Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  June 2013

Dumelela Tayo ya Jehofa Gore e go Bope

Dumelela Tayo ya Jehofa Gore e go Bope

“O tla ntlhahla ka morero wa gago, ka morago wa nkiša le letagong.”—PS. 73:24.

1, 2. (a) Ke dilo dife tšeo di nyakegago gore re be le tswalano e botse le Jehofa? (b) Re tla holwa bjang ke go hlahloba dipego tša Mangwalo tša mabapi le ditsela tšeo batho ba ka arabelago ka tšona tayong ya Modimo?

“GE E le nna ke kgahlwa ke go batamela Modimo. Ke tšhabetše go Mmuši Morena Jehofa.” (Ps. 73:28) Go tšwa temaneng ye, mopsalme o ile a bontšha gore o bota Modimo. Ke maemo afe ao a dirilego gore a fihlelele phetho ye? Ge mathomong a bona eka batho ba babe ba na le khutšo, o ile a galefa. O llile ka gore: “Ke ga lefeela ge ke hlwekišitše pelo ya ka le ge ke hlapa diatla tša ka go bontšha gore ga ke na molato.” (Ps. 73:2, 3, 13, 21) Lega go le bjalo, ge a be a tsena “sekgethweng se sekgethwa sa Modimo,” o ile a kgona go fetoša monagano wa gagwe gomme a dula a batamela go Modimo. (Ps. 73:16-18) Phihlelo ye e rutile monna yoo wa go boifa Modimo thuto e bohlokwa ya gore: Ge e ba motho a nyaka go ba le tswalano ya kgauswi le Jehofa, gona o swanetše go ba gare ga batho ba Modimo gomme a amogele keletšo e bile a e diriše bophelong bja gagwe.—Ps. 73:24.

2 Le rena re kganyoga go ba le tswalano ya kgauswi le Modimo yo a phelago le wa therešo. E le gore re fihlelele seo, re swanetše go dumelela tlhahlo ya Modimo goba tayo ya gagwe e re bopa, e le gore re be batho bao ba mo kgahlišago! Nakong e fetilego, ka kgaugelo Modimo o ile a nea batho ba itšego le ditšhaba dibaka tša gore ba arabele tayong ya gagwe. Dipego tša mabapi le go arabela ga bona tayong di begilwe ka Beibeleng bakeng sa “go re ruta” le go “[lemoša] rena bao re fihletšwego ke bofelo bja mehla ye.” (Baroma 15:4; 1 Bakor. 10:11) Go hlahloba dipego tše ka kelohloko go tla re thuša gore re kwešiše semelo sa Jehofa le go re bontšha kamoo re ka holegago ka gona ge a re bopa.

KAMOO MMOPI A DIRIŠAGO BOLAODI BJA GAGWE KA GONA

3. Go Jesaya 64:8 le Jeremia 18:1-6, bolaodi bja Jehofa godimo ga batho bo swantšhwa le eng? (Bona seswantšho seo se lego mathomong a sehlogo se.)

3 Jesaya 64:8 e hlalosa tsela yeo Jehofa a dirišago bolaodi  bja gagwe godimo ga batho le ditšhaba ka gore: “Wena Jehofa, o Tatago rena. Re letsopa gomme wena o Mmopi wa rena; ka moka ga rena re modiro wa seatla sa gago.” Mmopi a ka kgona go dira sebjana le ge e le sefe seo a se ratago ka letsopa la gagwe. Tabeng ye, letsopa le ka se botše mmopi seo a swanetšego go se dira. Boemo ke bjo swanago le tabeng ya motho le Modimo. Le rena ga re na tshwanelo ya go botša Modimo kamoo a swanetšego go re bopa ka gona, go fo etša ge letsopa le ka se dire seo ge le le diatleng tša mmopi wa lona.—Bala Jeremia 18:1-6.

4. Na Modimo o fo bopa batho goba ditšhaba ka tsela e nngwe le e nngwe? Hlalosa.

4 Jehofa o bontšhitše bokgoni bja gagwe bja seo mmopi a se dirago ge a bopa letsopa nakong ya ge a be a dirišana le Isiraele ya bogologolo. Eupša tabeng ye go na le phapano e kgolo. Mmopi a ka bopa selo le ge e le sefe seo a kgonago go se bopa ka letsopa. Na Jehofa o fo bopa batho goba ditšhaba ka tsela yeo ba bangwe e bago ba lokilego gomme ba bangwe e bago ba babe? Karabo ya Beibele potšišong yeo ke aowa. Jehofa o neile batho mpho e bohlokwahlokwa, e lego mpho ya go ikgethela. Ga a diriše bolaodi bja gagwe ka tsela yeo e paledišago batho gore ba thabele mpho yeo. Batho ba swanetše go ikgethela ge e ba ba nyaka go bopša ke Mmopi wa bona, Jehofa.—Bala Jeremia 18:7-10.

