Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2013

Dipotšišo tše Tšwago go Babadi

Dipotšišo tše Tšwago go Babadi

“Barwa ba Modimo wa therešo” bao go boletšwego ka bona go Genesi 6:2, 4 bao ba phetšego pele ga Meetsefula ke bomang?

Re na le bohlatse bja gore polelwana ye e bolela ka barwa ba Modimo ba moya. Eupša bohlatse bjoo ke bofe?

Temana ya pele go ditemana tšeo e balega ka gore: “Barwa ba Modimo wa therešo ba lemoga gore barwedi ba batho e be e le ba babotse; ba ya ba itšeela basadi gare ga bona, ba itšeela bohle bao ba ikgethelago bona.”—Gen. 6:2.

Mangwalong a Seheberu, dipolelwana “barwa ba Modimo wa therešo” le “barwa ba Modimo” di tšwelela go Genesi 6:2, 4; Jobo 1:6; 2:1; 38:7; le go Psalme 89:6. Mangwalo a a bontšha eng ka “barwa [ba] ba Modimo”?

“Barwa ba Modimo wa therešo” bao re balago ka bona go Jobo 1:6 go bonagala gabotse gore ke dibopiwa tša moya tšeo di bego di bokane pele ga Modimo. Gare ga bona go be go na le Sathane, yo a bego a dutše a “ralala le lefase.” (Jobo 1:7; 2:1, 2) Ka tsela e swanago, go Jobo 38: 4-7, re bala ka “barwa ba Modimo” bao ba ilego ba “gobela ka go hlalala” ge Modimo a be a ‘bea leswika la sekhutlo’ la lefase. E swanetše go ba e be e le barongwa, ka lebaka la gore batho ba be ba sa tšwa ba bopša ka nako yeo. Ga go pelaelo gore “barwa ba Modimo” bao go bolelwago ka bona go Psalme 89:6 e be e le dibopiwa tša moya tša legodimong tšeo di nago le Modimo, e sego batho.

Ka gona, “barwa ba Modimo wa therešo” bao go bolelwago ka bona pegong ya Genesi 6:2, 4 ke bomang? Ka go dumelelana le dintlha tša ditemana tša Beibele tšeo re šetšego re boletše ka tšona, ke mo go kwagalago go phetha ka gore pego ye e bolela ka barwa ba Modimo ba moya bao ba ilego ba tla lefaseng.

Ba bangwe ga ba nape ba dumela gore barongwa ba ka kganyoga go ba le dikopano tša botona le botshadi. Mantšu a Jesu a begilwego go Mateo 22:30 a bontšha gore legodimong ga go na lenyalo le dikopano tša botona le botshadi. Eupša barongwa ka dinako tše dingwe ba ile ba ikapeša mebele ya batho, ba ja e bile ba nwa le bona. (Gen. 18:1-8; 19:1-3) Ka lebaka leo, go a kwagala go phetha ka gore ge ba ikapešitše mebele ya batho, ba be ba ka robala le basadi.

Go na le mabaka a theilwego Beibeleng ao a dirago gore re dumele gore barongwa ba bangwe ba ile ba ba le dikopano tša botona le botshadi. Juda 6, 7 e bapiša sebe sa banna ba Sodoma, bao ba ilego ba phegelela dikganyogo tša nama tšeo e sego tša tlhago, le sa “barongwa bao ba sa kago ba boloka boemo bja bona bja pele, eupša ba tlogetše bodulo bja bona bjo bo swanetšego.” Selo setee seo barongwa ba le Basodoma ba ba bego ba swana ka sona ke gore ba be ba ‘ineetše boitshwarong bjo bo gobogilego gomme ba phegelela dikganyogo tša nama tšeo e sego tša tlhago.’ Temana e swanago ya 1 Petro 3:19, 20 e tswalanya barongwa ba sa kwego le ‘mehla ya Noa.’ (2 Pet. 2:4, 5) Ka gona, mokgwa wa bophelo wa barongwa ba go se kwe ba mehleng ya Noa o ka swantšhwa le sebe sa Sodoma le Gomora.

