Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2013

“Ke Mang yo Ruri e Lego Mohlanka yo a Botegago le wa Temogo?”

“Ke Mang yo Ruri e Lego Mohlanka yo a Botegago le wa Temogo?”

“Ke mang yo ruri e lego mohlanka yo a botegago le wa temogo, yo Mong wa gagwe a mmeilego gore a hlokomele ba ntlo ya gagwe?”—MAT. 24:45.

1, 2. Jesu o diriša mokero ofe gore a re fepe lehono, gomme ke ka baka la’ng go le bohlokwa gore re tsebe mokero woo?

“BANA bešo, ga ke kgone go bala makga ao le ilego la nnea dihlogo tšeo di bego di na le dintlha tšeo ke bego ke tloga ke di nyaka ka nako ya gona.” Ke ka tsela yeo kgaetšedi yo mongwe a ilego a leboga ka lengwalo bana babo rena bao ba šomago ntlongkgolo ya rena. Na ke ka mokgwa woo o ikwago ka gona? Bontši bja rena re ikwa bjalo. Na seo se swanetše go re makatša? Le gateetee.

2 Dijo tša moya tšeo re di hwetšago ka nako ke bohlatse bja gore Jesu, e lego Hlogo ya phuthego, o phethagatša kholofetšo ya gagwe ya gore o tla re fepa. O dira seo a diriša mang? Ge Jesu a be a bolela ka pontšho ya go ba gona ga gagwe, o itše o tla diriša “mohlanka yo a botegago le wa temogo” gore a abele ba ntlo ya gagwe “dijo . . . ka nako e swanetšego.” * (Bala Mateo 24:45-47.) Mohlanka yoo yo a botegago ke mokero woo Jesu a o dirišago go fepa balatedi ba gagwe ba therešo mehleng ye ya bofelo. Ke gabohlokwa kudu gore re tsebe mohlanka yo a botegago. Katlego ya rena ya moya gotee le tswalano ya rena le Modimo di ithekgile ka mokero woo.—Mat. 4:4; Joh. 17:3.

3. Ke eng seo dikgatišo tša rena di kilego tša se bolela ka seswantšho sa mohlanka yo a botegago?

3 Bjale re swanetše go kwešiša bjang seswantšho sa Jesu sa mabapi le mohlanka yo a botegago? Nakong e fetilego, dikgatišo tša rena di boletše gore: Ka Pentekoste ya 33 C.E., Jesu o ile a bea mohlanka yo a botegago gore a hlokomele ba ntlo ya gagwe. Di boletše gore mohlanka o emela sehlopha ka moka sa Bakriste ba tloditšwego mo lefaseng ba phetšego ka nako le ge e le efe go tloga ka nako yeo. Di boletše le gore ba ntlo ya gagwe ba šupa go bona batlotšwa bao e le motho ka o tee ka o tee. Le gona tša bolela gore ka 1919, Jesu o ile a bea mohlanka yo a botegago “gore a hlokomele dilo tša gagwe ka moka”—dikgahlego tša gagwe ka moka tša Mmušo mo lefaseng. Lega go le bjalo, go ithuta ga rena ka mo go oketšegilego ka kelohloko gotee le go rapela ka taba ye go utolla gore kwešišo ya rena ya mantšu a Jesu a mabapi le mohlanka  yo a botegago le wa temogo e swanetše go lokišwa. (Die. 4:18) Anke re hlahlobeng seswantšho se le kamoo re akaretšwago ka gona go sona, go sa šetšwe gore re na le kholofelo ya go phela legodimong goba ya go phela mo lefaseng.

SESWANTŠHO SE SE PHETHAGALA NENG?

4-6. Ke ka baka la’ng re ka phetha ka gore seswantšho sa Jesu sa mohlanka yo a botegago se thomile go phethagala feela ka morago ga 1914?

