Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JULY 2013

 PHIHLELO

Re be re Ikemišeditše go Hlankela Jehofa Kae le Kae

Re be re Ikemišeditše go Hlankela Jehofa Kae le Kae

Ke be ke thoma go dira boboledi ke le noši. Ke be ke tšhogile kudu moo ke bego ke thulanya matolo ka mehla ge ke eya bodireding. Sa go befiša ditaba go ya pele e be e le gore tšhemo yeo e be e le thata kudu. Ba bangwe ba batho ba moo ba be ba nkgalefela o šoro e bile ba tšhošetša ka gore ba tla ntia. Kgweding ya pele ke le tirelong ya bobulamadibogo, ke ile ka sepediša pukwana e tee feela!—Markus.

TIRAGALO yeo ke ya 1949, nywageng ya ka godimo ga e 60 e fetilego, eupša kanegelo ya bophelo bja ka e thoma nywageng e mentši ya go feta yeo. Tate e lego Hendrik, o be a šoma go lokiša dieta le dirapa kua Donderen, motsaneng wa ka leboa la profense ya Drenthe, nageng ya Netherlands. Ke belegetšwe moo ka 1927, gomme ke ngwana wa bone wa bana ba gagwe ba šupago. Ntlo ya gešo e be e agilwe kgauswi le tsela ya mmu seleteng sa magaeng. Bontši bja baagišani ba rena e be e le balemi, gomme ke be ke thabela bophelo bja dipolaseng. Ka 1947, ge ke be ke na le nywaga e 19, ke kwele therešo la mathomo go yo mongwe wa baagišani ba rena e lego Theunis Been. Ke a gopola gore la mathomo ge ke kopana le Theunis ke ile ka se mo rate, eupša nakwana ka morago ga Ntwa ya II ya Lefase, o ile a ba yo mongwe wa Dihlatse tša Jehofa, gomme ke ile ka lemoga gore o be a le botho kutšwanyana go feta peleng. Phetogo ye ya semelo sa gagwe e ile ya mmakatša, ka gona ke ile ka mo theetša ge a be a boledišana le nna ka kholofetšo ya Modimo ya paradeise. Go se go ye kae ke ile ka amogela therešo, gomme nna le yena ra ba bagwera ba bophelo ka moka. *

Ke thomile go ya tšhemong ka May 1948, gomme kgweding e latelago yeo, ka June 20, ka kolobetšwa kopanong kua Utrecht. Ka January 1, 1949, ke ile ka thoma bobulamadibogo gomme ka abelwa go šoma kua Borculo, ka bohlabela bja Netherlands, moo go bego go na le phuthego e nyenyane. Ke be ke swanetše go sepela dikhilomithara tše 130 go ya moo, ka gona ke ile ka phetha ka gore ke ragele paesekela. Ke be ke nagana gore go tla ntšea diiri tše tshelelago, eupša ka baka la dipula tša matlorotloro le diphefo tše matla, go ile gwa  ntšea diiri tše 12, gaešita le ge ke ile ka namela setimela dikhilomithareng tše 90 tša mafelelo! Ge leswiswana le swara, ke ile ka feleletša ke fihlile mo ke yago gona, e lego lapeng la Dihlatse tšeo ke ilego ka dula le tšona nakong ka moka ya ge ke bula madibogo tikologong yeo.

Nywageng yeo ya ka morago ga ntwa, batho ba be ba na le dilo tše sego kae feela tše bonagalago. Ke be ke na le sutu e tee feela le borokgo—sutu ya gona e be e mpheta, borokgo bo ntlhaela! Go etša ge ke boletše matsenong, kgwedi ya ka ya pele kua Borculo e be e le boima, eupša Jehofa o ile a ntšhegofatša ka dithuto tše mmalwa tša Beibele. Ka morago ga dikgwedi tše senyane, ke ile ka abelwa go šoma toropong ya Amsterdam.

