1900, batho ba ile ba thabela go bogela filimi e gogelago e se nago medumo yeo e bitšwago A Trip Down Market Street, yeo e bego e bontšha bophelo bja letšatši le letšatši bja nakong yeo kua San Francisco, U.S.A. Bahlami ba filimi yeo ba be ba hlomeseditše khamera ka pele ga koloyana ba e lebišitše ditseleng tša leemaema tša motse woo. Filimi yeo e be e bontšha dikarikana tšeo di bego di gogwa ke ditonki, dikoloi tša mehleng yeo, bareki gotee le bašemanyana bao ba bego ba rekiša dikuranta ba tšwela pele ka kgwebo ya bona.

Seo se bego se dira gore filimi ye e kweše bohloko kudu ke gore e ka ba e ile ya gatišwa ka April 1906, pejana ga tšhišinyego ya lefase le mollo tšeo di ilego tša feta ka maphelo a batho ba diketekete le go senya karolo ya motse woo ka April 18. Mohlomongwe ba bangwe ba batho bao ba tšweletšego filiming yeo ba be ba šaletšwe ke matšatši a sego kae a bophelo. Scott Miles e lego setlogolo sa yo mongwe wa bahlami ba difilimi o re: “Ge ke bogetše filimi yeo, ke iponela feela batho bao ba sa tsebego seo se tlago go ba diragalela. Ruri ke be ke fo ba kwela bohloko.”

Tšhišinyego ya lefase ya 1906 le mollo di ile tša senya karolo e kgolo ya motse wa San Francisco go sa letelwa

Lehono go na le seo re ithutago sona go tšwa go seo. Le rena re tloga re kwela baagišani ba rena bohloko. Ba phela maphelo a bona a letšatši le letšatši ntle le go lemoga masetlapelo ao a lego kgauswi le go tla—go fedišwa ga tshepedišo ye ya dilo le tsela ya bona ya bophelo. Lega go le bjalo, go fapana le tšhišinyego ya lefase yeo e bego e sa letelwa, rena re sa na le sebakanyana sa go lemoša baagišani ba rena ka letšatši la Jehofa la kahlolo. Go ka direga gore o beetše nako ka thoko beke e nngwe le e nngwe go tšea karolo bodireding bja ntlo le ntlo, eupša na o ka dira mo go oketšegilego go lemoša ba bangwe?

JESU O BE A SA TŠHAIŠE

Mohlala wa Jesu ke o mobotse ka ge ka mehla a be a diriša sebaka seo se tšwelelago. O be a bolela ditaba tše dibotse go bohle bao a bego a gahlana le bona, e ka ba go molekgetho yoo a ilego a mo feta tseleng goba go mosadi yoo a ilego a gahlana le yena sedibeng mosegare wa sekgalela. (Luka 19:1-5; Joh. 4:5-10, 21-24) Le ge a be a ipeetše nako ya go khutša, Jesu ka go rata o be a tlogela seo a se rerilego e le gore a rute ba bangwe. Go kwela baagišani ba gagwe bohloko go dirile gore a se ke a ithola kgwara ge a nea bohlatse. (Mar. 6:30-34) Maikwelo a go akgofa ga nako a Jesu a ekišwa bjang lehono?

BA DIRIŠA SEBAKA SE SENGWE LE SE SENGWE

Melika o dula moagong o šireleditšwego kudu. Baagišani ba gagwe ba bantši ke barutwana bao ba tšwago dinageng dišele bao dinomoro tša bona tša megalathekeng le maina a bona a sa ngwalwago pukung  ya dinomoro tša megala mo go gorogelago baeng. O diriša sebaka se sengwe le se sengwe go boledišana ka Beibele le bahiri ba moagong woo ge a gahlana le bona bogorogelong bja baeng le ka lifithing. O re: “Ke be ke bona se e le tšhemo ya ka.” Melika o dula a swere dikgatišo ka maleme a mantši, gomme bontši bo amogela dipampišana le dimakasine. E bile o botša baagišani ba gagwe ka Wepesaete ya rena ya jw.org. O thomile dithuto tša Beibele tše mmalwa.

Sonia le yena o dula a phafogetše go nea bohlatse go motho yo mongwe le yo mongwe. O šoma ngakeng, gomme o ipeela pakane ya go nea bohlatse ka botlalo go bašomigotee le yena. Sa pele, o ile a ipha nako ya go ithuta dinyakwa le dilo tšeo di kgahlago yo mongwe le yo mongwe wa bona. Ke moka, o ile a diriša nako ya gagwe ya matena go boledišana le yo mongwe le yo mongwe wa bona ka Beibele. Ka baka leo, Sonia o ile a kgona go thoma dithuto tše pedi tša Beibele. E bile o nyaka go fela a jela matena bogorogelong bja baeng bja moo kliniking gore a bolele le bao ba sa letetšego go bona ngaka.

DIRIŠA DIBAKA TŠEO O DI HWETŠAGO

Yo mongwe wa baphologi ba tšhišinyego ya lefase ye e bilego gona ka 1906 o ile a re tšhišinyego yeo “e bile masetlapelo a šiišago ao a sa kago a wela motse le ge e ka ba ofe.” Lega go le bjalo, go se go ye kae masetlapelo ka moka e tla be e se selo ge a bapetšwa le letšatši la tefetšo leo le tlelago “bao ba sa tsebego Modimo.” (2 Bathes. 1:8) Jehofa o tloga a rata gore batho ba fetoše dipelo le menagano ya bona gomme ba arabele gabotse molaetšeng wa temošo woo o newago ke Dihlatse tša gagwe.—2 Pet. 3:9, mongwalo wa tlase wa Reference Bible; Kut. 14:6, 7.

Na o ka diriša sebaka se sengwe le se sengwe go nea bohlatse go batho bao o gahlanago le bona letšatši le letšatši?

Le wena o na le tokelo ya go lemoša batho ka mehla ya rena e hlobaetšago le go ba thuša gore ba tlogele dikganyogo tša bona tša boithati e le gore ba tsome Jehofa. (Tsef. 2:2, 3) Na o ka diriša sebaka se sengwe le se sengwe go nea bohlatse go bašomigotee le wena, baagišani ba gago le go batho bao o gahlanago le bona letšatši le letšatši? Na o ka dira mo go oketšegilego go lemoša ba bangwe?