Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2013

Holwa ka Botlalo ke go Bala Beibele

Holwa ka Botlalo ke go Bala Beibele

“Ruri ke kgahlwa ke molao wa Modimo.”—BAROMA 7:22.

1-3. Re holega bjang ka go bala Beibele le go diriša seo e se rutago?

“KE LEBOGA Jehofa mesong e mengwe le e mengwe ge a nthušitše go kwešiša Beibele.” Kgaetšedi yo a tšofetšego wa Mokriste yo a boletšego mantšu ao o badile Beibele ka moka ga yona ka makga a ka godimo ga a 40, e bile o sa tšwela pele a e bala. Kgaetšedi yo mongwe yo mofsa o ngwadile gore go bala Beibele go mo thušitše go bona gore Jehofa ke motho wa kgonthe. Ka baka la seo, o batametše kgauswi kudu le Tatagwe wa legodimong. O boletše gore: “Ke ikwa ke thabile kudu bophelong bja ka go feta le ge e le neng pele!”

2 Moapostola Petro o kgothaleditše batho ka moka gore ba “[hlagolele] kganyogo ya go kganyoga maswi a sa tswakwago a lentšu.” (1 Pet. 2:2) Bohle bao ba kgotsofatšago kganyogo yeo ka go ithuta Beibele le go diriša dithuto tša yona ba na le letswalo le le hlwekilego gotee le morero bophelong. Ba ba le ditswalano tše di swarelelago le ba bangwe bao le bona ba ratago Modimo wa therešo le go mo hlankela. A ka moka ke mabaka a kwagalago a gore re ‘kgahlwe ke molao wa Modimo.’ (Baroma 7:22) Eupša go sa na le mehola e mengwe gape. E mengwe ya yona ke efe?

3 Ge o dutše o ithuta mo go oketšegilego ka Jehofa le Morwa wa gagwe, ke moo o ba ratago le go feta e bile o ratago le batho ba bangwe. Go ba le tsebo e nepagetšego ya Mangwalo go go thuša gore o bone kamoo Modimo kgauswinyane a tlago go phološa batho ba kwago tshepedišong ye e hwelelago ya dilo. O swere molaetša o kgahlišago wa ditaba tše dibotse woo o ka o botšago batho bodireding bja gago. Jehofa o tla go šegofatša ge o dutše o ruta ba bangwe dilo tšeo o ithutilego tšona ge o be o bala Lentšu la Gagwe.

BALA GOMME O NAGANIŠIŠE

4. Go bala Beibele “ka lentšu la tlasana” go bolela’ng?

4 Jehofa ga a nyake gore bahlanka ba gagwe ba kitimele go fetša go bala Lentšu la gagwe. O boditše Joshua wa mehleng ya bogologolo gore: “Puku ye ya molao e se ke  ya tloga molomong wa gago, o e bale ka lentšu la tlasana mosegare le bošego.” (Josh. 1:8; Ps. 1:2) Na taelo ye e bolela gore o balele tlasana ka tsela ya kgonthe mantšu ka moka ao o a balago go tloga go Genesi go ya go Kutollo? Aowa. A ra gore o swanetše go bala ka tsela yeo o tlago go kgona go naganišiša ka seo o se balago. Ge o bala Beibele “ka lentšu la tlasana,” seo se tla go thuša gore o kgone go gopola dikarolo tša yona tšeo di tlogago di go hola e bile di go kgothatša ka nako yeo. Ge o kopana le dikarolo tše bjalo, ditemana goba dipego tše bjalo, di bale ka go iketla, mohlomongwe o hebehebetša mantšu a tšona. Kgwekgwe ya Mangwalo a bjalo e ka go kgoma ka go lebanya. Ke ka baka la’ng se se le bohlokwa? Ka gobane go kwešiša gabotse keletšo ya Modimo go tla go nea matla a magolo a gore o e diriše.

5-7. Bontšha kamoo go bala Lentšu la Modimo ka lentšu la tlasana go ka go thušago (a) go dula o hlwekile boitshwarong; (b) go se felele ba bangwe pelo le go ba bontšha botho; (c) go bota Jehofa gaešita le dinakong tša mathata.

