Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2013

Go Fepa ba Bantši go Dirišwa ba Sego Kae

Go Fepa ba Bantši go Dirišwa ba Sego Kae

“Ka morago ga go ngwathaganya dinkgwa a di abela barutiwa ba gagwe, bona ba di abela mašaba.”—MAT. 14:19.

1-3. Hlalosa kamoo Jesu a ilego a fepa lešaba le legolo kgauswi le Betsaida. (Bona seswantšho seo se lego mathomong a sehlogo se.)

NAGANA ka tiragalo e latelago. (Bala Mateo 14:14-21.) Paseka ya 32 C.E. e kgauswi le go thoma. Lešaba la banna ba ka bago 5 000, go sa balwe basadi le bana, le na le Jesu le barutiwa ba gagwe lefelong leo le sa dulwego ke motho kgauswi le Betsaida, e lego motsana wo o lego ka leboa la lebopo la Lewatle la Galilea.

2 Ge Jesu a bona lešaba leo, o le kwela bohloko, ke moka o fodiša balwetši bao ba lego gare ga lona gomme o le ruta dilo tše dintši ka Mmušo wa Modimo. Ge barutiwa ba Jesu ba bona gore nako e šetše e ile, ba mo kgothaletša gore a phatlalatše lešaba leo e le gore le ye metsaneng ya kgauswi le yo ithekela tša go ja. Eupša Jesu o botša barutiwa ba gagwe gore: “Lena [ba] neeng sa go ja.” Ba makatšwa ke mantšu ao, ka gobane ba be ba swere dijo tše dinyenyane kudu—dinkgwa tše hlano le dihlapi tše pedi tše dinyenyane.

3 Ka go šušumetšwa ke kwelobohloko, Jesu o dira mohlolo—mohlolo o nnoši woo o begilwego ke bangwadi ka moka ba bane ba Diebangedi. (Mar. 6:35-44; Luka 9:10-17; Joh. 6:1-13) Jesu o laela barutiwa ba gagwe gore ba botše lešaba leo go dula bjanyeng bjo botala ka dihlopha tša ba 50 le ba 100. Ka morago ga go kgopela tšhegofatšo, o thoma go ngwathaganya dinkgwa tšeo le go arola dihlapi. Ke moka, go e na le gore a nee batho bao dijo ka boyena, Jesu o ile “a di abela barutiwa ba gagwe, bona ba di abela mašaba.” Mohlolo e bile gore dijo tšeo di ile tša lekana batho ka moka! Anke o fo nagana: Jesu o fepile ba dikete a diriša ba sego kae—barutiwa ba gagwe. *

4. (a) Jesu o be a tshwenyegile kudu ka go nea batho dijo tša mohuta ofe, gona ka baka la’ng? (b) Re tlo ahlaahla’ng sehlogong se le seo se latelago?

4 Jesu o be a bile a tshwenyegile kudu ka go nea balatedi ba gagwe dijo tša moya. O be a tseba gore ge batho ba eja dijo tša moya, e lego ditherešo tšeo di hwetšwago ka Lentšung la Modimo, ba tla hwetša bophelo bjo bo sa felego. (Joh. 6:26, 27; 17:3) Ka go šušumeletšwa ke kwelobohloko e swanago le yeo a bilego le yona ge a fepa mašaba ka dinkgwa  le dihlaphi, Jesu o ile a fetša diiri tše dintši a ruta balatedi ba gagwe. (Mar. 6:34) Eupša o be a tseba gore nako ya gagwe mo lefaseng e be e tlo ba e nyenyane le gore o be a tlo boela legodimong. (Mat. 16:21; Joh. 14:12) Jesu o be a tla dira bjang gore balatedi ba gagwe mo lefaseng ba fepše moyeng ge yena a le legodimong? O be a tlo diriša mokgwa o swanago—go fepa ba bantši a diriša ba sego kae. Eupša ke bomang bao e bego e tla ba ba sego kae? Anke re boneng kamoo Jesu a ilego a diriša ba sego kae gore ba fepe balatedi ba gagwe ba bantši ba tloditšwego lekgolong la pele la nywaga. Ke moka sehlogong se se latelago, re tla araba potšišo e latelago yeo e lego bohlokwa go rena ka moka: Re ka kgona go tseba bjang ba sego kae bao Kriste a ba dirišago go re fepa lehono?