GO TLOGA MAGAENG GO YA TOROPONG

Le ge ke goletše dipolaseng, ke ile ka ikhwetša ke le Amsterdam, e lego toropo e kgolokgolo ya Netherlands. Tšhemo ya moo e be e tšweletša dienywa tše dintši. Kgweding ya pele, ke ile ka sepediša dikgatišo tše dintši go feta tšeo ke di sepedišitšego dikgweding tše senyane tša go feta. Go se go ye kae ke be ke na le dithuto tša Beibele tša ka godimo ga tše seswai. Ka morago ga gore ke kgethwe go ba mohlanka wa phuthego (yo ga bjale a bitšwago molomaganyi wa sehlopha sa bagolo), ke ile ka hwetša kabelo ya gore ke nee polelo ya ka ya mathomo ya phatlalatša. Ke be ke tšhogile kudu, eupša ke ile ka thaba kudu ge ke be ke abelwa go ya phuthegong e nngwe nakwana pele ga ge letšatši la polelo yeo le fihla. Seo ke bego ke sa se tsebe ke gore go theoša le nywaga, ke be ke tla nea dipolelo tše fetago 5 000!

Markus (mafelelong ka go la le letona) a le modirong wa setarateng kgauswi le Amsterdam ka 1950

Ka May 1950, ke ile ka abelwa go šoma toropong ya Haarlem. Ke moka ka amogela taletšo ya go tsenela modiro wa tikologo. Ke ile ka felelwa ke boroko ka matšatši a mararo. Ke ile ka botša yo mongwe wa bana babo rena yo a bego a hlankela ofising ya lekala e lego Robert Winkler gore ke be ke ikwa ke sa swanelege, eupša o ile a re go nna: “Wena e fo tlatša difomo tšeo. Tše dintši o tla ithuta pele.” Nakwana ka morago ga moo, ke ile ka newa tlwaetšo ya kgwedi gomme ka thoma go hlankela ke le mohlanka (molebeledi) wa tikologo. Ge ke be ke etetše e nngwe ya diphuthego, ke ile ka gahlana le Janny Taatgen, e lego mmulamadibogo yo mofsa yo a tletšego ka lethabo gomme a rata Jehofa ka pelo ya gagwe ka moka e bile a na le moya wa boikgafo. Re ile ra nyalana ka 1955. Pele ga ge nka tšwela pele ka kanegelo ya ka, Janny o tla hlalosa kamoo a ilego a ba mmulamadibogo le kamoo re ilego ra hlankela mmogo ka morago ga gore re nyalane.

GO HLANKELA MMOGO KA MORAGO GA GO NYALANA

Janny: Mma o bile Hlatse ka 1945 ge ke be ke na le nywaga e 11. Gateetee o ile a bona bohlokwa bja gore a ithute Beibele le bana ba gagwe ba bararo, eupša tate o be a ganetša therešo, ka gona mma o ile a re ruta ge tate a be a se gona ka gae.

Seboka sa pele seo ke bilego go sona e bile kopano ya kua toropong ya The Hague ka 1950. Beke ka morago ga moo, ke ile ka ya dibokeng tša ka tša mathomo Holong ya Mmušo ya kua Assen (Drenthe). Tate o ile a galefa kudu gomme a nthaka gae. Mma o ile a re go nna: “O tseba gabotse moo o ka yago go dula gona.” Ke ile ka tseba gore o be a bolela ka magaeng a bana babo rena le dikgaetšedi. Ke ile ka thoma go dula le lapa le lengwe la  Dihlatse leo le bego le dula kgauswi le gagešo, eupša tate o be a sa dutše a nthatafišetša bophelo, ka gona ke ile ka hudugela phuthegong ya toropong ya Deventer (Overijssel), yeo e bego e le bokgole bja dikhilomithara tše 95 go tloga gae. Lega go le bjalo, go ya ka molao ke be ke sa dutše ke le nywageng ya go hlokomelwa ke batswadi, ka gona tate o ile a tsenywa bothateng ke balaodi ba mmušo ka baka la ge a ile a nthaka gae. Ka baka la seo, o ile a mpotša gore ke boe gae. Gaešita le ge tate a se a ka a amogela therešo, o ile a feleletša a ntumeletše go ba gona dibokeng ka moka le go ya modirong wa boboledi.