5 Go bala ka lentšu la tlasana go thuša kudu ge o bala dipuku tša Beibele tšeo o sa tlwaelanago le tšona. Ka mohlala, nagana ka maemo a latelago a mararo. Boemong bja pele, nagana ka lesogana la Mokriste leo lenaneo la lona la mmalo wa Beibele le mo fihlišitšego go boporofeta bja Hosea. Go kgaolo 4, le ema go se nene ka morago ga go bala ditemana 11 go ya go 13 ka lentšu la tlasana. (Bala Hosea 4:11-13.) Ka baka la’ng? Le gogelwa ke ditemana tšeo ka gobane le lwa ka thata go fenya teko ya boitshwaro bjo bo gobogilego sekolong. Le naganišiša ka ditemana tše gomme le lemoga gore: ‘Jehofa o bona dilo tšohle tše mpe, go akaretša le tšeo re di dirago ka sephiring. Ga ke nyake go mo kgopiša.’ Lesogana leo le dira phetho e tiilego ya gore le tla dula le itshwere gabotse pele ga Modimo.

6 Boemong bja bobedi, kgaetšedi wa Mokriste o bala boporofeta bja Joele gomme o fihla go kgaolo 2, temana 13. (Bala Joele 2:13.) Ge a dutše a bala temana yeo ka lentšu la tlasana, o thoma go naganišiša kamoo a ka ekišago Jehofa tabeng yeo, e lego yo a ‘šokelago e bile a gaugelago, a diegago go galefa gomme a tletše botho.’ Kgaetšedi yoo o dira phetho ya gore o tla leka go kgaotša go diriša kodutlo le mantšu a bogale ao gantši a a šomišago ge a bolela le monna wa gagwe le batho ba bangwe.

7 Boemong bja boraro, nagana ka tate yo e lego Mokriste yoo a lahlegetšwego ke mošomo gomme a tshwenyegile ka gore mosadi wa gagwe le bana ba tla phela bjang. Go Nahume 1:7, o bala ka lentšu la tlasana gore Jehofa “o tseba bao ba tšhabelago go yena” gomme o ba šireletša go swana le “sebo se tiilego letšatšing la tlalelo.” Mantšu ao a mo thoba pelo. O lemoga kamoo Jehofa a mo ratago ka gona gomme o kgaotša go tshwenyega ka mo go feteletšego. Ke moka o bala temana 15 ka lentšu la tlasana. (Bala Nahume 1:15.) Ngwanabo rena o lemoga gore ka go bolela ditaba tše dibotse dinakong tša mathata, o bontšha gore o tloga a tšea Jehofa e le sebo sa gagwe. Ge a dutše a nyaka mošomo wa boiphedišo, o šušumeletšega go thekga tirelo ya tšhemo ya gare ga beke.

8. Re botše ka boripana lehumo la moya leo o le epolotšego ge o be o ipalela Beibele.

8 Dintlha tšeo tše holago tšeo re sa tšwago go bolela ka tšona di tšwa dipukung tša Beibele tšeo ba bantši ba ka naganago gore di thata go kwešišwa. Ge o dutše o hlahloba puku ya Hosea, ya Joele le ya Nahume ka maikemišetšo a gore o ithute, o tla feleletša o nyaka go bala ditemana tše dingwe tša tšona ka lentšu la tlasana. Nagana ka bohlale le khomotšo tšeo o tlago go di hwetša ka dipukung tša baporofeta bao! Le gona go thwe’ng ka dipuku tše dingwe ka moka tša Beibele? Lentšu la Modimo le swana le moepo woo o tšweletšago ditaamane. Epa moepo woo ka kelohloko! Ee, bala Beibele ka moka o na le pakane ya go hwetša mahumo le kgothatšo tšeo di tla go hlahlago go tšwa go Modimo.