Ba dikete ba ile ba fepša go dirišwa ba sego kae (Bona serapa 4)

JESU O KGETHA BA SEGO KAE

5, 6. (a) Ke phetho efe e boima yeo Jesu a e dirilego go kgonthišetša gore balatedi ba gagwe ba tla fepša moyeng ka morago ga lehu la gagwe? (b) Jesu o ile a lokišetša bjang baapostola ba gagwe go tlo phetha tema e bohlokwa ka morago ga lehu la gagwe?

5 Hlogo ya lapa yeo e nago le boikarabelo e dira dithulaganyo tša gore lapa la yona le šale le hlokometšwe ge e ba e ka hwa. Ka mo go swanago, Jesu—yoo e bego e tla ba Hlogo ya phuthego ya Bokriste—o ile a dira dithulaganyo go kgonthišetša gore balatedi ba gagwe ba hlokomelwa moyeng ka morago ga lehu la gagwe. (Baef. 1:22) Ka mohlala, mo e ka bago nywaga e mebedi pele ga ge Jesu a ehwa, o ile a dira phetho e boima. O ile a kgetha ba sego kae ba pele bao ka morago a bego a tlo ba diriša go fepa ba bantši. Ela hloko seo se ilego sa direga.

6 Ka morago ga go rapela bošego ka moka, Jesu o ile a kgoboketša barutiwa ba gagwe gomme a kgetha ba 12 ba bona gore e be baapostola. (Luka 6:12-16) Nywageng e mebedi e latetšego, o be a phela kudu le ba 12, a ba ruta ka mantšu le ka ditiro. O be a tseba gore go na le tše ntši tšeo ba bego ba swanetše go ithuta tšona; ge e le gabotse, ba ile ba tšwela pele ba bitšwa “barutiwa.” (Mat. 11:1; 20:17) O ile a ba nea dikeletšo tše bohlokwa le go ba tlwaetša ka botlalo bodireding. (Mat. 10:1-42; 20:20-23; Luka 8:1; 9:52-55) Go molaleng gore o be a ba lokišetša go tlo phetha tema e bohlokwa ka morago ga lehu la gagwe le go rotogela ga gagwe legodimong.

7. Jesu o ile a hlabiša bjang seetša mabapi le selo se segolo seo baapostola ba gagwe ba bego ba tla tshwenyega ka sona?

7 Ke tema efe yeo baapostola ba bego ba tlo e kgatha? Ge Pentekoste ya 33 C.E. e dutše e batamela, go be go le molaleng gore baapostola ba be ba tla hlankela ‘maemong a bolebeledi.’ (Dit. 1:20) Eupša selo se segolo seo ba bego ba tla tshwenyega ka sona e be e le sefe? Ka morago ga gore Jesu a tsošwe, o ile a hlabiša seetša tabeng ye poledišanong yeo a bilego le yona le moapostola Petro. (Bala Johane 21:1, 2, 15-17.) Ge a be a na le ba bangwe ba baapostola ba gagwe, Jesu o boditše Petro gore: “Fepa dikwana tša ka.” Ka go re’alo Jesu o bontšhitše gore baapostola ba gagwe ba be ba tla ba gare ga ba sego kae bao ba bego ba tla nea ba bantši dijo tša moya. Seo ruri se bontšha ka tsela e kgomago le e matla gore Jesu o ikwa bjang ka “dikwana” tša gagwe! *

GO FEPA BA BANTŠI GO TLOGA KA PENTEKOSTE GO YA PELE

8. Bao e bego e sa tšwa go ba badumedi ba ile ba bontšha bjang ka Pentekoste gore ba be ba lemoga gabotse mokero woo Kriste a bego a o diriša?

8 Go thoma ka Pentekoste ya 33 C.E., Kriste yo a tsošitšwego o ile a diriša baapostola ba gagwe e le mokero woo ka wona a fepago barutiwa ba gagwe ka moka ba tloditšwego. (Bala Ditiro 2:41, 42.) Mokero woo o ile wa lemogwa gabotse ke Bajuda le basokologi bao e ilego ya ba Bakriste ba tloditšwego letšatšing leo. Ka ntle le go dikadika, ba ile “ba tšwela pele ba ikgafela thutong ya baapostola.” Go ya ka seithuti se sengwe, lediri la Segerika leo le fetoletšwego e le “[go] tšwela pele ba ikgafela” le ka bolela go “botegela ka mo go feletšego tsela e itšego ya go dira dilo.” Bao e bego e sa tšwa go ba badumedi ba be ba swerwe ke tlala e kgolo ya go nyaka dijo tša moya, gomme ba be ba tseba moo ba ka di hwetšago gona. Ka potego  e feletšego, ba ile ba ithekga ka baapostola gore ba ba hlalosetše mantšu le ditiro tša Jesu le go ba hlabišetša seetša mabapi le seo se bolelwago ke mangwalo a mabapi le yena. *Dit. 2:22-36.