5. Ge batho ba gana go bopša ke Jehofa, o diriša bjang bolaodi bja gagwe godimo ga bona?

5 Go thwe’ng ge e ba batho ka bonganga ba gana go bopša ke Mmopi yo Mogolo? Maemong a bjalo, o diriša bjang bolaodi bja gagwe ka ge e le Mmopi? Akanya ka seo se diregago ka letsopa ge e ba le sa swanelegele morero wa lona. Mmopi a ka bopa mohuta o itšego wa sebjana ka letsopa leo goba a fo le lahla! Gantši ke phošo ya mmopi ge e ba letsopa le se sa na mohola. Tabeng ye, Mmopi wa rena a ka se tsoge a dirile phošo e bjalo. (Doit. 32:4) Ge motho a sa dumele go bopša ke Jehofa, ka mehla bothata ke bja yena motho yoo. Jehofa o diriša bolaodi bja gagwe bja go swana le bja mmopi bathong ka gore a fetoše tsela yeo a dirišanago le bona ka yona go ithekgile ka gore ba arabela ka tsela efe ge a ba bopa. Bao ba arabelago gabotse ge ba bopša ke yena ba a holega. Ka mohlala, Bakriste ba tloditšwego ke “[dibjana] tša kgaugelo” tšeo di ilego tša bopša go ba ‘dibjana bakeng sa tirišo e hlomphegago.’ Ka lehlakoreng le lengwe, bao ka bonganga ba ganetšanago le Modimo ba feleletša e le “dibjana tša kgalefo tšeo di dirilwego gore di swanelwe go fedišwa.”—Baroma 9:19-23.

6, 7. Tsela yeo Kgoši Dafida le Kgoši Saulo ba ilego ba arabela tayong ya Jehofa e fapana bjang?

 6 Tsela e nngwe yeo Jehofa a bopago batho ka yona ke ka keletšo goba tayo. Re kgona go bona kamoo a dirišago bolaodi bja gagwe godimo ga bao a ba bopago ka gore re ele hloko mohlala wa dikgoši tše pedi tša Isiraele, e lego Saulo le Dafida. Ge Kgoši Dafida a be a dira bohlotlolo le Batseba, ditiro tša gagwe di ile tša kgoma yena le batho ba bangwe gampe. Gaešita le ge Dafida e be e le kgoši, Jehofa ga se a ka a lesa go mo nea tayo e matla. Modimo o ile a romela moporofeta wa gagwe e lego Nathane go Dafida go tliša molaetša o matla. (2 Sam. 12:1-12) Dafida o ile a arabela bjang? O ile a kwa bohloko gomme a itshola. Modimo o ile a gaugela Dafida.—Bala 2 Samuele 12:13.

 7 Go fapana le seo, Kgoši Saulo yo a ilego a hlatlangwa ke Dafida, ga se a arabele gabotse tayong. Jehofa o ile a laela Saulo ka go lebanya a diriša moporofeta Samuele, a re: O fediše Baamaleke ka moka le diruiwa tša bona. Saulo ga se a kwa taelo ye e tšwago go Modimo. O ile a šokela kgoši Agaga gotee le diruiwa tše nonnego. Ka baka la’ng? Le lengwe la mabaka ke gore o be a nyaka go ikgodiša. (1 Sam. 15:1-3, 7-9, 12) Ge Saulo a be a eletšwa ka taba ye, o be a swanetše go nolofatša pelo ya gagwe gomme a itumelele go bopša ke Mmopi yo Mogolo. Go e na le moo, Saulo o ile a gana go fetoša tsela ya gagwe. O ile a lokafatša boitshwaro bja gagwe. O ile a nyenyefatša seo a se dirilego ka go bolela gore  mehlape yeo e be e ka dirišetšwa go ba dihlabelo, gomme a nyatša tayo ya Samuele. Jehofa o ile a amoga Saulo bogoši, e bile Saulo go tloga nakong yeo ga se a ka a lokiša tswalano ya gagwe le Modimo wa therešo.—Bala 1 Samuele 15:13-15, 20-23.