KATANELA GO KWEŠIŠA SEO O SE BALAGO

9. Re ka oketša bjang kwešišo ya rena ka ditaba tšeo di tswalanago le thato ya Modimo?

9 Gaešita le ge go le bohlokwa gore o bale karolo e itšego ya Beibele letšatši le letšatši, go nyakega gore o feleletše o na le kwešišo le temogo.  Ka gona, diriša ka botlalo dikgatišo tša mokgatlo wa Jehofa go dira nyakišišo ka setlogo sa batho, mafelo le ditiragalo tšeo o balago ka tšona. Goba ge e ba o sa kwešiše kamoo karolo e itšego ya Beibele e ka kgomago bophelo bja gago ka gona, o ka kgopela thušo go mogolo wa phuthego goba Mokriste yo mongwe yo a gotšego ka tsebo. Go bontšha bohlokwa bja gore re oketše kwešišo ya rena ka Mangwalo, anke re ahlaahleng mohlala wa Mokriste yo mongwe wa lekgolong la pele la nywaga yoo a ilego a katanela go dira se se swanago. Leina la gagwe e be e le Apollo.

10, 11. (a) Apollo o ile a thušwa bjang go ba modiredi yo a kaonefaditšego tsela ya gagwe ya go bolela ditaba tše dibotse? (b) Re ka ithuta eng pegong ya Apollo? (Bona lepokisi le le rego: “Na o Ruta Thuto Yeo e Lego Nakong?”)

10 Apollo e be e le Mokriste wa Mojuda yo a bego a “tseba Mangwalo gabotse” e bile “a fišega moyeng.” Puku ya Ditiro e bolela ka yena gore: “[O ile] a bolela le go ruta ka mo go nepagetšego dilo tše di lego mabapi le Jesu, eupša a tlwaelane le kolobetšo ya Johane feela.” Apollo o be a sa lemoge gore o ruta thuto yeo e bego e se sa le nakong ya mabapi le kolobetšo. Ka morago ga gore banyalani ba bangwe ba Bakriste e lego Perisila le Akhwila ba mo kwe a ruta thuto yeo kua Efeso, ba ile ba mo hlalosetša “tsela ya Modimo ka mo go nepagetšego kudu.” (Dit. 18:24-26) Seo se ile sa hola Apollo bjang?

11 Ka morago ga gore a dire boboledi Efeso, Apollo o ile a ya Akaya. “Ge a fihla moo, a thuša kudu bao ka baka la botho bjo bogolo bja Modimo e ilego ya ba badumedi; gobane ka matla o ile a hlatsela phatlalatša ka botlalo gore Bajuda ba be ba fošitše, ge a dutše a bontšha ka Mangwalo gore Jesu e be e le yena Kriste.” (Dit. 18:27, 28) Mo lebakeng leo, Apollo o be a ka hlalosa ka mo go nepagetšego seo se bego se bolelwa ke kolobetšo ya Bokriste. Ka ge a be a na le kwešišo e oketšegilego, o ile a “thuša kudu” bao ba sa tšwago go kopanela gore ba dire tšwelopele borapeding bja therešo. Re ka ithuta eng pegong ye? Ka go swana  le Apollo, re katanela go kwešiša seo re se balago ka Beibeleng. Lega go le bjalo, ge e ba modumedigotee le rena yo a nago le phihlelo a re nea ditšhišinyo tša kamoo re ka rutago ka katlego kutšwanyana, re ikemišeditše go amogela thušo yeo ka boikokobetšo le ka lethabo. Ge e ba re ka dira seo, gona sehlabelo sa rena se sekgethwa se tla kaonefala kudu.

DIRIŠA SEO O ITHUTAGO SONA GORE O THUŠE BA BANGWE

12, 13. Bontšha kamoo go diriša ga rena Mangwalo ka bohlale go ka thušago barutwana ba Beibele go dira tšwelopele.

12 Ka go swana le Perisila, Akhwila le Apollo, re ka thuša batho ba bangwe. O ikwa bjang ge o kgothaditše motho yo a thabelago gomme a feleletša a fentše mapheko ao a dirago gore a se tšwele pele moyeng? Goba ge e ba o le mogolo, o ikwa bjang ge morapedigotee le wena a go leboga ka baka la keletšo ya Mangwalo yeo e mo thušitšego nakong ya mathata? Ga go pelaelo gore go diriša Lentšu la Modimo go thuša ba bangwe gore ba kaonefatše maphelo a bona ke selo seo se re kgotsofatšago le go re thabiša. * Ela hloko kamoo o ka fihlelelago pakane yeo ka gona.