9. Baapostola ba ile ba bontšha bjang gore ba be ba dula ba tšeela godimo boikarabelo bja bona bja go fepa dinku tša Jesu?

9 Baapostola ba ile ba dula ba tšeela godimo boikarabelo bja bona bja go fepa dinku tša Jesu. Ka mohlala, ela hloko kamoo ba ilego ba swaragana le taba e boima le e bego e ka aroganya ditho tša phuthego; taba yeo e ile ya rotoga phuthegong e bego e sa le e mpsha. Se se makatšago ke gore taba ya gona e be e le mabapi le dijo—dijo tša nama. Bahlologadi bao ba bolelago Segerika ba be ba tshedišwa mahlo kabong ya dijo ya letšatši le letšatši, eupša bahlologadi bao ba bolelago Seheberu ba be ba sa tshedišwe mahlo. Baapostola ba ile ba rarolla bjang taba ye yeo go sego bonolo go bolela ka yona? “Ba lesomepedi” ba ile ba kgetha banna ba šupago ba swanelegago gore ba okamele “modiro . . . wo o nyakegago” wa go aba dijo. Baapostola—bao bontši bja bona ka ntle le pelaelo ba ilego ba tšea karolo go abeng dijo mašabeng ao Jesu a ilego a a fepa ka mohlolo—ba ile ba bona go le bohlokwa kudu gore ba diriše nako ya bona e ntši ba fepa batho moyeng. Ka go re’alo, ba ile ba ikgafela “bodireding bja lentšu.”—Dit. 6:1-6.

10. Kriste o ile a diriša bjang baapostola le bagolo Jerusalema?

10 Ka 49 C.E., baapostola bao ba bego ba sa phela ba be ba šoma gotee le bagolo ba bangwe ba swanelegago. (Bala Ditiro 15:1, 2.) “Baapostola le bagolo Jerusalema” ba be ba hlankela e le sehlopha se bušago. Ka ge Kriste e le Hlogo ya phuthego, o ile a diriša sehlopha se se senyenyane sa banna ba swanelegago gore se lokiše ditaba tšeo di tswalanago le thuto ya mangwalo gomme se okamele le go nea tlhahlo modirong wa go bolela le go ruta ditaba tše dibotse tša Mmušo.—Dit. 15:6-29; 21:17-19; Bakol. 1:18.

11, 12. (a) Ke eng seo se bontšhago gore Jehofa o ile a šegofatša thulaganyo yeo Morwa wa gagwe a bego a e diriša go fepa diphuthego tša lekgolong la pele la nywaga? (b) Ke ka tsela efe mokero woo Kriste a bego a o diriša go fepa batho moyeng o bego o bonagala gabotse?

11 Na Jehofa o ile a šegofatša thulaganyo yeo Morwa wa gagwe a bego a e diriša go fepa diphuthego tša lekgolong la pele la nywaga? Ga go pelaelo gore o ile a e šegofatša! Re ka kgonthišega bjang ka seo? Puku ya Ditiro e re nea pego ye: “Bjale ge ba [moapostola Paulo le basepedišani ba gagwe] dutše ba sepela go phatša metse yeo ba be ba iša ditaelo go bao ba lego moo gore ba di latele, e lego tšeo baapostola le bagolo bao ba lego Jerusalema ba bego ba dirile phetho ka tšona. Ka gona diphuthego  di ile tša tšwela pele di matlafatšwa tumelong le go oketšega ka palo letšatši le letšatši.” (Dit. 16:4, 5) Ela hloko gore diphuthego tšeo di ile tša atlega ka baka la go dirišana ga tšona le sehlopha se bušago seo se bego se le Jerusalema. Na seo ga se bohlatse bja gore Jehofa o be a šegofatša thulaganyo yeo Morwa wa gagwe a bego a e diriša go fepa diphuthego? Anke re gopoleng gore go atlega ga rena moyeng go kgonega feela ge re šegofatšwa ke Jehofa ka tsela e kgolo.—Die. 10:22; 1 Bakor. 3:6, 7.

