Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2013

Hlokomelanang Gomme le Kgothatšaneng

Hlokomelanang Gomme le Kgothatšaneng

“A re hlokomelaneng gore re hlohleletšaneng leratong le medirong e mebotse.”—BAHEB. 10:24.

1, 2. Ke eng seo se ilego sa thuša Dihlatse tša Jehofa tše 230 go phologa mogwanto wa lehu mafelelong a Ntwa ya II ya Lefase?

GE PUŠO ya Nazi e dutše e phuhlama mafelelong a Ntwa ya II ya Lefase, go ile gwa ntšhwa taelo ya gore go fedišwe batho ba dikete bao ba bego ba šetše dikampeng tša tlaišo. Bagolegwa bao ba bego ba le kampeng ya Sachsenhausen ba be ba tlo išwa maemakepeng moo ba bego ba tla nametšwa ka dikepeng gomme tša nweletšwa ka lewatleng. Seo e be e le karolo ya leano leo ka morago le ilego la tsebja e le megwanto ya lehu.

2 Bagolegwa ba dikete tše masometharo-tharo go tšwa kampeng ya tshwenyo ya Sachsenhausen ba be ba swanetše go gwanta dikhilomithara tše 250 go ya Lübeck, e lego motse o lego lebopong la Jeremane. Gare ga bona go be go na le Dihlatse tša Jehofa tše 230 go tšwa dinageng tše tshelelago, gomme le tšona di be di laetšwe gore di gwante di le gotee. Bagolegwa ka moka ba be ba feditšwe matla ke tlala le malwetši. Bana babo rena ba ile ba kgona bjang go phologa mogwantong woo? Yo mongwe wa bona o re: “Re ile ra dula re kgothatšana gore re ye pele.” Godimo ga “matla a fetago a tlwaelegilego” ao ba bego ba a neilwe ke Modimo, lerato leo ba bego ba na le lona seng sa bona le ile la ba thuša gore ba phologe mogwanto woo.—2 Bakor. 4:7.

3. Ke ka baka la’ng re swanetše go kgothatšana?

3 Lehono ga re mogwantong woo wa lehu, eupša re lebeletšana le ditlhohlo tše dintši. Ka morago ga go hlongwa ga Mmušo wa Modimo ka 1914, Sathane o ile a rakwa legodimong gomme a lahlelwa mo lefaseng, e bile o “galefile kudu, ka ge a tseba gore o na le nako e kopana.” (Kut. 12:7-9, 12) Ge lefase le le dutše le lebile ntweng ya Haramagedone, Sathane o diriša diteko le dikgateletšo go leka go re fokodiša moyeng. Godimo ga moo, re lebeletšana le dikgateletšo tša letšatši le letšatši. (Jobo 14:1; Mmo. 2:23) Ka dinako tše dingwe ge diteko tša rena e le tše ntši re ka felelwa ke matla go fihla bokgoleng bjoo matla ao re nago le ona maikwelong le moyeng a feleletšago a sa lekana gore  re lebeletšane le manyami ao a re welago. Ela hloko mohlala wa ngwanabo rena yo mongwe yoo ka nywaga e mentši a thušitšego batho ba masomesome moyeng. Ge a šetše a tšofala, yena le mosadi wa gagwe ba ile ba babja, gomme o ile a ikwa a gateletšegile kudu. Go swana le ngwanabo rena yo, ka moka ga rena re nyaka “matla a fetago a tlwaelegilego” a tšwago go Jehofa gotee le kgothatšo e tšwago go ba bangwe.

4. Ge e ba re nyaka go kgothatša batho ba bangwe, re swanetše go tšeela godimo keletšo efe ya moapostola Paulo?

4 Ge e ba re nyaka go kgothatša batho ba bangwe, re swanetše go tšeela godimo keletšo yeo moapostola Paulo a ilego a e nea Bakriste ba Baheberu. O itše: “A re hlokomelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudukudu ka ge le bona letšatši le batamela.” (Baheb. 10:24, 25) Re ka diriša bjang keletšo ye e botse?

“HLOKOMELANANG”

5. Go “hlokomelana” go bolela’ng, gomme seo se nyaka boiteko bofe?

5 Go “hlokomelana” go bolela “go šetša dinyakwa tša ba bangwe le go nagana ka bona.” Na re ka kgona go šetša dinyakwa tša ba bangwe ge e ba re boledišana le bona ka boripana feela ge re ba dumediša Holong ya Mmušo goba re bolela le bona feela ka ditaba tše di sego bohlokwa? Go ka no se kgonege. Go ba gona, re swanetše go ‘šetša ditaba tša rena’ gomme re se ‘tsenatsene ditabeng tša batho ba bangwe.’ (1 Bathes. 4:11; 1 Tim. 5:13) Lega go le bjalo, ge e ba re nyaka go kgothatša bana babo rena, ruri re swanetše go ba tseba—re tsebe maemo ao ba phelago go ona, dika tša bona, boemo bja bona bja moya, bokgoni bja bona le mafokodi a bona. Ba swanetše go re bona re le bagwera ba bona gomme ba kgodišege gore re a ba rata. Seo se ra gore re fetše nako le bona—e sego feela ge ba lebeletšane le mathata gomme ba nyamile eupša le ka dinako tše dingwe.—Baroma 12:13.

