Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2013

Tšeela Godimo Kudu Dika tša Jehofa

Tšeela Godimo Kudu Dika tša Jehofa

“Ebang baekiši ba Modimo, le le bana ba ba rategago.”—BAEF. 5:1.

1. (a) Ke dika dife tša Jehofa tšeo Mokriste a ka di hlahlobago? (b) Re tla holega bjang ge e ba re ka hlahloba dika tša Modimo?

KE DIKA dife tšeo o di gopolago ge o thoma go nagana ka semelo sa Jehofa? Bontši bja rena re nagana ka lerato la gagwe, toka, bohlale le matla. Eupša re a lemoga gore Jehofa o na le dika tše dintši tše dibotse. Ge e le gabotse, re ka dira lelokelelo la dika tša Jehofa tše di fetago 40, gomme ka moka ga tšona di kile tša ahlaahlwa ka dikgatišong tša rena. Anke o fo nagana gore re ka utolla mahumo a mantši gakaakang a kgahlišago mabapi le semelo sa Jehofa ge re ka ithuta ka sona re le motho ka noši goba re le lapa! Re ka holega bjang ka go ithuta dika tše bjalo? Seo se ka dira gore re tšeele godimo kudu Tatago rena wa legodimong. Mafelelong, ge e ba re tšeela Jehofa godimo, gona kganyogo ya rena e kgolo e ba ya gore re mmatamele gomme re mo ekiše.—Josh. 23:8; Ps. 73:28.

2. (a) Bontšha kamoo re ka tšeelago dika tša Jehofa godimo kudu. (b) Re tlo hlahloba eng?

2 Lega go le bjalo, “go tšeela selo godimo” go bolela’ng? Go bolela go lemoga bohlokwa bja sona. Tekanyo yeo re tšeelago selo godimo e ka gola ganyenyane-ganyenyane. Ka mohlala: Tsela yeo re ratago sejo se itšego seo re thomago go se bona e ka oketšwa ke ge re ekwa monko wa sona, ke moka ra kwa tatso ya sona gomme ra feleletša re ikapeetše sona. Ka mo go swanago, re ka tšeela godimo kudu seka se itšego sa Jehofa ka go tlwaelana le sona, ra naganišiša ka sona gomme ra se diriša maphelong a rena. (Baef. 5:1) Morero wa sehlogo se le tše dingwe tše pedi tše di latelago ke go re thuša gore re tšeele godimo kudu dika tša Modimo tšeo gantši re sa kego re nagana ka tšona go swana le dika tša gagwe tše dikgolo. Ge re hlahloba se sengwe le se sengwe sa dika tše, re tla ipotšiša gore: Seka seo se bolela’ng? Jehofa o se bontšha bjang? Le gona re ka ekiša bjang Jehofa ge re diriša seka seo?

 JEHOFA O A BATAMELEGA

3, 4. (a) O ka hlalosa bjang motho yo a batamelegago? (b) Jehofa o kgonthišetšha bjang gore o a batamelega?

3 Anke re thomeng ka go hlahloba seka sa go batamelega. O ka hlalosa bjang motho yo a batamelegago? Mohlomongwe o ka re: ‘Ke motho yo botho, yo a hwetšagalago gabonolo e bile go le bonolo go boledišana le yena.’ Gantši o ka kgona go lemoga ge e ba motho a batamelega goba a se bjalo ka go ela hloko tsela yeo a dirago dilo ka yona, kudukudu dilo tšeo a di dirago ntle le go bolela.

