Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) AUGUST 2013

Elisha o Ile a Bona Dikoloi tša Mollo—Na Wena o a di Bona?

Elisha o Ile a Bona Dikoloi tša Mollo—Na Wena o a di Bona?

Kgoši ya Siria e be e tsoma moporofeta wa Modimo e lego Elisha gomme e ile ya mo hwetša motseng wa Dothane woo o bego o le mmotong e bile o ageleditšwe ka maboto. Bošegong bjoo, mmuši wa Siria o ile a romela dipere tša ntwa, dikoloi tša ntwa le madira go ya Dothane. Ka masa, madira a gagwe a be a šetše a dikaneditše motse.—2 Dikg. 6:13, 14.

Ge modiredi wa Elisha a tsoga gomme a tšwela ka ntle o ile a bona batho bao ba bego ba rometšwe go swara moporofeta yo. O ile a re: “Joo mong wa ka! Re tla dira’ng?” Elisha o ile a re: “O se ke wa boifa, gobane bao ba nago le rena ke ba bantši go feta bao ba nago le bona.” Ke moka moporofeta o ile a rapela a re: “Hle wena Jehofa, bula mahlo a gagwe gore a bone.” Pego e tšwela pele ka gore: “Gateetee Jehofa a bula mahlo a mohlokomedi yoo moo a ilego a bona; gwa bonala dithaba di tletše dipere le dikoloi tša ntwa tša mollo go dikologa Elisha.” (2 Dikg. 6:15-17) Ke eng seo re ka ithutago sona pegong ye le ditiragalong tše dingwe bophelong bja Elisha?

Elisha o be a sa tšhoga ge a be a lebeletšane le madira a Basiria ka ge a be a bota Jehofa e bile a bone matla a Modimo a go kgona go šireletša batho. Ga se ra letela gore go direge mehlolo lehono, eupša re lemoga gore Jehofa o šireletša batho ba gagwe e le sehlopha. Ka kgopolo e itšego, le rena re dikaneditšwe ke dipere le dikoloi tša mollo. Ge e ba re di “bona” ka mahlo a rena a tumelo e bile ka mehla re bota Modimo, re tla ‘dula ka polokego’ gomme ra bona ditšhegofatšo tša Jehofa. (Ps. 4:8) Anke re hlahlobeng kamoo re ka holegago ka gona ditiragalong tše dingwe tša bophelo bja Elisha.

ELISHA O THOMA GO HLANKELA ELIYA

Lebakeng le lengwe ge Elisha a lema tšhemong, moporofeta Eliya o ile a mmatamela gomme a fošetša seaparo sa gagwe sa baporofeta godimo ga gagwe. Elisha o be a tseba seo se bolelwago ke tiragalo yeo. O ile a dira moletlo, a laela batswadi ba gagwe gomme a tloga gae a yo hlankela Eliya. (1 Dikg. 19:16, 19-21) Ka ge Elisha a ile a ikgafela go hlankela Modimo ka botlalo ka moo go ka kgonegago, o ile a ba sedirišwa seatleng sa Jehofa gomme mafelelong a hlankela e le moporofeta legatong la Eliya.

 Elisha o ile a hlankela Eliya ka nywaga e ka bago e tshelelago. Nakong yeo, Elisha ke yena “a bego a tšhela meetse diatleng tša Eliya.” (2 Dikg. 3:11) Mehleng yeo, ka tlwaelo batho ba be ba eja ka matsogo, go se na dithipa le diforoko goba dilo le ge e le dife tša go ja. Ka morago ga dijo, mohlanka o be a tšhela meetse diatleng tša mong wa gagwe gore a mo hlapiše tšona. Ka gona, mešongwana e mengwe ya Elisha e be e le ya go nyatšega. Lega go le bjalo, o ile a lebelela go ba mohlokomedi wa Eliya e le tokelo.

