Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2013

Na o a Gopola?

Na o a Gopola?

Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

Go bula Beibele ka bofofu go bolela’ng, gomme Bakriste ba swanetše go go lebelela bjang?

Go bula Beibele ka bofofu ke mokgwa wa go fo bula Beibele gomme wa bala lengwalo leo o kopanago le lona la mathomo o na le tumelo ya gore mantšu ao a tla go nea tlhahlo e nyakegago. Bakriste ba therešo ga ba diriše dipheko. Go e na le moo, ba ithuta Beibele gore ba be le tsebo e nepagetšego le go hwetša tlhahlo ya Modimo.—12/15, letlakala 3.

Ke “lefase” lefe leo le tlago go feta?

“Lefase” leo le tlago go feta ke lefase la batho bao maphelo a bona a sa sepedišanego le thato ya Modimo. (1 Joh. 2:17) Go tla phologa polanete ye gotee le batho ba botegago.—1/1, matlakala 5-7.

Gaešita le ge Abele a hwile, ke ka tsela efe a sa dutšego a bolela le rena lehono? (Baheb. 11:4)

O bolela le rena ka tumelo ya gagwe. Re ka ithuta tumelong ya gagwe gomme ra e ekiša. Mohlala wa gagwe o sa dutše o phela.—1/1, letlakala 12.

Ke dibopegong dife moo re swanetšego go ba šedi gore re se tloge kgauswi le Modimo?

Tše dingwe tša tšona ke tše latelago: mešomo ya rena ya boiphedišo, boitapološo le boithabišo bjoo re bo kgethago, go gwerana le wa leloko yoo a kgaotšwego, go diriša ga rena gampe thekinolotši, go tshwenyega kudu ka boemo bja rena bja tša maphelo, pono e fošagetšego ka tšhelete le ka go etiša pele dipono tša rena goba maemo a rena.—1/15, matlakala 12-21.

Re ka ithuta eng boikokobetšong bja Moshe?

Go e na le go dumelela boikgogomošo gore bo mo laole, Moshe o ile a ithekga ka Modimo, e sego ka bohlale bja gagwe. Le ka mohla ga re nyake gore matla ao re nago le ona, bolaodi goba bokgoni bja tlhago di dire gore re ikgogomoše; go e na le moo, re nyaka go bota Jehofa. (Die. 3:5, 6)—2/1, letlakala 5.

Bahu bao ba tlago go tsošwa ba tlo dula kae?

Palo e sego kae ya ba 144 000 e tla dula legodimong. Lega go le bjalo, bontši bja bao ba tlago go tsošwa ba tla phela mo lefaseng, ba na le kholofelo ya go phela go lona ka mo go sa felego.—3/1, letlakala 6.

Taba ya gore Baisiraele ba be ba sa “bolla pelong” e bolela’ng? (Jer. 9:26)

Ba be ba ngangabaletše go rabela gomme ba be ba swanetše go tloša seo se bego se dira gore dipelo tša bona di ngangabale—dikgopolo tša bona, dilo tšeo ba di ratago goba maikemišetšo a bona ao a bego a thulana le melao ya Modimo. (Jer. 5:23, 24)—3/15, matlakala 9-10.

Ke ka tsela efe Jesu e bilego mohlala wa motho yo a phetšego bophelo bjo bo nago le morero?

O be a na le morero bophelong, morero wa go dira thato ya Modimo. O be a rata Tatagwe ka mo go feletšego, e bile o be a rata batho. Ka baka leo, Jesu o be a tseba gore Tatagwe o a mo rata e bile o a mo amogela. Tšeo ke tšona dinotlelo tšeo di lebišago bophelong bjo bo nago le morero.—4/1, matlakala 4-5.

Karolo ya lefaseng ya mokgatlo wa Modimo e akaretša’ng?

E akaretša Sehlopha se Bušago, dikomiti tša makala, balebeledi ba basepedi, dihlopha tša bagolo, diphuthego le Dihlatse e le motho ka o tee ka o tee.—4/15, letlakala 29.

Ke ka baka la’ng re ka bolela gore go phethagatša ga Modimo dikahlolo tša gagwe e be e se pontšho ya gore o sehlogo?

Jehofa ga a kgahlwe ke lehu la ba kgopo. (Hesek. 33:11) Ditiro tša gagwe tša nakong e fetilego di bontšha gore ka lerato o lemoša batho pele a ka phethagatša kahlolo ya gagwe. Se se ka re nea kholofelo ya gore re tla phologa dikahlolo tša nakong e tlago.—5/1, matlakala 5-6.

Na Baisiraele ba be ba bolaya disenyi ka go di fega koteng?

Aowa. Ditšhaba tše dintši mehleng ya bogologolo di be di dira seo, eupša e sego Baisiraele. Mehleng ya ge go be go ngwalwa Mangwalo a Seheberu, badiri ba bobe ba be ba thoma pele ka go bolawa, mohlomongwe ka go kgatlwa ka maswika. (Lef. 20:2, 27) Ke moka ditopo tša bona di be di ka fegwa koteng e le temošo go ba bangwe.—5/15, letlakala 13.

Ke ka baka la’ng batho ba sa kgone go tliša khutšo lefaseng?

Le ge batho ba fihleletše dilo tše dintši, ga ba kgone go laola dikgato tša bona. (Jer. 10:23) Sathane o laola lefase, ka gona batho ba ka se tsoge ba kgonne go tliša khutšo. (1 Joh. 5:19)—6/1, letlakala 16.