Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  August 2013

Le Hlokomeleng Mohuta wa Batho Bao le Swanetšego go ba Bona

Le Hlokomeleng Mohuta wa Batho Bao le Swanetšego go ba Bona

“Le hlokomeleng mohuta wa batho bao le swanetšego go ba bona ditirong tše kgethwa tša boitshwaro le medirong ya boineelo go Modimo!”—2 PET. 3:11.

1, 2. ‘Re swanetše go ba batho ba mohuta ofe’ gore Modimo a re amogele?

KE MO go tlwaelegilego gore motho a tshwenyege ka seo batho ba bangwe ba se naganago. Lega go le bjalo, rena ka ge re le Bakriste, na ga se ra swanela go tshwenyega kudu ka pono ya Jehofa ka rena? Ge e le gabotse, ke Yena yo mogologolo legohleng e bile ke “mothopo wa bophelo.”—Ps. 36:9.

2 Ge moapostola Petro a gatelela gore re ‘hlokomele mohuta wa batho bao re swanetšego go ba bona’ go ya ka pono ya Jehofa, o re kgothaletša gore re tšee karolo “ditirong tše kgethwa tša boitshwaro le medirong ya boineelo go Modimo.” (Bala 2 Petro 3:11.) E le gore re amogelwe ke Modimo, ‘ditiro tša rena’ e swanetše go ba tše kgethwa, ke gore, e be tše hlwekilego—boitshwarong, monaganong le moyeng. Godimo ga moo, re swanetše go dira ‘mediro ya boineelo go Modimo’ gomme re mmoife le go mo kgomarela. Ka gona, go amogelwa ke Modimo ga go akaretše feela boitshwaro bja rena eupša go akaretša le seo re lego sona ka gare. Ka ge Jehofa e le “mohlahlobi wa dipelo,” o tseba ge e ba boitshwaro bja rena e le bjo bokgethwa e bile re ineetše go yena ka dipelo ka moka goba go se bjalo.—1 Dikor. 29:17.

3. Ke dipotšišo dife tšeo re swanetšego go di ahlaahla mabapi le tswalano ya rena le Modimo?

3 Sathane Diabolo ga a nyake gore re amogelwe ke Modimo. Ge e le gabotse, le dira sohle seo le ka se kgonago go re dira gore re senye tswalano ya rena le Jehofa. Sathane o dula a ikemišeditše go diriša maaka le bofora go re goga gomme a re tloše kgauswi le Modimo yoo re mo rapelago. (Joh. 8:44; 2 Bakor. 11:13-15) Ka gona, ke gabohlale gore re ipotšiše gore: ‘Sathane o fora bjang batho? Nka dira’ng gore ke šireletše tswalano ya ka le Jehofa?’

 SATHANE O FORA BJANG BATHO?

4. Ke eng seo Sathane a se hlaselago ge a leka go senya tswalano ya rena le Modimo, gona ka baka la’ng?

4 Morutiwa Jakobo o ngwala gore: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e gotše e tswala sebe; sebe sona ge se dirilwe se tšweletša lehu.” (Jak. 1:14, 15) Maitekong a gagwe a go senya tswalano ya rena le Modimo, Sathane o hlasela mothopo wa dikganyogo tša rena—dipelo tša rena.

5, 6. (a) Sathane o diriša eng gore a re fore? (b) Ke dikgoketšo dife tšeo Sathane a di dirišago ka maikemišetšo a go senya dikganyogo tša dipelo tša rena, gomme o di diriša bjang gore a atlege?

5 Sathane o diriša eng gore a hlasele dipelo tša rena? Beibele e re: “Lefase ka moka le rapaletše matleng a yo kgopo.” (1 Joh. 5:19) Dibetša tša Sathane di akaretša “dilo tše di lego lefaseng.” (Bala 1 Johane 2:15, 16.) Diabolo o feditše nywaga e dikete a bopa ka kelohloko tikologo yeo re phelago go yona. Ka ge re phela mo lefaseng le, re swanetše go šetša makatika a gagwe a sa bonagalego gabonolo.—Joh. 17:15.

6 Sathane o diriša mekgwa yeo e hlametšwego go senya dikganyogo tša pelo. Moapostola Johane o bolela ka dikgoketšo tše tharo tšeo Sathane a di dirišago: (1) “kganyogo ya nama,” (2) “kganyogo ya mahlo” le (3) “pontšho ya bomponeng ya dilo tša motho tša boiphedišo.” Sathane o ile a di diriša go leka Jesu kua lešokeng. Ka ge Sathane a feditše nywaga e mentši a ithuta go diriša melaba ye, lehono o e diriša ka katlego, gomme o fetofetoga le maemo go ithekgile ka seo motho a se ratago. Pele ga ge re ka ahlaahla megato yeo re ka e gatago go itšhireletša tabeng ye, anke re boneng kamoo Diabolo a dirišitšego ka katlego dikgoketšo tše itšego go fora Efa eupša a paletšwego ke go fora Morwa wa Modimo.