Phetho e bjalo e tloga e kwagala gabotse ge re lemoga gore “barwa ba Modimo wa therešo” bao go boletšwego ka bona go Genesi 6:2, 4 e be e le barongwa bao ba ilego ba ikapeša mebele ya batho gomme ba itshwara ka tsela e gobogilego le basadi.

 Beibele e re Jesu o ile a “yo bolela le meoya yeo e bego e le kgolegong.” (1 Pet. 3:19) Na se se bolela eng?

Moapostola Petro o bolela ka meoya ye e le bao ba “ kilego [ba] se kwe ge Modimo a be a letile ka go se fele pelo mehleng ya Noa.” (1 Pet. 3:20) Go bonagala gabotse gore Petro o be a bolela ka dibopiwa tša moya tšeo di ilego tša kgetha go latela borabele bja Sathane. Juda o bolela ka barongwa “bao ba sa kago ba boloka boemo bja bona bja pele, eupša ba tlogetše bodulo bja bona bjo bo swanetšego,” gomme o re Modimo “o ba bolokile ditlemong tša neng le neng kgamping ya leswiswi go fihlela ge ba tlo ahlolwa letšatšing le legolo.”—Juda 6.

Ke ka tsela efe dibopiwa tša moya di sa kago tša theetša mehleng ya Noa? Pele ga Meetsefula, dibopiwa tše tše kgopo tša moya di ile tša ikapeša mebele ya nama, e lego selo seo Modimo a sa kago a ba rerela sona. (Gen. 6:2, 4) Go oketša moo, barongwa bao ba bego ba robala le basadi ba be ba dira selo seo e sego sa tlhago. Modimo ga se a ka a bopa dibopiwa tše tša moya gore di be le dikopano tša botona le botshadi le basadi. (Gen. 5:2) Barongwa ba ba kgopo ba go se kwe, ba tla fedišwa ka nako yeo Modimo a e beilego. Ga bjale ka ge Juda a boletše, boemo bja bona ke bja ‘kgampi ya leswiswi,’ bjo go ka thwego ke kgolego ya moya.

Jesu o ile a bolela neng le “meoya yeo e lego kgolegong,” gona ka tsela efe? Petro o ngwadile gore se se diragetše ka morago ga gore Jesu ‘a phedišwe moyeng.’ (1 Pet. 3:18, 19) Le gona, ela hloko gore Petro o re Jesu o ile “a yo bolela.” Go diriša ga Petro lebaka le le fetilego go šišinya gore go bolela moo go diragetše pele Petro a ngwala lengwalo la gagwe la pele. Ka gona, go bonagala eka neng neng ka morago ga tsogo ya gagwe, Jesu o ile a bolela le meoya ye e kgopo mabapi le kotlo e feletšego yeo e e swanetšego yeo e tlago go e hwetša. O be a sa e botše molaetša woo o e neago kholofelo. E be e le molaetša wa kahlolo. (Jona 1:1, 2) Gateetee ka morago ga gore Jesu a bontšhe tumelo ya gagwe le potego ya gagwe go fihla lehung gomme a tsošitšwe bahung—a bontšhitše gabotse gore Diabolo a ka se mo dire selo—Jesu o be a na le tokelo ya go bolela kahlolo yeo.—Joh. 14:30; 16:8-11.

Nakong e tlago, Jesu o tla tlema le go lahlela Sathane gotee le barongwa bao sekoting. (Luka 8:30, 31; Kut. 20:1-3) Go ba go fihla nakong yeo, meoya yeo e sa kwego e tla ba boemong bja leswiswi la moya gomme phedišo ya yona ya mafelelo e kgonthišeditšwe.—Kut. 20:7-10.