4 Jehofa o bontšha bjang gore o a batamelega? Gaešita le ge e le Mmopi yo mogolo wa legohle ka moka, Jehofa o re kgonthišetša gore o ikemišeditše le go fagahlela go kwa dithapelo tša rena le go di araba. (Bala Psalme 145:18; Jesaya 30:18, 19.) Re ka bolela le Modimo ka nako le ge e le efe goba lefelong le ge e le lefe. Re ka mmatamela ka bolokologi, re tseba gore a ka se tsoge a re gobošitše ka baka la ge re dirile seo. (Ps. 65:2; Jak. 1:5) Lentšu la Modimo le hlalosa Jehofa ka tsela yeo rena batho re ka e kwešišago ka yona ge le bontšha gore o nyaka ge re mmatamela. Ka mohlala, mopsalme Dafida o ngwadile gore “mahlo a Jehofa a [re] lebeletše” le gore ‘seatla sa gagwe sa le letona se dula se re kakatletše.’ (Ps. 34:15; 63:8) Moporofeta Jesaya o ile a swantšha Jehofa le modiši ka go bolela gore: “O tla kgoboketša dikwana ka letsogo la gagwe; o tla di rwala sehubeng sa gagwe.” (Jes. 40:11) E fo nagana ka seo! Jehofa o nyaka gore re mmatamele go swana le ge kwana e kukilwe ke modiši yo a e hlokometšego. Ruri Tatago rena o a batamelega! Re ka ekiša bjang Jehofa tabeng ye?

SEKA SEO SE TŠEELWAGO GODIMO KUDU

5. Ke ka baka la’ng go le bohlokwa gore bagolo ba batamelege?

5 Moragonyana bjale, Dihlatse tše fišegago tšeo di dulago dikontinenteng tše fapafapanego di botšišitšwe gore: “Ke seka sefe seo o se tšeelago godimo go mogolo?” Bontši bja tšona di arabile ka gore: “Ge a batamelega.” Ke therešo gore Mokriste yo mongwe le yo mongwe o swanetše go hlagolela seka seo ka botlalo, eupša e tloga e le gabohlokwa gore bagolo ba batamelege. (Jes. 32:1, 2) Ge kgaetšedi yo mongwe  a be a bolela lebaka leo a naganago gore seka se e tloga e le se bohlokwa o itše: “Re ka kgona go holwa ke dika tše dingwe tše dibotse tša mogolo ge feela a batamelega.” Na o kgona go bona bohlale bja mantšu ao? Eupša ke eng seo se dirago gore motho a batamelege?

6. Ke eng seo se ka thušago motho gore a batamelege?

6 Selo se segolo seo se dirago gore motho a batamelege ke ge a kgahlegela batho go tšwa pelong. Ge e ba mogolo a tshwenyegile ka batho e bile a ikemišeditše go ikgafela bona, gona bana babo le dikgaetšedi, go akaretša le bafsa, ba tla lemoga seo. (Mar. 10:13-16) Carlos wa nywaga e 12 o re: “Ge ke le holong, ke bona bagolo ba myemyela e bile ba bontšha botho, gomme ke sona seo ke se ratago ka bona.” Go ba gona, ga se gwa lekana gore mogolo a bolele gore o a batamelega; o swanetše go bontšha seka seo. (1 Joh. 3:18) A ka dira bjang seo?

7. Ke ka baka la’ng petšhe ya kopano e gogela batho gore ba boledišane le rena, gomme re ithuta eng tabeng yeo?

7 Nagana ka mohlala wo. Moragonyana bjale, ngwanabo rena yo mongwe o be a hlomme petšhe ya gagwe ya kopano ge a boela gae ka sefofane ka morago ga ge a bile kopanong ya selete nageng e šele. Ge mošomi wa ka sefofaneng a bona petšhe yeo le mantšu a rego: “Mmušo wa Modimo a o tle!” o ile a mmotša gore: “Ee, a o tle—go nyakega gore re tle re boledišane ka taba yeo.” Ka moragonyana, ba ile ba boledišana gomme mošomi yoo a amogela dimakasine tša rena ka lethabo. Bontši bja rena re bile le diphihlelo tše di swanago le ye. Ke eng seo se dirago gore petšhe ya kopano gantši e gogele batho gore ba boledišane le rena? Ke ka gobane ka tsela e itšego e ba botša gore: “Ikwe o lokologile go bolela le nna. Mpotšiše gore ke ya kae.” Petšhe ke seka seo se bonagalago seo se botšago batho gore re ikemišeditše go boledišana le bona ka seo re se dumelago. Ka mo go swanago, bagolo ba Bakriste ba swanetše go ba le dika tše di bonagalago tšeo di botšago badumedigotee le bona gore: “Ikwe o lokologile go bolela le nna.” Dika tšeo ke dife?