13 Mabapi le go kgetha borapedi bja therešo go bja maaka, bontši bja Baisiraele ba mehleng ya Eliya ba be ba sa itsebe moo ba emego gona. Keletšo yeo Eliya a e neilego batho bao e ka thuša morutwana wa Beibele yo a dikadikago go dira tšwelopele moyeng. (Bala 1 Dikgoši 18:21.) Ela hloko boemo bjo bongwe: Ge e ba motho yo a thabelago a boifa gore bagwera goba lapa labo le tla arabela bjang, o ka tiiša boikemišetšo bja gagwe bja go rapela Jehofa ka go boledišana le yena ka Jesaya 51:12, 13.Bala.

14. Ke eng seo se tla go thušago go gopola ditemana tša Beibele ge o di nyaka gore o thuše batho ba bangwe?

14 Go molaleng gore Beibele e na le mantšu a mantši ao a ka re kgothatšago, ao a ka phošollago goba go matlafatša bao ba e balago. Eupša o ka ipotšiša gore: ‘Nka hwetša bjang mangwalo ka pela ge ke a nyaka?’ Bala Beibele gomme o naganišiše ka dikgopolo tša Modimo letšatši le letšatši. Ge e ba o dira seo, o tla tseba Beibele gakaone, gomme moya wa Jehofa o tla go thuša go a gopola ge o a nyaka.—Mar. 13:11; bala Johane 14:26. *

15. Ke eng seo se tla go thušago gore o kwešiše Lentšu la Modimo kutšwanyana?

15 Ka go swana le Kgoši Solomone, rapelela gore Jehofa a go nee bohlale bja go phethagatša boikarabelo bja gago bja ka phuthegong. (2 Dikor. 1:7-10) Go etša ge baporofeta ba bogologolo ba dirile, “botšišiša ka mafolofolo le go nyakišiša ka kelohloko” ka Lentšung la Modimo gore o be le tsebo e nepagetšego ka Jehofa le thato ya gagwe. (1 Pet. 1:10-12) Moapostola Paulo o kgothaleditše Timotheo gore a iphepe “ka mantšu a tumelo le a thuto e botse.” (1 Tim. 4:6) Ge e ba o dira seo, gona o tla ba boemong bjo bobotse kudu bja go thuša ba bangwe moyeng. Ka nako e swanago, o tla ba o aga tumelo ya gago.

GO BALA LENTŠU LA MODIMO GO A RE ŠIRELETŠA

16. (a) Go ‘hlahloba ga Baberea Mangwalo ka kelohloko letšatši le letšatši’ go ba hotše bjang? (b) Ke ka baka la’ng e le gabohlokwa kudu gore re bale Beibele letšatši le letšatši mehleng ye?

16 Bajuda bao ba bego ba le motseng wa Matsedonia wa Berea ba be ba tlwaetše go “hlahloba Mangwalo ka kelohloko letšatši le letšatši.” Ge Paulo a be a bolela ditaba tše dibotse gare ga Bajuda bao, ba ile ba bapiša seo a bego a se bolela le seo ba bego ba se tseba go tšwa Mangwalong. Ka mafelelo afe? Ba bantši ba ile ba kgodišega gore o be a ruta therešo, gomme “ba fetoga badumedi.” (Dit. 17:10-12) Se se bontšha  gore go bala ga motho Beibele letšatši le letšatši go dira gore a be le tumelo e tiilego go Jehofa. Tumelo e bjalo, e lego “tebelelo e kgonthišeditšwego ya seo se holofetšwego,” e tloga e nyakega ge e ba re tla phologela lefaseng le lefsa la Modimo.—Baheb. 11:1.

17, 18. (a) Tumelo e matla le lerato di šireletša bjang pelo ya seswantšhetšo ya Mokriste? (b) Kholofelo e re šireletša bjang kotsing?

