Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2013

Le ka Mohla o se ke wa “Galefela Jehofa”

Le ka Mohla o se ke wa “Galefela Jehofa”

“Bošilo bja motho ke bjona bo kgopamišago tsela ya gagwe, gomme ka go re’alo pelo ya gagwe ya galefela Jehofa.”—DIE. 19:3.

1, 2. Ke ka baka la’ng re sa swanela go bea Jehofa molato ka mathata a batho? Bontšha.

A RE re o monna yo a thabetšego lenyalo la gagwe ka nywaga e mentši. Eupša ka letšatši le lengwe ge o boa gae, o hwetša dilo ka moka ka ntlong ya gago di sentšwe. O hwetša phahlo e sentšwe, dibjana di pšhatlilwe le mmete o le maratha. Legae la gago le rategago le hlakahlakane. Na o be o ka omana ka gore: “Ke ka baka la’ng mosadi wa ka a dirile se?” Goba na o be o ka se botšiše gore: “Ke mang a dirilego se?” Go molaleng gore monaganong wa gago go tla tšwelela potšišo ya bobedi. Ka baka la’ng? Ka baka la gore o tseba gabotse gore mosadi wa gago yo a rategago a ka se dire tshenyo e bjalo.

2 Lehono, lefase le šilafetše, le tletše ka bošoro le boitshwaro bjo bo gobogilego. Ka ge re le barutwana ba Beibele, re tseba gabotse gore ga se Jehofa a bakilego mathata ao ka moka. O bopile lefase le gore e be paradeise e kgahlišago. (Gen. 2:8, 15) Jehofa ke Modimo yo lerato. (1 Joh. 4:8) Go ithuta ga rena Mangwalo go re thušitše go lemoga yoo ge e le gabotse a bakilego mathata a mantši a lefase. Re ithutile gore ga go yo mongwe ge e se Sathane Diabolo, yena “mmuši wa lefase.”—Joh. 14:30; 2 Bakor. 4:4.

3. Re ka ba le menagano e fošagetšego ka tsela efe?

3 Lega go le bjalo, re ka se latofatše Sathane ka mathata a rena ka moka. Ka baka la’ng? Ka baka la gore a mangwe a mathata a rena a tlišwa ke diphošo tša rena. (Bala Doiteronomio 32:4-6.) Le ge re ka amogela therešo yeo, go se phethagale ga rena go ka dira gore re be le menagano e fošagetšego gomme ra feleletša re tsene tseleng e išago kotsing. (Die. 14:12) Ka tsela efe? Go e na le gore re bee rena goba Sathane molato, re ka thoma go bea Jehofa molato. E bile re ka “galefela Jehofa.”—Die. 19:3.

4, 5. Mokriste a ka ‘galefela Jehofa’ bjang?

 4 Na ge e le gabotse go a kgonega gore re ‘galefele Jehofa’? Go molaleng gore go dira bjalo ga go na mohola. (Jes. 41:11) Ge e le gabotse go dira bjalo go tla re hola ka’ng? Sereti se sengwe se ile sa re: “Matsogo a gago ke a makopana kudu gore a ka lwa le Modimo.” Ga se gantši re ka bolelago ka go lebanya gore re ngongoregela Jehofa. Eupša Diema 19:3 e re bošilo bja motho “bo [kgopamiša] tsela ya gagwe, gomme ka go re’alo pelo ya gagwe ya galefela Jehofa.” Ee, motho a ka galefela Modimo ka pelong ya gagwe. Mokgwa wo o ka tšwelela ka ditsela tše sa bonagalego. Ka tsela yeo, motho a ka bolokela Jehofa sekgopi. Mafelelong, motho yoo a ka tlogela phuthego goba a se thekge ka botlalo dithulaganyo tša borapedi bja Jehofa.

5 Ke’ng seo se ka dirago gore re ‘galefele Jehofa’? Re ka phema bjang molaba woo? Go bohlokwa gore re tsebe dikarabo tša dipotšišo tše. Ka gobane se se kgoma tswalano ya rena le Jehofa Modimo!

KE ENG SEO SE KA DIRAGO GORE RE ‘GALEFELE JEHOFA’?

6, 7. Ke ka baka la’ng Baisiraele ba mehleng ya Moshe ba ile ba thoma go ngongoregela Jehofa?

6 Ke’ng seo se ka dirago gore pelo ya mohlanka yo a botegago wa Jehofa e thome go ngongoregela Modimo? A re hlahlobeng dintlha tše hlano gaešita le mehlala ya Beibele yeo e bontšhago kamoo ba bangwe nakong e fetilego ba ilego ba wela molabeng wo.—1 Bakor. 10:11, 12.

