Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI (KGATIŠO E ITHUTWAGO) APRIL 2013

Ba Ile ba Ikgafa ka go Rata kua Mexico

Ba Ile ba Ikgafa ka go Rata kua Mexico

RURI go a thabiša go bona palo e oketšegago ya bafsa ba Dihlatse bao ba nolofatšago maphelo a bona e le gore ba katološe bodiredi bja bona bja Bokriste. (Mat. 6:22) Ba dira diphetogo dife? Ba lebeletšana le mapheko afe? Gore re hwetše dikarabo tša dipotšišo tšeo, anke re ithuteng ka ba bangwe ba bona bao ga bjale ba hlankelago kua Mexico.

“RE BE RE SWANETŠE GO DIRA DIPHETOGO”

Dustin le Jassa bao ba tšwago United States ba nyalane ka January 2007. Nakwana ka morago ga moo, ba ile ba fihlelela toro ya bona—toro ya go reka seketswana sa bona le go dula ka go sona ngwaga ka moka. Seketswana seo sa bona se be se emišitšwe lebopong la kgauswi le Astoria, Oregon, U.S.A., e lego toropo e botse kudu yeo e dikologilwego ke meboto ya dithokgwa le dithaba tšeo di phelago di na le lehlwa, e bile di kgauswi kudu le Lewatle la Pacific. Dustin o re: “Ge o lebelela gohle go dikologa lefelo leo, o be o bona botse feela!” Banyalani bao ba be ba ipona ba phela bophelo bjo bonolo, ba ithekgile ka Jehofa. Ba be ba ipoditše gore: ‘Ge e le gabotse, re phela ka seketswaneng sa dimithara tše seswai, re šoma mešomo ya nakwana, re phuthegong ya leleme le šele gomme re fela re hlankela re le babulamadibogo ba go thuša.’ Eupša ka moragonyana ba ile ba phetha ka gore ba be ba iphora. Dustin o re: “Go e na le gore re thekge phuthego, re be re fetša nako e ntši re lokiša seketswana sa rena. Re be re tseba gore ge e ba re tloga re nyaka go etiša Jehofa pele maphelong a rena, re be re swanetše go dira diphetogo.”

 Jassa o oketša ka gore: “Pele ga ge ke nyalwa, ke be ke dula Mexico, gomme ke be ke le phuthegong ya Seisemane. Ke be ke thabela go hlankela moo, e bile ke be ke fela pelo ya gore ke tla boela neng morago.” E le gore ba matlafatše kganyogo ya bona ya go ya nageng e šele, Dustin le Jassa ba ile ba dira gore nakong ya borapedi bja bona bja lapa ba bale diphihlelo tša bana babo rena le dikgaetšedi bao ba ilego ba hudugela dinageng tšeo mašemo a tšona a bego a šweufaletše go bunwa. (Joh. 4:35) Dustin o re: “Re be re nyaka go latswa lethabo la mohuta woo.” Ge ba be ba ekwa ka bagwera ba bangwe ba bona gore Mexico go na le sehlopha seo se bego se sa tšwa go thewa gomme se nyaka thušo, Dustin le Jassa ba ile ba dira phetho ya go ya moo. Ba ile ba rola mediro, ba rekiša seketswana sa bona gomme ba hudugela Mexico.

“KE SELO SE SEKAONEKAONE SEO SE KILEGO SA RE DIRAGALELA”

Dustin le Jassa ba ile ba dula toropong ya Tecomán, gomme ba be ba sa dutše ba le kgauswi le Lewatle la Pacific eupša ba le monabo wa dikhilomithara tše 4 300 ka borwa bja Astoria. Dustin o re: “Go e na le go hlabja ke diphefšana tše bosana le go bona dithaba tše dibotse, re be re le phišong yeo e ntšhago hlapi ka bodibeng gomme re bona feela dihlare tša diswiri.” Mathomong ba be ba sa hwetše mešomo. Ka ge ba be ba se na tšhelete e lekanego, ba be ba eja reise le dinawa gabedi ka letšatši, ka dibeke tša go latelana. Jassa o re: “Eupša gateetee ge go be go bonagala eka ga re sa kgona go kgotlelela go ja dijo tšeo letšatši le letšatši, barutwana ba rena ba Beibele ba ile ba thoma go re tlišetša dimanko, dipanana, diphopho gotee le mekotla ya diswiri ka ge di be di tletše gohle!” Ka moragonyana, banyalani bao ba ile ba hwetša mošomo sekolong se sengwe sa go ruta maleme seo se šomago ka Inthanete sa kua Taiwan. Tšhelete yeo ba e hwetšago mošomong woo ga bjale e kgona go ba thuša go hlokomela dinyakwa tša bona tša letšatši le letšatši.