12 Go fihla ga bjale re bone gore Jesu o ile a latela mokgwa o itšego ge a fepa balatedi ba gagwe: O ile a fepa ba bantši a diriša ba sego kae. Mokero woo a bego a o diriša go fepa batho moyeng o be o bonagala gabotse. Ge e le gabotse, baapostola, e lego ditho tša mathomo tša sehlopha se bušago, ba be ba ka nea bohlatse bjo bo bonagalago bja gore thekgo ya bona e be e etšwa legodimong. Ditiro 5:12 e re: “Ka diatla tša baapostola go ile gwa tšwela pele go direga dipontšho tše dintši le mehlolo e mentši bathong.” * Ka baka leo, bao e ilego ya ba Bakriste ba be ba se na lebaka la go botšiša gore: ‘Ke bomang bao ge e le gabotse Kriste a ba dirišago go fepa dinku tša gagwe?’ Eupša go ya mafelelong a lekgolo la pele la nywaga, maemo a ile a fetoga.

Lekgolong la pele la nywaga, go be go na le bohlatse bjo bo lego molaleng bja bao Jesu a bego a ba diriša go fepa phuthego (Bona serapa 12)

GE MEFOKA E BE E LE E MENTŠI GOMME MAKGABA A KORONG E LE E SEGO KAE

13, 14. (a) Jesu o ile a lemoša gore go be go tla ba le tlhaselo efe, gomme mantšu a gagwe a ile a thoma go phethagala neng? (b) Tlhaselo yeo e be e tla tšwelela mahlakoreng afe a mabedi? (Bona tlhaloso.)

13 Jesu o ile a bolela gore phuthego ya Bokriste e be e tlo hlaselwa. Gopola gore seswantšhong sa gagwe sa boporofeta sa korong le mefoka, Jesu o ile a lemoša gore tšhemo yeo e bego e sa tšwa go bjalwa ya korong (Bakriste ba tloditšwego) e be e tla tlala ka mefoka (Bakriste ba mankekišane). O itše dihlopha tšeo ka bobedi di be di tla dumelelwa go gola mmogo—di sa tshwenywe ke motho go fihlela nakong ya puno, yeo e bego e tla tla “bofelong bja tshepedišo ya dilo.” (Mat. 13:24-30, 36-43) Go se go ye kae ke ge mantšu ao a Jesu a thoma go phethagala. *

14 Bohlanogi bo ile bja nyaka go šwahlela lekgolong la pele la nywaga, eupša baapostola ba botegago ba Jesu ba ile ba fetoga “selo se se thibelago,” ba thibela tshenyo le tutuetšo ya dithuto tša maaka. (2 Bathes. 2:3, 6, 7) Eupša ka morago ga gore baapostola ka moka ba hwe, bohlanogi bo ile bja tsema medu gomme bja phatlalala lebakeng le letelele la go gola ga peu leo le tšerego nywagakgolo e mentši. Go oketša moo, nakong yeo ka moka, mefoka e ile ya ba e mentši gomme korong e le e sego kae. Go be go se na mokero o rulagantšwego woo o bego o aba dijo tša moya ka mehla. Seo se be se tla feleletša se fetogile. Eupša potšišo ke gore: Neng?

KE BOMANG BAO BA TLAGO GO FEPA BA BANGWE NAKONG YA PUNO?

15, 16. Go ithuta ga Barutwana ba Beibele Mangwalo ka phišego go ile gwa tšweletša mafelelo afe, gomme ke potšišo efe yeo e rotogago?

15 Ge bofelo bja go gola ga peu bo dutše bo batamela, go ile gwa ba le bao ba thomago go kgahlegela kudu therešo ya Beibele. O tla gopola gore ka bo-1870, sehlopha se senyenyane sa batho bao ba bego ba nyaka therešo se ile sa kopana gomme sa hloma diklase tša go ithuta Beibele ka ntle le thušo ya mefoka, e lego Bakriste ba mankekišane bao ba bego ba le ka dikerekeng le dihlotswaneng tša Bojakane. Ka dipelo tše ikokobeditšego le menagano e bulegilego, Barutwana bao ba Beibele ba botegago, go etša ge ba be ba ipitša bjalo ka nako yeo, ba ile ba rapela gomme ba nyakišiša ka kelohloko seo Mangwalo a se bolelago.—Mat. 11:25.

16 Go ithuta ga Barutwana ba Beibele Mangwalo ka kelohloko go ile gwa tšweletša dipoelo tše dibotse kudu. Banna bao le basadi bao ba botegago ba ile ba pepentšha dithuto tša maaka gomme ba phatlalatša ditherešo tša moya, ba gatiša le go phatlalatša kgole le kgauswi dikgatišo tše theilwego Beibeleng. Modiro wa bona o ile wa ratwa ke ba bantši gomme wa kgodiša bao ba bego ba swerwe ke tlala le lenyora la therešo ya moya. Ka gona go rotoga  potšišo e latelago e kgahlišago: Na Barutwana ba Beibele bao ba bego ba le gona nywageng ya pele ga 1914 e be e le mokero o kgethilwego woo Kriste a bego a fepa dinku tša gagwe ka wona? Aowa. Ba be ba sa dutše ba le lebakeng la go gola ga peu, gomme thulaganyo ya gore go be le mokero wa go aba dijo tša moya e be e dutše e sa bopega. Go be go se gwa tšwa go fihla nako ya gore Bakriste ba mankekišane bao ba swanago le korong ba hlaolwe go Bakriste ba therešo bao ba emelwago ke korong.