“KGANYOGO YA NAMA”

Efa o ile a forwa ke “kganyogo ya nama” (Bona serapa 7)

7. Sathane o ile a leka Efa bjang a diriša “kganyogo ya nama”?

7 Batho ba na le kganyogo ya motheo ya go fepa mebele ya bona, e lego kganyogo ya go nyaka dijo. Mmopi o hlamile lefase ka tsela yeo le kgonago go tšweletša dijo ka boati. Sathane a ka leka go re goketša a diriša kganyogo ya rena ya dijo ka maiteko a go re tlogediša go dira thato ya Modimo. Ela hloko kamoo a dirilego seo ka gona go Efa. (Bala Genesi 3:1-6.) Sathane o ile a botša Efa gore a ka ja seenywa sa “sehlare sa go tseba botse le bobe” gomme a se hwe, a mmotša gore letšatši leo a tlago go ja tša sona, o be a tla swana le Modimo. (Gen. 2:9) Ka gona Diabolo o ile a bolela gore go be go sa nyakege gore Efa a kwe Modimo gore a phele. Ao e be e le maaka e le ruri! Mafelelong ge kgopolo yeo e be e metše monaganong wa Efa, o be a swanetše go kgetha go dilo tše tše pedi: O be a ka gana kgopolo yeo, goba o be a ka nagana ka yona gomme a dumelela kganyogo ya gagwe ya go ja seenywa e gola. Go sa šetšwe gore o be a dumeletšwe go ja seenywa sa mohlare  le ge e le ofe tšhemong, o ile a kgetha go nagana ka seo Sathane a se boletšego ka sehlare sa gare ga tšhemo, ke moka “a fula seenywa sa sona a se ja.” Ka gona Sathane o ile a dira gore a be le kganyogo ya selo seo se bego se thibetšwe ke Mmopi.

Jesu ga se a ka a dumelela selo le ge e le sefe se mo aroša (Bona serapa 8)

8. Sathane o dirišitše bjang “kganyogo ya nama” go leka Jesu, gona ke ka baka la’ng teko yeo e ile ya folotša?

8 Sathane o ile a diriša leano le le swanago ge a be a leka Jesu lešokeng. Ka morago ga ge Jesu a ikonne dijo ka matšatši a 40 le mašego a 40, Sathane o ile a leka Jesu ka dijo. Sathane o itše: “Ge e ba o le morwa wa Modimo, gona botša leswika le gore le fetoge senkgwa.” (Luka 4:1-3) Jesu o be a ka kgetha go dilo tše tše pedi: O be a ka kgetha go diriša matla a gagwe a go dira mohlolo go itirela dijo goba a kgetha go se a diriše. Jesu o be a tseba gore ga se a swanela go diriša matla ao ka mabaka a boithati. Le ge a be a swerwe ke tlala, go hwetša dijo go be go se bohlokwa go feta go boloka tswalano ya gagwe le Jehofa. Jesu o ile a araba ka gore: “Go ngwadilwe gwa thwe: ‘Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.’”—Mat. 4:4.

“KGANYOGO YA MAHLO”

9. Mantšu a rego “kganyogo ya mahlo” a bontšha’ng, le gona Sathane o dirišitše bjang kganyogo e bjalo go leka Efa?

9 Johane o boletše le gore “kganyogo ya mahlo” ke kgoketšo. Mantšu a a bontšha gore motho a ka thoma go kganyoga selo feela ka go se lebelela. Sathane o ile a diriša kganyogo e bjalo go Efa, ge a be a re: “Mahlo a lena a tla bulega.” Ge Efa a dutše a lebeletše seenywa seo se ileditšwego, kganyogo ya gagwe e ile ya gola. Efa o ile a bona sehlare seo e le “selo se se kganyogwago ke mahlo.”