Janny (mafelelong ka go la le letona) a bula madibogo ka nakwana ka 1952

Nakwana ka morago ga gore ke boe gae, mma o ile a babja kudu gomme ke ile ka swanelwa ke go dira mešomo ka moka ya ka gae. Go sa šetšwe seo, ke ile ka dira tšwelopele moyeng gomme ka kolobetšwa ka 1951 ke na le nywaga e 17. Ka 1952, ka morago ga gore Mma a fole, ke ile ka hlankela le dikgaetšedi tše dingwe tše tharo tša babulamadibogo ka dikgwedi tše pedi ke le mmulamadibogo wa nakwana (wa go thuša). Re be re dula ka seketswaneng gomme re nea bohlatse ditoropong tše pedi tša profenseng ya Drenthe. Ke bile mmulamadibogo wa ka mehla go thoma ka 1953. Ngwaga ka morago ga moo, molebeledi yo mongwe wa tikologo yo e bego e sa le lesogana o ile a etela phuthego ya rena. Yena e be e le Markus. Re ile ra nyalana ka May 1955, ka gobane re be re bona gore re ka hlankela Jehofa gakaone re le banyalani.—Mmo. 4:9-12.

Letšatšing la rena la lenyalo ka 1955

Markus: Ka morago ga lenyalo la rena, kabelo ya rena ya pele e bile ya go hlankela re le babulamadibogo kua Veendam (Groningen). Re be re dula ka phapošing e nyenyane ya bophara bja dimithara tše pedi le botelele bja dimithara tše tharo. Eupša Janny o ile a dira gore e be e botsana e bile e ratege. Bošegong bjo bongwe le bjo bongwe, re be re swanetše go šuthiša tafola ya rena le ditulo tše dinyenyane e le gore re theoše mpete wa rena wa go kgomaretšwa lebotong.

Ka morago ga dikgwedi tše tshelelago, re ile ra laletšwa go hlankela modirong wa bosepedi kua nageng ya Belgium. Ka 1955, go be go na le bagoeledi ba 4 000 feela nageng yeo. Ga bjale palo ya bona e ipušeleditše ka makga a tshelelago! Kua Flanders, ka leboa la Belgium, batho ba gona ba bolela leleme la go swana le la Netherlands. Lega go le bjalo, tsela yeo badudi bao ba Belgium ba bolelago ka yona e be e tloga e fapane le ya rena, ka gona mathomong re ile ra swanelwa ke go tlwaelana le seo.

Janny: Modiro wa bosepedi o tloga o nyaka moya wa boikgafo. Re be re etela diphuthego ka dipaesekela tša rena gomme re dula magaeng a bana babo rena le dikgaetšedi. Ka ge re be re se na legae leo e bego e le la rena ge re dutše re etela diphuthego, re be re dula magaeng a bana babo rena go fihlela Mošupologo gomme re fetela phuthegong e nngwe ka Labobedi mesong. Eupša ka dinako tšohle re be re lebelela tirelo ya rena e le tšhegofatšo e tšwago go Jehofa.

Markus: Mathomong re be re sa tsebe bana babo rena le dikgaetšedi ka diphuthegong tšeo, eupša ba be ba le botho kudu e bile ba na le moya wa go amogela baeng. (Baheb. 13:2.) Go theoša le nywaga, re be re etela ka makga a mmalwa diphuthego ka moka tšeo di bolelago Sedutch tšeo di lego Belgium. Se se re tlišeditše ditšhegofatšo tše dintši. Ka mohlala, re ile ra tseba bana babo rena le dikgaetšedi ba bantši bao ba bego ba le seleteng  seo go bolelwago Sedutch, le gona re be re ba rata kudu. Re ile ra bona ge bana ba bantši ba gola e bile ba tia moyeng gomme ba ineela go Jehofa, ba etiša dikgahlego tša Mmušo pele maphelong a bona. Go thabiša kudu go bona ba bantši ba bona ba hlankela Jehofa ka potego tirelong ya nako e tletšego. (3 Joh. 4) Go ‘kgothatšana’ ga rena le bona go dirile gore re nolofalelwe ke go tšwela pele re hlankela ka dipelo ka moka kabelong ya rena.—Baroma 1:12.