Go theetša dipolelo tše mpe go ka go aroša (Bona serapa 7)

7 Dipolelo tše mpe tša batho ba bangwe di ka re šušumetša. (Bala Doiteronomio 1:26-28.) Baisiraele ba be ba sa tšwa go phološwa bokgobeng kua Egipita. Jehofa ka mohlolo o be a tlišitše dikotlo tše lesome go setšhaba seo se bego se ba gateletše gomme a fedišitše Farao le madira a gagwe Lewatleng le Lehwibidu. (Ek. 12:29-32, 51; 14:29-31; Ps. 136:15) Go be go šetše feela gore batho ba Modimo ba tsene Nageng ya Kholofetšo. Lega go le bjalo, ka nako yeo e bohlokwahlokwa, Baisiraele ba ile ba thoma go ngongoregela Jehofa. Go hloka tumelo moo go bakilwe ke’ng? Dipelo tša bona di ile tša boifišwa ke pego e mpe ya bao ba bego ba rometšwe go yo hlola naga. (Num. 14:1-4) Se se feleleditše ka eng? Moloko woo ka moka ga se wa ka wa dumelelwa go tsena ‘nageng yeo e botse.’ (Doit. 1:34, 35) Na ka dinako tše dingwe re dumelela dipolelo tše mpe tša ba bangwe di fokodiša tumelo ya rena gomme ra ngongorega ka tsela yeo Jehofa a dirišanago le rena ka yona?

8. Go tlile bjang gore batho ba Modimo mehleng ya Jesaya ba thome go bea Jehofa molato ka boemo bja bona?

8 Mathata a ka re nyamiša. (Bala Jesaya 8:21, 22.) Mehleng ya Jesaya, setšhaba sa Juda se ile sa ba mathateng. Se be se dikologilwe ke manaba. Dijo di be di hlaela. Ba bantši ba be ba bolawa ke tlala. Eupša se segolo le go feta ke gore tswalano ya bona le Modimo e be e fokola. (Amose 8:11) Lega go le bjalo, go e na le go nyaka thušo ya Jehofa mathateng ao, ba ile ba thoma go “rogaka” kgoši ya bona le Modimo wa bona. Ee, ba ile ba bea Jehofa molato ka mathata a bona. Ge e ba re hlagetšwe ke mathata, na le rena re ka bolela dipelong tša rena ra re: ‘Jehofa o be a le kae ge ke mo hloka?’

9. Go tlile bjang gore Baisiraele ba mehleng ya Hesekiele ba be le pono e fošagetšego?

9 Ga re tsebe ditaba ka botlalo. Ka ge Baisiraele ba mehleng ya Hesekiele ba be ba sa tsebe ditaba ka botlalo, ba ile ba bona eka tsela ya Jehofa “ga se ya loka.” (Hesek. 18:29) Go be go le bjalo ka ge eka ba ipeile baahlodi ba Modimo, ka ge ba be ba beile ditekanyetšo tša bona tša toka ka godimo ga tša Jehofa gomme ba mo ahlola go ya ka kwešišo ya bona ya ditiragalo yeo e lekanyeditšwego. Ge e ba ka dinako tše dingwe re sa kwešiše pego e itšego ya Beibele  goba seo se diregago maphelong a rena, na re swanetše go bona eka tsela ya Jehofa ga e bontšhe go naganela, gore “ga se ya loka”?—Jobo 35:2.

10. Motho a ka latela bjang mohlala o mobe wa Adama?

10 Re ipona eka ga re na molato goba ga go phošo yeo re e dirilego. Mathomong a histori ya batho, Adama o ile a bea Modimo molato ka sebe sa gagwe. (Gen. 3:12) Le ge Adama a tshetše molao wa Modimo ka boomo e bile a be a tseba gabotse ditlamorago tša seo, o ile a bea Jehofa molato. Ge e le gabotse o ile a ba a re Jehofa o mo neile mosadi yo mobe. Go tloga ka nako yeo, ba bangwe ba latela mohlala wa Adama ka go bea Modimo molato ka diphošo tša bona. Re swanetše go ipotšiša gore: ‘Na go nyamišwa le go gakantšhwa ke diphošo tša ka go dira gore ke se kgotsofalele ditekanyetšo tša Jehofa?’

11. Re ithuta’ng go Jona?

11 Re ba le boithati. Moporofeta Jona o ile a selekwa ke phetho ya Jehofa ya go gaugela Ninife. (Jona 4:1-3) Ka baka la’ng? Go bonagala a ile a tshwenyega kudu ka go lahlegelwa ke seriti sa gagwe nakong ya ge molaetša wa gagwe wa go fedišwa ga motse o be o sa phethagale. Jona o ile a dumelela botumo bja gagwe bo šira lešoko leo a swanetšego go ba a bile le lona ge Baninife ba sokologa. Na le rena re ka bontšha moya wa boithati moo re ka ‘galefelago Jehofa’ ge a sa tliše bofelo ka pela? Ge e ba re na le nywagasome re bolela gore letšatši la Jehofa le kgauswi, na re swanetše go thoma go felela Jehofa pelo ge ba bangwe ba re sola ka ge re bolela molaetša wa Beibele?—2 Pet. 3:3, 4, 9.