Saulo o ile a nyenyefatša keletšo gomme a e gana. O ile a gana go bopša ke tayo! (Bona serapa 7)

Dafida o ile a kwa bohloko gomme a amogela keletšo. O ile a dumelela Modimo gore a mmope. Na le wena o bjalo? (Bona serapa 6)

MODIMO GA A BEBE SEFAHLEGO

8. Re ka ithuta thuto efe tseleng yeo setšhaba sa Isiraele se ilego sa arabela ka yona ge Jehofa a be a se bopa?

8 Jehofa ga a nee feela batho sebaka sa gore ba bopše ke yena eupša gape o nea le ditšhaba sebaka seo. Ka 1513 B.C.E., Baisiraele ba ile ba lokollwa bokgobeng kua Egipita gomme ba tsena kgweranong le Modimo. Setšhaba sa Isiraele se be se kgethilwe ke Modimo e bile se na le tokelo ya go bopša ke yena, ka gona se ile sa ba bjalo ka ge eka se bopša ke seatla sa Mmopi yo Mogolo. Lega go le bjalo, se ile sa tšwela pele se dira dilo tše mpe mahlong a Jehofa, gomme sa ba sa rapela medimo ya ditšhaba tšeo di bego di se dikologile. Jehofa ka makga a mantši o ile a romela baporofeta gore ba lokiše ditsela tša bona eupša Baisiraele ga se ba ka ba theetša. (Jer. 35:12-15) Tsela ya Baisiraele ya bonganga e ile ya dira gore ba laiwe gabohloko. Go fo swana le sebjana seo se swanelwago ke go fedišwa, mmušo wa ka leboa wa meloko e lesome ya Isiraele o ile wa fenywa ke Baasiria gomme mmušo wa ka borwa wa meloko e mebedi wona wa fenywa ke Bababilona. Se se re ruta thuto e bohlokwa e le ruri! Go bopša ke Jehofa go tla re hola ge feela re arabela gabotse ge a re laya.

9, 10. Batho ba Ninife ba ile ba arabela bjang temošong ya Modimo?

9 Le gona Jehofa o ile a nea batho ba Ninife, e lego motsemošate wa Asiria, sebaka sa gore ba arabele temošong ya gagwe. Lentšu la gagwe le ile la tlela Jona, la re: “Tsoga o ye motseng  o mogolo wa Ninife, o o tsebiše gore bobe bja wona bo rotogetše pele ga ka.” Ninife e be e swanetše go fedišwa.—Jona 1:1, 2; 3:1-4.

10 Lega go le bjalo, ge Jona a be a tsebatša molaetša wa kahlolo, “batho ba Ninife [ba ile] ba thoma go dumela go Modimo, ba kwalakwatša gore go ikonwe dijo gomme go aparwe mekotla, go tloga ka yo mogolo go bona go ya go yo monyenyane.” Kgoši ya bona e ile ya “ema sedulong sa yona sa bogoši ya apola seaparo sa bogoši gomme ya apara mokotla ya dula meloreng.” Batho ba Ninife ba ile ba arabela maitekong a Jehofa a go ba bopa gomme ba ile ba itshola. Ka baka leo, Jehofa ga se a ba tlišetša masetlapelo ao.—Jona 3:5-10.

11. Ke seka sefe sa Jehofa seo se ilego sa bonagala gabotse ge a be a dirišana le setšhaba sa Isiraele le batho ba Ninife?

11 Gaešita le ge Baisiraele e be e le setšhaba sa gagwe se kgethilwego, seo se be se sa bolele gore a ka se ba laye. Ka lehlakoreng le lengwe, batho ba Ninife bona ba be ba se kgweranong le Modimo. Lega go le bjalo, Jehofa o ile a dira gore molaetša wa gagwe wa kahlolo o tsebatšwe go bona gomme a ba gaugela ge ba be ba itlhatsela go ba letsopa le boleta diatleng tša gagwe. Ruri mehlala ye e mebotse e bontšha gore Jehofa Modimo wa rena “ga a bebe sefahlego”!—Doit. 10:17.

