Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2013

“Le Kgonthišetše Dilo tše Bohlokwa Kudu”

“Le Kgonthišetše Dilo tše Bohlokwa Kudu”

“Le kgonthišetše dilo tše bohlokwa kudu.”—BAFIL. 1:10.

1, 2. Ke boporofeta bofe bja mabapi le mehla ya bofelo bjoo bo swanetšego go ba bo ile bja kgahla barutiwa ba Jesu kudu, gona ka baka la’ng?

PETRO, Jakobo, Johane le Andrea ba be ba hweditše sebaka sa go ba le Mong wa bona feela. Seo Jesu a ilego a se bolela pejana mabapi le go senywa ga tempele se ile sa ba tshwenya kudu. (Mar. 13:1-4) Ka go re’alo, ba ile ba botšiša gore: “Re botše gore dilo tše di tla direga neng, le gona pontšho ya go ba gona ga gago le ya bofelo bja tshepedišo ya dilo e tla ba eng?” (Mat. 24:1-3) Jesu o ile a thoma go ba botša ka ditiragalo goba maemo ao a bego a ka se feleletše feela ka go ba le diphetogo tše kgolo bophelong eupša gape a bego a tla šupa mehla ya bofelo bja tshepedišo e kgopo ya dilo ya Sathane. Go na le selo se itšego seo se bego se tlo direga seo se swanetšego go ba se ile sa kgahla barutiwa ba Jesu kudu. Ka morago ga gore Jesu a bolele ka dilo tše di sa kgahlišego tše bjalo ka dintwa, tlhaelelo ya dijo le go oketšega ga go hloka molao, o ile a bolela ka selo se itšego seo se kgahlišago seo le sona se bego se tla swaya mehla ya bofelo. O itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mat. 24:7-14.

2 Barutiwa ba Jesu ba ile ba thabela go bolela ditaba tše dibotse tša Mmušo ba na le Kriste. (Luka 8:1; 9:1, 2) Ba ka ba ba ile ba gopola seo a se boletšego, ge a re: “Puno ke e kgolo eupša bašomi ke ba sego kae. Ka baka leo, kgopelang Mong wa puno gore a romele bašomi punong ya gagwe.” (Luka 10:2) Eupša ba be ba tla dira boboledi bjang “lefaseng ka moka” le go nea “bohlatse go ditšhaba tšohle”? Ba be ba tla hwetša bašomi kae? Ge feela nkabe ba be ba kgona go bona bokamoso ge ba be ba na le Jesu lona letšatšing leo, ga go pelaelo gore ba be ba tla makatšwa ke go bona go phethagala ga mantšu a sego kae ao lehono re a balago go Mateo 24:14.

3. Luka 21:34 e phethagatšwa bjang lehono, gona re swanetše go dira boitlhahlobo bofe?

 3 Re phela mehleng ya go phethagatšwa ga boporofeta bja Jesu. Ba dimilione ba šoma gotee gore ba bolele ditaba tše dibotse tša Mmušo lefaseng ka bophara. (Jes. 60:22) Lega go le bjalo, Jesu o bontšhitše gore ba bangwe ba be ba tla thatafalelwa ke go dula ba le šedi mehleng ye ya bofelo. Ba be ba tla šitišwa gomme ba “imelwa.” (Bala Luka 21:34.) Mantšu ao le ona re a bona a phethagala. Ba bangwe gare ga batho ba Modimo ba a šitišega. Se se ka bonwa diphethong tšeo ba di dirago mabapi le mešomo ya boiphedišo, thuto e phagamego, go hwetša dilo tše di bonagalago gotee le nako yeo ba e fetšago dipapading le boithabišong. Ba bangwe ba lapišwa ke dikgateletšo le dipelaelo tša bophelo bja letšatši le letšatši. Ipotšiše gore: ‘Ke šoma bjang tabeng ye? Diphetho tšeo ke di dirago di bontšha’ng mabapi le dilo tšeo di tlago pele bophelong bja ka?’

