Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2013

Tšeela Godimo go Botega ga Jehofa le go Lebalela ga Gagwe

Tšeela Godimo go Botega ga Jehofa le go Lebalela ga Gagwe

“Wena Jehofa o lokile e bile o ikemišeditše go lebalela; le gona botho bo atetše bohle bao ba go bitšago.”—PS. 86:5.

1, 2. (a) Ke ka baka la’ng re tšeela godimo bagwera bao ba botegago le bao ba lebalelago? (b) Ke dipotšišo dife tšeo re tlago go di ahlaahla?

O KA hlalosa bjang mogwera wa kgonthe? Kgaetšedi yo mongwe wa Mokriste yo a bitšwago Ashley o re: “Go ya ka nna, mogwera wa kgonthe ke motho yoo ka mehla a go thekgago gomme a go lebalelago ge o dira diphošo.” Ka moka ga rena re tšeela godimo bagwera bao ba botegago le bao ba lebalelago. Ba dira gore re ikwe re šireletšegile e bile re ratwa.—Die. 17:17.

2 Jehofa ke Mogwera yo a botegago le go lebalela kudu go feta le ge e le ofe yo re ka bago le yena. O bjalo ka ge mopsalme a boletše gore: “Wena Jehofa o lokile e bile o ikemišeditše go lebalela; le gona botho bo atetše bohle bao ba go bitšago.” (Ps. 86:5) Go bolela’ng gore motho o a botega e bile o a lebalela? Jehofa o bonagatša bjang dika tšeo tše dibotse? Le gona re ka ekiša bjang mohlala wa gagwe? Dikarabo tša dipotšišo tšeo di tla matlafatša tsela yeo re ratago Mogwera wa rena yo mogolo ka yona, Jehofa. Di tla re thuša le gore re matlafatše segwera sa rena le ba bangwe.—1 Joh. 4:7, 8.

JEHOFA O A BOTEGA

3. Go botega go bolela’ng?

3 Go botega ke seka se borutho seo se akaretšago kgopolo ya boineelo, go rereša le go bota ka tsela e tsepamego. Motho yo a botegago ga a šišinyege gabonolo. Go e na le moo, o ikgomaretša ka lerato mothong yo itšego (goba selong se itšego) go sa šetšwe maemo a thata ao a tšwelelago. Ee, Jehofa ke “Mmotegi” yo mogolo.—Kut. 16:5.

4, 5. (a) Jehofa o bontšha bjang gore o a botega? (b) Re ka matlafatšwa bjang ke go naganišiša ka ditiro tša Modimo tša go bontšha gore o a botega?

4 Jehofa o bontšha bjang gore o a botega? Le ka mohla ga a lahle barapedi ba gagwe ba botegago. Yo mongwe wa barapedi bao, e lego Kgoši Dafida, o ile a hlatsela go botega ga Jehofa. (Bala 2 Samuele 22:26.) Ge Dafida a  be a lebeletšane le diteko, Jehofa ka potego o ile a mo hlahla, a mo šireletša le go mo hlakodiša. (2 Sam. 22:1) Dafida o be a tseba gore Jehofa o be a bontšha ka ditiro gore o a botega. Ke ka baka la’ng Jehofa a ile a botegela Dafida? Ke ka gobane Dafida ka boyena e be e le “yo a botegago.” Jehofa o tšeela godimo potego ya barapedi ba gagwe, gomme o ba putsa ka gore le yena a ba botegele.—Die. 2:6-8.

5 Re ka matlafatšwa ke go naganišiša ka ditiro tša Jehofa tša go bontšha gore o a botega. Ngwanabo rena yo mongwe yo a botegago yo a bitšwago Reed o re: “Ke holega kudu ge ke bala kamoo Jehofa a ilego a dirišana le Dafida ka gona dinakong tša tlalelo. Gaešita le nakong ya ge Dafida a be a tšhaba, a phela ka ntle le ka gare ga mawa, Jehofa o ile a mo thekga ka mehla. Seo ruri se kgothatša kudu! Se nkgopotša gore go sa šetšwe gore maemo ke afe, go sa šetšwe gore boemo bjo ke lego go bjona bo bonala bo se na kholofelo, Jehofa o tla nthekga ge feela ke dula ke mmotegela.” Ga go pelaelo gore le wena o ikwa ka tsela yeo.—Baroma 8:38, 39.