4 Taba yeo e dikologilego seswantšho se sa mohlanka yo a botegago le wa temogo e bontšha gore ga se sa thoma go phethagala ka Pentekoste ya 33 C.E., eupša se thomile go phethagala mehleng ye ya bofelo. Anke re boneng kamoo Mangwalo a re thušago gore re fihlelele phetho ye.

5 Seswantšho sa mohlanka yo a botegago ke karolo ya boporofeta bja Jesu bja mabapi le “pontšho ya go ba gona ga [gagwe] le ya bofelo bja tshepedišo ya dilo.” (Mat. 24:3) Karolo ya pele ya boporofeta bjo yeo e begilwego go Mateo 24:4-22, e na le diphethagalo tše pedi—ya pele ke ya nywageng ya go tloga ka 33 C.E. go ya go 70 C.E., gomme ya bobedi ke e kgolo yeo e phethagalago mehleng ya rena. Na seo se bolela gore mantšu a Jesu a mabapi le mohlanka yo a botegago le ona a tla ba le diphethagalo tše pedi? Aowa.

6 Go thoma ka mantšu ao a begilwego go Mateo 24:29, Jesu o be a bolela kudu ka ditiragalo tšeo di bego di tla direga mehleng ya rena. (Bala Mateo 24:30, 42, 44.) Ge a be a bolela ka seo se tlago go direga nakong ya masetlapelo a magolo, o itše batho ba tla “bona Morwa wa motho a etla ka maru a legodimo.” Ke moka, ge a be a bolela ka bao ba tlago go phela mehleng ya bofelo, o ile a kgothaletša gore ba phafoge ka go bolela gore: “Ga le tsebe letšatši leo Morena wa lena a tlago ka lona,” le gore: “Morwa wa motho o tla ka nako yeo le sa e naganego.” * Ke gona mo boemong bjo—ge a be a bolela ka ditiragalo tša mehleng ya bofelo—moo Jesu a ilego a bolela seswantšho sa mohlanka yo a botegago. Ka gona, re ka phetha ka gore mantšu a gagwe a mabapi le mohlanka yo a botegago a thomile go phethagala feela ka morago ga ge mehla ya bofelo e thomile ka 1914. Phetho yeo ya rena e a kwagala. Ke ka baka la’ng re re’alo?

7. Ke potšišo efe e bohlokwa yeo e ilego ya rotoga ge lebaka la puno le thoma, gona ka baka la’ng?

7 Nagana go se nene ka potšišo ye: “Ke mang yo ruri e lego mohlanka yo a botegago le wa temogo?” Lekgolong la pele la nywaga, go be go se na lebaka le le kwagalago la gore motho a botšiše potšišo e bjalo. Go etša ge re bone sehlogong se se fetilego, baapostola ba be ba kgona go dira mehlolo e bile ba nea ba bangwe dimpho tša mohlolo e le bohlatse bja gore Modimo o a ba thekga. (Dit. 5:12) Ka gona ke mang yo a bego a ka nyaka go tseba yoo ruri Kriste a mmeilego gore a etelele pele? Lega go le bjalo, boemo e be e le bjo bo fapanego kudu ka 1914. Lebaka la puno le thomile ngwageng woo. Go be go fihlile nako ya gore mefoka e hlaolwe go korong. (Mat. 13:36-43) Ge lebaka la puno le thoma, go ile gwa rotoga potšišo ye e bohlokwa: Ka ge go be go na le Bakriste ba bantši ba mankekišane bao ba bego ba ipolela gore ke balatedi ba therešo ba Jesu, gona korong—Bakriste ba tloditšwego—e be e ka tsebja bjang? Seswantšho sa mohlanka yo a botegago se be se swere karabo ya potšišo yeo. Balatedi ba tloditšwego ba Kriste e be e tla ba bona bao ba fepšago moyeng.

KE MANG E LEGO MOHLANKA YO A BOTEGAGO LE WA TEMOGO?