17 Paulo o be a nepile ge a be a ngwala gore: “Ge e le rena ba mosegare, anke re duleng re hlaphogetšwe menaganong, re apere sephemelasefega sa tumelo le lerato gomme kholofelo ya phološo re e rwale e le kefa.” (1 Bathes. 5:8) Pelo ya lešole e swanetše go šireletšwa gore e se hlabje ke lenaba. Ka mo go swanago, pelo ya seswantšhetšo ya Mokriste e swanetše go šireletšwa matleng a sebe. Ke eng seo se diregago ge mohlanka wa Jehofa a na le tumelo e matla dikholofetšong tša Modimo e bile a mo rata le go rata batho ba bangwe? Mohlanka yoo o apere sephemelasefega sa moya sa maemo a godimo. Go na le kgonagalo e ntši ya gore a se itshware ka tsela yeo e tla dirago gore Modimo a se sa mo amogela.

18 Paulo o boletše le ka kefa, e lego “kholofelo ya phološo.” Ge e ba lešole la mehleng ya Beibele le be le sa šireletše hlogo ya lona, gona le be le ka bolaelwa ntweng gabonolo. Eupša ge e ba le be le rwele kefa ya maleba, le be le ka se gobale o šoro ge le itiwa hlogong. Ge e ba re ithuta Lentšu la Jehofa, gona re tiiša kholofelo ya gore o tla re phološa. Kholofelo e matla e re thuša gore re ganetše bahlanogi le ‘dipolelo tša bona tša lefeela’ tše di kekago bjalo ka sešo. (2 Tim. 2:16-19) Le gona kholofelo ya rena e tla re thuša go ganetša bao ba nyakago gore re itshware ka tsela yeo Jehofa a e hloilego.

GO ITHUTA BEIBELE GO TLA RE THUŠA GORE RE PHOLOGE

19, 20. Ke ka baka la’ng re tšeela godimo Lentšu la Modimo, gomme re bontšha bjang seo? (Bona lepokisi le le rego: “Jehofa o Nnea Feela Seo ke se Nyakago.”)

19 Ge re dutše re batamela bofelo bja tshepedišo ye, ke moo go tlogago go nyakega gore re ithekge ka Lentšu la Jehofa. Keletšo yeo re e hwetšago go lona e re thuša go phošolla mekgwa e mebe le go laola ditshekamelo tša rena tša sebe. Ka kgothatšo le khomotšo yeo re e hwetšago go lona, re tla kgona go fenya diteko tšeo Sathane le lefase la gagwe ba re tlišetšago tšona. Ka tlhahlo yeo Jehofa a re neago yona ka Lentšu la gagwe, re tla dula re le tseleng e išago bophelong.

20 Gopola gore thato ya Modimo ke gore “mehuta yohle ya batho e phološwe.” Bahlanka ba Jehofa ba gare ga “mehuta yohle ya batho.” Go bjalo le ka bao re ka ba thušago ka modiro wa rena wa boboledi le wa go dira barutiwa. Eupša bohle bao ba nyakago go phološwa ba swanetše go ba le ‘tsebo e nepagetšego ya therešo.’ (1 Tim. 2:4) Ka baka leo, go phologa ga rena mehla ye ya bofelo go sepedišana le go bala Beibele gotee le go diriša keletšo ya yona e buduletšwego. Ee, go bala ga rena Beibele letšatši le letšatši go bontšha kamoo re tšeelago godimo Lentšu le bohlokwahlokwa la therešo la Jehofa.—Joh. 17:17.

^ ser. 12 Therešo ke gore ga se ra swanela go diriša keletšo ya Beibele go gatelela ba bangwe goba go ba ahlola. Re swanetše go iketlela morutwana wa Beibele le go mo swara ka botho go etša ge Jehofa a dira bjalo go rena.—Ps. 103:8.

^ ser. 14 Go thwe’ng ge e ba o gopola mantšu a itšego a ka Beibeleng eupša o sa gopole gore a tšwa pukung efe, kgaolong efe le temaneng efe? Ge o ka nyaka mantšu ao ka go tlhatlamano yeo e lego ka mafelelong a Beibele, go Watchtower Library, goba go tšhupane (concordance) ya Phetolelo ya Lefase le Lefsa, go na le kgonagalo e ntši ya gore o hwetše lengwalo leo.