6. Jehofa o bontšha ka ditsela dife tše dingwe gore o a botega, gomme seo se hola bjang barapedi ba gagwe?

6 Jehofa o bontšha ka ditsela dife tše dingwe gore o a botega? O dula a kgomaretše ditekanyetšo tša gagwe. O re kgonthišetša gore: “Gaešita le botšofading bja motho ke dula e le Nna wa ka mehla.” (Jes. 46:4) Ka mehla o dira diphetho motheong wa ditekanyetšo tša gagwe tše di sa fetogego tša seo se nepagetšego le se se fošagetšego. (Mal. 3:6) Go oketša moo, Jehofa o bontšha go botega ga gagwe ka gore a phelele seo a se holofeditšego. (Jes. 55:11) Ka baka leo, potego ya Jehofa e hola barapedi ba gagwe ka moka ba botegago. Seo se kgonega bjang? Ge e ba re dira sohle seo re se kgonago go kgomarela ditekanyetšo tša Jehofa, gona re ka kgodišega gore o tla phethagatša kholofetšo ya gagwe ya gore o tla re šegofatša.—Jes. 48:17, 18.

EKIŠA POTEGO YA JEHOFA

7. Tsela e nngwe yeo re ka ekišago potego ya Modimo ka yona ke efe?

 7 Re ka ekiša bjang potego ya Jehofa? Tsela e nngwe ke ka gore re thuše bao ba lebeletšanego le maemo a boima. (Die. 3:27) Ka mohlala, na o tseba modumedigotee le wena yo a nyamilego, mohlomongwe e le ka baka la bolwetši, kganetšo ya ka lapeng goba mafokodi a gagwe? Ke ka baka la’ng o sa gate mogato wa pele ka gore o botše motho yo bjalo “mantšu a mabotse le a homotšago.” (Sak. 1:13) * Ge e ba o dira bjalo, o tla ba o bontšha gore o mogwera yo a botegago le wa kgonthe, yoo a “kgomarelago motho go phala ngwanabo.”—Die. 18:24.

8. Re ka ekiša bjang potego ya Jehofa manyalong a rena le ditabeng tše dingwe?

8 Le gona re ka ekiša potego ya Jehofa ka go dula re botegela bao re ba ratago. Ka mohlala, ge e ba o le lenyalong, o a tseba gore o swanetše go dula o botegela molekane wa gago. (Die. 5:15-18) Ka gona re phema le dilo tšeo di ka lebišago bohlotlolong. (Mat. 5:28) Go oketša moo, re botegela badumedigotee le rena ka go phema lesebo le kotsi goba go ba thomeletša, ra gana go phatlalatša ditaba tše bjalo goba gaešita le go di theetša.—Die. 12:18.

9, 10. (a) Ke mang yoo ka mo go kgethegilego re nyakago go mmotegela? (b) Ke ka baka la’ng go kwa ditaelo tša Jehofa go ka se be bonolo ka mehla?

9 Ka godimo ga tšohle, re nyaka go dula re botegela Jehofa. Re dira seo bjang? Ka go katanela go lebelela ditaba kamoo a di lebelelago ka gona—ra rata seo a se ratago gomme ra hloya seo a se hloilego—ke moka ra itshwara ka yona tsela yeo. (Bala Psalme 97:10.) Ge e ba re tšwela pele re dumelelanya dikgopolo tša rena le maikwelo a rena le dikgopolo tša Jehofa le maikwelo a gagwe, ke moo re  tlago go rata go kwa ditaelo tša gagwe.—Ps. 119:104.