10. Sathane o ile a diriša bjang “kganyogo ya mahlo” go leka Jesu, gomme ke’ng seo Jesu a ilego a se dira?

10 Go thwe’ng ka Jesu? Sathane “ka nakwana [o ile a bontšha Jesu] mebušo ka moka ya lefase. Ke moka Diabolo a re go yena: ‘Ke tla go nea bolaodi bjo ka moka le letago la mebušo ye.’” (Luka 4:5, 6) Jesu o be a ka se bone ka nakwana mebušo yeo ka moka e le ka kgonthe, eupša Sathane a ka ba a ile a nagana gore letago la yona le be le tla gogela Jesu ge e ba a be a ka le bona ponong. Sathane o ile a bolela a sa lewe ke dihlong gore: “Ge o ka nthapela gatee o le pele ga ka, e tla ba [ya] gago ka moka.” (Luka 4:7) Jesu le gatee o be a sa nyake go ba mohuta wa motho yo Sathane a bego a nyaka gore a be yena. O ile a mo araba ntle le go dikadika. O itše: “Go ngwadilwe gwa thwe: ‘Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.’”—Luka 4:8.

“PONTŠHO YA BOMPONENG YA DILO TŠA MOTHO TŠA BOIPHEDIŠO”

11. Efa o ile a goketšwa bjang ke Sathane?

11 Ge Johane a bolela ka dilo tša lefase,  o boletše ka “pontšho ya bomponeng ya dilo tša motho tša boiphedišo.” Go molaleng gore ge Adama le Efa e be e le batho ba nnoši lefaseng, ba be ba ka se be le ‘pontšho ya bomponeng ya dilo tša bona tša boiphedišo.’ Eupša ba ile ba ba le boikgogomošo. Ge Sathane a be a leka Efa, o ile a mo fa kgopolo ya gore Modimo o be a mo gana ka selo se itšego se sebotse. Diabolo o ile a mmotša gore mohlang a jago “sehlare sa go tseba botse le bobe,” o be a tla ‘swana le Modimo, a tseba botse le bobe.’ (Gen. 2:17; 3:5) Ka gona Sathane o be a bolela gore Efa o be a ka ipuša go e na le go bušwa ke Jehofa. Boikgogomošo ke bjona bo dirilego gore a dumele maaka ao. O ile a ja seenywa se se ileditšwego, a nagana gore a ka se hwe. O be a iphorile e le ruri!

12. Sathane o lekile Jesu ka tsela efe e nngwe, gomme Jesu o ile a dira’ng?

12 Go fapana le Efa, ka kgonthe Jesu o re beetše mohlala o mobotse wa boikokobetšo! Sathane o ile a leka go goketša Jesu a diriša tsela e nngwe, fela Jesu o ile a gana gaešita le kgopolo ya go dira selo seo se ka kgahlago batho eupša sa leka Modimo. Go dira bjalo go be go tla bontšha gore o a ikgogomoša! Go e na le moo, Jesu o ile a nea karabo e kwagalago le e lebanyago ka gore: “Go ngwadilwe gwa thwe: ‘O se ke wa leka Jehofa Modimo wa gago.’”—Bala Luka 4:9-12.

RE KA ŠIRELETŠA BJANG TSWALANO YA RENA LE JEHOFA?

13, 14. Hlalosa kamoo Sathane a dirišago ka gona tše dingwe tša dikgoketšo lehono.

13 Lehono, Sathane o re goketša ka tsela yeo a ilego a goketša Efa le Jesu. Ka “kganyogo ya nama,” Diabolo o diriša lefase la gagwe go kgothaletša boitshwaro bjo bo gobogilego gaešita le go ja le go nwa ka mo go feteletšego. Ka diswantšho tše di kgothaletšago bootswa, kudukudu Inthaneteng, a ka goga motho yo a sego šedi ka go diriša “kganyogo ya mahlo.” Ruri kgoketšo ya dilo tše di bonagalago, go rata go ba le matla a bolaodi gotee le botumo di ka swara bao ba ikgogomošago le bao ba ratago go dira ‘pontšho ya bomponeng ya dilo tša bona tša boiphedišo’!

Ke melao efe ya motheo ya Mangwalo yeo o swanetšego go e gopola ge o lebeletšana le maemo a? (Bona dirapa 13, 14)

14 “Dilo tše di lego lefaseng” di swana le digoketši tša morei wa dihlapi. Digoketši tšeo di a gogela, eupša go se sengwe le se sengwe sa tšona go na le huku. Sathane o diriša dilo tšeo batho ba naganago gore ke dinyakwa tša letšatši le letšatši gore ba dire seo se thulanago le melao ya Modimo. Lega go le bjalo, dikgoketšo tše bjalo tše sa lemogegego di hlametšwe go tutuetša dikganyogo tša  rena le go senya dipelo tša rena. Morero wa tšona ke go leka go re dira gore re bone eka go hlokomela dinyakwa tša rena le boiketlo bja rena go bohlokwa go feta go dira thato ya Modimo. Na re tla dumelela gore dikgoketšo tše bjalo di re fore?