17. Ke ditiragalo dife tše bohlokwa tšeo di ilego tša thoma ka 1914?

17 Go etša ge re ithutile sehlogong se se fetilego, lebaka la puno le thomile ka 1914. Ngwageng woo, go ile gwa thoma ditiragalo tše bohlokwa. Jesu o ile a bewa sedulong sa Bogoši, gomme mehla ya bofelo e ile ya thoma. (Kut. 11:15) Go tloga ka 1914 go ya karolong ya mathomo ya 1919, Jesu o ile a ya le Tatagwe tempeleng ya moya go yo dira modiro o bego o tloga o nyakega wa go e hlahloba le go e hlwekiša. * (Mal. 3:1-4) Ke moka go thoma ka 1919, e be e le nako ya go thoma go kgoboketša korong. Na bjale go be go fihlile nako ya gore Kriste a bee mokero o tee o rulagantšwego wa go aba dijo tša moya? Ruri go bjalo!

18. Jesu o boletše gore o be a tla nea boikarabelo bofe, gomme ke potšišo efe e kgolo yeo e ilego ya rotoga ge mehla ya bofelo e thoma?

18 Boporofeteng bja gagwe bja mabapi le mehla ya bofelo, Jesu o ile a bolela gore o tla bea mokero woo o bego o tla aba ‘dijo tša moya ka nako e swanetšego.’ (Mat. 24:45-47) O be a tla diriša mokero ofe? Ka go dumelelana le mokgwa woo a ilego a o diriša lekgolong la pele la nywaga, Jesu o be a tla buša a fepa ba bantši a diriša ba sego kae. Eupša ge mehla ya bofelo e be e thoma, potšišo e kgolo e ile ya ba e rego: Ke bomang bao e bego e tla ba ba sego kae? Potšišo yeo gotee le dipotšišo tše dingwe tša mabapi le boporofeta bja Jesu di tla ahlaahlwa sehlogong se se latelago.

 

^ ser. 3 Serapa 3: Lebakeng le lengwe ka morago, ge Jesu a be a fepa ka mohlolo banna ba 4 000, go sa balwe basadi le bana, le gona moo o ile a nea “barutiwa ba gagwe [dijo], bona ba di abela mašaba.”—Mat. 15:32-38.

^ ser. 7 Serapa 7: Mehleng ya Petro, “dikwana” ka moka tšeo di bego di tla fepša di be di na le kholofelo ya go phela legodimong.

^ ser. 8 Serapa 8: Taba ya gore badumedi ba bafsa ba ile “ba tšwela pele ba ikgafela thutong ya baapostola” e bontšha gore baapostola ba be ba ruta ka mehla. E nngwe ya thuto ya baapostola e ile ya ngwalelwa sa ruri ka dipukung tše di buduletšwego tšeo ga bjale e lego karolo ya Mangwalo a Bakriste a Segerika.

^ ser. 12 Serapa 12: Gaešita le ge ba bangwe ka ntle le baapostola ba ile ba hwetša dimpho tša mohlolo tša moya, go bonagala maemong a mantši dimpho tše tša mohlolo ba be ba di newa ka go lebanya ke yo mongwe wa baapostola goba ba di newa yo mongwe wa baapostola a le gona.—Dit. 8:14-18; 10:44, 45.

^ ser. 13 Serapa 13: Mantšu a moapostola Paulo a hwetšwago go Ditiro 20:29, 30 a bontšha gore phuthego e be e tla hlaselwa go tšwa mahlakoreng a mabedi. La pele e be e tla ba la Bakriste ba mankekišane (“mefoka”), bao ba bego ba tla “tsena gare ga” Bakriste ba therešo. La bobedi e be e tla ba la bao ba tšwago “gare ga” Bakriste ba therešo, bao ba bangwe e bego e tla ba bahlanogi ba bolelago “dilo tše di kgopamego.”

^ ser. 17 Serapa 17: Bona sehlogo se se rego: “Tsebang Gore ke na le Lena Matšatši ka Moka,” go tšwa yona tokollong ye go letlakala 11, serapa 6.