10 Ke therešo gore go ka se be bonolo ka mehla go kwa ditaelo tša Jehofa. Go ka nyakega gore re lwe ka thata gore re dule re botega. Ka mohlala, Bakriste ba bangwe bao ba sego lenyalong ba ka rata go tsena lenyalong, eupša ga se ba tšwa ba hwetša molekane yo a ba swanetšego gare ga barapedi ba Jehofa. (1 Bakor. 7:39) Kgaetšedi yo a sa nyalwago a ka lemoga gore bašomimmogo le yena ba sa dumelego ba dula ba leka go mo kopanya le batho bao ba nyakago a ratana le bona. Kgaetšedi a ka ba a elwa le maikwelo a go lewa ke bodutu. Lega go le bjalo, o dira sohle seo a ka se kgonago gore a botegele Jehofa. Na ga re tšeele godimo mehlala e bjalo e mebotse ya potego? Ga go pelaelo gore Jehofa o tla putsa bohle bao ba dulago ba mmotegela go sa šetšwe mathata.—Baheb. 11:6.

“Go na le mogwera yo a kgomarelago motho go phala ngwanabo.”—Die. 18:24 (Bona serapa 7)

“Le lebalelane ka bolokologi.”—Baef. 4:32 (Bona serapa 16)

JEHOFA O A LEBALELA

11. Go lebalela go bolela’ng?

11 Se sengwe sa dika tše di kgahlišago kudu tša Jehofa ke sa go ikemišetša ga gagwe go lebalela. Go lebalela go bolela’ng? Ge e le gabotse, go bolela go swarela mofoši ge e ba go na le lebaka la go dira seo. Seo ga se re gore motho yo a lebalelago o lokafatša molato woo goba o gana gore o dirilwe. Go e na le moo, o kgetha gore a se ke a boloka sekgopi. Mangwalo a re ruta gore Jehofa “o ikemišeditše go lebalela” bao ba itsholago go tšwa pelong.—Ps. 86:5.

12. (a) Jehofa o lebalela ka tsela efe? (b) Go ‘phumolwa’ ga dibe tša motho go bolela’ng?

12 Jehofa o bontšha bjang gore o a lebalela? Ge Jehofa a lebalela motho, o mo “lebalela kudu”; o mo lebalela ka mo go feletšego le sa ruri. (Jes. 55:7) Re tseba bjang gore Jehofa o lebalela ka mo go feletšego? Ela hloko mantšu a kgothatšago a hwetšwago go Ditiro 3:19. (Bala.) Moapostola Petro o ile a kgothaletša batheetši ba gagwe gore ba ‘itshole gomme ba sokologe.’ Ge modiradibe a itshola go tšwa pelong, o tloga a nyamišitšwe ke tsela ya gagwe e mpe. Le gona o ikemišeditše gore a se bušeletše sebe sa gagwe. (2 Bakor. 7:10, 11) Go oketša moo, boitsholo bja kgonthe bo šušumeletša modiradibe gore a “sokologe,” a  lahle tsela ya gagwe e fošagetšego gomme a phegelele yeo e thabišago Modimo. Ge e ba batheetši ba Petro ba be ba tla bonagatša boitsholo bjo bjalo bjo tšwago pelong, seo se be se tla feleletša ka eng? Petro o boletše gore ba be ba tla dira gore dibe tša bona di “phumolwe.” Lentšu leo le tšwa lentšung la Segerika leo le bolelago “go tloša selo ka mo go feletšego.” Ka gona ge Jehofa a lebalela motho, o mo lebalela ka mo go feletšego.—Baheb. 10:22; 1 Joh. 1:7.

13. Mantšu a gore “nka se sa gopola sebe sa bona” a re kgonthišetša ka eng?

13 Re tseba bjang gore Jehofa o lebalela motho sa ruri? Ela hloko boporofeta bja Jeremia bja mabapi le kgwerano e mpsha yeo e dirilwego le Bakriste ba tloditšwego, e lego yeo e dirago gore tebalelo ya kgonthe e kgonege go bao ba bontšhago tumelo sehlabelong sa topollo. (Bala Jeremia 31:34.) Jehofa o re: “Ke tla ba lebalela molato wa bona gomme nka se sa gopola sebe sa bona.” Ka gona Jehofa o re kgonthišetša gore ge a re lebaletše, a ka se boe gape nakong e tlago go tlo re otlela dibe tšeo. Ga a fatolle dibe e le gore a re latofatše goba a re otle gantši le gantši. Go e na le moo, Jehofa o re lebalela dibe tše bjalo gomme a di lebala sa ruri.—Baroma 4:7, 8.