TLHOHLO E KGOLO LE TŠHEGOFATŠO E MAKATŠAGO

Markus: Go tloga letšatšing leo re nyalanego ka lona, re be re kganyoga go ya Sekolong sa Gilead. Re be re fetša iri letšatši le letšatši re ithuta Seisemane. Eupša go be go se bonolo go ithuta Seisemane ka dipuku, ka gona re ile ra phetha ka gore re ye Engelane nakong ya rena ya maikhutšo e le gore re itlwaetše go bolela leleme leo ge re dutše re dira boboledi. Mafelelong, ka 1963 re ile ra amogela enfelopo go tšwa ntlongkgolo kua Brooklyn. E be e na le mangwalo a mabedi, le lengwe e le la ka gomme le lengwe e le la Janny. Lengwalo la ka e be e le taletšo ya go ba klaseng e kgethegilego ya dikgwedi tše lesome ya Gilead. Klase yeo e be e tla šoma kudu go tlwaetša bana babo rena le go ba thuša gore ba dire dilo ka thulaganyo ya mokgatlo. Ka baka leo, go barutwana ba 100 bao ba bego ba laleditšwe, ba 82 ba bona e be e le bana babo rena.

Janny: Ka lengwalong leo ke le amogetšego letšatšing leo, ke ile ka kgopelwa gore ke rapele gomme ke naganišiše ka taba ya ge e ba nka kgona go šala Belgium ge Markus a le Gilead. Seo nka se bolelago ke gore mathomong ke be ke nyamile. Go ile gwa bonagala eka Jehofa o be a sa šegofatša maiteko ao ke bego ke a dirile a go fihlelela pakane yeo. Eupša ke ile ka ikgopotša ka morero wa Sekolo sa Gilead—go thuša bao ba bago go sona gore ba phethagatše modiro wa go bolela ditaba tše dibotse lefaseng ka bophara. Ka gona ke ile ka dumela go šala gomme ka abelwa go hlankela ke le mmulamadibogo yo a kgethegilego toropong ya Belgium ya Ghent ke na le Anna le Maria Colpaert, e lego babulamadibogo ba babedi ba kgethegilego bao ba bego ba na le phihlelo.

Markus: Ka ge ke be ke swanetše go kaonefatša Seisemane sa ka, ke ile ka laletšwa Brooklyn dikgwedi tše hlano pele ga ge sekolo se thoma. Ke ile ka šoma lefapheng la tša Thomelo le la Tirelo. Go šoma ga ka ntlongkgolo le go thuša go phuthela dikgatišo tše di yago Asia, Yuropa le Amerika Borwa go ile gwa ntira gore ke lemoge borwarre bja rena bja lefase ka bophara. Motho yo ke mo gopolago ka mo kgethegilego ke Ngwanabo rena A. H. Macmillan, yo a bilego modirong wa bosepedi (molebeledi wa mosepedi) mehleng ya Ngwanabo rena Russell. O be a šetše a tšofetše ka nako yeo e bile a se sa kwa gabotse, eupša o be a eba gona dibokeng ka moka tša phuthego. Seo se ile sa nkgoma kudu e bile sa nthuta gore le ka mohla ga se ra swanela go tšeela dipokano tša rena tša Bokriste fase.—Baheb. 10:24, 25.

Janny: Nna le Markus re be re boledišana ka makga a mmalwa mo bekeng. Re be re hlologelana kudu! Eupša Markus o be a thabela tlwaetšo yeo a bego a e hwetša Gilead, gomme nna ke thabišwa kudu ke bodiredi bja ka. Ge Markus a boa gae go tšwa United States, ke be ke na le dithuto tša Beibele tše 17! Go ba ga rena kgole le kgole ka dikgwedi tše 15 e be e tloga e le tlhohlo, eupša ke ile ka bona gore Jehofa o ile a re šegofatša ka baka la boikgafo bjoo re bo dirilego. Letšatšing leo Markus a boilego ka lona, sefofane sa gagwe se ile sa diega ka diiri tše mmalwa, ka gona ge mafelelong a goroga, re ile ra lla re gokarelane. Go tloga ka nako yeo go ya pele, re bile monwana le lenala.