8. Bagolo ba bontšha bjang gore ba tloga ba tshwenyegile ka batho ba bangwe, gomme seo se kgoma phuthego bjang?

8 Dilo tšeo batho ba tlwaetšego go di dira di fapane go ya ka dinaga, eupša gantši ge re myemyela le bana babo rena le dikgaetšedi, re ba dumediša ka seatla le go ba botšiša gore ba phetše bjang, re tla ba re ba bontšha gore re tloga re tshwenyega ka bona. Ke mang yo a swanetšego go gata mogato wa pele tabeng ye? Ela hloko mohlala woo Jesu a re beetšego wona. Mateo o bega gore sebokeng seo Jesu a bego a na le sona le barutiwa ba gagwe, o ile “a batamela a bolela le bona.” (Mat. 28:18) Ka mo go swanago, bagolo lehono ba gata mogato wa pele ka go batamela badumedigotee le bona gomme ba bolela le bona. Seo se ka kgoma phuthego bjang? Kgaetšedi yo mongwe wa mmulamadibogo yo a nago le nywaga e 88 o re: “Ke kwa ke rata bagolo le go feta ge ba myemyela le nna e bile ba mpotša mantšu a go nkgothatša ge ke tsena ka Holong ya Mmušo.” Kgaetšedi yo mongwe yo a botegago o okeditše ka gore: “Ba bangwe ba ka tšea taba ye e le e nyenyane, eupša ge mogolo a nkamogela sebokeng a myemyela, ke ikwa ke thabile kudu.”

BATAMELEGA O BE O HWETŠAGALE

9, 10. (a) Jehofa o re beela mohlala ofe o mobotse? (b) Bagolo ba ka ipha bjang nako gore ba hwetšagale go bana babo bona?

 9 Go molaleng gore re ka se batamelwe ke motho ge e ba re sa hwetšagale. Jehofa o bea mohlala o mobotse tabeng ye. “Ga a kgole le yo mongwe le yo mongwe wa rena.” (Dit. 17:27) Tsela e nngwe yeo bagolo ba hwetšagalago ka yona ke ka go ipha nako pele ga diboka tša Bokriste le ka morago ga tšona gore ba boledišane le bana babo bona le dikgaetšedi—ba bagolo le ba banyenyane. Ngwanabo rena yo mongwe wa mmulamadibogo o boletše gore: “Ge mogolo a mpotšiša matsogo gomme a ema gore a kwe karabo ya ka, seo se  dira gore ke ikwe ke le bohlokwa kudu.” Kgaetšedi yo a nago le nywaga e ka bago e 50 a hlankela Jehofa o boletše gore: “Bagolo bao ba iphago nako ya gore ba bolele le nna ka morago ga diboka ba dira gore ke ikwe ke le bohlokwa.”

10 Go a kwagala gore badiši ba Bakriste ba swanetše go dira le mediro e mengwe e bohlokwa. Lega go le bjalo, pakane ya bona dibokeng e swanetše go ba ya go hlokomela dinku pele.

JEHOFA GA A BEBE SEFAHLEGO

11, 12. (a) Go se bebe sefahlego go akaretša’ng? (b) Jehofa ke mohlala o mobotse go rena bjang tabeng ya go se bebe sefahlego?

11 Seka se sengwe se se kgahlišago sa Jehofa ke sa go se bebe sefahlego. Go se bebe sefahlego go bolela’ng? Go akaretša go dira dilo ka toka le go se bontšhe kgethollo. Go se bebe sefahlego e le ka kgonthe go bonagatšwa ke dilo tše tše pedi: boemo bja kgopolo le ditiro. Ke ka baka la’ng dilo tše ka bobedi di nyakega? Ka gobane ke feela ge motho a na le kgopolo ya go se bebe sefahlego moo a tlago go tutueletšega go swara batho bohle ka go se bebe sefahlego. Ka Mangwalong a Bakriste a Segerika, polelwana ‘go se bebe sefahlego’ ka go lebanya e bolela go se “nyatše motho yo mongwe” ka baka la ponagalo ya gagwe ya sefahlego. (Dit. 10:34; Kingdom Interlinear) Ka baka leo, motho yo a sa bebego sefahlego o tla hlompha motho ka baka la seo a lego sona, e sego ka baka la ponagalo ya gagwe goba maemo a gagwe.