14. Re ka homotšwa bjang ke go naganišiša ka tebalelo ya Jehofa? Nea mohlala.

14 Re ka homotšwa ke go naganišiša ka tebalelo ya Jehofa. Ela hloko mohlala o latelago. Nywaga e mentši e fetilego, kgaetšedi yo mongwe yoo re tlago go mmitša Elaine o ile a kgaolwa. Nywaga e sego kae ka morago o ile a bušetšwa. Elaine o dumela gore: “Gaešita le ge ke be ke ipotša gore Jehofa o ntebaletše e bile ke botša le ba bangwe seo, ka mehla ke be ke ikwa eka ka tsela e itšego o kgole kudu le nna gomme ba bangwe ba kgauswi le yena e bile ke wa kgonthe go bona.” Lega go le bjalo, Elaine o ile a homotšwa ke go bala le go naganišiša ka tše dingwe tša diswantšho tšeo Beibele e di dirišago go hlalosa tebalelo ya Jehofa. Elaine o oketša ka gore: “Ke ile ka kwa lerato la Jehofa le botho bja gagwe go nna ka tsela yeo ke sa kago ka ekwa peleng.” O ile a kgothatšwa kudu ke kgopolo e rego: “Ge Jehofa a re lebalela dibe, ga se ra swanela go ikwa eka re na le sepatso sa dibe tšeo bophelong bja rena ka moka.” * Elaine o re: “Ke ile ka lemoga gore ke be ke sa dumele gore Jehofa a ka ntebalela ka mo go feletšego, gomme ke be ke nagana gore ke tla rwala morwalo woo bophelo bja ka ka moka. Ke a tseba gore seo se tla tšea nako, eupša ke thoma go bona gore ruri nka kgona go batamela kgauswi le Jehofa, e bile ke ikwa ke imolotšwe morwalo.” Re tloga re hlankela Modimo yo a nago le lerato le yo a lebalelago!—Ps. 103:9.

EKIŠA TEBALELO YA JEHOFA

15. Re ka ekiša bjang tsela ya Jehofa ya go lebalela?

15 Re ka ekiša tebalelo ya Jehofa ka go kgetha go lebalelana neng le neng ge go na le motheo wa gore re dire seo. (Bala Luka 17:3, 4.) Gopola gore ge Jehofa a lebalela batho, o lebala dibe tša bona ka kgopolo ya gore ga a boe ka morago gore a ba sekišetše tšona. Le rena ge re lebalela ba bangwe, re ka lebala dibe tšeo ka go se sa tshwenyega ka tšona le ka go se di tsoše gape nakong e tlago.

16. (a) Na go ba bao ba lebalelago go bolela gore re lokafatše melato yeo goba re dumelele ba bangwe ba re namela hlogong? Hlalosa. (b) Ke eng seo re swanetšego go se dira ge e ba re tla lebalelwa ke Modimo?

 16 Go ba bao ba lebalelago ga go bolele gore re lokafatša melato yeo goba go dumelela ba bangwe gore ba re namele hlogong. Aowa. Go bolela gore re kgetha go se boloke sekgopi. Lega go le bjalo, selo se sengwe se bohlokwa ke gore ge e ba Jehofa Modimo a tla re lebalela, gona re swanetše go ekiša tebalelo ya gagwe ditirišanong tša rena le ba bangwe. (Mat. 6:14, 15) Ge e le gabotse, kwelobohloko e šušumeletša Jehofa gore a gopole gore “re lerole.” (Ps. 103:14) Ka gona, na  kwelobohloko ga se ya swanela go re šušumeletša gore re naganele mafokodi a ba bangwe, re ba lebalele ka bolokologi go tšwa pelong?—Baef. 4:32; Bakol. 3:13.