Ka mo go swanago lehono, Bakriste ba bantši ba tsenela dibopego tše di fapanego tša tirelo ya nako e tletšego. Ka go dira bjalo, ba šušumetšwa ke tumelo le kganyogo ya bona go diriša matla a bona ka botlalo kamoo ba ka kgonago ka gona go hlankela Jehofa. Tše dingwe tša dikabelo tša bona di nyaka gore ba tloge magaeng a bona gomme ba dire modiro wa Bethele, mediro ya kago, bjalo bjalo—yeo ba bantši ba e lebelelago e le yeo e nyatšegago. Ga go Mokriste yo a swanetšego go lebelela mediro ye e le e nyatšegago goba e le ya tlasana, ka gobane Jehofa o e tšeela godimo kudu.—Baheb. 6:10.

ELISHA O ILE A KGOMARELA KABELO YA GAGWE

Pele Modimo a “rotošetša Eliya magodimong ka ledimo,” o ile a romela moporofeta yoo go tloga Giligala go ya Bethele. Eliya o ile a šišinya gore mothuši wa gagwe a se ke a sepela le yena, eupša Elisha o ile a araba ka gore: “Nka se go tlogele.” Ge leeto le dutše le tšwela pele, Eliya o ile a kgothaletša Elisha ka makga a mangwe gape a mabedi gore a šale, eupša o ile a gana. (2 Dikg. 2:1-6) Go etša ge Ruthe a ile a kgomarela Naomi, Elisha le yena o ile a kgomarela Eliya. (Ruthe 1:8, 16, 17) Ka baka la’ng? Go molaleng gore Elisha o be a tšeela godimo tokelo yeo a bego a e neilwe ke Modimo ya go hlankela Eliya.

Elisha o re beetše mohlala o mobotse. Ge e ba re newa tokelo e itšego ya tirelo mokgatlong wa Modimo, re tla e tšeela godimo kudu ge e ba re gopola gore re hlankela Jehofa. Ga go na tokelo ya go swana le yeo.—Ps. 65:4; 84:10.

“NKGOPELE SEO O NYAKAGO KE GO DIRELA SONA”

Ge banna ba ba babedi ba dutše ba sepela, Eliya o ile a re go Elisha: “Nkgopele seo o nyakago ke go direla sona pele ke tlošwa go wena.” Go swana le ge kgopelo yeo e dirilwego ke Solomone nywaga pejana e be e le ya dilo tša moya, le ya Elisha e be e le bjalo. O ile a kgopela go ‘newa dikarolo tše pedi tša moya wa Eliya.’ (1 Dikg. 3:5, 9; 2 Dikg. 2:9) Kua Isiraele, morwa wa leitšibulo o be a newa dikarolo tše pedi tša bohwa. (Doit. 21:15-17) Ka baka leo, Elisha o ile a kgopela gore a tšewe e le moporofeta yo a hlatlamago Eliya. Go oketša moo, Elisha o be a tloga a nyaka go ba le sebete seo se swanago le sa Eliya, yo a bego a “hufegile ka baka la Jehofa.”—1 Dikg. 19:13, 14.

Eliya o ile a arabela kgopelo ya mohlokomedi wa gagwe ka tsela efe? Moporofeta yoo o ile a araba ka gore: “O kgopetše selo se sethata. Ge o ka mpona nakong ya ge ke tlošwa go wena, gona go tla direga kamoo o kgopetšego ka gona; eupša ge e ba o ka se mpone, gona go ka se be bjalo.” (2 Dikg. 2:10) Karabo ya Eliya ge e le gabotse e be e bolela dilo tše pedi. Sa pele, Modimo ke yena a nnoši yoo a ka dirago gore Elisha a hwetše seo a se kgopetšego. Sa bobedi, Elisha o be a ka newa kgopelo ya gagwe ge e ba a be a ikemišeditše go dula a hlankela Eliya, go sa šetšwe seo se diregago.

SEO ELISHA A SE BONEGO

Modimo o ile a lebelela bjang kgopelo ya Elisha ya gore a newe dikarolo tše pedi tša moya wa Eliya? Pego e re: “Ya re ge ba dutše ba sepela ba tšama ba bolela, ba bona go tšwelela koloi ya ntwa ya mollo le dipere tša mollo gomme tša ba aroganya; ke moka Eliya a rotogela magodimong ka ledimo. Nako ye ka moka ke ge Elisha a bona tšeo.” * Yeo e bile tsela ya Jehofa ya go araba kgopelo ya Elisha. Elisha o ile a bona ge Eliya a tšewa pele ga gagwe, a newa dikarolo tše pedi tša moya wa Eliya gomme a ba moporofeta yo a hlatlamago Eliya.—2 Dikg. 2:11-14.