4. (a) Moapostola Paulo o ile a rapelela eng mabapi le Bakriste ba kua Filipi, gomme ka baka la’ng? (b) Re tlo hlahloba eng sehlogong se le se latelago, gona ka morero ofe?

4 Bakriste bao ba bego ba phela lekgolong la pele la nywaga ba ile ba swanelwa ke go dira boiteko bja go dula ba etiša pele dilo tša moya. Moapostola Paulo o ile a bona go nyakega gore a rapelele Bakriste ba Filipi gore ba ‘kgonthišetše dilo tše bohlokwa kudu.’ (Bala Bafilipi 1:9-11.) Go swana le moapostola Paulo, bontši bo be bo “bontšha sebete kudu go boleleng lentšu la Modimo ba sa boife.” (Bafil. 1:12-14) Ka tsela e swanago, lehono bontši bja rena re bolela Lentšu la Modimo ka sebete. Lega go le bjalo, na go naganišiša ka seo se dirwago ga bjale mokgatlong wa Jehofa go ka re thuša go tsepamiša menagano ya rena ka mo go oketšegilego modirong o bohlokwahlokwa wa boboledi? Ruri go ka dira bjalo! Sehlogong se, anke re ikgopotšeng ka tokišetšo yeo Jehofa a e rulagantšego go phethagatša Mateo 24:14. Ke selo sefe seo se lego bohlokwa mokgatlong wa gagwe, gomme go tseba se go ka tutuetša bjang rena le malapa a rena? Sehlogong se se latelago, re tla hlahloba seo se ka re thušago go kgotlelela le go dula re sepedišana le mokgatlo wa Jehofa.

KAROLO YA LEGODIMONG YA MOKGATLO WA JEHOFA E GATELA PELE

5, 6. (a) Ke ka baka la’ng Jehofa a ile a re nea dipono tša karolo ya legodimong ya mokgatlo wa gagwe? (b) Ke eng seo Hesekiele a ilego a se bona ponong?

5 Go na le dilo tše dintši tšeo Jehofa a kgethilego go se di akaretše Lentšung la gagwe le le ngwadilwego. Ka mohlala, ga se a re nea ditaba ka botlalo mabapi le kamoo bjoko goba legohle le šomago ka gona, gaešita le ge tsebišo e bjalo e be e tla ba e kgahlišago kudu! Go e na le moo, Jehofa o re neile tsebišo yeo re e hlokago e le gore re kwešiše merero ya gagwe gomme re phele maphelo a rena ka go dumelelana le yona. (2 Tim. 3:16, 17) Ruri go a thabiša gore Beibele e bolela ka dipono tše kgahlišago tša karolo e sa bonagalego ya mokgatlo wa Jehofa! Re thabišwa ke go bala ka seo se hlaloswago ke thulaganyo ya Jehofa ya legodimong yeo e ngwadilwego ke Jesaya, Hesekiele le Daniele gotee le Johane pegong ya gagwe ya Kutollo. (Jes. 6:1-4; Hesek. 1:4-14, 22-24; Dan. 7:9-14; Kut. 4:1-11) Go ba bjalo ka ge eka Jehofa o tlošitše seširo gomme a re dumelela gore re bone seo se diregago legodimong. Ke ka baka la’ng a ile a re nea tsebišo ye?

6 Le ka mohla Jehofa ga a nyake gore re lebale gore re karolo ya mokgatlo wa gagwe wa legohle. Go na le dilo tše dintši tšeo re sa di bonego tše di dirwago bakeng sa go thekga merero ya Jehofa. Ka mohlala, Hesekiele o ile a bona karolo e sa bonagalego ya mokgatlo wa Jehofa e swantšhwa le koloi e kgolo ya legodimong. Koloi ye e be e ka kitima ka lebelo gomme e kgona go leba lehlakoreng le lengwe ka bjako. (Hesek. 1:15-21) Ka mokgwa woo koloi ye e bego e sepela  ka gona, e be e ka sepela monabo o mogolo kudu. Ponong ya gagwe, Hesekiele o ile a kgona go bona Monamedi wa koloi yeo. O itše: “Ke bone selo se se phadimago bjalo ka gauta e tswakilwego le silifera, ka gare le go dikologa moo go be go swana le mollo . . . E be e swana le ya letago la Jehofa.” (Hesek. 1:25-28) Ruri Hesekiele o swanetše go ba a ile a kgahlišwa ke go bona pono ye! O bone Jehofa a laola mokgatlo wa gagwe ka botlalo, a o hlahla ka moya wa gagwe o mokgethwa. Ruri seo se swantšhetša gabotse karolo ya legodimong ya mokgatlo wa Jehofa woo o gatelago pele!