8. Ke ka baka la’ng e le mo go swanetšego gore mohlanka yo a botegago a bopše ke Bakriste ba tloditšwego?

8 Mohlanka yo a botegago o swanetše go bopša ke Bakriste ba tloditšwego ba lego mo lefaseng. Bona bao ba bitšwa “boperisita bja bogoši” gomme ba laetšwe gore ba ‘bolele gohle mabothakga a yo a ba biditšego leswiswing gomme a ba biletša seetšeng sa gagwe se se makatšago.’ (1 Pet. 2:9) E tloga e le mo go swanetšego gore ditho tša “boperisita [bjoo] bja bogoši” di be le karolo ka go lebanya go ruteng badumedigotee le tšona therešo.—Mal. 2:7; Kut. 12:17.

9. Na Bakriste ka moka ba tloditšwego ba bopa mohlanka yo a botegago? Hlalosa.

9 Na batlotšwa ka moka bao ba lego lefaseng  ba bopa mohlanka yo a botegago? Aowa. Therešo ke gore ga se batlotšwa ka moka bao ba tšeago karolo modirong wa go abela badumedigotee le bona lefaseng ka bophara dijo tša moya. Gare ga korong go na le bana babo rena ba tloditšwego bao ba hlankelago e le bahlanka ba bodiredi goba bagolo diphuthegong tša gabo bona. Ba ruta ka ntlo le ntlo gotee le diphuthegong tša gabo bona, e bile ba thekga ka potego tlhahlo e tšwago ntlongkgolo. Eupša ga ba tšee karolo modirong wa go aba dijo tša moya tšeo di yago go bana babo rena lefaseng ka bophara. Le gona gare ga batlotšwa go na le dikgaetšedi tšeo di ikokobeditšego, tšeo le ka mohla di ka se lekego go tšea boikarabelo bja go ba barutiši ka phuthegong.—1 Bakor. 11:3; 14:34.

10. Ke mang e lego mohlanka yo a botegago le wa temogo?

10 Ka gona, ke mang e lego mohlanka yo a botegago le wa temogo? Ka go dumelelana le mokgwa wa Jesu wa go fepa ba bantši a diriša ba sego kae, mohlanka yoo o bopša ke sehlopha se senyenyane sa bana babo rena ba tloditšwego bao ba nago le karolo ka go lebanya go lokišetšeng dijo tša moya le go di aba nakong ya go ba gona ga Kriste. Go theoša le nywaga ka moka ya mehla ya bofelo, bana babo rena ba tloditšwego bao ba bopago mohlanka yo a botegago ba be ba hlankela mmogo ntlongkgolo. Nywagasomeng e sa tšwago go feta, mohlanka yoo o be a tswalanywa kgauswi le Sehlopha se Bušago sa Dihlatse tša Jehofa. Lega go le bjalo, ela hloko gore Jesu seswantšhong sa gagwe o boletše gore go tla ba le “mohlanka” o tee. Ka go re’alo Sehlopha se Bušago se dira diphetho se le ka moka.

KE BOMANG BAO E LEGO BA NTLO YA GAGWE?

11, 12. (a) Ke dikabelo dife tše pedi tšeo mohlanka yo a botegago le wa temogo a di newago? (b) Jesu o beile neng mohlanka yo a botegago gore a hlokomele ba ntlo ya gagwe, gomme o ile a kgetha bomang?

11 Selo seo se lemogegago seswantšhong sa Jesu ke gore mohlanka yo a botegago le wa temogo o amogela dikabelo tše pedi tše di sa swanego. Kabelo ya pele ke ya go bewa gore a hlokomele ba ntlo ya mong wa gagwe; ya bobedi ke ya gore a hlokomele dilo tša mong wa gagwe ka moka. Ka ge seswantšho se se phethagala feela mehleng ye ya bofelo, mohlanka yoo o be a tlo newa dikabelo tšeo ka bobedi ka morago ga ge go thomile nako ya go ba gona ga Jesu e le kgoši ka 1914.