Elisha o ile a topa seaparo sa baporofeta seo se bego se wele go Eliya gomme a se apara. Seaparo seo se ile sa hlaola Elisha e le moporofeta wa Modimo. Bohlatse bjo bo tlaleletšago gore o kgethilwe bo ile bja bonagala ge ka morago a ile a dira mohlolo wa go arola meetse a Noka ya Jorodane.

Ga go pelaelo gore seo Elisha a se bonego ge Eliya a rotoga ka ledimo se ile sa ba le tutuetšo e matla go yena. Ge e le gabotse, ga se ka mehla moo motho a bonago koloi ya ntwa ya mollo le dipere tša mollo! Se e be e le bohlatse bja karabo e botse ya Jehofa kgopelong ya Elisha. Ge Modimo a araba dithapelo tša rena, ga re bone pono ya koloi ya ntwa e tukago mollo gotee le dipere tša mollo. Eupša re ka kgona go lemoga gore Modimo o diriša matla a gagwe a magolo go kgonthišetša  gore thato ya gagwe e a dirwa. Ge re lemoga gore Jehofa o šegofatša karolo ya lefaseng ya mokgatlo wa gagwe, ge e le gabotse re ka bolela gore re “bona” koloi ya gagwe ya legodimong e sepela.—Hesek. 10:9-13.

Elisha o bile le diphihlelo tše dintši tšeo di ilego tša mo kgonthišetša gore Jehofa o na le matla a magolo. Ge e le gabotse, moya o mokgethwa wa Modimo o ile wa thuša moporofeta yo go dira mehlolo e 16, e lego e fetago gabedi palo ya mehlolo yeo e ilego ya dirwa ke Eliya. * Lekga la bobedi leo Elisha a bonego dipere le dikoloi tša ntwa tša mollo e bile nakong ya mathata a kua Dothane go etša ge go hlalositšwe matsenong a sehlogo se.

ELISHA O ILE A BOTA JEHOFA

Le ge a be a dikologilwe ke manaba kua Dothane, Elisha o ile a se boife. Ka baka la’ng? Ka gobane o be a na le tumelo e matla go Jehofa. Le rena re swanetše go ba le tumelo e bjalo. Ka gona, anke re rapeleleng moya o mokgethwa wa Modimo e le gore re bontšheng tumelo le dika tše dingwe tšeo di enywago ke moya o mokgethwa.—Luka 11:13; Bagal. 5:22, 23.

Seo se diragetšego Dothane le sona se ile sa nea Elisha lebaka le le kwagalago la go bota Jehofa le madira a gagwe ao a šireletšago le a sa bonagalego. Moporofeta yoo o ile a lemoga gore Modimo o rometše barongwa gore ba dikanetše motse gotee le barakeledi ba wona. Ka mohlolo Modimo o ile a phološa Elisha le mohlanka wa gagwe ka go otla manaba a bona ka bofofu. (2 Dikg. 6:17-23) Nakong yeo ya mathata, go etša mabakeng a mangwe, Elisha o ile a bontšha tumelo gomme a bota Jehofa ka mo go feletšego.

Go swana le Elisha, anke re boteng Jehofa Modimo. (Die. 3:5, 6) Ge e ba re dira bjalo, “Modimo yena o tla re gaugela a ba a re šegofatša.” (Ps. 67:1) Ke therešo gore ga se ra dikanetšwa ke dikoloi le dipere tša mollo e le ka kgonthe. Lega go le bjalo, nakong e tlago ya “masetlapelo a magolo,” Jehofa o tla re šireletša re le borwarre bja lefase ka bophara. (Mat. 24:21; Kut. 7:9, 14) Go ba go fihla ka nako yeo, anke ka mehla re dule re gopola gore “Modimo ke setšhabelo sa rena.”—Ps. 62:8.

^ ser. 16 Eliya ga se a rotogela magodimong ao e lego bodulo bja moya bja Jehofa le barongwa ba gagwe. Bona Morokami wa September 15, 1997, letlakala 15.

^ ser. 19 Bona Morokami wa August 1, 2005, letlakala 10.