7. Pono yeo e neilwego Daniele e dira gore re kgodišege ka eng?

7 Daniele le yena o bone dilo tše dintši tšeo di dirago gore re kgodišege. O ile a dumelelwa go bona Jehofa a swantšhetšwa ke “Motala wa Mabaka” a dutše sedulong sa bogoši seo se nago le dikgabo tša mollo. Sedulo seo se be se na le maotwana. (Dan. 7:9) Jehofa o be a nyaka gore Daniele a bone gore mokgatlo wa Gagwe o gatela pele gomme o phethagatša morero wa Gagwe. Le gona Daniele o ile a bona “motho yo mongwe yo e kego ke morwa wa motho,” Jesu, a newa boikarabelo bja go okamela karolo ya lefaseng ya mokgatlo wa Jehofa. Pušo ya Kriste e phethagetšego e ka se be gona ka nywaga e sego kae feela. Go e na le moo, ke “ya neng le neng, yeo e ka se kego ya fedišwa gomme mmušo wa gagwe ke wo o ka se kego wa senywa.” (Dan. 7:13, 14) Re šušumeletšega gore re bote Jehofa le go lemoga seo a se phethagatšago. O file Morwa wa gagwe yo a swanelegago e lego Jesu, “pušo, seriti le mmušo.” Jehofa o bota Morwa wa gagwe. Ka go re’alo, re ka kgodišega gore Jesu o tla re etelela pele gabotse.

8. Dipono tše tšwago go Jehofa di kgomile Hesekiele le Jesaya ka tsela efe, gomme rena di swanetše go re kgoma bjang?

 8 Dipono tše tša mabapi le karolo e sa bonagalego ya mokgatlo wa Jehofa di swanetše go re kgoma bjang? Go swana le Hesekiele, re tloga re kgahlwa ke seo Jehofa a se phethagatšago e bile se re kgoma kudu. (Hesek. 1:28) Go naganišiša ka mokgatlo wa Jehofa go ka re šušumeletša gore re gate mogato, go etša ge Jesaya a dirile. Ge a be a bulegelwa ke sebaka sa gore a botše ba bangwe seo Jehofa a se dirago, o ile a diriša sebaka seo ka ntle le go dikadika. (Bala Jesaya 6:5, 8.) Jesaya o be a kgodišegile gore ge e ba a thekgwa ke Jehofa, o be a ka lebeletšana le tlhohlo le ge e le efe ka katlego. Ka tsela e swanago, le rena re swanetše go kgahlišwa kudu ke dipono tša mabapi le karolo ya legodimong ya mokgatlo wa Jehofa gomme di re tutueletše go gata mogato. Ruri go a kgothatša go naganišiša ka mokgatlo wo woo o dulago o gatela pele e bile o swaregile ka go phethagatša merero ya Jehofa!

KAROLO YA LEFASENG YA MOKGATLO WA JEHOFA

9, 10. Ke ka baka la’ng go nyakega gore go be le karolo e bonagalago ya mokgatlo wa Jehofa?

9 A diriša Morwa wa gagwe, Jehofa o ile a hloma thulaganyo mo lefaseng yeo e šomago ka go dumelelana le karolo e sa bonagalego ya mokgatlo wa gagwe. Ke ka baka la’ng go nyakega thulaganyo e bonagalago gore go phethwe modiro woo o hlalositšwego go Mateo 24:14? Ela hloko mabaka a latelago a mararo.