JEHOFA O NA LE TEKATEKANO E BILE O FETOFETOGA LE MAEMO

12, 13. (a) Ke ka baka la’ng Modimo a fetoša diphetho tša gagwe ge batho ba arabela gabotse ge a ba bopa? (b) Taba ya gore Jehofa o ile a itshola goba a “šegama” e ile ya bolela’ng tabeng ya Saulo le tabeng ya Ninife?

12 Tsela yeo Modimo a ikemišeditšego go re bopa e bontšha gore o na le tekatekano e bile o fetofetoga le maemo. Se se ka bonwa maemong ao Jehofa a ilego a ikemišetša go gata mogato o itšego a laolwa ke kahlolo ya gagwe e lokilego, eupša a fetoša monagano wa gagwe ka ge batho ba arabetše gabotse tayong ya gagwe. Mabapi le kgoši ya pele ya Isiraele, Mangwalo a re botša gore Jehofa o ile a ‘itshola ge a ile a kgetha Saulo gore e be kgoši.’ (1 Sam. 15:11) Ge batho ba Ninife ba be ba itshola gomme ba sokologa tseleng ya bona e mpe, Beibele e re: “Modimo wa therešo a šegama ka baka la masetlapelo ao a bego a boletše gore o tla ba tlišetša wona; a se ke a a tliša.”—Jona 3:10.

13 Lentšu la Seheberu leo le fetoletšwego e le go itshola goba go “šegama” ge e le gabotse le tswalana le go fetoša ga motho boemo bja gagwe bja kgopolo goba maikemišetšo a gagwe. Mathomong Jehofa o be a amogela Saulo, eupša ge Saulo a be a gana go mo kwa, Modimo o ile a fetoša boemo bja gagwe bja kgopolo ka yena gomme a mo lahla. Go fetoga mo ga se gwa direga ka gobane Jehofa a dirile phošo ge a be a kgetha Saulo, eupša ke ka gobane Saulo o ile a dira dilo ka go se bontšhe tumelo gomme a se kwe Modimo. Tabeng ya batho ba Ninife, Modimo wa therešo o ile a šegama; ke gore, o ile a fetoša maikemišetšo a gagwe ka bona. Ruri go a homotša go tseba gore Mmopi wa rena Jehofa o na le tekatekano e bile o fetofetoga le maemo, o a šokela e bile o a gaugela, o ikemišeditše go fetoša tsela ya gagwe ge batho ba itshola!

ANKE RE SE HLASWE TAYO YA JEHOFA

14. (a) Jehofa o re bopa bjang lehono? (b) Re swanetše go arabela bjang ge re bopša ke Modimo?

14 Lehono Jehofa o re bopa ka Lentšu la gagwe Beibele le ka mokgatlo wa gagwe. (2 Tim. 3:16, 17) Na ga se ra swanela go amogela keletšo le ge e le efe goba tayo yeo re e hwetšago ka mekero ye? Go sa šetšwe gore re na le nywaga e mekae re kolobeditšwe goba re bile le ditokelo tša tirelo tše dintši gakaakang, re swanetše go tšwela pele re amogela keletšo yeo Jehofa a re neago yona, re e dumelele go re bopa gore re be dibjana tša tirišo e hlomphegago.

15, 16. (a) Ke maikwelo afe a fošagetšego ao a ka rotogago ge tayo e akaretša go lahlegelwa ke ditokelo? Bontšha. (b) Ke eng seo se ka re thušago go lebeletšana le maikwelo a fošagetšego ao a sepedišanago le tayo?

15 Tsela e nngwe yeo Modimo a re layago  ka yona e ka ba ka go re hlahla goba go re phošolla. Lega go le bjalo, ka dinako tše dingwe go ka nyakega gore re laiwe ka ge re dirile phošo. Tayo yeo e ka akaretša go lahlegelwa ke ditokelo. Ela hloko mohlala wa Dennis * yo a bego a hlankela e le mogolo. O ile a dira sebe ka baka la go hloka kahlolo e botse ditabeng tša kgwebo gomme a kgalemelwa ka sephiring. Dennis o ile a ikwa bjang mantšiboeng ao go bego go dirwa tsebišo phuthegong gore ga a sa hlwa a hlankela e le mogolo? O re: “Ke ile ka ikwa ke paletšwe e le ruri. Nywageng e 30 e fetilego, ke bile le ditokelo tše dintši. Ke be ke hlanketše ke le mmulamadibogo wa ka mehla, ke hlanketše Bethele, ka morago ka kgethwa go ba mohlanka wa bodiredi gomme ka feleletša ke le mogolo. Le gona ke be ke sa tšwa go nea polelo ya ka ya pele kopanong ya selete. Ka ponyo ya leihlo, ditokelo tšeo ka moka di be di se sa hlwa di le gona. Ka ntle le moo, ke ile ka ikwa ke lewa ke dihlong e bile ke nyamile, le gona ke be ke nagana gore ga ke sa hlwa ke na le mohola ka mokgatlong wa Jehofa.”