12 Jesu o beile neng mohlanka yo a botegago gore a hlokomele ba ntlo ya gagwe? E le gore re arabe potšišo yeo, re swanetše go boela morago ngwageng wa 1914, e lego ngwaga wa mathomo wa lebaka la puno. Go etša ge re ithutile pejana, ka nako yeo go be go na le dihlopha tše dintši  tšeo di bego di ipitša Bakriste. Jesu o be a tla kgetha sehlopha sefe gare ga tšona gomme a se bea gore e be mohlanka yo a botegago? Potšišo yeo e ile ya arabja ge yena le Tatagwe ba etla go hlahloba tempele, goba thulaganyo ya moya ya borapedi, go tloga ka 1914 go ya karolong ya mathomo ya 1919. * (Mal. 3:1) Ba ile ba thabišwa ke sehlopha se senyenyane sa Barutwana ba botegago ba Beibele bao ba bontšhitšego gore dipelo tša bona di be di thekga Jehofa le Lentšu la gagwe. Therešo ke gore ba be ba swanetše go hlwekišwa ka tsela e itšego, eupša ka boikokobetšo ba ile ba arabela gabotse nakong yeo e kopana ya go lekwa le go sekišwa. (Mal. 3:2-4) Barutwana bao ba botegago ba Beibele e be e le Bakriste ba therešo ba emelwago ke korong. Ka 1919, e lego nakong ya go tsošološwa ga bona moyeng, Jesu o ile a kgetha bana babo rena ba tloditšwego ba swanelegago gare ga bona gore e be mohlanka yo a botegago le wa temogo gomme a ba bea gore ba hlokomele ba ntlo ya gagwe.

13. Ke bomang bao ba akaretšwago gare ga ba ntlo ya Jesu, gona ka baka la’ng?

13 Bjale ke bomang bao e lego ba ntlo ya gagwe? Ke bao ba fepšago. Mathomong a mehla ye ya bofelo, ba ntlo ya gagwe e be e le batlotšwa feela. Ka morago ga moo, ba ntlo ya gagwe ba ile ba akaretša le lešaba le legolo la dinku tše dingwe. Ga bjale dinku tše dingwe di bopa karolo e kgolo kudu ya “mohlape o tee” woo o eteletšwego pele ke Kriste. (Joh. 10:16) Dihlopha tšeo ka bobedi di holwa ke dijo tša moya tše di tlago ka nako e swanetšego tšeo di abjago ke mohlanka yo a botegago. Go thwe’ng ka ditho tša Sehlopha se Bušago tšeo lehono di bopago mohlanka yo a botegago le wa temogo? Bana bao babo rena le bona ba swanetše go fepša moyeng. Ka baka leo, ka boikokobetšo ba lemoga gore ge ba le motho ka o tee ka o tee le bona ke ba ntlo ya Jesu go no swana le balatedi ba bangwe ka moka ba kgonthe ba gagwe.

Go sa šetšwe gore re na le kholofelo ya go phela legodimong goba mo lefaseng, ka moka ga rena re ba ntlo ya gagwe e bile re nyaka dijo tša moya ka nako e swanetšego

14. (a) Mohlanka yo a botegago o neilwe boikarabelo bofe, gomme bo akaretša’ng? (b) Ke temošo efe yeo Jesu a ilego a e nea mohlanka yo a botegago le wa temogo? (Bona lepokisi le le rego: “Ge e ba Mohlanka yoo yo Mobe . . . ”)

14 Jesu o neile mohlanka yo a botegago le wa temogo boikarabelo bjo bogolo. Mehleng ya Beibele, mohlanka goba molaki yo a botwago e be e le molaodi wa ditaba tša ka ntlong. (Luka 12:42) Ka go re’alo mohlanka yo a botegago le wa temogo o neilwe boikarabelo bja go laola ba ntlo ya tumelo. Boikarabelo bjoo bo akaretša go okamela didirišwa ka moka, modiro wa boboledi, mananeo a dikopano tša tikologo le tša selete gotee le go tšweletšwa ga dikgatišo tše di theilwego Beibeleng tšeo di dirišwago bodireding bja tšhemo le thutong ya motho ka noši goba dibokeng tša phuthego. Ba ntlo ya gagwe ba ithekgile ka ditokišetšo tše ka moka tša  moya tšeo di abjago ke sehlopha se sa mohlanka.