6. Ke eng seo se tlago go thuša mogolo gore a ‘hlokomele’ bana babo?

6 Banna ba bagolo ka phuthegong ba kgothaletšwa gore ba ‘diše mohlape wa Modimo woo ba o hlokometšego,’ gomme ba dire seo ka go rata le ka go fišega. (1 Pet. 5:1-3) Ba ka atlega bjang modirong wa bodiši ge e ba ruri ba sa tsebe dinku tšeo ba di hlokometšego? (Bala Diema 27:23.) Ge e ba bagolo ba ipha nako ya go ba le badumedigotee le bona e bile ba thabela go ba le bona, ga go pelaelo gore dinku di tla ba kgopela thušo ge di e nyaka. Le gona bana babo rena le dikgaetšedi ba tla ikwa ba lokologile go ba tšhollela sa mafahleng a bona, gomme seo se tla thuša bagolo gore ba ba ‘hlokomele’ le go ba nea thušo e nyakegago.

7. Re swanetše go lebelela bjang ‘mantšu a bošilo’ a bao ba nyamilego?

7 Ge Paulo a be a bolela le phuthego ya Thesalonika o itše: “Thekgang ba fokolago.” (Bala 1 Bathesalonika 5:14.) Batho “bao ba nyamilego” ba fokola ka tsela e itšego. Diema 24:10 e re: “Na o ipontšhitše o nyamile letšatšing la tlalelo? Gona matla a gago a tla hlaela.” Motho yoo a nyamilego o šoro a ka bolela ‘mantšu a bošilo.’ (Jobo 6:2, 3) Ge re ‘hlokomela’ batho ba bjalo, re swanetše go dula re gopola gore seo ba se bolelago e ka no ba e se seo se tšwago ka garegare ga dipelo tša bona. Rachelle, yoo mmagwe a ilego a gateletšega o šoro, o ithutile se go tšwa phihlelong ya gagwe. Rachelle o re: “Mma gantši o be a bolela dilo tšeo di hlabago pelong. Mabakeng a mantši ge a be a bolela dilo tšeo, ke ile ka leka go ikgopotša semelo sa gagwe—gore ke yo lerato, yo botho le wa seatla se bulegilego. Ke ile ka ithuta gore batho bao ba gateletšegilego ba bolela dilo tše dintši tšeo ge e le gabotse di sa tšwego dipelong tša bona. Selo se sebe kudu seo motho a ka ba dirago sona ke go itefeletša ge ba mo hlaba ka mantšu goba ba mo dira selo se bohloko.” Diema 19:11 e re: “Temogo ya motho e fokotša bogale bja gagwe gomme go botse ge a sa latišiše molato.”

8. Ke bomang bao ka mo go kgethegilego re swanetšego go ba ‘kgonthišetša’ gore re a ba rata, gona ka baka la’ng?

 8 Re ka ‘hlokomela’ bjang motho yo a ikwago a nyamile ka baka la ge a jewa ke dihlong le go fetšwa matla ke sebe seo a se dirilego nakong e fetilego, gaešita le ge a ile a gata megato ya maleba ya go lokiša ditaba? Paulo o ngwadile mabapi le modiri wa bobe yo a itshotšego wa kua Korinthe gore: “Le mo lebalele ka botho gomme le mo homotše, gore ka tsela e itšego motho yo bjalo a se imelwe ke go nyama ga gagwe go feta tekano. Ka baka leo, ke le kgothaletša gore le mo kgonthišetše lerato la lena.” (2 Bakor. 2:7, 8) Go ya ka puku e nngwe ya go hlalosa mantšu, lentšu leo le fetoletšwego e le “kgonthišetše” le bolela go “tiišetša, go tlama selo ka molao.” Re ka se fo tšea gore motho o kwešiša kamoo re mo ratago ka gona le kamoo re tshwenyegago ka yena ka gona. O swanetše go bona seo ka tsela yeo re mo lebelelago ka yona le go mo swara ka yona.