Anke dithapelo tša rena tša go kgopela tebalelo di tšwe pelong (Bona serapa 17)

17. Ke eng seo se ka re thušago ge e ba re kwešitšwe bohloko ke modumedigotee le rena?

 17 Therešo ke gore ga go bonolo ka mehla go lebalela ba bangwe. Gaešita le Bakriste ba bangwe ba tloditšwego lekgolong la pele la nywaga ba ile ba thatafalelwa ke go lokiša diphapano tša bona le ba bangwe. (Bafil. 4:2) Ke eng seo se ka re thušago ge e ba re kwešitšwe bohloko ke modumedigotee le rena? Ela hloko mohlala wa Jobo. O be a kwešitšwe bohloko ke bao ba bego ba ipitša bagwera ba gagwe—Elifase, Bilidada le Tsofara—bao ba ilego ba mo phara ka ditatofatšo tša maaka. (Jobo 10:1; 19:2) Mafelelong, Jehofa o ile a kgala balatofatši bao ba maaka. Modimo o ile a ba laela gore ba ye go Jobo gomme ba neele sehlabelo bakeng sa dibe tša bona. (Jobo 42:7-9) Eupša Jehofa o ile a ba a nyaka gore Jobo a dire selo se sengwe. Selo seo e be e le sefe? Jehofa o ile a laela Jobo gore a rapelele banna bao ba bego ba mo latofaditše. Jobo o ile a dira seo Jehofa a bego a mo kgopetše go se dira, gomme Jehofa o ile a mo šegofatša ka baka la moya wa gagwe wa go lebalela. (Bala Jobo 42:10, 12, 16, 17.) Re ithuta eng tabeng ye? Ge e ba re ka rapelela ka pelo ka moka motho yo a re senyeditšego, gona seo se tla re thuša gore re se boloke sekgopi.

TŠWELA PELE O TŠEELA GODIMO DIKA TŠA JEHOFA KA BOTLALO

18, 19. Re ka tšwela pele bjang re tšeela godimo kudu semelo se se kgahlišago sa Jehofa?

18 Ruri e bile mo go lapološago go rena gore re hlahlobe dika tše di fapafapanego tša semelo se se rategago sa Jehofa. Re bone gore o a batamelega, ga a bebe sefahlego, o na le seatla se se bulegilego, o na le tekatekano, o a botega e bile o a lebalela. Go ba gona, re boletše ka tše sego kae feela. Re tla thabela go ithuta mo go oketšegilego ka Jehofa ka mo go sa felego. (Mmo. 3:11) Re dumelelana le moapostola Paulo, yo a ngwadilego gore: “A bodiba bja mahumo a Modimo, bohlale le tsebo!” Re ka bolela se se swanago ka lerato la Modimo le dika tše tshela tšeo re di hlahlobilego dihlogong tše.—Baroma 11:33.

19 Eka ka moka ga rena re ka tšwela pele re tšeela godimo kudu semelo se se kgahlišago sa Jehofa. Re ka dira seo ka go tlwaelana le dika tša gagwe, ra naganišiša ka tšona gomme ra di diriša maphelong a rena. (Baef. 5:1) Ge re dutše re dira seo, ga go pelaelo gore re tla dumelelana kudu le go feta le mopsalme yo a opetšego ka gore: “Ge e le nna ke kgahlwa ke go batamela Modimo.”—Ps. 73:28.

^ ser. 7 Bakeng sa ditšhišinyo tše di holago tabeng ye, bona sehlogo seo se rego: “Na o Ile wa Kgothatša Motho le ge e le Ofe Morago Bjale?” ka go tokollo ya Morokami wa January 15, 1995, le seo se rego: “Hlohleletšanang Leratong le Medirong e Mebotse—Bjang?” ka go tokollo ya April 1, 1995.