O BEWA NENG GORE A HLOKOMELE DILO TŠA MONG WA GAGWE KA MOKA?

15, 16. Jesu o bea neng mohlanka yo a botegago gore a hlokomele dilo tša gagwe ka moka?

15 Jesu o nea neng mohlanka yoo boikarabelo bja bobedi bja “gore a hlokomele dilo tša gagwe ka moka”? Jesu o itše: “Go thaba mohlanka yoo ge e ba Mong wa gagwe a fihla [phetolelo ya lentšu ka lentšu e re, “ge a tlile,” mongwalo wa ka tlase wa Reference Bible] a mo hwetša a dira bjalo. Ruri ke re go lena: O tla mmea gore a hlokomele dilo tša gagwe ka moka.” (Mat. 24:46, 47) Ela hloko gore Jesu o nea mohlanka boikarabelo bja bobedi ka morago ga ge a fihlile gomme a hweditše gore o be a “dira bjalo,” ke gore, a aba dijo tša moya ka potego. Ka gona o be a ka se mo nee dikabelo tšeo ka nako e tee. E le gore re kwešiše gore Jesu o bea bjang mohlanka gore a hlokomele dilo tša gagwe ka moka, le gore o dira seo neng, re swanetše go kwešiša dilo tše pedi tše latelago: nako yeo a fihlago ka yona le seo se akaretšwago ke dilo tša gagwe.

16 Jesu o fihla neng? Re hwetša karabo ya potšišo yeo go tšwa tabeng yeo e dikologilego ditemana tše. Gopola gore ge ditemana tša pele ga tšeo di bolela gore Jesu o “e tla,” polelwana yeo e šupa nakong ya ge a tlo ahlola batho le go phethagatša kahlolo yeo bofelong bja tshepedišo ye ya dilo. * (Mat. 24:30, 42, 44) Ka gona go “fihla,” goba ‘go tla’ ga Jesu moo go boletšwego seswantšhong sa mohlanka yo a botegago go direga masetlapelong a magolo.

17. Dilo tša Jesu di akaretša’ng?

17 ‘Dilo ka moka tša Jesu’ di akaretša’ng? Jesu ga se a bolela gore dilo tša gagwe “ka moka” ke tša mo lefaseng feela. Ge e le gabotse, Jesu o na le matla a magolo kudu legodimong. O itše: “Ke neilwe matla ka moka legodimong le lefaseng.” (Mat. 28:18; Baef. 1:20-23) Dilo tša gagwe ka moka gona bjale di akaretša Mmušo wa Mesia; mmušo woo e bile wa gagwe  go tloga ka 1914 gomme o tlo buša go ona nakong e tlago a na le balatedi ba gagwe ba tloditšwego.—Kut. 11:15.

18. Ke ka baka la’ng Jesu a tla thabela go bea mohlanka gore a hlokomele dilo tša gagwe ka moka?

18 Re ka phetha ka go re’ng go tšwa go seo re boletšego ka sona? Ge Jesu a tliša kahlolo masetlapelong a magolo, o tla hwetša gore mohlanka yoo yo a botegago o be a abela ba ntlo ya gagwe dijo tša moya ka potego ka nako e swanetšego. Ke moka Jesu o tla thabela go mo nea boikarabelo bja bobedi, e lego bja gore a hlokomele dilo tša gagwe ka moka. Bao ba bopago mohlanka yo a botegago ba tla amogela boikarabelo bjo ge ba hwetša moputso wa bona wa legodimong, nakong ya ge ba eba babušigotee le Kriste.