Dustin le Jassa ba ikwa bjang ka bophelo bja bona bjo bofsa? Ba re: “Go hudugela ga rena mo ke selo se sekaonekaone seo se kilego sa re diragalela. Tswalano ya rena le Jehofa gotee le ya rena ka noši e matlafetše go feta kamoo re bego re nagana gore e ka matlafala ka gona. Letšatši le lengwe le le lengwe re dira dilo tše ntši re le gotee—re ya bodireding bja tšhemo, re ahlaahla kamoo re ka thušago barutwana ba rena ba Beibele le go lokišetša diboka. Le gona, ga re sa gateletšwa ke dilo tšeo di bego di re gatelela nakong e fetilego.” Ba oketša ka gore: “Ga bjale re kwešiša gabotse seo re bego re sa se kwešiše peleng, e lego therešo ya kholofetšo e hwetšwago go Psalme 34:8 e rego: ‘Latswang le be le boneng gore Jehofa o lokile.’”

KE ENG SEO SE ŠUŠUMETŠAGO BAITHAOPI BA BA DIKETEKETE?

Bana babo rena le dikgaetšedi ba ka godimo ga 2 900—ba lego lenyalong le ba sego lenyalong, bao bontši bja bona ba lego nywageng ya bo-20 le ya bo-30—ba hudugetše ditikologong tša Mexico moo go sa dutšego go nyakega bagoeledi ba bantši ba Mmušo. Ke ka baka la’ng Dihlatse tše ka moka di ile tša kgetha modiro wo o nago le ditlhohlo? Ge sehlopha sa bona se be se botšišwa potšišo  yeo, se ile sa nea mabaka a mararo a motheo. Mabaka ao ke afe?

Leticia le Hermilo

Go bontšha gore ba rata Jehofa le batho. Leticia o kolobeditšwe a na le nywaga e 18. O re: “Ge ke be ke neela bophelo bja ka go Jehofa, ke ile ka kwešiša gore seo se bolela gore ke mo hlankele ka pelo ya ka ka moka le ka moya wa ka ka moka. Ka gona e le gore ke bontšhe gore ke rata Jehofa ka pelo ya ka ka moka, ke ile ka rata gore ke diriše nako ya ka le matla a ka tirelong ya gagwe.” (Mar. 12:30) Hermilo, yoo ga bjale a nyalanego le Leticia, o be a le mathomong a nywaga ya bo-20 ge a be a huduga go yo hlankela moo go nyakegago bagoeledi ba oketšegilego ba Mmušo. O re: “Ke ile ka lemoga gore go thuša batho gore ba kwešiše ditaba tša moya e tla ba tsela e kaone kudu ya go bontšha gore ke rata moagišani.” (Mar. 12:31) Ka gona o ile a tloga toropong e atlegilego ya Monterrey moo a bego a šoma pankeng e bile a phela bophelo bja manobonobo, a hudugela torotswaneng e nngwe.

Essly

Go ba le lethabo la kgonthe le leo le swarelelago. Nakwana ka morago ga gore Leticia a kolobetšwe, o ile a sepela le kgaetšedi yo a bego a na le phihlelo wa mmulamadibogo ba ya torotswaneng e nngwe yeo e bego e le lekatana, gomme ba fetša kgwedi ba dira boboledi moo. Leticia o gopola gore: “Ke ile ka šala ke ahlame. Ke ile ka thabišwa kudu ke go bona ka tsela yeo batho ba moo ba bego ba arabela gabotse ka yona molaetšeng woo re bego re ba botša wona wa Mmušo. Mafelelong a kgwedi yeo, ke ile ka ipotša gore: ‘Se ke sona seo ke nyakago go se dira ka bophelo bja ka!’” Ka mo go swanago, Essly, e lego kgaetšedi yo a sa nyalwago yo a lego mathomong a nywaga ya bo-20, o ile a gogelwa ke lethabo leo a bego a le bona go batho bao ba bego ba le tirelong ya mohuta wo. Ge a be a sa le sekolong se se phagamego, o ile a kopana le Dihlatse tše mmalwa tše fišegago tšeo di bego di hlankela moo go tlogago go nyakega bagoeledi ba oketšegilego. O re: “Ge ke be ke bona difahlego tše di thabilego tša bana bao babo rena le dikgaetšedi, ke ile ka nyaka gore le nna ke phele ka tsela e swanago.” Dikgaetšedi tše dintši di ile tša arabela ka tsela yeo Essly a arabetšego ka yona. Ge e le gabotse, kua Mexico go na le dikgaetšedi tšeo di sa nyalwago tša ka godimo ga 680 tšeo di hlankelago moo go nyakegago bagoeledi ba oketšegilego. Ruri woo ke mohlala o mobotse wo ba o beetšego ba bagolo le ba banyenyane!

