Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) JUNE 2013

Bagolo—Na le tla Lapološa “Moya o Lapilego”?

Bagolo—Na le tla Lapološa “Moya o Lapilego”?

Angela, * e lego kgaetšedi yo a sa nyalwago yo a lego nywageng ya bo-30, o bonagala a tšhogile. O letetše go kopana le bagolo. Ke eng seo ba tlago go mmotša sona? Ke therešo gore o ile a foša diboka tše sego kae, eupša o lapile kudu ka morago ga gore a šome letšatši ka moka a hlokometše batšofadi. Go oketša dipelaelong tša gagwe tša letšatši le letšatši, o tshwenywa kudu ke boemo bja mmagwe bja tša maphelo.

Ge e ba o be o etela Angela, o be o tla kgothatša bjang ‘moya wo o lapilego’? (Jer. 31:25) Sa pele, o be o tla lokišetša bjang leeto la bodiši leo le lapološago?

NAGANA KA MAEMO A BANA BENO

Ka dinako tše dingwe, ka moka ga rena re lapišwa ke mešomo ya rena ya boiphedišo goba boikarabelo bja ka phuthegong. Ka mohlala, moporofeta Daniele o ile a ‘ikwa a lapile kudu’ nakong ya ge a bona pono yeo a bego a sa kgone go e kwešiša. (Dan. 8:27) Ka moragonyana, o ile a thušwa ke morongwa Gabariele yo a ilego a tšwelela ponong yeo. Morongwa yo wa Modimo o ile a thuša Daniele gore a kwešiše pono yeo, a mo kgonthišetša gore dithapelo tša gagwe di kwelwe ke Jehofa e bile a mmotša gore e sa dutše e le “motho yo a rategago kudu.” (Dan. 9:21-23) Lebakeng le lengwe ka morago ga moo, mantšu ao a kgethilwego gabotse ao a ilego a bolelwa ke morongwa yo mongwe a ile a matlafatša moporofeta yoo yo a bego a lapile.—Dan. 10:19.

Pele ga ge le ka dira leeto la bodiši, hlahlobang maemo a modumedigotee le lena

Ka mo go swanago, pele ga gore o etele modumedigotee le wena yo a ka bago a lapile goba a nolegile moko, iphe nako ya go nagana ka maemo a gagwe. Ipotšiše gore: Ke mathata afe ao a lebeletšanago le ona? Mathata ao a ka ba a mo fetša matla ka tsela efe? O na  le dika dife tše dibotse? Richard, yo a nago le nywaga ya ka godimo ga e 20 a hlankela e le mogolo, o re: “Ke šetša kudu dika tše dibotse tša bana bešo.” O oketša ka gore: “Ka go ela hloko maemo a bona pele ga ge nka ba etela, ke nolofalelwa ke go nyaka ditsela tšeo ka tšona nka ba neago kgothatšo yeo e swanelago maemo a bona.” Ge e ba o tla be o sepela le mogolo yo mongwe leetong leo la bodiši, go re’ng le sa hlahlobe boemo bja ngwanabo rena yoo le le gotee?

DIRANG GORE BANA BABO LENA BA IKWE BA LOKOLOGILE

Mohlomongwe le a dumela gore batho ba lewa ke dihlong ge ba bolela ka ditaba tša bona. Ka mohlala: Ngwanabo rena a ka thatafalelwa ke go ikwa a lokologile ge bagolo ba mo etetše. Ka gona, le ka tloša lepheko leo bjang? Go myemyela ga lena go tšwa pelong le go bolela mantšu a sego kae a kgothatšago go ka ba le mafelelo a mabotse. Michael, yo a nago le nywaga ya ka godimo ga e 40 a hlankela e le mogolo, gantši o thoma ketelo ya gagwe ka gore: “E nngwe ya ditokelo tše dibotse kudu tša mogolo ke go etela bana babo magaeng a bona gore a ba tsebe gakaone. Ka gona, ke be ke tloga ke fagahletše ketelo ya rena ya lehono.”

Mohlomongwe le ka thoma ka go rapela go tšwa pelong ge le fihla go yena. Moapostola Paulo dithapelong tša gagwe o ile a bolela gabotse ka tumelo, lerato le kgotlelelo tša bana babo. (1 Bathes. 1:2, 3) Ge le bolela tsela yeo le ikwago ka yona ka dika tše dibotse tšeo bana babo lena ba di bontšhago, ge e le gabotse le lokišetša dipelo tša lena le tša bona gore le be le poledišano e agago. Mantšu a lena le ona a ka ba a fodišago. Ray, e lego mogolo yo a nago le phihlelo, o lemogile gore: “Ka dinako tše dingwe, ka moka ga rena re lebala dilo tše dibotse tšeo re di dirago. Ka gona ge motho yo mongwe a re gopotša ka tšona, seo se lapološa moya wa rena.”