12 Jehofa ke mohlala o mogologolo wa go se bebe sefahlego. Lentšu la gagwe le bolela gore “ga a bebe sefahlego.” (Bala Ditiro 10:34, 35; Doiteronomio 10:17.) Boemo bjo bo ilego bja rotoga mehleng ya Moshe bo bontšha taba yeo gabotse.

Barwedi ba Tselofehadi ba ile ba tšeela godimo go se bebe sefahlego ga Modimo (Bona dirapa 13, 14)

13, 14. (a) Ke bothata bofe bjoo barwedi ba bahlano ba Tselofehadi ba ilego ba lebeletšana le bjona? (b) Jehofa o ile a bontšha bjang gore ga a bebe sefahlego?

 13 Nakwana pele ga ge Baisiraele ba ka tsena Nageng ya Kholofetšo, barwedi ba bahlano ba monna yo mongwe bao ba sa nyalwago ba ile ba lebeletšana le nngalaba ya taba. Bothata e be e le eng? Ba be ba tseba gore ka go swana le malapa a mangwe ka moka a Isiraele, lapa la gabo bona le lona le be le tla newa naga yeo e bego e abetšwe tatago bona. (Num. 26:52-55) Lega go le bjalo, tatago bona e lego Tselofehadi wa moloko wa Manase, o be a hwile. Go ya ka molao, tshwanelo ya go tšea naga yeo e be e tla fetišetšwa go barwa ba Tselofehadi, eupša yena o be a na le barwedi feela. (Num. 26:33) Ka ge go be go se morwa yo a ka amogelago naga yeo, na naga ya lapa leo e be e tla newa ba leloko gomme barwedi bao ba šala ba se na bohwa bja lapa labo bona?

14 Barwedi bao ba bahlano ba ile ba batamela Moshe gomme ba mmotšiša gore: “Go re’ng leina la tatago rena le tlošwa lapeng la gagwe feela ka gobane a be a se na morwa?” Ba ile ba mo lopa ka gore: “Hle re neeng bohwa gare ga bana babo tatago rena.” Na Moshe o ile a ba kgaphela ka thoko ka go ba botša gore: ‘Ga go seo nka se dirago, molao ke molao’? Aowa, o ile “a iša taba ya bona pele ga  Jehofa.” (Num. 27:2-5) Moshe o ile a hwetša karabo efe? Jehofa o ile a botša Moshe gore: “Barwedi ba Tselofehadi ba a rereša. Ba nee bohwa gare ga bana babo tatago bona gomme o fetišetše bohwa bja tatago bona go bona.” Jehofa o ile a nea ditaelo tše dingwe gape. O ile a laela Moshe gore a ntšhe taelo e mpsha e rego: “Ge monna a ka hwa a se na morwa, gona le fetišetšeng bohwa bja gagwe go morwedi wa gagwe.” (Num. 27:6-8; Josh. 17:1-6) Go tloga ka nako yeo go ya pele, basadi ka moka ba Baisiraele bao ba bego ba lebeletšane le bothata bjo bo swanago le bjo ba be ba tla šireletšwa.

15. (a) Jehofa o swara batho ba gagwe bjang, kudukudu bao ba lego maemong a sa kgahlišego? (b) Ke dipego dife tše dingwe tša Beibele tšeo di bontšhago gore Jehofa ga a bebe sefahlego?

15 Yeo ruri e bile phetho e botho le ya go bontšha go se bebe sefahlego! Jehofa o ile a swara ka seriti basadi ba bao ba bego ba le boemong bjo sa kgahlišego, a ba swara go swana le Baisiraele bao maemo a bona a bego a kgahliša. (Ps. 68:5) Ye ke e nngwe ya dipego tše dintši tša ka Beibeleng tšeo di gatelelago therešo ye e thabišago pelo: Jehofa o swara bahlanka ba gagwe ka moka ka go se bebe sefahlego.—1 Sam. 16:1-13; Dit. 10:30-35, 44-48.