Go phela bophelo bjo bo nago le morero le bjo bo kgotsofatšago. Ka morago ga go aloga sekolong se se phagamego, Essly o ile a newa sebaka sa go ithuta yunibesithing. Dithaka tša gagwe di ile tša mo kgothaletša gore a diriše sebaka seo gomme a phegelele seo go thwego ke bophelo bjo bo tlwaelegilego—go ba le degree, go hwetša mošomo, go ba le koloi gotee le go ipshina ka go tšea maeto. Lega go le bjalo, ga se a ka a latela keletšo ya bona. Essly o re: “Bagwera ba ka ba mmalwa ba Bakriste ba ile ba phegelela dilo tšeo, gomme ke ile ka lemoga gore dipakane tša moya e be e se sa hlwa e le dilo tša bohlokwa go bona. Le gona ke ile ka lemoga gore ba be ba ferekanywa ke mathata ao ba lebeletšanego le ona ge ba dutše ba katanela go hwetša dilo tše oketšegilego gomme ba  tsenelela ditabeng tša lefase le. Ke be ke nyaka go diriša bofsa bja ka gore ke hlankele Jehofa ka botlalo.”

Racquel le Phillip

Essly o ile a ithutela dithuto tša tlaleletšo tšeo di bego di tla mo thuša go hwetša mošomo wa gore a iphediše ge a dutše a bula madibogo, ke moka a hudugela lefelong leo go nyakegago bagoeledi ba oketšegilego ba Mmušo. O ile a ba a lebeletšana le tlhohlo ya go ithuta maleme a moo a setlogo, e lego Seotomi le Setlapaneko. Ga bjale, ge a gadima morago nywageng e meraro yeo a e feditšego a dira boboledi ditikologong tša lekatana, o re: “Go hlankela moo go nyakegago bagoeledi ba oketšegilego go tlišitše kgotsofalo le morero wa kgonthe bophelong bja ka. Go feta moo, go matlafaditše tswalano ya ka le Jehofa.” Phillip le Racquel, e lego banyalani ba lego mathomong a nywaga ya-30 bao ba tšwago United States, ba dumela seo. Ba re: “Lefase le fetoga ka lebelo moo batho ba bantši ba ikwago eka maphelo a bona ga se a tsepama. Eupša go hlankela moo re sa dutšego re hwetša batho ba bantši bao ba theetšago molaetša wa Beibele go dira gore maphelo a rena a be le morero. Ruri go tloga go kgotsofatša!”

KAMOO O KA SWARAGANAGO LE DITLHOHLO

Verónica

Ke therešo gore go hlankela moo go nyakegago bagoeledi ba oketšegilego ba Mmušo go na le ditlhohlo tša gona. E nngwe ya ditlhohlo tšeo ke go itlhokomela ka ditšhelete. E le gore o dire seo, o swanetše go ikemišetša go dumelelana le maemo a lefelong leo o hlankelago go lona. Verónica, e lego mmulamadibogo yo mongwe yo a nago le phihlelo, o hlalosa gore: “Lefelong le lengwe leo ke bego ke hlankela go lona, ke be ke rekiša dijo tša go apeelwa ruri. Lefelong le lengwe ke be ke rekiša diaparo le go kota moriri. Ga bjale ke hlwekiša ntlo le go swara diklase tša bao e sa tšwago go ba batswadi, ke ba ruta go boledišana le bana ba bona.”