10 La pele, Jesu o boletše gore modiro wo wa boboledi o be o tla dira gore barutiwa ba gagwe ba fihle “karolong ya kgole ya lefase.” (Dit. 1:8) La bobedi, go be go tla nyakega gore go dirwe ditokišetšo bakeng sa go aba dijo tša moya gotee le go hlokomela bao ba tšeago karolo modirong wo. (Joh. 21:15-17) La boraro, go be go swanetše go dirwa ditokišetšo tša gore bao ba bolelago ditaba tše dibotse ba bokane gotee gore ba rapele Jehofa le go rutwa kamoo ba ka phethago modiro woo. (Baheb. 10:24, 25) Ga go fo itiragalela gore go fihlelelwe seo. E le gore balatedi ba Kriste ba atlege, go be go tla nyakega gore modiro wo o rulaganywe gabotse.

11. Re bontšha bjang gore re thekga ditokišetšo tšeo di dirilwego ke mokgatlo wa Jehofa?

11 Re bontšha bjang gore re thekga ditokišetšo tšeo di dirilwego ke mokgatlo wa Jehofa? Tsela e nngwe e bohlokwa ya gore re dire se ke ka go dula re bota bao Jehofa le Jesu ba ba neilego boikarabelo bja gore ba re etelele pele modirong wa boboledi. Bana bao babo rena ba ka ba ba ile ba diriša nako ya bona le matla a bona gore ba leke go rarolla mathata a lefase le. Eupša ke selo sefe seo se ilego sa dula se etla pele karolong e bonagalago ya mokgatlo wa Jehofa?

BA TSEPAMIŠITŠE MENAGANO YA BONA ‘DILONG TŠE BOHLOKWA KUDU’

12, 13. Bagolo ba Bakriste ba phetha bjang kabelo ya bona, gona ke ka baka la’ng se se go kgothatša?

12 Bagolo bao ba nago le phihlelo ba Bakriste lefaseng ka bophara ba kgethilwe gore ba okamele le go akgofiša modiro wa go bolela ka Mmušo dinageng tšeo ba hlankelago go tšona. Bana ba babo rena ba tsoma tlhahlo e tšwago Lentšung la Modimo, ba le dira ‘lebone dinaong tša bona le seetša tseleng ya bona,’ ke moka ba rapela go tšwa pelong gore Jehofa a ba hlahle ge ba dutše ba dira diphetho.—Ps. 119:105; Mat. 7:7, 8.

13 Go swana le bao ba bego ba etelela pele lekgolong la pele la nywaga, bagolo ba Bakriste bao ba okamelago modirong wa boboledi lehono ba ikgafetše “bodireding bja lentšu.” (Dit. 6:4) Ba thabišwa kudu ke tšwelopele yeo e dirwago modirong wa go bolela ditaba tše dibotse dinageng tša gabo bona le lefaseng ka bophara. (Dit. 21:19, 20) Ga ba beele batho melao e mentšintši le ditaelo. Go e na le moo, ba latela Mangwalo le tlhahlo ya moya o mokgethwa wa Modimo ge ba dutše ba dira ditokišetšo tšeo di nyakegago  bakeng sa go thuša gore modiro wa boboledi o tšwele pele. (Bala Ditiro 15:28.) Ka go dira bjalo, bana ba babo rena ba ikarabelago ba bea mohlala o mobotse go bohle bao ba lego diphuthegong tša gabo bona.—Baef. 4:11, 12.

14, 15. (a) Go dirilwe ditokišetšo dife bakeng sa go thekga modiro wa boboledi lefaseng ka bophara? (b) O ikwa bjang ka karolo yeo o e tšeago gore o thekge modiro wa go bolela ka Mmušo?