‘HLOHLELETŠANANG LERATONG LE MEDIRONG E MEBOTSE’

9. Go ‘hlohleletša ba bangwe leratong le medirong e mebotse’ go bolela’ng?

9 Paulo o ngwadile gore: “A re hlokomelaneng gore re hlohleletšaneng leratong le medirong e mebotse.” Re swanetše go tutueletša badumedigotee le rena gore ba bontšhe lerato gomme ba dire mediro e mebotse. Ge mollo o le kgauswi le go tima, go ka nyakega gore re o kgohletše le go o butšwetša. (2 Tim. 1:6) Ka mo go swanago, ka botho re ka hlohleletša bana babo rena gore ba bontšhe kamoo ba ratago Modimo le moagišani. Theto e swanetšego e a nyakega gore re hlohleletše ba bangwe medirong e mebotse.

Eba le ba bangwe tirelong ya tšhemo

10, 11. (a) Ke bomang gare ga rena bao ba swanetšego go retwa? (b) Bontšha kamoo theto e ka thušago motho yo a ‘gatilego kgato e fošagetšego.’

10 Ka moka ga rena re nyaka go retwa, go sa šetšwe gore re nyamile goba re thabile. Mogolo yo mongwe o ngwadile gore: “Ga go le ka mohla moo tate a ilego a mpotša gore ke dirile selo se itšego gabotse. Ka gona ke gotše ke sa ikholofele. . . . Gaešita le ge ga bjale ke na le nywaga e 50, ke sa dutše ke tšeela godimo taba ya gore bagwera ba ka ba mpotše gore ke dira mošomo o mobotse ge ke phetha dikabelo tša ka tša go ba mogolo. . . . Phihlelo ya ka e nthutile bohlokwa bja go reta ba bangwe, gomme ke dira sohle seo nka se kgonago gore ke ba rete.” Theto e ka fa batho ka moka matla—go  akaretša babulamadibogo, batšofadi gotee le bao ba ka bago ba nyamile.—Baroma 12:10.

11 Ge ‘bao ba nago le ditshwanelego tša moya ba leka go bušetša tseleng motho yo a gatilego kgato e fošagetšego,’ tayo e lerato le theto e swanetšego di ka tutueletša modiri wa bobe gore a boele a dire botse. (Bagal. 6:1) Seo se ile sa šoma tabeng ya kgaetšedi yo a bitšwago Miriam. O ngwala gore: “Ke ile ka feta dinakong tše thata bophelong bja ka ge ba bangwe ba bagwera ba ka ba bagolo ba tlogela phuthego gomme ka nako e swanago, tate a swarwa ke bolwetši bja go tšhologela ga madi bjokong. Ke ile ka gateletšega o šoro. Ke ile ka leka go fenya kgateletšego ya ka ka gore ke thome go ratana le lesogana la lefase.” Seo se ile sa dira gore a ikwe a sa swanelwe ke lerato la Jehofa, gomme o ile a nagana go tlogela therešo. Ge mogolo yo mongwe a be a mo gopotša ka tirelo ya gagwe ya nakong e fetilego yeo a e dirilego ka potego, o ile a kgongwa ke seo. O ile a nea bagolo sebaka sa gore ba mo kgonthišetše kamoo Jehofa a mo ratago ka gona. Mafelelong lerato la gagwe le ile la tuka gape. O ile a kgaotša tswalano ya gagwe le lesogana leo le sa dumelego gomme a tšwela pele a hlankela Jehofa.

Hlohleletša ba bangwe leratong le medirong e mebotse

12. Go diriša mokgwa wa go leša motho dihlong, go mo swaya diphošo le go mo dira gore a ikwe a le molato go ka ba le mafelelo afe?

12 Go leša motho dihlong ka go mmapetša le ba bangwe, go mo swaya diphošo ka go mmeela ditekanyetšo tše thata goba go mo dira gore a ikwe a le molato ka ge a palelwa ke go dira mo go oketšegilego tirelong go ka mo tutueletša gore a thome go ba le mafolofolo, eupša mafolofolo ao e tla ba a nakwana feela. Ka lehlakoreng le lengwe, go reta modumedigotee le wena le go mmontšha kamoo Modimo a mo ratago ka gona go ka ba le mafelelo a mabotse le a swarelelago.—Bala Bafilipi 2:1-4.

‘KGOTHATŠANANG’

13. Go kgothatša ba bangwe go akaretša’ng? (Bona seswantšho se se lego mathomong a sehlogo se.)

13 Re swanetše go “kgothatšana, kudukudu ka ge [re] bona letšatši le batamela.” Go kgothatša batho ba bangwe go akaretša go ba tutueletša go tšwela pele ba hlankela Modimo. Go etša ge go hlohleletšana leratong le medirong e mebotse go ka swantšhwa le go kgohletša mollo woo o lego kgauswi le go tima, go kgothatša ba bangwe go ka swantšhwa le go tsenya dikgong mollong gore o tšwele pele o tuka goba o tuke le go feta. Go kgothatša ba bangwe go akaretša go matlafatša le go homotša bao ba nyamilego. Ge re kgothatša batho ba bjalo, re swanetše go bolela le bona ka botho le ka boleta. (Die. 12:18) Go oketša moo, anke re ‘akgofeleng go kwa’ gomme re ‘diegeng go bolela.’ (Jak. 1:19) Ge e ba re theetša ka kelohloko, re ka kgona go lemoga maemo ao a nyamišago Mokristegotee le rena gomme ra mmotša selo seo se ka mo thušago go lebeletšana le maemo ao.

