Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami—Kgatišo e Ithutwago  |  May 2013

Dipotšišo tše Tšwago go Babadi

Dipotšišo tše Tšwago go Babadi

Na Baisiraele ba be ba bolaya disenyi ka go di fega koteng?

Ditšhaba tše dintši mehleng ya bogologolo di be di bolaya disenyi tše dingwe ka go di kokotela koteng goba phateng. Baroma ba be ba bofelela motho koteng goba ba mo kokotela go yona, moo a bego a ka tšwela pele a phela ka matšatši a mmalwa pele a ka bolawa ke go kwa bohloko, lenyora, tlala le dilo tše dingwe tšeo di ka bakago lehu la gagwe. Baroma ba be ba lebelela go kokotelwa koteng e le kotlo e lešago dihlong yeo e bego e newa disenyi tšeo di bego di dirile melato e megolo.

Go thwe’ng ka setšhaba sa Isiraele ya bogologolo? Na Baisiraele ba be ba bolaya disenyi ka go di fega koteng? Molao wa Moshe o itše: “Ge go ka ba le motho yo a dirilego sebe seo se swanelwago ke kahlolo ya lehu, ke moka a bolawa a fegwa koteng, gona setopo sa gagwe se se ke sa lala koteng; eupša o mmoloke letšatšing lona leo.” (Doit. 21:22, 23) Ka gona, go molaleng gore mehleng ya ge go ngwalwa Mangwalo a Seheberu, motho yoo a bego a swanetšwe ke lehu o be a bolawa pele gomme a fegwa koteng goba sehlareng.

Tabeng ye, Lefitiko 20:2 e bontšha gore: “Motho le ge e le ofe mo go bana ba Isiraele le modiiledi le ge e le ofe yo a dulago e le modiiledi mo Isiraele, yoo a gafelago le ge e le ofe wa bana ba gagwe go Mmoleke, a bolawe. Setšhaba se mo kgatle ka maswika.” Bao ba bego ba ‘dirišana le meoya e mebe goba didupe’ le bona ba be ba swanetše go bolawa. Bjang? “Ka go kgatlwa ka maswika.”—Lef. 20:27

Go Doiteronomio 22:23, 24, re bala gore: “Ge e ba go ka ba le ngwanenyana wa kgarebe yo a beeleditšwego ke monna gomme monna yo mongwe a mo hwetša motseng a robala le yena, bobedi bja bona le ba ntšhetše ka ntle ga kgoro ya motse woo le ba kgatle ka maswika ba hwe; ngwanenyana yoo a hwe ka gobane ga se a goeletša moo motseng, gomme monna yoo a hwe ka gobane o gobošitše mosadi wa wa gabo. Ka go re’alo o tloše se sebe mo go wena.” Ka gona go Baisiraele ba bogologolo, mokgwa o mogolo wa go bolaya disenyi tšeo di dirilego molato o mogolo e be e le go di kgatla ka maswika. *

Go molaleng gore mehleng ya ge go ngwalwa Mangwalo a Seheberu, motho yoo a bego a swanetšwe ke lehu o be a bolawa pele gomme a fegwa koteng goba sehlareng

Doiteronomio 21:23 e re: “Motho yo a fegwago koteng o etša selo seo se rogakilwego ke Modimo.” Go bewa phatlalatša ga setopo sa motho yo kgopo yo a “rogakilwego ke Modimo” go be go tloga go kgoma Baisiraele ka tsela e matla. Ruri go fegwa koteng goba sehlareng ga setopo sa motho yoo go be go le bjalo ka temošo go ba bangwe.

^ ser. 6 Diithuti tše dintši di dumelelana ka gore ka tlase ga Molao wa Moshe, sesenyi se be se bolawa pele ga ge setopo sa sona se ka fegwa koteng. Lega go le bjalo, go na le bohlatse bja gore lekgolong la pele la nywaga, Bajuda ba be ba kokotela disenyi tše dingwe koteng di sa phela gomme tša hwela moo.