16 Dennis o ile a swanelwa ke go fetoša tsela ya gagwe ya bophelo gomme a furalele bobe bjoo bo ilego bja dira gore a phošollwe. Eupša ke eng seo se mo thušitšego go lebeletšana le maikwelo a fošagetšego? O hlalosa gore: “Ke be ke ikemišeditše go dula ke na le thulaganyo e botse ya dilo tša moya. Le gona selo se bohlokwa kudu e be e le thekgo yeo ke e hweditšego borwarreng bja Bokriste le kgothatšo e tšwago dikgatišong tša rena. Sehlogo se rego: ‘Na o Kile wa Hlankela? Na o ka Hlankela Gape?’ tokollong ya Morokami wa August 15, 2009, se be se swana le lengwalo le le lebišitšwego go nna leo le arabago dithapelo tša ka. Kgatišong yeo go be go na le keletšo yeo ke tlogago ke e tšeela godimo, e be e re: ‘Ge o sa dutše o se na boikarabelo bjo bo oketšegilego ka phuthegong, lebiša tlhokomelo tabeng ya go matlafatša tswalano ya gago le Jehofa.’” Dennis o ile a holwa bjang ke tayo yeo? O re: “Nywaga e sego kae ka morago ga moo, Jehofa o ile a ntšhegofatša gape ka tokelo ya go hlankela ke le mohlanka wa bodiredi.”

17. Go kgaolwa ga modiri wa bobe go ka mo thuša bjang gore a boele sekeng? Bontšha.

17 Go kgaolwa ke mohuta o mongwe wa tayo e tšwago go Jehofa. Go kgaolwa go šireletša phuthego ditutuetšong tše mpe e bile go ka dira gore modirabobe a boele sekeng. (1 Bakor. 5:6, 7, 11) Robert o ile a kgaolwa nywaga e ka bago e 16, gomme nakong yeo ka moka batswadi ba gagwe le bana babo ba ile ba kgomarela ka potego tlhahlo yeo e tšwago Lentšung la Modimo ya go lesa go gwerana le badiri ba bobe, go akaretša le go se dumediše batho ba bjalo. Ga bjale go fetile nywaga e mmalwa Robert a bušeditšwe e bile o dira tšwelopele moyeng. Ge a botšišwa gore o šušumeditšwe ke eng gore a boele go Jehofa le batho ba Gagwe ka morago ga nako e telele gakaakaa, o boletše gore mogato woo o gatilwego ke lapa labo o ile wa mo kgoma kudu. O oketša ka gore: “Ge nkabe lapa lešo le ile la gwerana le nna, gaešita le ka nakwana feela, mohlomongwe go mpotšiša matsogo, ga go pelaelo gore go ba le bona ka nakwana feela go ka ba go ile gwa nkgotsofatša e bile gwa dira gore kganyogo ya ka ya go gwerana le ditho tša phuthego e se be e matla moo ke bego nka nyaka go boela go Modimo.”

18. Re swanetše go itlhatsela re le letsopa la mohuta ofe ka diatleng tša Mmopi yo Mogolo?

18 Go ka no se nyakege gore rena re laiwe ka tsela e bjalo, eupša re tla itlhatsela re le letsopa la mohuta ofe ka diatleng tša Mmopi yo Mogolo? Re tla arabela bjang ge re laiwa? Na re tla swana le Dafida goba ra swana le Saulo? Tatago rena ke Mmopi yo Mogolo. Le ka mohla o se ke wa lebala gore “Jehofa o kgalema yo a mo ratago, go etša ge tate a kgalema morwa wa gagwe yo a mo ratago.” Ka gona, “o se ke wa gana tayo ya Jehofa; o se ke wa hlaswa kgalemelo ya gagwe.”—Die. 3:11, 12.

^ ser. 15 Maina a fetotšwe.