14 Seo batho ba bantši ba sa se lemogego ke boitapišo bjo bo sa kgaotšego bja gore re lokišeletšwe dijo tša moya tšeo re di hwetšago ka dikgatišong tša rena, dibokeng tša rena le dikopanong tša rena. Baithaopi ba dikete ba šoma ka thata gore ba fetolele dijo tše tša moya ka maleme a 600 e le gore batho ba bantši ka mo go kgonegago ba ka ithuta “matete a Modimo” ka maleme a gabo bona. (Dit. 2:7-11) Bana babo rena le dikgaetšedi ba bafsa ba šoma ka thata gore ba tšweletše dikgatišo tša rena metšheneng yeo e šomago ka lebelo ya go gatiša le go dira dipuku. Ke moka dikgatišo tše di romelwa gaešita le diphuthegong tšeo di lego mafelong a lekatana lefaseng ka bophara.

15 Go dirilwe ditokišetšo tše ntši e le gore re ka fetša nako e oketšegilego re bolela ditaba tše dibotse gotee le diphuthego tša gabo rena. Ka mohlala, baithaopi ba dikete ba thuša ka go agwa ga Diholo tša Mmušo le Diholo tša Kopano, go thuša bao ba kgomilwego ke dikotsi tša tlhago goba bao ba lebeletšanego le maemo a tšhoganyetšo a tša kalafo, go rulaganya dikopano tša rena tše dikgolo le tše dinyenyane le go ruta dikolong tša pušo ya Modimo, e lego dilo tše sego kae tšeo di sa dirwego pepeneneng. Morero wa modiro wo ka moka ke ofe? Ke go thuša go bolelwa ga ditaba tše dibotse, go kaonefatša boemo bja moya bja bao ba dirago modiro wo gotee le go tšwetša pele borapedi bja therešo. Na karolo ya lefaseng ya mokgatlo wa Jehofa e ile ya dula e tsepamišitše monagano dilong tše bohlokwa kudu? Ruri e dirile seo!

LATELA MOHLALA WA MOKGATLO WA JEHOFA

16. Ke eng seo o ka rulaganyetšago go ithuta sona borapeding bja lapa goba thutong ya gago ya motho ka noši?

16 Na re fela re ipha nako ya go naganišiša ka tsela yeo mokgatlo wa Jehofa o šomago ka yona? Ba bangwe ba ile ba kgetha go diriša nako borapeding bja bona bja lapa goba thutong ya bona ya motho ka noši go dira nyakišišo ka ditaba tše le go naganišiša ka tšona. Go a kgahliša go ithuta ka dipono tšeo di neilwego Jesaya, Hesekiele, Daniele le Johane. Puku ya Dihlatse tša Jehofa—Bagoeledi ba Mmušo wa Modimo le dikgatišo tše dingwe goba di-DVD tšeo di hwetšagalago ka leleme la geno di ka go thuša gore o be le kwešišo e nabilego ka mokgatlo.

17, 18. (a) Sehlogo se se go hotše bjang? (b) Ke dipotšišo dife tšeo re tlago go di ahlaahla??

17 Go naganišiša ka seo Jehofa a se fihlelelago ka mokgatlo wa gagwe go a re hola. Ka go dirišana le mokgatlo wo o kgahlišago, anke re ikemišetšeng go dula re tsepamišitše menagano ya rena dilong tše bohlokwa kudu. Go dira bjalo go tla re matlafaletša gore re be le boikemišetšo bjo bo swanago le bjoo Paulo a bego a na le bjona, ge a be a ngwala gore: “Ka ge re na le bodiredi bjo go ya ka kgaugelo yeo re e bontšhitšwego ke Modimo, ga re lape.” (2 Bakor. 4:1) Le gona o ile a kgothaletša bašomigotee le yena gore: “Anke re se ke ra lapa go dira botse, gobane re tla buna ka nako e swanetšego ge e ba re sa lape.”—Bagal. 6:9.

18 Na go na le diphetogo tšeo re swanetšego go di dira re le motho ka o tee ka o tee goba re le lapa e le gore re kgonthišetše dilo tše bohlokwa kudu bophelong bja rena bja letšatši le letšatši? Na re ka nolofatša maphelo a rena goba ra fokotša ditšhitišo e le gore re etiše pele modiro o bohlokwahlokwa wa boboledi? Sehlogong se se latelago, re tla ahlaahla dilo tše hlano tšeo di tlago go re thuša go dula re sepedišana le mokgatlo wa Jehofa.