Go itlwaelanya le setšo se sengwe le mekgwa e fapanego ya bophelo e ka ba tlhohlo e kgolo, kudukudu ge o dula le batho ba setlogo sa moo bao ba dulago magaeng. Se ke sona seo se diragaletšego Phillip le Racquel ge ba be ba hlankela tšhemong yeo go bolelwago leleme la Senahuatl. Phillip o re: “Setšo sa bona se be se tloga se fapana kudu le sa rena.” Ke eng seo se ba thušitšego gore ba itumelelanye le maemo? O re:“Re ile ra šetša kudu dilo tše dibotse tšeo re bego re di bona go batho bao ba bolelago Senahuatl—go ratana ga malapa a bona, potego yeo ba e bontšhago ditirišanong tša bona le tsela yeo ba neago ka seatla se bulegilego.” Racquel o oketša ka gore: “Re ithutile mo gontši ka go dula moo gotee le go hlankela le bana babo rena le dikgaetšedi ba tikologong yeo.”

KAMOO O KA ITOKIŠETŠAGO KA GONA

Ge e ba o rata go hlankela mafelong a lekatana moo go nyakegago thušo, ke eng seo o ka se dirago gona bjale gore o itokišetše seo? Bana babo rena le dikgaetšedi bao ba nago le phihlelo mohuteng wo wa tirelo ba re: Pele ga ge o ka huduga, thoma ka go nolofatša tsela ya gago ya bophelo gomme o ithute go kgotsofalela seo o nago le sona. (Bafil. 4:11, 12) O ka dira’ng gape? Leticia o laodiša gore: “Ke ile ka phema mehuta ka moka ya mešomo ya boiphedišo yeo e nyakago gore ke itlame go dula lefelong letee nako e telele. Ke be ke nyaka go huduga nako le ge e le efe yeo ke e ratago.” Hermilo o re: “Ke ile ka ithuta go apea, go hlatswa diaparo le go di šidolla.” Verónica o laodiša gore: “Ge ke be ke sa dula gae le batswadi ba ka le bana bešo, ke ile ka thuša ka go hlwekiša le go ithuta go apea dijo tše di sa jego tšhelete e ntši eupša e le tše nago le phepo. Le gona ke ile ka ithuta go seketša.”

Amelia le Levi

Levi le Amelia bao ba tšwago United States e bile ba feditše nywaga e seswai ba nyalane ba laodiša kamoo dithapelo tše di lebanyago di ba thušitšego go itokišeletša go hlankela kua Mexico. Levi o re: “Re ile ra nyakišiša gore go nyakega bokae go hlankela nageng e šele ka tekanyo ya ngwaga gomme ra kgopela Jehofa ka thapelo go re thuša go hwetša yona tšhelete yeo e nyakegago.” Ka morago ga dikgwedi tše sego kae, ba ile ba kgona go boloka tšhelete yeo e nyakegago yeo ba boletšego ka yona thapelong ya bona, gomme ba ile ba huduga ntle le go dikadika. Levi o re: “Jehofa o be a arabile kgopelo ya rena e lebanyago, ka gona e be e le nako ya gore re phethe karolo ya rena.” Amelia o oketša ka gore: “Re be re nagana gore re ka dula ngwaga feela, eupša ga bjale re šetše re feditše nywaga e šupago e bile ga re nyake go boela morago! Go dula ga rena mo go re dumelela go bona ka noši thušo ya Jehofa. Re bona bohlatse bja go loka ga gagwe letšatši le letšatši.”

Adam le Jennifer

Thapelo e kgathile tema e kgolo go Adam le Jennifer, e lego banyalani ba tšwago kua United States bao ba hlankelago tšhemong yeo go bolelwago Seisemane kua Mexico. Ba šišinya gore: “O se ke wa letela maemo a kaonekaone. Dula o rapelela kganyogo ya gago ya go hlankela nageng e šele ke moka o naganišiše ka yona, gomme o dire dilo ka go dumelelana le dithapelo tša gago. Nolofatša bophelo bja gago, ngwalela ofisi ya lekala ya naga yeo o nyakago go hlankela go yona, gomme ka morago ga go bala ditshenyagalelo tša gago, huduga!” * Ge e ba o dira seo, o tla ba o letetšwe ke bophelo bjo bo humilego moyeng le bjo bo kgahlišago.

^ ser. 21 Bakeng sa tsebišo e oketšegilego, bona sehlogo se se rego: “Na o ka ‘Tshelela Matsedonia’?” tokollong ya August 2011 ya Tirelo ya Rena ya Mmušo.

Ithute ka mo go oketšegilego

Babulamadibogo ba na le Dikolo Dife?

Bao ba fetšago nako e ntši ba le modirong wa go bolela ka Mmušo wa Modimo ba diretšwe dikolo dife tše di kgethegilego?