KAMOO RE KA PHEMAGO GO “GALEFELA JEHOFA”

12, 13. Ke’ng seo re sa swanelago go se hlokomologa ge e ba ka dipelong tša rena re thoma go sola mediro ya Jehofa?

12 Re swanetše go dira’ng ge pelo ya rena yeo e sekametšego go dira sebe e belaela mediro ya Jehofa? Gopola gore ke ga bošilo go dira bjalo. Phetolelo e nngwe ya Diema 19:3 e re: “Bošilo bja motho bo mo senyetša tsela, gomme pelo ya gagwe e selekegela Jehofa.”  (PK) Re dutše re gopola seo, ga bjale a re hlahlobeng dintlha tše hlano tšeo di tla re thušago gore re se tsoge re dumeletše mathata a bophelo a dira gore re bee Jehofa molato.

13 O se ke wa hlokomologa tswalano ya gago le Jehofa. Re ka phema tshekamelo ya go galefela Modimo yeo e bakwago ke go se phethagale ga rena ka go dula re le kgauswi le yena. (Bala Diema 3:5, 6.) Re swanetše go bota Jehofa. Le gona re swanetše go phema go ipona eka re bohlale goba go bontšha moya wa boithati. (Die. 3:7; Mmo. 7:16) Ge re dira bjalo, ga se gantši re ka beago Jehofa molato ge dilo tše mpe di direga.

14, 15. Ke’ng seo se ka re thušago gore re se arošwe ke dipolelo tše mpe tša ba bangwe?

14 O se ke wa arošwa ke dipolelo tše mpe. Baisiraele ba mehleng ya Moshe ba be ba na le lebaka le le kwagalago la go dumela gore Jehofa o be a tla ba fihliša Nageng ya Kholofetšo. (Ps. 78:43-53) Eupša ge ba ekwa pego e mpe ya dihlodi tše sa botegego tše lesome, ga se ba ka “ba gopola seatla sa gagwe.” (Ps. 78:42) Ge e ba re ka naganišiša ka mediro ya Jehofa, ra gopola le dilo ka moka tše dibotse tšeo a re diretšego tšona, re tla matlafatša tswalano ya rena le yena. Mafelelong, re ka se dumelele dikgopolo tše fošagetšego tša batho ba bangwe di re aroganya le Jehofa.—Ps. 77:11, 12.

15 Go thwe’ng ge e ba re na le pono e fošagetšego ka barapedigotee le rena? Maemong a bjalo, seo se ka kgoma tswalano ya rena le Jehofa. (1 Joh. 4:20) Ge Baisiraele ba be ba sola go kgethwa ga Arone boemong bja gagwe, Jehofa o ile a lebelela seo e le go ngongoregela Yena. (Num. 17:10) Ka mo go swanago, ge e ba re ka thoma go ngongorega le go belaela ka bao Jehofa a ba dirišago go hlahla karolo ya lefaseng ya mokgatlo wa gagwe, ge e le gabotse re tla ba re ngongoregela Jehofa.—Baheb. 13:7, 17.

16, 17. Re swanetše go gopola eng ge re na le mathata?

16 Gopola gore Jehofa ga se sebaki sa mathata a rena. Le ge Baisiraele ba mehleng ya Jesaya ba be ba furaletše Jehofa, O be a sa dutše a nyaka go ba thuša. (Jes. 1:16-19) Go sa šetšwe bothata bjo re lebeletšanego le bjona, go tseba gore Jehofa o na le taba le rena e bile o nyaka go re thuša go a re kgothatša. (1 Pet. 5:7) Ge e le gabotse, o re holofetša go re nea matla a nyakegago gore re kgotlelele.—1 Bakor. 10:13.

17 Ge e ba re lebeletšana le go hloka toka mo go itšego—go swana le Jobo yo a bego a botega—re swanetše go gopola gore Jehofa ga a re bakela bothata bjoo. Jehofa o hloile go hloka toka; o rata go loka. (Ps. 33:5) Go swana le Elihu mogwera wa Jobo, a re boleleng ka kgodišego gore: “Go dira tše kgopo a go be kgole le Modimo wa therešo, le go dira ka go hloka toka a go be kgole le Ramatlaohle!” (Jobo 34:10) Go e na le gore Jehofa a re bakele mathata, o re fa “mpho e nngwe le e nngwe e botse le neo e nngwe le e nngwe e phethagetšego.”—Jak. 1:13, 17.