RE KA KGONA GO EKIŠA JEHOFA

16. Re ka hlagolela bjang le go matlafatša seka sa go se bebe sefahlego?

16 Re ka ekiša bjang go se bebe sefahlego ga Jehofa? Gopola gore go se bebe sefahlego go bonagatšwa ke dilo tše pedi. Ke feela ge re na le tshekamelo ya go se bebe sefahlego moo re tlago go tutueletšega go swara batho bohle ka go se bebe sefahlego. Ke therešo gore ka moka ga rena re ipona re na le tekatekano e bile re sa bebe sefahlego. Lega go le bjalo, mohlomongwe o tla dumela gore ga se ka mehla go lego bonolo go hlahloba maikwelo a rena ka potego. Ka gona ke eng seo re ka se dirago go tseba ge e ba re tumile ka go se bebe sefahlego? Ge Jesu a be a nyaka go tseba seo batho ba bego ba se nagana ka yena, o ile a botšiša bagwera ba gagwe bao a ba botago gore: “Batho ba re Morwa wa motho ke mang?” (Mat. 16:13, 14) Go ka ba bjang ge o ka ekiša Jesu tabeng ye? O ka botšiša mogwera wa gago yo o mmotago gore a go botše therešo ya ge e ba o tsebja o le motho yo a sa bebego sefahlego. Ge e ba a go botša gore o na le dika tšeo di bontšhago gore o kgetholla batho go ya ka morafo wa bona, maemo a bona setšhabeng le a ditšhelete, gona ke’ng seo o swanetšego go se dira? Tšhollela Jehofa maikwelo a gago ka thapelo tabeng ye, o mo lope gore a go thuše go lokiša boemo bja gago bja kgopolo e le gore o bonagatše ka botlalo seka sa gagwe sa go se bebe sefahlego.—Mat. 7:7; Bakol. 3:10, 11.

17. Ke ka ditsela dife re ka swarago ba bangwe ka go se bebe sefahlego?

 17 Ka phuthegong ya Bokriste, re bonagatša seka sa Jehofa sa go se bebe sefahlego ka gore re sware bana babo rena le dikgaetšedi ka moka ka seriti le ka botho. Ka mohlala, tabeng ya go amogela baeng, re katanela go laletša mehuta ka moka ya badumedigotee le rena, go akaretša le bao ditlogo tša bona di sa swanego le tša rena gotee le bao ba diilago, ditšhiwana goba bahlologadi. (Bala Bagalatia 2:10; Jakobo 1:27.) Godimo ga moo, ge re le modirong wa go bolela ka Mmušo wa Modimo, re botša batho ba ditlogo ka moka ditaba tše dibotse ka go se bebe sefahlego, go akaretša le bao ba tšwago dinageng dišele. Re tloga re thabišwa ke gore re na le dikgatišo tša Beibele ka maleme a ka bago 600. Bjoo ruri ke bohlatse bjo bo lego molaleng bja gore ga re bebe sefahlego!

18. Ke eng seo o tlago go se dira go bontšha gore o tšeela godimo go batamelega ga Jehofa le go se bebe ga gagwe sefahlego?

18 Ee, ge re dutše re fetša nako re naganišiša kamoo Jehofa a batamelegago ka gona e bile a sa bebego sefahlego, re mo tšeela godimo le go feta. Ge re tšeela Jehofa godimo ka tsela yeo, gona re tla feleletša re šušumeletšega go ekiša dika tša gagwe ka botlalo, ra di bonagatša ditirišanong tša rena le badumedigotee le rena go akaretša le go bao re ba botšago ditaba tše dibotse.

“Jehofa o kgauswi le bohle bao ba mmitšago.”—Ps. 145:18 (Bona serapa 9)

“Jehofa Modimo wa lena ke . . . yo a sa bebego sefahlego sa motho.”—Doit. 10:17 (Bona serapa 17)