Thabela segwera se sebotse

14. Ngwanabo rena yo mongwe yo a nyamilego o ile a thušwa bjang?

14 Ela hloko kamoo mogolo yo mongwe yo a nago le kwelobohloko a ilego a thuša ngwanabo rena yo a bego a tapile ka nywaga e mmalwa. Ge mogolo yoo a dutše a mo theeditše, go ile gwa ba molaleng gore  ngwanabo rena o be a sa dutše a rata Jehofa ka mo go tseneletšego. O be a ithuta tokollo e nngwe le e nngwe ya Morokami ka mafolofolo gomme a dira boiteko bja go ba dibokeng ka mehla. Eupša boitshwaro bja ba bangwe ka phuthegong bo be bo mo dirile gore a ikwe a nyamile e bile a galefile ka tekanyo e itšego. Mogolo o ile a mo theetša ka kelohloko ntle le go mo ahlola gomme a botša ngwanabo rena kamoo a tshwenyegilego ka gona ka yena le lapa la gagwe. Mafelelong, ngwanabo rena o ile a lemoga gore o be a dumelela dilo tše mpe tša nakong e fetilego di mo thibela go hlankela Modimo yoo a mo ratago. Mogolo o ile a kgopela ngwanabo rena gore a ye le yena modirong wa boboledi. Ka thušo ya mogolo yoo, ngwanabo rena o ile a thomološa bodiredi bja gagwe gomme a feleletša a swanelegela go hlankela gape e le mogolo.

Theetša ka go se fele pelo ge motho yo a nyakago kgothatšo a bolela (Bona dirapa 14, 15)

15. Re ka ithuta’ng go Jehofa mabapi le go kgothatša bao ba nyamilego?

15 Motho yo a nyamilego a ka no se ikwe a imologile le semeetseng goba a arabela gateetee thušong yeo a e newago. Go ka nyakega gore re dule re mo thekga. Paulo o itše: “Swareletšang ba fokolago, go se be le yoo le mo felelago pelo.” (1 Bathes. 5:14, An American Translation) Go e na le go kitimela go ngala bao ba fokolago, anke re lekeng go ba ‘swareletša,’ re tšweleng pele re ba thekga. Mehleng e fetilego, Jehofa ga se a ka a felela pelo bahlanka ba gagwe bao ka dinako tše dingwe ba bego ba nyamile. Ka mohlala, Modimo o ile a bontšha Eliya lešoko le legolo, a naganela maikwelo a gagwe. Jehofa o ile a nea moporofeta yoo seo a bego a se nyaka gore a tšwele pele ka tirelo ya gagwe. (1 Dikg. 19:1-18) Jehofa o ile a lebalela Dafida ka ge a be a itshola go tšwa pelong. (Ps. 51:7, 17) Le gona Modimo o ile a thuša mongwadi wa Psalme 73 yoo a ilego a nyaka a kgaotša go mo hlankela. (Ps. 73:13, 16, 17) Jehofa o re bontšha lešoko le botho, kudukudu ge re kwele bohloko e bile re nyamile. (Ek. 34:6) Dikgaugelo tša gagwe “o di bontšha mesong e mengwe le e mengwe,” gomme “di ka se fele.” (Dillo 3:22, 23) Jehofa o letetše gore re latele mohlala wa gagwe gomme bao ba nyamilego re ba sware ka botho.

KGOTHATŠANANG GORE LE DULE LE LE TSELENG E IŠAGO BOPHELONG

16, 17. Ke eng seo re swanetšego go ikemišetša go se dira ge bofelo bja tshepedišo ye bo dutše bo batamela, gona ka baka la’ng?

16 Gare ga bagolegwa ba 33 000 bao ba tlogilego kampeng ya tlaišo ya Sachsenhausen, go ile gwa hwa ba diketekete. Lega go le bjalo, bohle ba 230 bao e lego Dihlatse tša Jehofa bao ba tlogilego kampeng yeo ba ile ba phologa masetlapelo ao. Go kgothatšana le go thekgana ga bona go kgathile tema e bohlokwa gore mogwanto woo wa lehu o fetoge mogwanto wa phologo go bona.

17 Lehono, re ‘tseleng e išago bophelong.’ (Mat. 7:14) Go se go ye kae, barapedi ba Jehofa ka moka ba tla tsena ka botee lefaseng le lefsa la go loka. (2 Pet. 3:13) Anke re ikemišetšeng go thušana ge re le tseleng e išago bophelong bjo bo sa felego.