19. Na mohlanka yo a botegago o tla hwetša moputso o mogolo legodimong go feta batlotšwa ba bangwe ka moka? Hlalosa.

19 Na mohlanka yo a botegago o tla hwetša moputso o mogolo legodimong go feta batlotšwa ba bangwe ka moka? Aowa. Moputso woo o holofetšwago sehlopha se senyenyane boemong bjo itšego o ka feleletša o thabelwa ke ba bangwe. Ka mohlala, ela hloko seo Jesu a se boditšego baapostola ba gagwe ba botegago ba 11 bošegong bjoo a hwilego ka bjona. (Bala Luka 22:28-30.) Jesu o holofeditše sehlopha seo se senyenyane sa banna gore se letetšwe ke moputso o kgahlišago ka baka la go botega ga sona. Se be se tlo ba le matla bogošing bja gagwe. Eupša nywaga ka morago, o ile a bontšha gore ditho ka moka tša ba 144 000 di be di tla dula didulong tša bogoši gomme tša ba le karolo pušong ya gagwe. (Kut. 1:1; 3:21) Ka mo go swanago, go etša ge go boletšwe go Mateo 24:47, o holofeditše gore palo e nyenyane ya banna—bana babo rena ba tloditšwego bao e lego karolo ya mohlanka yo a botegago—e tla bewa gore e hlokomele dilo tša gagwe ka moka. Ge e le gabotse, ditho ka moka tša ba 144 000 di tla ba le karolo pušong ya gagwe e kgolo ya legodimong.—Kut. 20:4, 6.

Bohle ba 144 000 ba tla tšea karolo pušong e kgolo ya Jesu ya legodimong (Bona serapa 19)

20. Ke ka baka la’ng Jesu a ile a bea mohlanka yo a botegago, gomme ke’ng seo o ikemišeditšego sona?

20 Jesu o diriša mohlanka yo a botegago le wa temogo a latela mokgwa woo a o thomilego lekgolong la pele la nywaga—go fepa ba bantši a diriša ba sego kae. Jesu o beile mohlanka yoo yo a botegago go kgonthišetša gore balatedi ba gagwe ba kgonthe—go sa šetšwe gore ke batlotšwa goba ke ba dinku tše dingwe—ba dula ba hwetša dijo tša moya ka nako e swanetšego mehleng ka moka ya bofelo. Anke re ikemišetšeng go bontšha gore re leboga seo ka gore re thekge ka potego bana babo rena ba tloditšwego bao ba bopago mohlanka yoo yo a botegago le wa temogo.—Baheb. 13:7, 17.

 

^ ser. 2 Serapa 2: Pejana ga mo, Jesu o ile a bolela seswantšho se se swanago gomme a bitša “mohlanka” yoo gore ke “molaki” gomme “ba ntlo ya gagwe” a re ke “sehlopha sa gagwe sa bahlanka.”—Luka 12:42-44.

^ ser. 6 Serapa 6: ‘Go tla’ ga Kriste (ka Segerika, er′kho·mai) go fapana le “go ba gona” ga gagwe (pa·rou·si′a). Go ba gona ga gagwe ka tsela e sa bonagalego go direga pele ga ge a etla go tlo ahlola.

^ ser. 12 Serapa 12: Bona sehlogo se se rego: “Tsebang Gore ke na le Lena Matšatši ka Moka,” go tšwa tokollong yona ye, go matlakala 10-12, dirapa 5-8.

^ ser. 16 Serapa 16: Bona sehlogo se se rego: “Re Botše Gore Dilo tše di tla Direga Neng?” go tšwa tokollong yona ye, go matlakala 7-8, dirapa 14-18.