RE LEBOGA TOKELO E NNGWE LE E NNGWE YA TIRELO

Markus: Ge ke boa Gilead ka December 1964, re ile ra abelwa go hlankela Bethele. Gaešita le ge re be re sa tsebe seo ka nako yeo, kabelo yeo e be e ka se be ya sa  ruri. Dikgwedi tše tharo feela ka morago, re ile ra abelwa modirong wa selete kua Flanders. Ge Aalzen le Els Wiegersma ba be ba romelwa Belgium go ba baromiwa, ba ile ba abelwa go ba modirong wa selete, gomme re ile ra boela Bethele moo ke ilego ka hlankela Lefapheng la Tirelo. Go tloga ka 1968 go ya go 1980, dikabelo tša rena di ile tša fetoga ka makga a mmalwa go tloga go hlankeleng Bethele go ya modirong wa bosepedi. Mafelelong, go tloga ka 1980 go ya go 2005, ke ile ka hlankela gape ke le molebeledi wa selete.

Gaešita le ge dikabelo tša rena di be di fetoga gantšintši, ga se ra ka ra lahlegelwa ke pono ya gore re neetše maphelo a rena gore re hlankele Jehofa ka meoya ya rena ka moka. Ruri re ile ra thabela kabelo e nngwe le e nngwe yeo re bego re e newa, re na le kholofelo ya gore diphetogo le ge e le dife tirelong ya rena di be di tšwetša pele dikgahlego tša Mmušo.

Janny: Ke ile ka thabela ka mo go kgethegilego tokelo ya go ya le Markus kua Brooklyn ka 1977 le kua Patterson ka 1997 ge a be a yo hwetša tlwaetšo e oketšegilego e le setho sa Komiti ya Lekala.

JEHOFA O TSEBA DINYAKWA TŠA RENA

Markus: Ka 1982, Janny o ile a buiwa gomme a fola. Nywaga e meraro ka morago, phuthego ya Louvain e ile ya re nea moago wa bodulo wo o bego o le ka godimo ga Holo ya yona ya Mmušo. E be e le la mathomo ka morago ga nywaga e 30 re bago le lefelo la rena la bodulo. Ka Labobedi le lengwe le le lengwe ge re be re phutha merwalo gomme re etela phuthego e mpsha, ke be ke swanetše go ya godimo le fase ka manamelo a 54 gore ke iše merwalo ya rena tlase! Re leboga gore ka 2002 go ile gwa dirwa dithulaganyo tša gore re be le moago wa bodulo lebatong la mathomo. Ka morago ga ge ke bile le nywaga e 78, re ile ra abelwa go ba babulamadibogo ba kgethegilego toropong ya Lokeren. Re thabišwa kudu ke gore re ka hlankela ka tsela ye le gore re sa kgona go ya tšhemong letšatši le lengwe le le lengwe.

“Re dumela ka pelo ka moka gore selo se bohlokwa ga se moo re hlankelago re le gona goba kabelo yeo re lego go yona, eupša selo se bohlokwa ke yoo re mo hlankelago”

Janny: Nywaga yeo bobedi bja rena re e feditšego re le tirelong ya nako e tletšego e balelwa ka godimo ga e 120! Re bone ka noši therešo ya kholofetšo ya Jehofa ya gore ‘a ka se ke a re tlogela’ le ya gore ge e ba re mo hlankela ka potego, re ka se ‘hloke selo.’—Baheb. 13:5; Doit. 2:7.

Markus: Ge re be re sa le ba banyenyane, re ile ra ineela go Jehofa. Ga se ra ka ra inyakela dilo tše dikgolo. Re ile ra dula re ikemišeditše go amogela kabelo le ge e le efe yeo re e newago ka gobane re dumela ka pelo ka moka gore selo se bohlokwa ga se moo re hlankelago re le gona goba kabelo yeo re lego go yona, eupša selo se bohlokwa ke yoo re mo hlankelago.

^ ser. 5 Ge nywaga e dutše e eya, tate, mma, kgaetšedi wa ka yo mogolo le bana bešo ba babedi le bona e ile ya ba Dihlatse.