FETIŠETŠANG MPHO E ITŠEGO YA MOYA

Go swana le Paulo, le lena le ka fetišetša “mpho e itšego ya moya” ka gore le bolele ka taba e itšego e tšwago Mangwalong, gaešita le ge e le temana e tee feela. (Baroma 1:11) Ka  mohlala, ngwanabo rena yo a gateletšegilego a ka ikwa a se na mohola go swana le mopsalme yo a ilego a ipapetša le ‘lekuka le le omeletšego ka gare ga muši.’ (Ps. 119:83, 176) Ka morago ga gore le hlalose ka boripana seo se bolelwago ke mantšu ao, le ka kgodiša ngwanabo rena gore ‘ga se a lebala’ ditaelo tša Modimo.

Ka tsela e swanago, na seswantšho sa mabapi le tšhelete e timetšego ya tšhipi ya terakema se ka se kgome kgaetšedi yo a arogilego phuthegong goba yo a fokoditšego lebelo tirelong ya gagwe? (Luka 15:8-10) Tšhelete yeo e timetšego ya tšhipi e ka no ba e be e le karolo ya pheta e bohlokwahlokwa yeo e dirilwego ka ditšheletiana tše ntši tša silifera. Ge le ahlaahla seswantšho seo, kgaetšedi yo a ka thušwa go bona gore ke karolo e bohlokwa ya phuthego ya Bokriste. Ka morago ga gore le ahlaahle taba ye, le ka gatelela tsela yeo Jehofa a mo hlokomelago ka yona ka ge e le yo mongwe wa dinku tša gagwe tše dinyenyane.

Gantši badumedigotee le rena ba rata go bolela seo ba se naganago ka Beibele. Ka gona o se ke wa bolela kudu! Ka morago ga go bala temana yeo e šomago boemong bja bona, o ka kgetha lentšu goba sehlopha sa mantšu gomme o ba kgopele gore ba a hlalose. Ka mohlala, ka morago ga go bala 2 Bakorinthe 4:16, mogolo a ka botšiša gore: “Na o kile wa bona ditsela tšeo Jehofa a go mpshafatšago ka tšona?” Mokgwa wo o ka dira gore o “kgothatšane” le modumedigotee le wena e le ruri.—Baroma 1:12.

Gantši badumedigotee le rena ba rata go bolela seo ba se naganago ka Beibele

Le gona o ka lapološa modumedigotee le wena ka gore o ahlaahle motho yo a itšego yoo go bolelwago ka yena ka Beibeleng wa maemo a swanago le a gagwe. Ngwanabo rena yo a ikwago a feletšwe ke kholofelo a ka thabela go bolela ka batho ba bjalo ka Hanna goba Epaforodito, bao ka dinako tše dingwe ba bego ba gateletšegile eupša ba dula ba le bohlokwa mahlong a Modimo. (1 Sam. 1:9-11, 20; Bafil. 2:25-30) Go re’ng o sa ahlaahle e mengwe ya mehlala e mebotse ya ka Beibeleng ge go nyakega?

KGONTHIŠEGANG GORE LE A BOELA

Bontšhang gore le kgahlegela bana babo lena le dikgaetšedi ka gore le boele go bona ka morago ga ketelo ya pele. (Dit. 15:36) Ge le phetha leeto la bodiši, e ka ba mo go holago gore le bee nako yeo le tlago go tšea karolo bodireding le le gotee. Ge mogolo yo a nago le phihlelo yo a bitšwago Bernard a kopana gape le ngwanabo rena goba kgaetšedi yo a sa tšwago go mo etela, ka bohlale o nyaka go tseba ge keletšo yeo a mo neilego yona e šoma ka go mmotšiša gore: “Mpotše, na keletšo yela e ile ya šoma?” Ge o bontšha kgahlego e bjalo, gona o tla kgona go bona ge e ba go sa dutše go nyakega thušo e oketšegilego.

Go feta le ge e le neng pele, bana babo rena le dikgaetšedi ba nyaka go ikwa ba hlokometšwe, ba kwešišwa le go ratwa. (1 Bathes. 5:11) Ka gona, pele ga ge le ka dira leeto la bodiši, ipheng nako ya go naganišiša ka maemo a bana babo lena. Rapelelang taba yeo. Kgethang mangwalo a swanetšego. Ke moka le tla hwetša mantšu a swanetšego a go lapološa “moya o lapilego”!

^ ser. 2 Maina a fetotšwe.