18, 19. Ke ka baka la’ng le ka mohla re se ra swanela go belaela Jehofa? Bontšha.

18 O se ke wa belaela Jehofa le ka mohla. Modimo o phethagetše, le gona menagano ya gagwe e phagametše ya rena. (Jes. 55:8, 9) Ka gona, boikokobetšo le boipoetšo di swanetše go re thuša go amogela gore kwešišo ya rena e lekanyeditšwe. (Baroma 9:20) Ga se ka mehla re nago le dintlha ka botlalo ka maemo a itšego. Ga go pelaelo gore o kile wa bona therešo ya seema se: “Yo a bolelago pele tshekong o bonala a nepile go fihlela ge wa gabo a etla gomme a mmotšološiša.”—Die. 18:17.

19 Ge e ba mogwera wa rena yo re mmotago a ka dira seo peleng re sa se kwešišego goba seo re bonago se sa tlwaelega, na re tla kitimela go mo latofatša ka bobe? Goba na re tla bota mogwera wa rena ka mo go  feletšego, kudukudu ge e ba e le kgale re phela le yena? Ge e ba re swara bagwera ba rena ba sa phethagalago ka lerato le bjalo, gona re swanetše go bota gakaakang Tatago rena wa legodimong yoo menagano ya gagwe e phagametšego ya rena!

20, 21. Ke ka baka la’ng go le bohlokwa go sola yo ruri a lego molato?

20 Sola yo a lego molato. Ke ka baka la’ng re swanetše go dira seo? Ke ka gobane ka dinako tše dingwe re ka ba re ipaketše mathata. Ge e ba go le bjalo, re swanetše go amogela seo. (Bagal. 6:7) O se ke wa leka go bea Jehofa molato ka mathata a gago. Ke ka baka la’ng go dira seo go se gwa swanela? Ela hloko mohlala wo: Koloi e ka ba e kgona go kitima ka lebelo le legolo. A re re mootledi o kitima ka lebelo la go šiiša ge a thinya tseleng e kgopamego gomme a wa ka yona. Na mohlami wa koloi yeo a ka bewa molato wa kotsi yeo? Le gatee! Ka mo go swanago, Jehofa o re bopile re na le tokologo ya go ikgethela. Eupša gape o re file le dikeletšo tše di ka re thušago go dira diphetho tše bohlale. Ka gona, go re’ng re ka bea Mmopi wa rena molato ka diphošo tša rena?

21 Ga se gore mathata a rena ka moka a tlišwa ke diphošo goba mediro ya rena e fošagetšego. Dilo tše dingwe di tlišwa ke “nako le ditiragalo tšeo di sa letelwago.” (Mmo. 9:11) Lega go le bjalo, le ka mohla ga se ra swanela go lebala gore Sathane Diabolo ke sebaki se segolo sa bokgopo. (1 Joh. 5:19; Kut. 12:9) Ke yena lenaba la rena—e sego Jehofa!—1 Pet. 5:8.

TŠEELA GODIMO TSWALANO YA GAGO E KGETHEGILEGO LE JEHOFA

Joshua le Kalebe ba ile ba šegofatšwa ka ge ba ile ba bota Jehofa (Bona serapa 22)

22, 23. Re swanetše go gopola eng ge re nyamišwa ke mathata a rena?

22 Ge o lebeletšane le tlaišego le mathata, gopola mohlala wa Joshua le Kalebe. Go fapana le dihlodi tše lesome, banna bao ba botegago ba babedi ba ile ba tliša pego e botse. (Num. 14:6-9) Ba bontšhitše go ba le tumelo go Jehofa. Lega go le bjalo, ba ile ba ralala le Baisiraele ka moka lešokeng ka nywaga e 40. Na Joshua le Kalebe ba ile ba belaela goba ba befelwa, ba ikwa eka seo ke go hloka toka? Aowa. Ba ile ba bota Jehofa. Na ba ile ba šegofatšwa? Ba ile ba šegofatšwa le go feta! Le ge moloko woo ka moka o ile wa hwela lešokeng, bobedi bja bona ba ile ba tsena Nageng ya Kholofetšo. (Num. 14:30) Ka mo go swanago, re tla hwetša tšhegofatšo ya Jehofa ge e ba re sa “lape” go dira thato ya gagwe.—Bagal. 6:9; Baheb. 6:10.

23 Ke’ng seo o swanetšego go se dira ge o nyamišitšwe ke mathata, go se phethagale ga ba bangwe goba go se phethagale ga gago? Ikgopotše dika tše di makatšago tša Jehofa. Bona ka leihlo la kgopolo seo Jehofa a go holofeditšego sona. Ipotšiše gore: ‘Nkabe ke le kae ge nkabe ke sa tsebe Jehofa?’ Dula o le kgauswi le yena gomme o se ke wa dumelela pelo ya gago e mo galefela!