15. Re ka ekiša bjang Jesu tabeng ya go gana dikgoketšo tša Sathane?

15 Le ge Efa a ile a forwa ke dikgoketšo tša Sathane, Jesu ga se a ka a dumelela gore di mo fore. Nakong e nngwe le e nngwe o ile a araba a diriša Mangwalo, a re: “Go ngwadilwe gwa thwe.” Ge e ba re ithuta Beibele ka mafolofolo, re tla tseba Mangwalo gabotse le go gopola ditemana tšeo di ka re thušago gore re nagane ka tsela e nepagetšego ge re lekwa. (Ps. 1:1, 2) Go gopola mehlala ya ka Mangwalong ya bao ba ilego ba botegela Modimo go tla re thuša gore re ba ekiše. (Baroma 15:4) Re tla šireletšwa ke go boifa ga rena Jehofa e le ka kgonthe, go rata seo a se ratago le go hloya seo a se hloilego.—Ps. 97:10.

16, 17. ‘Matla a rena a tlhaologanyo’ a ka kgoma bjang mohuta wa motho yo re lego yena?

16 Moapostola Paulo o re kgothaletša gore re diriše ‘matla a rena a tlhaologanyo’ gore re be mohuta wa batho bao ba bopilwego go ya ka tsela ya Modimo ya go nagana, e sego ya lefase. (Baroma 12:1, 2) Ge Paulo a gatelela bohlokwa bja go laola ka mehla seo re naganago ka sona, o itše: “Re phekgola dikeleletšo le selo se sengwe le se sengwe seo se phagamego seo se iphagamišetšago tsebo ya Modimo; re thopa kgopolo e nngwe le e nngwe go e dira gore e kwe Kriste.” (2 Bakor. 10:5) Dilo tšeo re di naganago di kgoma kudu mohuta wa motho yo re lego yena, ka gona re swanetše go ‘tšwela pele re naganišiša’ ka dilo tšeo di agago.—Bafil. 4:8.

17 Re ka se be ba bakgethwa mola re fepa menagano ya rena ka dikganyogo tše fošagetšego. Re swanetše go rata Jehofa ka ‘dipelo tše hlwekilego.’ (1 Tim. 1:5) Eupša pelo e boradia, le gona re ka fo se lemoge gore “dilo tše di lego lefaseng” di re kgoma gakaakang. (Jer. 17:9) Ka baka leo, na ga se ra swanela go ‘dula re itekola go bona ge e ba re sa le tumelong, le go dula re itlhatsela seo rena ka noši re lego sona’ ka go itlhahloba ka mo go feletšego re diriša seo re ithutago sona ka Beibeleng?—2 Bakor. 13:5.

18, 19. Ke ka baka la’ng re swanetše go ikemišetša go ba mohuta wa batho bao Jehofa a nyakago re eba bona?

18 Se sengwe seo se re thušago go ganetša “dilo tšeo di lego lefaseng” ke go dula re gopola mantšu a buduletšwego a Johane a rego: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Joh. 2:17) Tshepedišo ya Sathane e bonagala e ka se fele e bile e le ya kgonthe. Lega go le bjalo, ka letšatši le lengwe e tla fela. Ga go selo le ge e le sefe sa lefase la Sathane seo se tlago go ba gona ka mo go sa felego. Go gopola ga rena seo go tla re thuša gore re se forwe ke dikgoketšo tša Diabolo.

19 Moapostola Petro o re kgothaletša gore re be mohuta wa batho bao Modimo a ba amogelago ge re ‘dutše re letile e bile re dula re nagana ka go ba gona ga letšatši la Jehofa, leo ka lona magodimo a tlago go fedišwa ka mollo gomme dikarolo tša ona tša tologa ka baka la go fiša kudu!’ (2 Pet. 3:12) Go se go ye kae letšatši leo le tla fihla, ke moka Jehofa o tla fediša karolo le ge e le efe ya lefase la Sathane. Go ba go fihla ka nako yeo, Sathane o tla ba a dutše a re leka ka “dilo tšeo di lego lefaseng,” go swana le ge a lekile Efa le Jesu. Ga se ra swanela go leka go kgotsofatša dikganyogo tša rena go swana le Efa. Go dira bjalo go tla swana le go dira Sathane modimo wa rena. Re swanetše go swana le Jesu gomme re gane dikgoketšo tše bjalo, go sa šetšwe gore ke tšeo di ipiletšago le tšeo di kgahlišago gakaakang. Eka yo mongwe le yo mongwe wa rena a ka ba mohuta wa motho yoo Jehofa a nyakago gore e be yena.